Kusintii Andunya 19
19
Dulum dii inɛi Sodomu ŋa
1Alɛu ŋɔi amaleka minji ŋau à to Sodomu. Wee Lɔtu wa buba si andɛ koofai iluu. Iyi í yɛ ŋa ŋɔi í dede í bɔ ku ko nŋa í koo í sɛɛbata si waju nŋa. 2Nɔ í ni, ǹ wa n tɔɔ ŋɛi, iŋɛ lafɛ̃ɛm ŋa, i na i lɔ kpasɛ̃m, amui ǹ jɛ woo ce icɛ nŋɛ, i wiɛ kutɛ nŋɛ ŋa, nɔ i sũ ihɛ̃ ŋa. Ala daadaakɔ nɔ i dede i dasi kpãa nŋɛ.
Ŋɔi à ni, aawo. Si bantumai iluui aa ka sũ.
3Amma Lɔtu í mante ŋa hee à tooɛ à bɔ kpasɛ̃ɛ. Ŋɔi í ce nŋa ijɛi jingau do pɛ̃ɛ hai nɛ levɛ̃ɛ nɔ à jɛ.
4Hee a maa sĩ njoo ŋɔi inɛi inɔ ilu Sodomu ŋa à naa à kaako kpasɛ̃u, hai ama awaasũ ŋa hee ku koo do inɛ ngbo ŋa fei, andi mii iyi í jɛ inɛmɔkɔi ilu bɛ fei de. 5Ŋɔi à kpe Lɔtu à beeɛ à ni, iwoi inɛ ŋau à wa, inɛ ŋa iyi à sɔ kpasɛ̃ɛ alɛiu. Fitaò ŋa wa ka sũò ŋa.
6Ŋɔi Lɔtu í fita í ba ŋa andɛi ileɛ bɛ, ŋɔi í cĩmbo do anyi anyi. 7Ŋɔi í ni, kpaasi ŋa, i suuru ŋa, i maà ce ide laalɔ bɛɛbɛ ŋa. 8Wee ǹ nɛ ama inaabo minji gɔ ŋa iyi a kù mà mɔkɔ titã. I jɔ̀ n fitaò nŋɛ wa nɔ i ce nŋa bɛi í sĩa nŋɛ. Amma inɛ ŋau ihɛ̃, i jɔ̀ɔm ŋa domi inɛ njoom ŋai.
9Ŋɔi à ni, awɔ mɔ inɛ njoo nɔ ì waa bi i kiiti wa? Fa araɛ hai bɛ. Bii ì kɔ̀ mɔ, mii iyi aa ka nyisiɛ á re tu ŋa. Ŋɔi à tale Lɔtu do gbugbã à waa bi a bɛjɛ gambou. 10Ŋɔi inɛ njoo ŋau à yɔ awɔ à fa Lɔtu à dasiɛ inɔ ile à cĩmbo gambou. 11Ŋɔi à dasi inɛ ŋa iyi à wa andɛi ileu fei fɛɛju, hai ama awaasũ ŋa hee ku koo do inɛ ngbo ŋau fei, ŋɔi à dabii à waa baabaa andɛi ileu.
12Ŋɔi inɛ njoo ŋau à bee Lɔtu à ni, yoo ŋai ì nɛ ihɛ̃ má. Mɔkɔi amaɛ ŋa do ama inɛmɔkɔɛ ŋa do ama inaaboɛ ŋa, inɛ ŋa iyi à jɛ titɛɛ fei, gbã ŋa i fitaò ŋa hai ihɛ̃. 13Ce bɛɛbɛ domi aa ka kpa irii iluu ihɛ̃ nsɛi, si na iyi í jɔ̀ Aɔ̃ Lafɛ̃ɛ í yɛ taale nŋa jiida jiida na daa laalɔ nŋa. Na ŋɔi í ce í bɛ wa wa ka naa ka ce nfei iluu.
14Ŋɔi Lɔtu í dede í bɔ bi awaasũ ŋa iyi í mua mudɛ̃ɛɛ ŋa í sɔ̃ ŋa í ni, i dede i fita hai iluu ihɛ̃ ŋa, domi Aɔ̃ Lafɛ̃ɛ wa bi ku kpa irii iluui. Amma awaasũ ŋau à ce ideu atafii.
15Iju kumáɛ daadaakɔu ŋɔi amaleka ŋau à wasi ku mante Lɔtu à ni, dede i gbã aboɛ do ama inaabo minjiɛ ŋa iyi à wa ihɛ̃ ku ba i maà na i ce nfe na daa laalɔi inɛi ilu ŋau ihɛ̃. 16Si bɛi kudedei Lɔtu mɔ kù waa jɛ ńya, ŋɔi amaleka ŋau à mu awɔɛ do ti aboɛ do ama inaabo minjiɛ ŋau, à fa ŋa à bɔò ŋa hee alalai iluu domi Aɔ̃ Lafɛ̃ɛ í ce araare nŋa. 17Iyi à fitaò ŋa à tã, ŋɔi inɛ akã nŋa í ni, saò hundeɛ, maà tii i cɔ anyi, maà leekĩ si bantumai ilɛu bii kãma. Sa i bɔ geete ikpa ihɔ̃ ku ba i maà na i ce nfe.
