TƏŊMORFANNE 2
2
1Masǝŋ joŋ sǝŋ ne sǝr tǝkine fan mo no gŋ daŋ vǝrri. 2Zah'nan rǝŋ ah mo ge dai o, ka joŋ yeɓ ah vǝr ɓe. Tǝ zah'nan rǝŋ ah 'yak ne ko.#Yahu 4:4,10#Pǝ̃ǝ 20:11 3Masǝŋ ẽe zah'nan rǝŋ ahe, joŋ daŋdaŋ, mor ne zah'nan ah Masǝŋ 'yak ne yeɓ mai mo joŋko daŋ. 4Ɓǝ joŋ sǝŋ ne sǝr mo joŋ, a naiko.
'Wah Eden
Ne cok Dǝɓlii Masǝŋ mo joŋ sǝŋ ne sǝrri, 5ka kpuu kǝka wo sǝr a ba, koo fãa vaŋno laŋ ka ɓah ciŋ tǝ sǝr a, mor Masǝŋ ɓah tan bam ge tǝ sǝr a, ne cok ah ka dǝfuu ma pǝǝ sǝr laŋ kǝka ba ta. 6Amma zah'nan daŋ bii pǝ̃ǝ gin mor sǝr ginni, a nǝn mahm tǝ sǝr daŋ.
7So Dǝɓlii Masǝŋ bǝǝ vuu joŋ dǝfuu ne ko, fee tǝ'yak ma ne cee ge fahvõo ah ra, so dǝfuu ciŋ fan ma ne cee.#1 Kor 15:45
8So Dǝɓlii Masǝŋ zyeɓ 'wah pǝ cok Eden nǝfah kǝmorcomzah'nanne, so kan dǝfuu mai mo joŋko gŋ. 9Masǝŋ joŋ kpuu masãh ne ban ah camcam gŋ ka mo lee syẽm masãhe. Joŋ kpuu ma nyi cee kǝsyil 'wah tǝkine kpuu ma cuu ɓǝ sãh ne ɓǝɓe' daŋ.#Caŋ 2:7; 22:2,14
10El malii pǝ̃ǝ ɓo kǝsyil 'wah Eden ka joŋ cok wok gin pǝ 'wah ahe, so jol el ah ɓǝl ɓo camcam nai. 11A ɗii patǝ vaŋno ah ne Pison. Ako ye kiŋ ɓo tǝ sǝr Havila daŋ. 12Vãm kaŋnyeeri masãh ah ne ɓǝrdi ma fuŋ 'nyah ah tǝkine tǝsal mai mo pǝsyem daŋ a gŋ. 13El patǝ gwa ah a ɗii ne Gihon. Ako ye kiŋ ɓo tǝ sǝr Kus. 14Patǝ sai ah a ɗii ne Tigǝr. Ako ye pǝ̃ǝ ɓo tǝ sǝr Asiria nǝfah kǝmorcomzah'nan ahe. Patǝ nai ah el Efrat yo.
15Dǝɓlii Masǝŋ ɓaŋ dǝfuu kan pǝ 'wah Eden ka mo pǝǝko tǝkine byak ahe. 16So lai ko faa: Mo gak ka ren lee kpuu ma kǝsyil 'wah daŋ tǝgbana zahzyil ɓo mo 'yahe. 17Amma mo re lee kpuu ma cuu ɓǝ sãh ne ɓǝɓe' ka. Com mai mo kal re lee ah ɓe, mo ga wǝ 'manna 'manna.
18So Dǝɓlii Masǝŋ faa: Ka dǝwor mo kaa syak ah nai ka pǝsãh ya, me ga joŋ ma gbah jol ah nyi ko ka mo yeako ne ki. 19Dǝɓlii Masǝŋ joŋ nǝǝ cok tǝkine juu daŋ ne vuuri, so woo ge wo dǝɓ ah ne ko ka ẽe ɗah a ga ɗii ra ɗǝne? Ɗii mai dǝɓ ah mo ɗii fan ma ne cee ne daŋ ciŋ tǝɗii ah lii. 20So dǝɓ ah ɗii fan ma syee ne ɓal tǝkine juu daŋ ne tǝɗii. Amma lwaa fan ma gbah jol ah ma jur ne ki kǝsyil ɓǝǝ ya.
21So Dǝɓlii Masǝŋ joŋ dǝɓ ah lee nǝm bǝṽǝk, so nǝǝ zahwoiŋcuu ah vaŋno, so zyǝŋ nǝǝ ge pǝ cok ahe. 22Dǝɓlii Masǝŋ joŋ madǝwin ne zahwoiŋcuu mai mo nǝǝ gin wo dǝworre, so zaŋ ko ge wo dǝwor ne ko. 23Dǝwor faa: Ayee, me lwaa ɓal ɓe ɓe! Woiŋ ah tǝkine nǝǝ ah daŋ ma ɓe yo. Ɗii ah ye madǝwinni, mor nǝǝ ko gin wo dǝworre. 24Mor mai dǝwor ga soɓ pah ah ne mah ahe, a mgbãara ki ne mawin ahe, a ciŋra suu vaŋno.#Mt 19:5; Mk 10:7-8; 1 Kor 6:16; Ef 5:31
25Dǝwor ne madǝwin gwa daŋ yeara ne suu kolle, swãa ka ren ra ya ta.
دیاریکراوەکانی ئێستا:
TƏŊMORFANNE 2: MUAR
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Bible Moundang © Alliance Biblique du Tchad, 1996.