TƏŊMORFANNE 6
6
Ɓǝɓe' dǝfuu
1Za sǝr tǝŋra baa sǝrri, bemra wee ŋwǝǝ ta.#Joɓ 1:6; 2:1 2So wee Masǝŋ#6:2 Za ki lǝŋra ara ye angeloi kwora wee ŋwǝǝ za sǝr pǝsãh pǝlli, a woora ŋwǝǝ kǝsyil ɓǝǝ kanra. 3So Dǝɓlii faa: Me ka gak soɓ dǝfuu nǝn wo sǝr ga lii ya, mor ara ye dǝfuu, syii kal ɓǝǝ wo sǝr ka kal tǝ syii 120 ya. 4Ɓaaɓe za mawah ah yeara wo sǝrri, so wee Masǝŋ ge kan wee ɓǝǝra, so bemra wee ne ra. Ara ye za maswah matãa mo ne tǝɗii kǝsyil zana.#KeeZ 13:33
5Dǝɓlii kwo faɓe' dǝfuu pǝ'man wo sǝrri, ɓǝ foo zahzyil ɓǝǝ pǝɓea zah'nan daŋ.#Mt 24:37; Lu 17:26; 1 Pe 3:20 6So ɗii marvǝǝ ne ɓǝ joŋ dǝfuu ŋhaa ɓǝ ah ɓeɓ zahzyil ahe. 7Dǝɓlii faa: Me ga vǝr fan ma tǝ sǝr mai me joŋ daŋ: dǝfuu, faɓalle, juu, tǝkine fan ma ker tǝ sǝrri, me foo kǝnah me joŋ ra ka. 8Amma Dǝɓlii ẽe Noa.
Ɓǝ Noa
9Ɓǝ Noa a naiko: Noa sye, ako ye dǝɓ matǝ njaŋ, ka ne ɓǝɓe' kǝsyil zahŋhǝǝtǝ̃ǝ mǝ ah ya, a syee ne Masǝŋ zah'nan daŋ.#2 Pe 2:5 10Noa bem wee sai, a ɗii wee ah ne Sem, Kam tǝkine Yafet. 11Masǝŋ kwo sǝr ɓeɓ ɓo nǝn ah mor faɓe' baa ɓo gŋ pǝlli. 12Ne cok mo ẽeko sǝrri, kwo ɓeɓ ɓo, mor dǝfuu daŋ zyakra fahlii ɓo.
13So Masǝŋ faa nyi Noa: Me ga vǝr dǝfuu ma wo sǝr daŋ, mor sǝr baa ɓo ne faɓe' ɓǝǝ pǝlli. Oho, me ga vǝr ra gin wo sǝr tǝkine fan mai mo no gŋ daŋ. 14Me 'yah mo zyeɓ dah ne kpuu mayak ahe. Ka mo cea ɓǝr ah camcam. So mo rwãh ɓǝr ah ne kǝfal ah ne mǝŋgǝ̃ǝ. 15Mo zyeɓ dah ah naiko: Wah ah mo i jol temere sai, 'ah ah mo i jol jemma dappe, giŋ ah mo i jol jemma sai. 16Mo zyeɓ fan rii tǝtǝl dah ahe, mo joŋ zahtǝwoo kǝsyil suu dah ne tǝtǝl ahe, 'ah ah mo i jol vaŋno. Mo joŋ zahfah kahlaa dah ahe. Mo woŋ giŋ ahe, ka mo zyeɓ yaŋ sǝŋ ɓǝr ah tǝki sai. 17Mor me ga pee bii ge tǝ sǝr ka vǝr fan ma ne cee daŋ. Fan mai mo wo sǝr daŋ a ga wukki, 18amma me ga gbǝ zah ne mo. Mo dan ɓǝr dahe, amo ne wee ɓo, mawin ɓo ne ŋwǝǝ wee ɓo. 19Mo sǝǝ zahban fan ma ne cee mawǝǝ ne maŋwǝǝ daŋ gwa gwa ge pǝ dah ne ra, ka mo lwaara ǝ̃ǝ ne mo. 20Mo syen zahban juu camcam, mo syen zahban nǝǝ ma syee ne ɓal camcam, mo syen zahban fan ma ker tǝ sǝr camcam ta. Kǝsyil fan mai moo ga syen ra camcam mo gera wo ɓo, ka mo byak ra. 21Amo, mo woo zahban farel mai za moo ren daŋ, mo rǝk kah ɓo, mor ka farel ah mo wol mo ne ra daŋ. 22Noa joŋ fan ah daŋ tǝgbana Masǝŋ mo faa nyi ko ka joŋni.#Yahu 11:7
دیاریکراوەکانی ئێستا:
TƏŊMORFANNE 6: MUAR
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Bible Moundang © Alliance Biblique du Tchad, 1996.