ማቶሳ 2
2
ዶሎሃፔ ዪዳ ኣሳታ
1ካዉዋ ሄሮዲሳ ዎዴን ዬሱሲ ዪሁዳ ቢታን ቤቴሌሜ ካታማን ዬሌቲዳይሳፌ ጉዬ ፆሊንቶ ታይቢያ ኣሳቲ ዶሎሃፔ ዬሩሳላሜ ዪዲ፥ 2«ዬሌቲዳ ኣይሁዴ ካዎይ ኣዉን ዴዒ? ኑኒ ዶሎሃ ባጋራ ኬዪዳ ኢያ ፆሊንቱዋ ቤዒዲ ኢያው ጎይናናው ዪዳ» ያጊዲ ኦይቺዶሶና። 3ካዎይ ሄሮዲሲ ሄሳ ሲዒዳ ዎዴ ዳጋሚስ። ዬሩሳላሜን ዴዒያ ኣሳይ ኡባይካ ዳጋሚዶሶና። 4ሄሮዲሲ ካሂኔ ሃላቃታኔ ሂጌ ኣስታማሬታ ባኮ ፄጊዲ፥ «ኪሪስቶሲ ኣዉን ዬሌታንዴሻ?» ያጊዲ ኤንታ ኦይቺስ።
5ኤንቲካ፥ «ዪሁዳ ቤቴሌሜና፤ ናቤይ፥
6‹ዪሁዳን ዴዒያ ቤቴሌሜ፥#ሚክ 5፡2
ዪሁዳን ዴዒያ ጎባ ካታማታፔ፥
ኔኒ ኣይቢንካ ጉፃካ።
ታ ዴሪያ ኢስራዔሌ ኣይሳናይሲ፥
ኔፔ ኬያና› ጊዲ ፃፊስ»
ያጊዶሶና።
7ሄሳፌ ጉዬ፥ ሄሮዲሲ ዶሎሃፔ ዪዳ ኣሳታ ጌማን ፄጊዲ፥ ፆሊንቱዋ ኤንቲ ቤዒዳ ዎዲያ ኤንታፌ ጌሺዲ ኤሪስ። 8ኢ ኤንታና ቤቴሌሜ ዬዲሼ፥ «ቢዲ ዬሌቲዳ ናዓ ሚንዲ ኮዪቴ፤ ኢያ ሂንቴ ዴሚዳ ዎዴ ታካ ባዳ ኢያው ጎይናና ሜላ ሲሚዲ ዪሼ ታው ኦዲቴ» ያጊስ። 9ኤንቲካ ካዎይ ሄሮዲሲ ጊዳይሳ ሲዒዲ ቢዶሶና። ኤንቲ ዶሎሃ ባጋራ ቤዒዳ ፆሊንቶይ ኤንታና ካሌሼ ናዓይ ዴዒያሱዋ ጋካናው ኤፊስ። 10ኤንቲ ሄ ፆሊንቱዋ ቤዒዳ ዎዴ ጊታ ኡፋይሲ ኡፋይቲዶሶና። 11ሶ ጌሊዲ ናዓ ባ ኣዬ ማይራሚራ ዴዔይሳ ቤዒዶሶና። ኢያው ጉልባቲዲ ጎይኒዶሶና። ባንታ ሳፂኒያ ዶዪዲ ዎርቃ፥ ኢፃኔኔ ካርቤ ኢያው ኢሚዶሶና። 12ኤንቲ ሄሮዲሳኮ ጉዬ ሲሞና ሜላ ፆሳይ ኣሙሆን ኤንታው ኦዲን፥ ሃራ ኦጌራ ባንታ ቢታ ሲሚዶሶና።
ጊብፄ ባቃቱዋ
13ዶሎሃ ባጋፌ ዪዳ ኣሳቲ ቢዳፔ ጉዬ፥ ጎዳ ኪታንቾይ ዮሴፋስ ኣሙሆን ቆንጪዲ፥ «ሄሮዲሲ ናዓ ዎናው ኮያ ጊሾ ዴንዳ፤ ኤሌሳዳ ናዓኔ ናዓ ኣዪው ኤካዳ ጊብፄ ቢታ ባ። ኔ ሲማና ዎዲያ ታ ኔው ኦዳና ጋካናው ያን ጋምዓ» ያጊስ።
14ሄሳ ጊሾ፥ ዮሴፊ ሄ ቃማን ዴንዲዲ፥ ናዓኔ ናዓ ኣዪው ኤኪዲ ጊብፄ ቢስ። 15ናቢያ ዶናን ፆሳይ፥ «ታኒ፥ ታ ናዓ፥ ጊብፄ ቢታፌ ፄጋስ»#ሆሴ 11፡1 ጌቴቲዳ ቃላይ ፖሌታና ሜላ ሄሮዲሲ ሃይቃና ጋካናው ኢ ያን ዴዒስ።
16ሄሳፌ ጉዬ፥ ዶሎሃ ባጋፌ ዪዳ ኣሳቲ ኢያ ጪሚዳይሳ ኤሪዳ ዎዴ ዳሮ ዪሎቲስ። ኢ ካሴ ኤንታፌ ሲዒዳይሳዳ ቤቴሌሜኒኔ ሄ ሄራን ዴዒያ ናምዑ ላይ ኩሚዳይሳታኔ ናምዑ ላይፌ ጋርሳን ዴዒያ ኣዴ ናይታ ኡባ ባ ዎታዳሬታ ዬዲዲ ዎሲስ።
17-18ናቢያ ኤርሚያሳ ዶናን፥
«ዬሆይኔ ዜሌልሲ፥
ራማ ካታማን ሲዔቲስ።
ራሄላ ባ ናይታስ ዬካዉሱ፤
ኤንቲ ሃይቂዳ ጊሾ
ሚኔታናው ዳንዳዓቡኩ»
ጊዲ ኦዲዳይሲ ፖሌቲስ።#ኤር 31፡15
ናዚሬቴ ሲሙዋ
19ሄሮዲሲ ሃይቂዳፔ ጉዬ ጊብፄን ጎዳ ኪታንቾይ ዮሴፋስ ኣሙሆን ቆንጪዲ፥ 20«ናዓ ዎናው ኮያ ኣሳቲ ሃይቂዳ ጊሾ ዴንዳዳ ናዓኔ ናዓ ኣዪው ኤካዳ ኢስራዔሌ ቢታ ሲማ» ያጊስ።
21ዮሴፊ ዴንዲዲ ናዓኔ ናዓ ኣዪው ኤኪዲ ኢስራዔሌ ቢታ ሲሚስ። 22ሺን ኣርኬሊዮሲ ዪሁዳን ባ ኣዋ ሄሮዲሳ ቤሳን ካዎቲዳይሳ ሲዒዳ ዎዴ ያ ባናው ያዪስ። ፆሳይ ኣሙሆን ኢያው ቆንጪሲን ጋሊላ ቢታ ቢስ። 23ናቤታ ዶናን፥ «ናዚሬቴ ኣሲ ጌቴታና» ጊዲ ኦዴቲዳይሲ ፖሌታና ሜላ ናዚሬቴ ካታማ ቢዲ ያን ዴዒስ።#ማር 1፡24፤ ሉቃ 2፡39፤ ዮሃ 1፡45
دیاریکراوەکانی ئێستا:
ማቶሳ 2: gofENT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2011, Wycliffe Bible Translators, Inc. All rights reserved.
زانیاری زیاتر لەبارەی ኦራ ጫቁዋ ጎፋ