Genesis 8
8
An Kataposan kan Baha
1Dai nalingawan nin Dios si Noe asin an gabos na hayop na kaibahan niya sa arka; pinahoyop niya an doros asin nagpoon magkulpa an tubig. 2Naserahan na an mga burabod nin tubig sa irarom kan daga asin an mga bintana sa kalangitan. Nag-ontok an pag-uran, 3dangan dikit-dikit na nag-ina an tubig sa laog nin syento singkwentang aldaw. 4Sa ikadyes y syeteng aldaw kan ikapitong bulan, an arka suminadsad sa ibabaw kan kabukidan kan Ararat. 5Nagpadagos sa pag-ibaba an tubig kaya sa enot na aldaw kan ikasampolong bulan, nahiling na an mga alitoktok kan kabukidan.
6Pakalihis nin kwarentang aldaw, binukasan ni Noe an bintana kan arka 7dangan pinalayog an sarong uwak. Dai ini nagbalik kundi palibot-libot na naglayog sagkod na naghubas an tubig. 8Sunod na pinalayog ni Noe an sarong salampati tanganing aramon kun kulpa na an tubig; 9alagad nin huli ta natatahoban pa nin tubig an bilog na daga, mayo ini nin nakuang matogdonan. Nagbalik sa arka an salampati dangan dinakop ni Noe asin ilinaog giraray. 10Pinalihis ni Noe an pito pang aldaw dangan pinalayog niya giraray an salampati. 11Pagkabanggi, nagbalik saiya an salampati na may darang bagong dahon nin oliba sa saiyang tuka. Kaya naaraman ni Noe na kulpa na an tubig. 12Pinalihis ni Noe an pito pang aldaw dangan pinalayog niya giraray an salampati. Dai na ini nagbalik.
13Kan seis syentos unong taon na an edad ni Noe, sa enot na aldaw kan primerong bulan, hubas na an tubig. Hinale ni Noe an tahob kan arka dangan tuminanaw sa palibot, asin nahiling niya na nagpoon nang magmara an daga. 14Kaya sa ikabeynte y syeteng aldaw kan ikaduwang bulan, mamara na an bilog na daga.
15Tinaraman nin Dios si Noe, 16“Magluwas na kamo sa arka; ika, an saimong agom, an saimong mga aking lalaki asin an saindang mga agom. 17Iluwas man nindo an mga gamgam asin mga hayop tanganing magdakul dangan maglakop sinda sa bilog na daga.” 18Kaya nagluwas sa arka si Noe kaiba an saiyang agom, an saindang mga aking lalaki patin an mga agom kaini. 19Dangan grupo-grupong nagruluwas man sa arka an gabos na hayop asin gamgam sosog sa manlaen-laen na klase ninda.
Nag-atang si Noe
20Guminibo si Noe nin altar para sa Kagurangnan; pakatapos kuminua siya nin saro hale sa manlaen-laen na klase kan malinig na hayop asin gamgam dangan tinutong niyang bilog an mga ini sa altar bilang dolot. 21Nawilihan nin Kagurangnan an parong kan dolot asin nagsaboot siya, “Dai ko na nanggad susumpaon an kinaban huli sa gibo nin tawo; aram kong maraot an kaisipan kan tawo poon pagkaniaki niya. Dai ko na nanggad paparaon an gabos na nabubuhay arog kan ginibo ko. 22Sagkod na yaon pa an kinaban, magkakaigwa nin panahon nin pagtanom asin pag-ani, nin lipot asin init, nin tig-init asin tig-uran, nin aldaw asin banggi.”
دیاریکراوەکانی ئێستا:
Genesis 8: MBBBIK92
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Marahay na Bareta Biblia © Philippine Bible Society, 1992.