Luke 24
24
1ခုနစ်ရက်တစ်ပတ်ပါအာမာ့ ပထမဆုံးမာန်းရာပ်a၊ စမီစ်ပူရီကားအချိန်နယ် ယာပ်ရှီဖူမ်ငေါ ဟီမ်နာပ်ပြာန်နောပေးကား အမွှေးနံ့သာဆလောဖူမ်နယ် လာကဲ့အယ် ဆိုင်းကြဉ်းသာဂူဝါး လာမ်ဟီးမာ့။ 2ဟီမ်နာပ်ကော အင်းမာနေရား ထုတ်ချီးရာစန်နော် ဆိုင်းကြဉ်းသာဂူပေါက်ဝလည် အောပ်ပီပ်သောပေးကား သလောင်ဆီတုန်းနယ် ဟော်ဝါဟော်ဝါ ဖယ်လောပေကားသယ်မာ့ အင်းမာသလောင်ဆီကော စာပါအာ ထုတ်ကဲ့လင်းမာကာလည် မီမ်းဟော်ဟီမာ့။ 3ဆိုင်းကြဉ်းသာဂူနား ဟီမ်နာပ် ဆာမ်ဟီးရာမ်စန်နော် ကိုယ်တော်ယေရှုကာ ရုပ်ခန္ဓာလည် သမ်ကဲ့အယ် ယူပ်မူစောမန်း။ 4ဟီမ်နာပ်ကော မညယ်ထာဝမ်မာ့ ငေါကားလည် တွေးလောကဲ့ အလူရယ် လင်းငါးအချိန်နယ် ရုတ်တရာပ် လူန်းကဲ့အယ် တောက်ပါးလောကား အဝတ်သယ် ဖူမ်ကဲ့အယ် တီတ်ဆာကယ်ဟောကော ဟီမ်နာပ်ကာ့ နဘေးရား ပေါ်လီကယ်အယ် စာပ်ကဲ့ လင်းဟီးမာ့။ 5အင်းမာယာပ်ရှီဖူမ်ငေါ နီပ်ကဲ့အယ် ဆန်နောစာပ်ရယ် ဟလာမ်းငေါပ်ကယ်အယ် လင်းဟီးမာ့။ အင်းညယ်ငေါဝမ်ရီ အင်းမာတီတ်ဆာကယ်ဟောကော “ရှီးကားဟီမ်နာပ်သယ်ဟာ ပေးကားကာ ဆိုင်းကြဉ်းသာဂူပါအာ ဆိုင်းကဲ့လင်းငါးဟီမ်နယ် မဟာအောမ်ကယ် သမ်ဟီးကားသယ်။ 6ကိုယ်တော်ကော အင်းကာနေရား အပေါ်စော်မန်။ ဟီမ်ငေါ ရှီးပါအာအယ် အသက်ဆိုင်းဟာမ်းပါတ်။ ဟီမ်ငေါ ဂါလိလဲပြည်ပါအာ နီမ်နောက်တူတူ ငါကဲ့လင်းငါးချိန်နယ် ဟီမ်မိန့်နီကာလည် နီမ် တွေးလူဟီးလိတ်။ 7တီတ်ဆာကာ့ဆာလည် ဒုစရိုက်အပြစ်သားလာပ်ကာ့ ထော်ဝါး အပ်သောဟိကာ။ ဟီမ်နာပ်ကော တီတ်ဆာကာ ဆာလည် လက်ဝါးကပ်တိုင်ငါ သာမ်ကဲ့ ကတ်ရှီးဟိကာ။ အင်းညယ်ငေါဝမ်ရီ ဟီမ်ငေါ ဆွန်းရာပ်မြောက်သောကားမာန်းရာပ်သယ် ပြန်နောကဲ့ ဆိုင်းဟေပ်ကား ငေါကဲ့အယ် မိန့်နီမာ့ ဟီပ်ယိုလေး” ငေါကဲ့အယ် ငေါမာ့။ 8အင်းမာချိန်နယ် အင်းမာ ယာပ်ရှီလာပ်ကော ကိုယ်တော်ယေရှု မိန့်နီကာဖူမ်နယ် သတိလူဟီးရာမ် ကယ်အယ် 9ဆိုင်းကြဉ်းသာဂူဝါးအယ် လာမ်ဟာမ်းစီးရာပ်သော် သာဝက တစ်ဆယ့်တစ်ယောက်နောက် အခြားတီတ်ဆာလာပ်အားလုံးနယ် အင်းကာ အကြောင်းဖူမ်အားလုံးနယ် ဆောမ်းဟာမ်းဟီးမာ့။ 10သာဝကလာပ်သယ် အင်းကာအကြောင်းဖူမ်နယ် ဆောမ်းငါး ဟီမ်နာပ်ကော မာဂဒလမြို့ဝါးမာ့ မာရိ၊ ယောဟန္န၊ ယာကုပ်ကာ့ အမေ မာရိနောက် အခြားယာပ်ရှီကြအာဖူမ် ထာမာ့။ 11သာဝကဖူမ်ငေါ် အင်းမာ ယာပ်ရှီလာပ်သပေါက်ကားဖူမ်ငေါ အဓိပ္ပာယ်အပိုငေါကဲ့အယ် မသာပ်ချီးကယ်မာ့ ဟီမ်နာပ်ကော ယုံနော်ဟီယို။ 12အင်းညယ်ငေါဝမ်ရီ ပေတရုကော ယုတ်ကဲ့အယ် ဆိုင်းကြဉ်းသာဂူဝါး ကာပ်ကဲ့အယ် ဂူနား ငေါပ်ဆာမ်ကဲ့အယ် ယူဝမ်စန်းနော ကိုယ်တော်ကာ ခန္ဓာကိုယ်လည် ပတ်သောပေးကား အဝတ်ဖူမ်ဟာ ယူပ်မူဝမ်မာ့။ အင်းသယ် ဟီမ်ငေါ အင်းမာအဖြစ်ပျက်ဖူမ်နယ် အန်းနောကဲ့အယ် ကျဉ်းမာလာမ်ဟာမ်းမာ့။ 13အင်းမာမာန်းရာပ်ပါအာဟာ ကိုယ်တော်ယေရှုကာ တပည့်တော်ဖူမ်ပါအာမာ့ ကယ်ဟောကော ဂျေရုဆလင်မြို့ဝါးအယ် ခုနစ်မိုင် စာကားကာ ဧမောက်ထိန်ငါး လာမ်ဟီးမာ့။ 14ဟီမ်နာပ်ကော လွန်နီကာကာ့ မာန်းရာပ်ပါအာ ထာရီကား အဖြစ်ပျက်မှန်သမျှလည် ဟော်ဝါနောက်ဟော်ဝါ အပြန်အလှန်ရယ် ဆွေးနွေးလောကဲ့ လာမ်ဟီးမာ့။ 15အင်းမာညယ် ဟီမ်နာပ်ကော လမ်းမား သပေါက်ကဲ့အယ် ဆွေးနွေးလောကဲ့အယ် လင်းငါးအချိန်နယ် ကိုယ်တော်ယေရှုကော ဟီမ်နာပ်ပါအာ လီကဲ့အယ် ဟီမ်နာပ်နောက်တူတူ လမ်းဟာကဲ့အယ် ကြွလာမ်မာ့။ 16အင်းညယ်ငေါဝမ်ရီ ဘုရားရှင်ငေါ် ဟီမ်နာပ်သယ် အမှတ်သော်ရင်ကွန်နယ် အောမ်ပေးကားသယ်မာ့ ဟီမ်နာပ်ကော ကိုယ်တော်လည် ယူပ်မူဟီးရီး မှတ်တိုဟီယို။ 17ကိုယ်တော်ကော “နီမ်ငေါ လမ်းဟာကဲ့အယ် မဟာ အကြောင်းနယ် ဆွေးနွေးလောဟီးကားသယ်” ငေါကဲ့အယ် စီမ်ညူဝမ်စန်းနော
ဟီမ်နာပ်ကယ်ဟောကော လမ်းဟာပါအာအယ် ရပ်သောကဲ့အယ် ဟီမ်နာပ်ကာ့ မီပ်မန်းငေါ တအား ဝမ်းနည်းလောကား ပုံစံရီး ပေါ်လောမာ့။ 18ဟီမ်နာပ်ပါအာမာ့ ကလောဖ ငေါကားကာ့ ဟီမ်ငေါ ကိုယ်တော်လည် “လွန်နီကာ မာန်းရာပ်ဖူမ်ပါအာ ဂျေရုဆလင်မြို့ဝါး ထာရီကားဖူမ်နယ် အမီမ်းဟော်ရယ်လင်းငါးကာ နှာမ်ငေါ် နာန်ဟော်ဝါနိုက် ငါကား” ငေါကဲ့အယ် ငေါမာ့။ 19ကိုယ်တော်ကော “မဟာဖူမ် ထာရီကားသယ်” ငေါကဲ့အယ် စီမ်ညူဝမ်စန်းနော ဟီမ်နာပ်ငေါ “နာဇရက်မြို့သား ကိုယ်တော်ယေရှုကာ အဖြစ်ပျက်ဖူမ် ထာမာ့။ ဟီမ်ငေါ ပရောဖက်တစ်ပါး ထာကယ်အယ် ဘုရားရှင်နောက် တီတ်ဆာလာပ်ကာ့ မန်းနား တန်ခိုးအာဏာနောက် ပြည့်စုံနော်ကာ သတင်းစကားဖူမ်နောက် အန်းနောမီးကားဖူမ်နယ် အောမ်မီမာ့။ 20အင်းညယ်ငေါဝမ်ရီ အလေဆူလာပ်ကာ့ ဂျူးပုရောဟိတ်အကြီးအကဲဖူမ်နောက် ဂျူးခေါင်းဆောင်ဖူမ်ငေါ ဟီမ်နယ် သေဒဏ်အီတီမ် ရောမအာဏာပိုင်နာပ်ကာထော်ဝါး အပ်သာမ်မာ့။ အင်းမာအာဏာပိုင်ဖူမ်ငေါ ဟီမ်နယ် လက်ဝါးကပ်တိုင်စုတ်အား မင်နားနောက် သမ်းကဲ့အယ် ကတ်ရှီးဟီးရာမ်မာ့။ 21အင်းမာအရှင်ငေါ် အလေဆူလာပ်ကာ့ အစ္စရေးတီတ်ဆာ အပေါင်းနာပ်သယ် ရွေးနှုတ်ကယ်တင်နောပ်ကာကာ့ အရှင်ထာ့ကား ငေါကဲ့အယ် အလေ မျှော်လင့်နောဟီးရီရာ အင်းမာအဖြစ်ပျက်ဖူမ် ထာရီကား ဆွန်းရာပ်မာပ်ပါတ်။ 22အင်းမာ့ပြာန်နယ် အလေဆူလာပ်ပါအာမာ့ ယာပ်ရှီကြအာကော အလေဆူလာပ်သယ် အန်းနောမီးကားဖူမ် ငေါဟီးရီမာ့။ ဟီမ်နာပ်ကော ယေမာပ်သယ်လည် စောဆီရယ် ဆိုင်းကြဉ်းသာဂူဝါး လာမ်ဟီးမာ့။ 23အင်းညယ်ငေါဝမ်ရီ ဟီမ်နာပ်ကော ကိုယ်တော်ယေရှုကာ ခန္ဓာကိုယ်လည် ယူပ်မူရီယိုး။ အင်းမာနောက်သယ် ဟီမ်နာပ်ကော လီဟာမ်းကဲ့အယ် ဟမန်းနာပ် ကြအာလည် ယူပ်မူဟီးမူရီကားအကြောင်းနောက် အင်းမာဟမန်းနာပ်ကော် ကိုယ်တော်လည် အသက်ဆိုင်းဟေရာမ် ငေါကဲ့အယ် ငေါရီကာ အကြောင်းနယ် အလေဆူလာပ်သယ် ဆောမ်းဟာမ်းဟီးမာ့။ 24စီးရာပ်သော် အလေဆူလာပ်ပါအာမာ့ တီတ်ဆာကြအာရီး ဆိုင်းကြဉ်းသာဂူဝါး လာမ်ကဲ့ယူဝါစန်းနော အင်းမာယာပ်ရှီလာပ် ငေါကယ်ညယ် ကိုယ်တော်ယေရှုကာ ခန္ဓာကိုယ်လည် ယူပ်မူဟီးရီယို” ငေါကဲ့အယ် ငေါမာ့။ 25စီးရာပ်သော် ကိုယ်တော်ကော ဟီမ်နာပ်သယ် “နီမ်ငေါ မဟာအောမ်ကယ် အနားလည်လော်ရင်ဟီကာသယ်၊ ပရောဖက်သာပ်ကာ မိန့်မာချက်ဖူမ်နယ် ယုံကြည်လောတီမ် မဟာအောမ်ကယ် ခက်ခဲလောဟီးကားသယ်။ 26မေရှိယကော