Kusintii Andunya 22
22
Ilaaɔ̃ wa cã idɔi Aburahamu
1Si anyii mii ŋau ihɛ̃ fei Ilaaɔ̃ wa cã idɔi Aburahamu í ni, Aburahamu. Nɔ Aburahamu í ni, amu wee.
2Ŋɔi Ilaaɔ̃ í ni, so Izaaki ama akãɛ, iyi ì bi jiida, i bɔòɛ ilɛi Mɔriya i koo i ceò kuwee iyi à ya jo si ina fei sãa sãa si antaii iri kuta gɔ bii an nyisiɛ.
3Iju kumáɛ ŋɔi Aburahamu í dede daadaakɔ í dĩ gaayii gbankɛlɛɛ nɔ í gbã woo ce icɛ minjiɛ gɔ ŋa do Izaaki amaɛu ajɔ nɔ í so jĩi ndii kuweeu í dasi kpãa wa bɔ bii Ilaaɔ̃ í sɔ̃ɔu. 4Si ajɔ mɛɛtasia ŋɔi Aburahamu í wu iju lele nɔ í hɔ̃nnɛ inyau hai jĩijĩ. 5Ŋɔi í sɔ̃ woo ce icɛɛ ŋau í ni, i leekĩ ihɛ̃ ŋa do gbankɛlɛu. Amu do amam aa ka bɔ ikpa ihɔ̃ kaa ce kutɔɔ wa, nɔ ka na ka ba ŋɛ ihɛ̃.
6Ŋɔi Aburahamu í so jĩi ndii kuweeu í kãa Izaaki amaɛu. Nŋu takaɛ í so kasɛ do ina wa mu nɔ à waa nɛ aŋa minji nŋa. 7Ŋɔi Izaaki í bee Aburahamu baaɛ í ni, baaba.
Ŋɔi Aburahamu í jɛ í ni, bɛirei í ce.
Ŋɔi Izaaki í ni, ina do jĩi wee. Iwoi angudãi kuweeu í wa.
8Ŋɔi Aburahamu í jɛaa í ni, amam, Ilaaɔ̃i á baa araɛ angudãi kuweeu. Nɔ aŋa minjiu à waa nɛ nŋa.
9Iyi à to bii Ilaaɔ̃ í fãau ŋɔi Aburahamu í ma bi kuwee í tɛsi jĩi. Nɔ í dĩ Izaaki amaɛu í lesi antaii jĩi ndii kuweeu, 10í bɛi í so kasɛ í yɔ awɔ ku saka Izaaki amaɛu. 11Ŋɔi amalekai Aɔ̃ Lafɛ̃ɛ í kpoo wa hai lele í ni, Aburahamu, Aburahamu.
Ŋɔi Aburahamu í ni, amu wee.
12Ŋɔi amalekau í ni, maà lu amau, maà ceaa ngɔgɔ, domi ǹ mà bɛbɛi iyi ì waa jirima Ilaaɔ̃, i kù kɔ̀ɔ ama akãɛu.
13Iyi amalekau í fɔ bɛɛbɛ í tã, ŋɔi Aburahamu í sinda í cɔ anyi ŋɔi í ba wee angudã kombo gɔ ngoɛ í gante si ama jĩi gɔ. Ŋɔi í koo í muu í ceò kuweeu si agbɛi amaɛu. 14Nɔ í sɔ inyau iri í ni, Aɔ̃ Lafɛ̃ɛ í jɔ̀ bukaata í kɔ̃. Ŋɔi í jɔ̀ baa nnyi à ya kpa mɔnda a ni, bukaata á kɔ̃ si iri kutai Aɔ̃ Lafɛ̃ɛ.
15Nɔ amalekai Aɔ̃ Lafɛ̃ɛ í kpe Aburahamu hai lele isɛ gbeejisia 16í ni, Aɔ̃ Lafɛ̃ɛ í fɔ í ni, ǹ gbasi do irii amu takam, si na iyi í jɔ̀ ì jɛsi bɛɛbɛ, i kù kɔ̀ɔm ama akãɛ, 17an weeɛ do ntɔ nɔ n jɔ̀ dimiɛ ku kpɔ bɛi leleaɔ̃ walakɔ bɛi sãai itĩi tenku, nɔ a kãmia mbɛɛ nŋa ŋa má. 18Dimi fei á ba kuwee si andunyau ihɛ̃ na saabui dimiɛ ŋa si na iyi í jɔ̀ ì jirima idem. 19Ŋɔi Aburahamu í sinda wa í naa í ba woo ce icɛɛ ŋau, nɔ à dede à baa Bɛɛseba ide nŋa.
Dimii Nakɔɔ ŋa
20Si anyii mii ŋau bɛ fei ŋɔi à sisia Aburahamu à ni, wee Milika mɔ í bía Nakɔɔ ifɔɛu ama inɛmɔkɔ ŋa. 21Í bí Uzi ama yemmaɛ do Buzi ifɔɛ do Kemuɛli baai Aramu, 22do Kesɛdi do Hazo do Pilidasi do Yidilafu do Betuɛli. 23Betuɛlii í bí Rebeka. Inɛ bɛ ŋai à jɛ ama mɛɛjɔ ŋa iyi Milika í bía Nakɔɔ ifɔi Aburahamu.
24Abo minjisiaɛ iyi à ya kpe Reuma, nŋu mɔi í bí Tebaki do Gahamu do Tahaki do Maaka.
Právě zvoleno:
Kusintii Andunya 22: MKL
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
2021, SIM International et UEEB