METIU 2
2
Leimik Kapat lamto kati kangoumei
1Herot Sagong mah tinglang kak Judiya kito kalei Bethlehem kito Jisugo lung kaleitai, 2“Julo, leimik kapat lamto Sageiti mah kati ka- ngoumeinii Jehudimei mah Sagong mah Sagong manaa kabam tei kadaki leiposii Jerosalemki gong takle. Kadapokii nyiinii leimik kapat lamto Mpou mah Sageiti tei ngoutakle, sateichii mpougo mata tang karam jangpii nyiinii gongleile.” 3Sagong Herotnii ai shii wosek-kii, mpou ninado Jerosalem kito kalei mei hangnii swi mage takle. 4Mpounii Tingdimei hang go sateichii Ajai- tingshang kati ojameihang go lat ndwisii, “Krista ai kada kito manaa tangposii?” ahnyii dato n-nhiitakle.
5Ahnyiinii mpougo khekalatle, “Judiyaki Bethlehem kitole”; “dapokii Lungkakalingmeinii aitiisii ryiibamle:
6‘He Judiya sazyii kito kalei Bethlehem,
nangnii Judiya mah sagongmeihang kak kito kacheng chengsang makle;
kadapokii gomei Isrelmeigo koipyii tang karam apum katii mei hangninii godato pat tangle.’ ”
7Teito Herotnii kati kangoumei gotei makumpii lat-tosii sageiti tei kadadou patpo katu ahnyii dato n-nhii kamati wotakle. 8Sateichii mpounii ahnyiigo Bethlehem kikii aitiisii tamsii matat aitakle, “Nah gotei tiigatpii fiitulo, sateichii gonyiinii mpougo ngou wosekchii, Iniido gong mpougo mata kabui tiisii gudakii sam pung gongpyiilo.”
9Ahnyiinii Sagong mah kakhat- sam tei shii wosii tat tutakle; sateichii julo, leimik kapat lamto kangou sageiti tei nahnii kalei bam Phyiiryii tei gongsii sat kasutatei ahnyii doi reitakle. 10Sateichii ahnyiinii sageiti tei ngou wosii tampei kalak tiisii ntale. 11Sateichii ahnyiinii teiki kikalung tei tatliitsii nah tei pwi Meri-go kaswisii kalei tei ahnyiinii ngou wotakle sateichii ahnyiinii kok-kumsii mpougo matale. Teito ahnyii mah pyiitang karam pot tei laat tosii, ahnyiinii Mpougo mai- kateeng Sona, keirum kabi sateichii manam kabi Myrrh tei pyiitakle.
12Sateichii Saraanii ahnyiigo Herotda nlaigong sulosii ahnyii mah mang kito mati kapyii taiswisii ahnyiinii pwidi kakilamto ahnyii mah sazyiiki katang tei tat tutakle.
Izip ki pak katu
13Sateichii ahnyiinii tat katutai, Julo, Bangpii mah Sating gamlui hangninanii Joseph mah mang kito humsii tamle, “Gungtusii nah nei Pwigo tei pangsii Izip sazyiiki tat tulo, sateichii Inii tam kasuta bam teiki teito bamlo; kadaponii Herotnii nah aigo tiimaga tang karam jangpii fiigong leziitakle.” 14Teito mpounii gungtusii nah tei nei pwi gotei tinghumkii pangsii Izip sazyiiki tat tutakle. 15Sateichii Abangpiinii Lungkakalingmeigo tam matu katu, “Inii gunah sapfii mpougo Izip kito lat to-takle,” katu ai gong matwi matu tang karam jangpii Herotnii tai kasuta tei teibam kito leile.
Herotnii Bethlehem nahmei hang go kagi
16Teito kati kangoumeinii mpougo achem tiisii kapek wotakle katu tei Herotnii ngou wosek-kii, hangkapii rarhiisii kati kangoumei dato n-nhii kamati wokalu tinglang tei taiswisii Bethlehem ninado teiki baang kito kalei tingkum hangna kashang ninado teikangto kalei nah sapfiimei hang gotei mei langkai- pyiisanii gitoi malei aitakle. 17Teito Lungkakalingpii Jerimaiyanii tam kabam tei gong matwi takle:
18“Teiteinii hungsii hat kalei,
ninado hangkapii magee kalei rok hangninii Ramah kito shiile.
Rachel nii mpoupei mah nahmei jangpii hatle,
mpoupeigo twumpei wolak takle;
kadapochiinii ahnyii tei gatakle.”
Izip kito nlai kagong
19Herotnii tai kaleitai, Julo, Izip kito Bangpii mah Sating gamlui hangninanii Joseph mah mang kito gongsii tamle, 20“Gungtusanii nah nei pwigo pangsii Isrel sazyiiki nlai tulo, kadapochiinii nah mah rangii poitanglesii fiikalei ahnyii tei tai- takle.” 21Sateichii mpounii gungtu wosanii, nah ninado pwi gotei pangsii Isrel sazyiiki gongtakle.
22Nlenii Arkaliyasnii mpoupfii Herot tung tousii Judiyaki sagong magong leitakle katu tei shii wosii, teiki bamki tei gong hing takle. Satei- chii Saraanii mang kito tam kakhat kapyii taiswisii Mpounii Galili sazyii mah bam hangniniiki tat tutakle. 23Sateichii Lungkakalingmeinii tam kabam: “Mpougo Nazaretmei sii lat tanglesii” katam tei gong matwi matutang karam jangpii Nazaretsii kalat namdi kitei mpounii gong lungtu takle.
Právě zvoleno:
METIU 2: NAG2
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Maram Naga, KARANU KABI SAMTAM © Bible Society of India, 2007.