ဟီမ်ငါဘုန်းတန်ခိုးတော်ဖူမ်နယ် အလူကြီစ် အင်းကာညယ်ဒုက္ခဝေဒနာဖူမ် ခံစားလောထော်ကယ်အယ် ရှီးထော်ပ်ကား ငေါကားလည် အမီမ်းဟော်ဟီကာလေး” ငေါကဲ့အယ် ငေါမာ့။ 27စီးရာပ်သော် မောရှေနောက် ပရောဖက်သာပ်ကာ ကျမ်းစာပါအာမာ့ ဟီမ်ငါအကြောင်းနယ် ရေးလောပေးကားမှန်သမျှဖူမ်ငါ အနက်အဓိပ္ပာယ်ဖူမ်နယ် ဟီမ်နာပ်သယ် ရှင်းပြလောကဲ့အယ် အီမာ့။ 28ဟီမ်နာပ်ကယ်ဟော လာမ်ကားကာ့ ဧမောက်ထိန်ထံဟပ်ပါအာ ထုတ်အီစန်းနော ကိုယ်တော်ကော စာပါအာ ဆက်သောကဲ့အယ် ပူပေးရာမ်ကားပုံစံနယ် ယူပ်မူကယ်မာ့ 29ဟီမ်နာပ်ကော “စမီစ်ဆာမ်ကဲ့အယ် တအားနောက်ကျလော တင်းပါတ်သယ်မာ့ အလေဆူလာပ်နောက်တူတူ တည်းလောလိတ်” ငေါကဲ့အယ် ကိုယ်တော်လည် လျှောက်သောမာ့။ အင်းသယ် ကိုယ်တော်ကော ဟီမ်နာပ်နောက်တူတူ တည်းလောတီမ် လာပ်မာ့။ 30ဟီမ်နာပ်နောက်တူတူ ရောက်မောက်တီမ် စပွဲရား ထောင်းငါမ်စန်နော် ကိုယ်တော်ကော ပေါင်မုန့်နယ် အောမ်းကဲ့အယ် ဘုရားရှင်ငါ ကျေးဇူးတော်လည် ချီးမွမ်းနောစီးရာမ်စန်နော် ပေါင်မုန့်နယ် လာဆိတ်ကဲ့အယ် ဟီမ်နာပ်ခနန်း အီရာမ်မာ့။ 31အင်းမာချိန်နယ် ဘုရားရှင်ငေါ် ဟီမ်နာပ်ကာ့ အမြင်အာရုံအောက်ကဲ့အယ် အီဟာမ်းကယ်မာ့ ဟီမ်နာပ်ကော ကိုယ်တော်လည် မှတ်မိလောဟီးရာမ်မာ့။ အင်းညယ်ငေါဝမ်ရီ တချိန်တည်းပါအာဟာ ကိုယ်တော်ကော ဟီမ်နာပ် ယူပ်မူကား မန်းနားအယ် မီမ်ပေးရာမ်မာ့။ 32ဟီမ်နာပ်ရီး “လမ်းမား ကိုယ်တော်ယေရှု အလေလည် ကျမ်းစာဖူမ် ရှင်းပြလောကားချိန်နယ် အလေကာစိတ်အား ဝမ်ကလိမ်ကလိမ်လှုပ်bကယ်ညယ် ပျော်လောမီးကားလည် ခံစားလီထော်မာ့ယိုလေး” ငေါကဲ့အယ် အချန်းချန်းငေါဟီးမာ့။ 33စီးရာပ်သော် ဟီမ်နာပ်ကော ချက်ချင်းယုတ်ကဲ့အယ် ဂျေရုဆလင်မြို့ဝါ လာမ်ဟာမ်းစန်းနော သာဝကဆယ့်တစ်ယောက်ကော အခြား တီတ်ဆာဖူမ်နောက်တူတူ စုလောကဲ့လင်းငါးလည် ယူပ်မူဝမ်မာ့။ 34အင်းမာစုလောကဲ့ လင်းငါးဟီမ်နာပ်အားလုံးငေါ ထုတ်ထေကာ ကယ်ဟောလည် “ကိုယ်တော်ယေရှုကော ရှီးပါအာအယ် တကယ်ဆိုင်းဟေကယ်အယ် ရှိမုန်နယ် ကိုယ်ထင်ပြလီမာ့” ငေါကဲ့အယ် ဆောမ်းဟီးမာ့။ 