Marik 15
15
Jesus mi nga avok Pilat
(Gol Mat 27.1-2,11-14; Luc 23.1-5; Jn 18.28-38)
1Ki yorogo tcholola, nglo suma ngat buzuna azi ki suma nglona ki suma hat gata ki suma b’ak zlad’a ki zlazi pet a ndjak vunazi tu. Azi djin Jesus, a im a hum abo Pilat. 2Pilat mi djobom ala: Angî amulâ hi Juif-fîna zu?
Jesus mi hulong dum ala: Ang de wa da’.
3Nglo suma ngat buzuna a tchugum zlad’a kam ngola. 4Pilat mi hulong djobom kua ala: Ang nga de mang ngi? Ang we nga zla d’a tchotcho d’a a nga tchugungzi kang wanda d’uo zu? 5Wani Jesus mi dok dum zla d’uo d’a, gak Pilat mi le atchap.
A ka sariya d’a matna yam Jesus
(Gol Mat 27.15-26; Luc 23.13-25; Jn 18.39—19.16)
6Kur bur ma vun til ma Pak ma lara pî, sama dangei ma suma a tchen Pilat kama, nga mi gazizi akulo. 7Wani sana mi nga kur dangeina a yum ala Barabas, zlapa ki ndrom suma bei hum vun suma te yambina, kayam a tchi matna kur huneî mazid’a. 8Ablau suma a i gen Pilat, a nde tchenem ala mi lazi d’igi nga mi lazi adjeu dei na.
9Pilat mi hulong dazi ala: Agi minigi ala an gagi namulâ hi Juif-fîna akulo zu? 10Kayam mi we tcha ala nglo suma ngat buzuna a le ni yungôra ba, a hum ki Jesus wana.
11Wani nglo suma ngat buzuna a nde le hozugona mablau suma ala mi gazi ni Barabas akulo d’ö. 12Pilat mi hulong dazi kua ala: Agi min ala an le ni nana ki ma agi nga yum ala Amulâ hi Juif-fâ na ge?
13A hulong a er ad’uzi akulo kua ala: B’alam akulo ata aguna!
14Pilat mi dazi ala: Mi le ni tcho me ge?
Wani a er ad’uzi akulo kua ala: B’alam akulo ata aguna!
15Kayam Pilat mi min á b’leng hur ablau suma, mi gazi Barabas akulo. Mi to Jesus ki blafâ, mi hazizi ala a b’alam akulo ata aguna.
Azigarâ a nga las Jesus
(Gol Mat 27.27-31; Jn 19.2-3)
16Azigarâ a i ki Jesus hur azina krovo, nala, hur azina hi ma te yambina, a yi ndrozi azigarâ ki zlazi pet gevezi mi. 17A tchugum baru d’a hleud’a atamu, a tchil avaval aweid’a, a kulubumzi kamu. 18A nde gum depa ala: Lafiya, amulâ hi Juif-fîna. 19Azi nde tumum yam ki totogod’a, a tuvom ayôna iramu, a grif kä avoromu, a kud’urom mi. 20Kid’a azi luwum dad’a, a fogom baru d’a hleud’a woi atamu, a tchugum baru mama atamu, a im woi kel á b’alam akulo ata aguna.
A b’al Jesus akulo ata aguna
(Gol Mat 27.32-44; Luc 23.26-43; Jn 19.17-27)
21Sama Siren-na simiyêm ala Simon, ni Alezandre azi ki Rufus abuziya, mi tcholï nabageya, nga mi kala. Azigarâ a vum kad’enga ala mi hlagu ma b’ala hi Jesus-na kamu. 22A im ata yima a yum ala Golgota na, nala, Yima asok yamba. 23Azi hum süm guguzlud’a gizeîd’a ki mir ala mi tche, wani mi vum mbi. 24A b’alam akulo ata aguna, a b’rau baru mamba abo taziya, a tum gumara kad’u. 25Kid’a afata mba mid’ei ma de zlad’id’a, a b’alam akulo ata aguna.
26Zla d’a a tchugumzi kamba, a b’irit akulo kam ala: Namulâ hi Juif-fîna. 27A b’al suma kula mbà ki sed’emu, tu ata bigam mba ndjufa, tu ata bigam mba gulad’a mi. [28A le hina á ndak ki vun zla d’a a b’irit kur mbaktumba hAlonid’a ala: A ndumum ki suma tchila yam gata na.]
