Kusintii Andunya 11
11
Ile iyi à ma Babɛli do kukpɛkɛ nkpɔ nkpɔ
1Tako wo fee akãi inɛ ŋa à waa fɔ si andunya fei. 2Ŋɔi inɛ ŋau à dede à waa nɛ hai nunui daakɔu nɔ à yɛ bantumai ilɛ gɔ si ilɛi Sineaa ŋɔi à ce ide bɛ. 3-4Ŋɔi à ni, to, i jɔ̀ ka ma ilu. Si iluu ka ma ile kukpɛkɛ iyi kugbokaɛ á to hee lelei Aɔ̃ ku ba ka nya iri nɔ ka maà fangaa si andunya bii fei. Nɔ à ni má, ka bu biiki ŋa ka sɔ̃ ŋa si ina a gbɛ. Nɔ à coo. Nɔ biiki ŋaui à baa à jɛ kuta nŋa ŋa, kɔntaa mɔ í jɛ simaa nŋa.
5Ŋɔi Aɔ̃ Lafɛ̃ɛ í kita wa í naa í cɔ iluu do ile kukpɛkɛ iyi amanɛ ŋau à waa ma. 6Ŋɔi í ni, wee aŋa dimi akã ŋai nɔ fee akãi à waa fɔ má nɔ à lasabu aŋa a ce mii nɔu ihɛ̃. Hai nsɛi nkãma kaa ganji ŋa a ce mii iyi à waa lasabu fei. 7I jɔ̀ ka kita kaa fɔtɔtɔi fee nŋau ku ba a maà ya gbɔ fee njɛ má. 8Ŋɔi Aɔ̃ Lafɛ̃ɛ í fangaa ŋa hai bɛ à bɔ hee jĩijĩ à fangaa si andunya fei nɔ à jɔ̀ iluu ku ma. 9Ŋɔi í jɔ̀ à waa kpe iluu Babɛli domi bɛi Aɔ̃ Lafɛ̃ɛ í fɔtɔtɔi feei inɛ fei. Hai bɛ mɔi Aɔ̃ Lafɛ̃ɛ í fangaa ŋa si andunyau fei.
Dimii amai Sɛmu ŋa
10Dimii amai Sɛmu ŋa wee. Si anyii inyi nlau, adɔ̃ minjii í lɔ, Sɛmu í bɛi í bí Aapakisadi. Waati bɛɛbɛ í nɛ adɔ̃ cĩɔ (100). 11Si anyii kubíi Aapakisadi nɔ Sɛmu í ce adɔ̃ cĩɔ miiu (500) má nɔ í bí ama inɛmɔkɔ do ama inaabo ŋa má.
12Aapakisadi í nɛ adɔ̃ kuntaa do miiu í bɛi í bi Sela. 13Si anyiɛ nɔ í ce adɔ̃ cĩɔ mɛɛ do mɛɛta (403) má. Nɔ í bí ama inɛmɔkɔ do ama inaabo ŋa má.
14Sela í nɛ adɔ̃ kuntaa í bɛi í bí Ebɛɛ. 15Si anyiɛ nɔ í ce adɔ̃ cĩɔ mɛɛ do mɛɛta (403) má. Nɔ í bí ama inɛmɔkɔ do ama inaabo ŋa má.
16Ebɛɛ í ce adɔ̃ kuntaa do mɛɛ í bɛi í bí Pelɛgi. 17Si anyiɛ nɔ í ce adɔ̃ cĩɔ mɛɛ do kuntaa (430) má. Nɔ í bí ama inɛmɔkɔ do ama inaabo ŋa má.
18Pelɛgi í nɛ adɔ̃ kuntaa í bɛi í bí Rehu. 19Si anyiɛ nɔ í ce adɔ̃ cĩɔ minji do mɛɛsã (209) má. Nɔ í bí ama inɛmɔkɔ do ama inaabo ŋa má. 20Rehu í nɛ adɔ̃ kuntaa do minji í bɛi í bí Serugu. 21Si anyiɛ nɔ í ce adɔ̃ cĩɔ minji do mɛɛje (207) má. Nɔ í bí ama inɛmɔkɔ do ama inaabo ŋa má.
22Serugu í nɛ adɔ̃ kuntaa í bɛi í bí Nakɔɔ. 23Si anyiɛ nɔ í ce adɔ̃ cĩɔ minji (200) má. Nɔ í bí ama inɛmɔkɔ do ama inaabo ŋa má.
24Nakɔɔ í nɛ adɔ̃ kɔnfia do mɛɛsã, í bɛi í bí Tera. 25Si anyiɛ nɔ í ce adɔ̃ cĩɔ do mɛɛwa do mɛɛsã (119) má. Nɔ í bí ama inɛmɔkɔ do ama inaabo ŋa má.
26Tera í nɛ adɔ̃ kitaò fɛɛwa, í bɛi í bí Aburamu do Nakɔɔ do Harãa.
Dimii amai Tera ŋa
27Dimii amai Tera ŋa wee. Tera nŋui í bí Aburamu do Nakɔɔ do Harãa. Harãa mɔi í bí Lɔtu. 28Harãa nŋu í tako í ku si iluɛ iyi à ya kpe Uu, bii à búu, si ilɛi Kaladee. Waati bɛɛbɛ Tera baaɛ í wɛɛ. 29Ŋɔi Aburamu do Nakɔɔ à so abo. Irii aboi Aburamui í jɛ Sarai, irii aboi Nakɔɔ mɔi Milika. Milikau do Yisika amai Harãa ŋai. 30Sarai í wɛɛi gbɛnda, kù bí ama.
31Tera í so Aburamu amaɛ do tɔkuɛ Lɔtu amai Harãa do Sarai aboi Aburamu. À dede à fita ajɔ hai Uu si ilɛi Kaladee nɔ à dasi kpãa à waa bɔ ilɛi Kanaã. À to hee ilu iyi à ya kpe Harãa nɔ à buba bɛ. 32Tera í ce adɔ̃ cĩɔ minji do miiu (205) nɔ í ku Harãa bɛ.
Právě zvoleno:
Kusintii Andunya 11: MKL
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
2021, SIM International et UEEB