35အင်းမာချိန်နယ် ဧမောက်ထိန်အယ် လီဟာမ်းငါးကာ့ တီတ်ဆာကယ်ဟောရီး ဧမောက်ထိန် လာမ်ငါး လမ်းမား ဟီမ်နာပ်ကြုံနီကာဖူမ်နောက် ပေါင်မုန့်နယ် လာဆိတ်အာမ်စန်နော် ကိုယ်တော်ယေရှု ထာမာငေါကားလည် ဟီမ်နာပ် မီမ်းဟော်ဝမ်ငါးကာ့ အကြောင်းဖူမ်နယ် ဆောမ်းဟာမ်းဟီးမာ့။ 36အင်းကာညယ် တပည့်တော်လာပ်ကော အင်းမာကြောင်းဖူမ် အဖြစ်ပျက်ဖူမ်နယ် ငေါကဲ့လင်းဟီးငါးအချိန်နယ် ကိုယ်တော်ကော ဟီမ်နာပ်ကာ အလယ်ရာ ရုတ်တရာပ် ပေါ်လီကယ်အယ် ဟီမ်နာပ်သယ် “ဘုရားရှင်ငေါ် နီမ်နန်း ငြီမ်းချမ်းနောကားလည် အီစန်ညူပ်” ငေါကဲ့အယ် မိန့်နောမာ့။ 37အင်းညယ်ငေါဝမ်ရီ တပည့်လာပ်ကော် ကိုယ်တော်လည် ယူပ်မူဝမ်စန်းနော တစ္ဆေရယ် မသပ်ချီးကားသယ်မာ့ တအား အန်းနောကဲ့အယ် ကစာပ်ကယ်အယ် လင်းဟီးရာမ်မာ့။ 38အင်းညယ်ငေါဝမ်ရီ ကိုယ်တော်ကော “နီမ်ငေါ မဟာအောမ်ကယ် ကစာပ်ချီထော်ကာသယ်။ နီမ်ငါ စိတ်နား မဟာအောမ်ကယ် သံသယ ငါဟီးထော်ကာသယ်။ 39ငါကာထော်ဖူမ် ၊သာဖူမ်နယ် ယူပ်ဝမ်နိတ်။ ငါလည် ထာဟီရီလိတ်။ တစ္ဆေပါအာကော် အရိုးဖူမ်၊ ဆလန်ဖူမ်အပို။ ငါပါအာကော် နီမ်ယူပ်မူကားတိုင်း ဆလန်ဖူမ်၊ အရိုးဖူမ် ငါမာ့” ငေါကဲ့အယ် မိန့်နောမာ့။ 40အင်းမာညယ်ငေါစီးကဲ့အယ် ဟီမ်ငါ ထော်နောက်သာပါအာမာ့ အမာရွက်ဖူမ်နယ် ပြလောမာ့။ 41တပည့်လာပ်ကော် တအားဆကောက်ချီကယ်အယ် အယုံကြည် လောရင်စာပ်အာမ်ကွန်းနယ် အန်းနောကဲ့ လင်းဟီးရာမ်မာ့။ ကိုယ်တော်ကော ဟီမ်နာပ်သယ် “အင်းကာနေရား ရောက်တီမ် မဟာမဟာငါနေး” ငေါကဲ့အယ် စီမ်ညူမာ့။ 42အင်းမာချိန်နယ် ဟီမ်နာပ်ကော သမ်းငါဂါးပေးကား တစ်ပိုင်းနယ် အီရာမ်စန်းနော 43ကိုယ်တော်ကော ဟီမ်နာပ်ကာ့ မန်းနားဟာ ရောက်အာမ်မာ့။ 44စီးရာပ်သော် ကိုယ်တော်ကော “ငါကော နီမ်နောက်တူတူ ငါရီကားအချိန်နယ် မောရှေကာ့ ပညတ်ကျမ်းနောက် ပရောဖက်သာပ်ကာ စာအုပ်ဖူမ်၊ ဆာလံကျမ်းပါအာ ရေးလောပေးကားကာ့ ကိုယ်တော်နောက် ပတ်သက်သောကား အကြောင်းဖူမ်အားလုံးငေါ အမှန်ထာရိကား” ငေါကဲ့အယ် မိန်နောမာ့။ 