29Suma a nga kalâ a nga ngulumu, a nga kidjik yazi ala: Ahâ! Ang ma dala ang to gong nga kud’ora hAlonid’a kä ang mba minit akulo kur bur ma hindina na, 30ang sut tangû, ang tchugï aseng kä woi ata agu ma b’ala.
31Hina mi, nglo suma ngat buzuna azi ki suma hat gata, a nga luwum aduk tazi ala: Mi sut suma dingâ, wani mi ndak nga á sut tam mbi. 32A dala: Ar Mesi, amulâ hi Israel-lîna, mi tchugï asem ka tchetchem ata agu ma b’ala, kayam ei weya, ei hei gagazid’a kamu.
Suma b’alazi ki sed’ema a ngulum mi.
Matna hi Jesus-na
(Gol Mat 27.45-56; Luc 23.44-49; Jn 19.28-30)
33Kid’a afata tchol falei d’ad’ara, yina mbut nduvunda yam andaga ndata pet gak afata tchuk siyad’u. 34Kid’a afata tchuk siyata, Jesus mi er ad’um akulo ki delem mba ngola ala: Eloi, Eloi, lama sabaktani? Nala, Alo mana, Alo mana, ni kayam me ba, ang aran ndei ge?
35Suma ding suma a nga tchola ata yi mámina, a huma, a dala: Gola! Nga mi yi Elie.
36Ma dingâ adigazi mi ringâ, mi oî eposâ ki süm guguzlu d’a azleîd’a, mi nigim avun heleud’a, mi humzi á tched’a. Mi dala: Ar djang! Le Elie mi mba ini á pad’am kä ni, ei weya. 37Wani Jesus mi er ad’um akulo ki delem mba ngola tua ba mi duk vunamu.
38Baru d’a ka ir ra kur gong nga kud’ora hAlonid’id’a ti haû woi aduk mbà tcholï akulo dei gak ti tchuk kä. 39Ma ngol ma azigarâ abom kis ma Romê-na ni ma nga tchola avok Jesus d’arâ. Kid’a mi wum mi duk vunamba, mi dala: Gagazi, sa máma nAlona Goroma.
40Arop suma dingâ a nga tchola woi hina dei á gola. Adigazi ni Marie d’a Makdala-d’a azi ki Marie d’a Jacques ma gorâ ki Jose asuzid’a ki Salome mi. 41Ni suma a nga tit ad’um á lum sunda kid’a mi nga kur Galile-na. Arop suma dingâ ablaud’a a nga kua, ni suma a i ki sed’em adjeu kur Jerusalem-ma mi.
Tosa hi Jesus-d’a
(Gol Mat 27.57-61; Luc 23.50-56; Jn 19.38-42)
42Kid’a afata ti mbut fladeged’a, ni bur ma min ahlena, nala, avin ni bur ma sabatna, 43Josef ma Arimate-na mi mba. Ni ma suma yorom zlam aduk suma b’ak zlad’a heîna, ni ma nga mi djup mbad’a hAlona d’a á te leu mamba yam andagad’id’a mi. Mi ve tam ad’enga, mi kal gen Pilat á djobom yam mad’a Jesus. 44Wani kid’a Pilat mi hum ala Jesus mi mit wa dad’a, mi le atchap. Mi yï ma ngol ma azigarâ abom kis ma Romê-na, mi djobom ala Jesus mi mit nadjï deyu ni, ni gagazi zu? 45Kid’a ma ngol ma azigarâ abom kisâ mi dum ala mi mit wa dad’a, mi ar Josef mi i hlum mad’amu.
46Josef mi i gus baktana, mi i pad’ï Jesus mad’am kä ata agu ma b’ala, mi d’ud’um ki sed’emu. Mi gum kur zul la a tchot aduk ahinad’id’a, mi ligat ahinad’a, mi duguttchi avunad’u. 47Marie d’a Makdala-d’a azi ki Marie d’a Jose asumba a we yima a gum kuana.
دیاریکراوەکانی ئێستا:
Marik 15: BA
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Azumeina Bible © Alliance Biblique du Tchad, 1999.