18Ŋɔi Lɔtu í sɔ̃ɔ í ni, aawo, Lafɛ̃ɛm. 19Wee ì ceem didɔ̃ nɔ ì ce araarem má jiida jiida ku ba n ba faaba. Amma n kaa n yɔkɔ n sa n bɔ hee geeteu bɛ wahalau ku bam nɔ n ce nfe. 20Cɔ ilu keekeu ihɛ̃. Inɛ nŋui í ce amɛɛ, an to ńya ńya. Jɔ̀ n koo n manji bɛ ku ba n ba faaba. I kù yɛ bɛi inɛ nŋu í kere?
21Ŋɔi amalekau í ni, an ceɛ didɔ̃ má. Ilu iyi ì waa fãau bɛ, n kaa n kpa iriɛ. 22Hanya i koo i manji bɛ, domi n kaa n yɔkɔ n ce ngɔgɔ bii kù jɛ ì to bɛ.
Na ide iyi Lɔtu í fɔ si gãmɛi iluui í jɔ̀ à sɔɔ Soaa, waatɔ ilu keeke.
Iri ku kpai Sodomu do Gomɔɔ
23Wee í ko inunu wa fita Lɔtu í bɛi í to Soaau. 24Ŋɔi Aɔ̃ Lafɛ̃ɛ í jɔ̀ fainwita do ina í cuku wa hai lele si ilui Sodomu do Gomɔɔ. 25Aɔ̃ Lafɛ̃ɛ í kpa irii ilu ŋau do bantumaɛ ŋau fei do amanɛ ŋa iyi à wa si ilu ŋau fei, do mii iyi í fita bɛ fei. 26Waati bɛɛbɛ aboi Lɔtuu í sinda wa cɔ anyi, ŋɔi í kpɔò kutai imu.
27Ajɔ nŋu bɛ, Aburahamu takaɛ mɔ í dede daadaakɔu í bɔ bii í tako í leekĩ si wajui Aɔ̃ Lafɛ̃ɛu. 28Iyi í cɔ ikpa Sodomu do Gomɔɔ do ilɛu fei, ŋɔi í ba wee cuai ina í dede bɛi sako iyi í gba ina. 29Waati iyi Ilaaɔ̃ wa bi ku kpa irii ilu ŋau, lasabuɛ í koo si Aburahamu. Na nŋu, í jɔ̀ Lɔtu í sa hai tengi bii í wa wo ku bɛi ku ce nfe nŋa.
Lɔtu do ama inaaboɛ ŋa
30Si anyii nŋu, ŋɔi Lɔtu í na í fita hai Soaa domi wa ce njoi ku buba si iluu. Ŋɔi í koo í wa si inɔ isai antaii iri kuta gɔ nŋu do ama inaabo minjiɛ ŋau ajɔ. 31Ŋɔi ama inɛ ngbou í sɔ̃ ifɔɛ í ni, baa nwa wee í gbo, inɛmɔkɔ gɔ kù nɔ kù wa ihɛ̃ iyi á so wa ku ce abo si bɛi ngu ŋa à waa ce si ilɛ fei. 32Naa wa ka sɔ baa nwau atɛ̃ vɛ̃ɛ ku ba ku sũò wa ku ba dimiɛ ku maà na ku kpa iri. 33Idũu ŋɔi à sɔ baa nŋa atɛ̃ vɛ̃ɛu ŋɔi ama inɛ ngbou í koo í sũ bi baau, amma Lɔtu kù mà waati iyi nŋu í sũ do waati iyi í dede.
34Iju kumáɛ ŋɔi inɛ ngbou í sɔ̃ ifɔɛ í ni, idũ ana ǹ jɔ̀ baa nwa í sũòm. Ka sɔɔ atɛ̃ vɛ̃ɛ má alɛi ku ba awɔ mɔ i koo ku sũòɛ ku ba dimiɛ ku maà kpa iri. 35Ŋɔi à sɔ baa nŋau atɛ̃ vɛ̃ɛu má idũu, nɔ ifɔu mɔ í koo í ba baau ku sũ. Baau kù mà waati iyi amau í na í sũ hee má jɛ waati iyi í dede. 36Bɛɛbɛi ama inaabo minji ŋau à soò asĩi baa nŋa. 37Ŋɔi ama inɛ ngbou í bí ama inɛmɔkɔ nɔ í sɔɔ Moabu. Nŋui í jɛ balai dimii Moabu ŋa iyi à wɛɛ baa nsɛi. 38Ifɔu mɔ í bí ama inɛmɔkɔ nɔ í sɔɔ Benami. Nŋui í jɛ balai dimii Amɔɔ ŋa iyi à wɛɛ baa nsɛi.
Právě zvoleno:
Kusintii Andunya 19: MKL
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
2021, SIM International et UEEB