45စီးရာပ်သော် ကျမ်းစာကာ့ အနက်အဓိပ္ပာယ်လည် နားလည်လော်ဟီကွန်နယ် တပည့်လာပ်သယ် ရှင်းပြလောကဲ့အီမာ့။ 46စီးရာပ်သော် ဟီမ်နာပ်ခနန်း “ကျမ်းစာဖူမ်ပါအာ မေရှိယကော ဆင်းရဲဒုက္ခဖူမ် ခံနောစီးကဲ့အယ် ရှီးထော်ပ်ကား။ အင်းညယ်ငေါဝမ်ရီ ဆွန်းရာပ်မြောက်သောကား မာန်းရာပ်သယ် ရှီးပါအာအယ် ဆိုင်းဟေပ်ကား။ 47ကိုယ်တော်လည် ယုံကြည်လောကား ဟီမ်နာပ်ကော တီတ်ဆာဖူမ်နယ် ဟီမ်နာပ်ကာ့ ဒုစရိုက်အပြစ်ဖူမ်နယ် နောင်တသံဝေဂ လူကဲ့အယ် ဘုရားရှင်ပါအာအယ် ခွင့်လွှတ်ခြင်း လူကွန်းနယ် ဂျေရုဆလင်မြို့ပါအာအယ် စားလောကဲ့အယ် ကမ္ဘာပေါ်ဝါးမာ့ လူမျိုးအားလုံးနာပ်သယ် ဟောလောပ်ကာငေါကဲ့အယ် ငေါပေးမာ့။ 48အင်းသယ် နီမ်ငေါ အင်းကာအဖြစ်ပျက်ဖူမ်ငါ မျက်မြင်သက်သေဖူမ်ထာမာ့။ 49ငါကာအဝါဘုရား အီပေးကား ကတိအတိုင်း ငါကော နီမ်ပါအာ ဉာဏ်အလင်းတော် သာပ်ကဲ့အယ် ထုတ်အီစီမ်းကာ။ အင်းသယ် နီမ်ငေါ ဉာဏ်အလင်းတော် ထုတ်အီကဲ့အယ် ရွှေမြို့တော်ပါအာအယ် တန်ခိုးအီကားအချိန်ထိ ဂျေရုဆလင်မြို့ဝါး လေးကဲ့လင်းဟီးလိတ်” ငေါကဲ့အယ် မိန့်နောမာ့။ 50စီးရာပ်သော် ကိုယ်တော်ကော တပည့်လာပ်သယ် ကော်ကဲ့အယ် ဂျေရုဆလင်မြို့ပြာန်ငါ ပူစီးကဲ့အယ် ဗေသနိထိန်နောက် ထံပါအာ ထုတ်အာမ်စန်းနော တပည့်တော်အားလုံးနန် ထော်လည် မြှောက်သောကဲ့အယ် ဘုရားရှင်ငေါ် ဟီမ်နာပ်သယ် ကူညီလောကဲ့အယ် အီတီမ် ဆုစိမ်ကဲ့အယ် အီမာ့။ 51အင်းမာညယ် ဆုစိမ်ကဲ့အယ် အီစီးရာနောက် ကိုယ်တော်ယေရှုကော ဟီမ်နာပ်ပါအာအယ် ပူရီကဲ့အယ် ရွှေမြို့တော်ဝါ ကြွလာမ်မာ့။ 52အင်းမာနောက်သယ် တပည့်လာပ်ကော် ကိုယ်တော်ယေရှုလည် ဒူးထောက်သောကဲ့အယ် ဝယ်လော်စီရာပ်သော် တအား ဆကောက်ချီတင်ကယ်အယ် ဂျေရုဆလင်မြို့ဝါး လာမ်ဟာမ်းဟီးမာ့။ 53ဟီမ်နာပ်ကော ဂျေရုဆလင်မြို့ဝါး ထုတ်ထာစန်နော် ဗိမာန်တော်ဝါမ်းငါး ပုံမှန်လာမ်ကဲ့အယ် ဘုရားရှင်နယ် ချီးမွမ်းနောဟီးမာ့။
دیاریکراوەکانی ئێستا:
Luke 24: ktpv-rv
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.