Luke 11
11
1ရာပ်အာလည် ကိုယ်တော်ယေရှုကော တစ်နေရာရာပါအာ ဆုစိမ်စီးရာမ်စန်နော် ကိုယ်တော်ယေရှုကာ တပည့်ဖူမ်ပါအာမာ့ ဟော်ဝါကော “အရှင်၊ ဝေးငဟူပ်ကာမင်္ဂလာဆရာယောဟန်ငေါ် ဟီမ်ငါတပည့်ဖူမ်နယ် ဆုစိမ်ငါးနည်း ဆောမ်နောကဲ့အီကယ်ညယ် အလေဆူလာပ်သယ်ရီး ဆောမ်နောကဲ့အယ် အီစာမ်းဆွမ်” ငေါကဲ့အယ် လျှောက်သောမာ့။ 2အင်းမာချိန်နယ် ကိုယ်တော်ယေရှုကော “နီမ်ဆုစိမ်ငါးအခါလည် ‘အဝါဘုရားရှင်၊ တီတ်ဆာတိုင်းငေါ ဘုရားရှင်ငါ မြင့်မြတ်သောကား နံမယ်လည် ရိုသေလောဟီးတီမ် အလေဆူ ဆုစိမ်မာ့။ ဘုရားရှင်ငေါ် တီတ်ဆာတိုင်းနယ် အုပ်စိုးလီတီမ်ရီး အလေဆူ ဆုစိမ်မာ့ဆွမ်။ 3အလေဆူလာပ်ခနန်း ရာပ်အာလိုအပ်သောကားကာ အစာအဟာရဖူမ်နယ် ရာပ်တိုင်းရာပ်တိုင်း အီကဲ့အယ်ဆွမ်။ 4အလေဆူလာပ်သယ် ဒုစရိုက်ကျုးလွန်နော်ကာကာ့ တီတ်ဆာလာပ်သယ် အလေဆူ ခွင့်လွှတ်သောကဲ့အီကယ်ညယ် အလေဆူလာပ်ကာ့ ဒုစရိုက်အပြစ်ဖူမ်နယ်ရား ခွင့်လွှတ်သောကဲ့ အီစာမ်းဆွမ်။ အလေဆူလာပ်သယ် ဒုစရိုက်ကျူးလွန်နော်ပါတ်ကွန်နယ် ဖြားယောင်းနောကား မှန်သမျှလည်ရီ ကာကွယ်လောကဲ့ အီစာမ်းဆွမ်’ ငေါကဲ့အယ် ဆုစိမ်ဟီးလိတ်” ငေါကဲ့အယ် မိန့်နောမာ့။ 5ရာကာပ်ဝါ ကိုယ်တော်ယေရှုကော ဟီမ်နာပ်သယ် “နီမ်ပါအာမာ့ ဟော်ဝါ ဟော်ဝါပါအာ မိတ်ဆွေဟော်ဝါငါမာ့ ငေါစာန်းစာပ် ဟီမ်ငေါ နာန်ကြည် ဇခေါင်ချိန်နယ် ဟီမ်ငါမိတ်ဆွေကာ့ ကျဉ်းမား ပေါင်မုန့် လှာကမ်တီမ် လာမ်ကဲ့အယ် 6နာန်ငေါ ဟီမ်နယ် ‘မိတ်ဆွေ၊ ငါကာမိတ်ဆွေဟော်ဝါ ခရီးစာပါအယ် ထုတ်အီကယ် ဟီမ်နန်းအီနောပ်တီမ် ငါပါအာ မဟာဟာမ်းအပိုသယ်မာ့ ငါနန်းပေါင်မုန့်ဆွန်းဟူပ် လှာကမ်ကဲ့အယ် အီစာမ်း’ ရယ် ငေါဝမ်းနော 7နာန်ငါ မိတ်ဆွေကော် ‘ငါလည် အနောက်ယှက် အီရီရာပ်၊ ကျဉ်းကဖာန်ပေါက်ဖူမ်ရီ အော်ပ်ပီပ်သောစီးရာပ်၊ ငါကာ ရှိတ်ဆာဖူမ်ရီး အက်ချီးရာပ်၊ ငါယုတ်ကဲ့အယ် နာန်နန်း မဟာဟာမ်း အောမ်ကဲ့အီရင်နိုး’ ငေါကဲ့အယ် နာန်နယ် သပေါက်ထာမ်းဟပ်ကာ။ 8နီမ်နယ် ငါငေါကာပ်ကာကော် အင်းမာဟီမ်ငေါ မိတ်ဆွေထာကာလည် ထောက်သောကဲ့အယ် နာန်ဟနန်း မဟာဟာမ်း အီရီပ်ကားအဟီပ်ရီ နာန်ငေါ ဇွဲအလျှော့လောရယ် ဆက်သောကဲ့အယ် စိမ်ကဲ့လင်းမန်းနော ဟီမ်ငေါ ဟီမ်ငါ နံမယ်ကလန်နယ် ထိန်းနောတီမ် ယုတ်ကဲ့အယ် နာန်လိုလောကနေ အိကား။ 9အင်းသယ်နီမ်နယ်ငါငေါကာပ်ကာကော် စိမ်ဟီးလိတ်၊ နီမ်လူနာပ်။ သမ်ဟီးလိတ်၊ ဟော့ပ်တော့ကာ။ ကဖာန်နယ် ခေါက်သောလိတ်၊ ကဖာန်အောက်ကဲ့အိကား။ 10စိမ်ဟီးကားတီတ်ဆာတိုင်း လူဟိကာ။ သမ်ငါးကာ တီတ်ဆာတိုင်း ဟော့ပ်သောဟိကာ။ ကဖာန်နယ် ခေါက်သောကားတီတ်ဆာတိုင်း ကဖာန်အောက်ကဲ့ အီဟိကာ။ 11တကယ်လို့ ရှိတ်ဆာဖူမ်ငေါ သမ်းငါနူဝါလည် စိမ်မန်းနော နီမ်ပါအာမာ့ တမာ့အဝါကော ကဖူးလည် အိကားသယ်။ 12တကယ်လို့ ရှိတ်ဆာဖူမ်ငေါ အူပ်တီလည် စိမ်မန်းနော နီမ်ပါအာမာ့ တမာ့အဝါကော ကတ်မြှီးကောက်သယ် အိကားသယ်။ 13အင်းသယ် နီမ်ငေါ အကလန်ငါဟီမ်နာပ်ထာမာ့ငေါရီး နီမ်ငါရှိတ်ဆာဖူမ်နယ် ကလန်ငါဖူမ်နယ်ဟာ အီဟာဝမ်းနော ရွှေမြို့တော်ပါအာမာ့ အဝါဘုရားရှင်ငေါ် စိမ်ငါးကာဟင်နယ်ဟာမ်း ထာဂါက်ထာ ဉာဏ်အလင်းတော်လည်ဟာမ်းအီတီမ် အရာမ်သင့်ငါကဲ့လင်းမာ့” ငေါကဲ့အယ် မိန့်နောမာ့။ 14ရာပ်အာလည် တီတ်ဆာဟော်ဝါလည် အသပေါက်ရင်ညယ် လင်းကွန်းမယ် အောမ်ပေးကားကာ စိတ်ဆလားလည် ကိုယ်တော်ယေရှုကော ငါပ်ပူမာ့။ ကိုယ်တော်ယေရှုကော စိတ်ဆလားလာပ်သယ် ငါပ်ပူစီးရာမ်စန်နော် အသပေါက်ခါရယ် လင်းငါးကာဟီမ်ငေါ သပေါက်ထေရင်ကယ်မာ့ တီတ်ဆာလာပ်ကော အန်းနောဟီးရာမ်မာ့။ 15အင်းညယ်ငေါဝမ်ရီ တီတ်ဆာကြအာကော “အင်းကာဟီမ်ငေါ စိတ်ဆလားလာပ်ကာ့ဘုရင် ဗေလဇေဗုလaကာတန်ခိုးနောက် အင်းကာစိတ်ဆလားလာပ်သယ် ငါပ်ပူကားထာမာ့” ငေါကဲ့အယ် ငေါဟီးမာ့။ 16အခြားတီတ်ဆာလာပ်ရီး ကိုယ်တော်လည် စမ်းသပ်သောဟီးကာပ်ကယ်မာ့ ကိုယ်တော်ကာတန်ိခုးတော်ဖူမ်ငေါ ဘုရားရှင်ပါအာအယ်လီမာ့ ငေါကားလည် အန်းနောမီးကား နိမိတ်လက္ခဏာကြအာကြအာ ပြလောကဲ့အယ် အီတီမ် စိမ်ဟီးမာ့။ 17ကိုယ်တော်ယေရှုကော အင်းမာဟီမ်နာပ် မညယ်တွေးလောကဲ့အယ် လင်းငါးလည် မီမ်းဟော်ကယ်မာ့ အင်းမာဟီမ်နာပ်သယ် “နိုင်ငံတစ်နိုင်ငံနားမာ့ တီတ်ဆာလာပ်ကော အချန်းချန်း တိုက်ခိုက်သောကဲ့လင်းမန်းနော အင်းမာနိုင်ငံငေါ ပျက်စီးလောထော်ပ်ကား။ အင်းမာတိုင်းမန်း မိသားစုကြအာပါအာရီ ကျဥ်းရှိတ်အချန်းချန်း တိုက်ခိုက်သောကဲ့လင်းမန်းနော အင်းမာမိသားစုကော ပြိုကွဲပျက်စီးလောထော်ပ်ကား။ 18တကယ်လို့ မာရ်နတ်ရီး ဟီမ်ငါစိတ်ဆလားလာပ်နောက် အချန်းချန်းတိုက်ခိုက်သောကဲ့အယ် လင်းမန်းနော ဟီမ်ငါနိုင်ငံရီး မညယ်တည်မြဲလောရင်ဟပ်ကားသယ်။ ရာ ငါ အင်းကာညယ် ငေါထော်ကာကော် နီမ်ငေါ ငါလည် ဗေလဇေဗုလကာ တန်ခိုးနောက် စိတ်ဆလားလာပ်သယ် ငါပ်ပူကား ငေါကဲ့အယ် နီမ်ငေါဟီးမာ့။
19တကယ်လို့ ငါကော ဗေလဇေဗုလကာ့တန်ခိုးနောက် စိတ်ဆလားလာပ်သယ် ငါပ်ပူမာ့ငေါနော နီမ်ငါတပည့်ဖူမ်ငေါ် ဟင်ငါတန်ခိုးနောက် စိတ်ဆလားလာပ်သယ် ငါပ်ပူကားသယ်။ နီမ်ငါ တပည့်ဖူမ်ငေါ် နီမ်မှားလောမာ့ ငေါကားလည် သက်သေပြလောမာ့။ 20အင်းညယ်ငေါဝမ်ရီ ငါကော ဘုရားရှင်ငါ တန်ခိုးတော်နောက် စိတ်ဆလားလာပ်သယ် ငါပ်ပူကဲ့အယ် လင်းငါးသယ်မာ့ ဘုရားရှင်ငါ သာသနာတော်ကော နီမ်ပါအာ ထုတ်အီရာမ်း ငေါကားလည် ဖော်ပြလောကား ထာမာ့” ငေါကဲ့အယ် မိန့်နောမာ့။ 21ကိုယ်တော်ကော ဟီမ်နောက်ဟီမ် မာရ်နတ်ကာထက်သယ် တန်ခိုးကြီးလောမာ့ ငေါကားလည် ပုံဥပမာနောက် မိန့်နောကားကော “ခွန်အားကြီးလောကားကာ့ တီတ်ဆာဟော်ဝါကော လက်နက်အစုံ အောမ်းကဲ့အယ် ဟီမ်ငါကျဥ်းနယ် စောင့်ရှောက်သောဝမ်းနော ဟီမ်ပိုင်နောကားကာ အရာအားလုံး လုံခြုံမှုငါမာ့။ 22အင်းညယ်ငေါဝမ်ရီ အင်းမာဟီမ်ငါထက်ပိုလောကဲ့အယ် ခွန်အားငါကားကာ့ဟီမ်ငေါ ဟီမ်ပါအာ လီကဲ့အယ် တိုက်ခိုက်သောကဲ့နားဝါပ်သော် ဟီမ်အားကိုးလောကားကာ လက်နက်ဖူမ်နယ် သိမ်းနောကဲ့အယ် ဟီမ်ပိုင်နောကား အရာအားလုံးနယ် အခြားတီတ်ဆာလာပ်ခနန်း ခွဲလောကဲ့အီဟပ်ကား။ 23ငါကာဘက်လာ အပေါ်ကာကာ့ ဟင်ဟာမ်းထာဂါက်ထာ ငါလည် ဆန့်ကျင်နောကားကာဟီမ် ထာမာ့။ ဘုရားရှင်ဟနန်း တီတ်ဆာလာပ်သယ် စုလောတီမ် ငါလည် အကူညီလောရယ် လင်းငါးဟီမ်နာပ်ကော ဘုရားရှင်ပါအာမာ့ တီတ်ဆာဖူမ်နယ် စာပါအာ ပူစီမ်းငါးတီတ်ဆာဖူမ်ထာမာ့” ငေါကဲ့အယ် မိန့်နောမာ့။ 24ကိုယ်တော်ယေရှု ပုံဥပမာကြအာနောက် မိန့်နောဟာမ်းငါးကော “စိတ်ဆလားကော ဟီမ်ဆာမ်ကဲ့လင်းငါးကာ့ ဟီမ်ပါအာအယ် ပူရီကဲ့အယ် တီတ်ဆာလာပ် အပေါ်ကာ ပေါက်ခါသာတုန်းငါး ဟာညာပ်ကယ်အယ် ဟီမ်လင်းတီမ်နေရာ သမ်ကဲ့ လင်းမာ့။ အင်းညယ်ငေါဝမ်ရီ တစ်နေရာဟာမ်း ယူပ်မူဝိုးသယ်မာ့ ‘ငါ ပူရီကားတီတ်ဆာပါအာ လာမ်ဟာမ်းကာ’ ငေါကဲ့အယ် လီဟာမ်းမာ့။ 25ပြန်နောကဲ့ ထုတ်ထေစန်နော် အရင်နာ ဟီမ်ဆာမ်ညီကား တီတ်ဆာကာ့ ခန္ဓာကိုယ်ကော သန့်ရှင်းနောကဲ့အယ် မက်သယ် လင်းမိကာ ကျဥ်းဟလော့ပ်ဟူပ်အာညယ် ထာကယ်လင်းငါးလည် ယူပ်မူဝမ်မာ့။ 26အင်းမာချိန်ငါ စိတ်ဆလားကော ဟီမ်ငါထက်သယ် ဆိုးလောကားကာ စိတ်ဆလားခုနစ်ကောင်နယ် ကော်ရီကဲ့အယ် အင်းမာတီတ်ဆာပါအာ ဆာမ်ကဲ့အယ် လင်းဟီးရာမ်စန်နော် အင်းမာတီတ်ဆာကာ အခြေနေဆိုးလောတင်းနီမာ့” ငေါကဲ့အယ် မိန့်နောမာ့။ 27ကိုယ်တော်ယေရှုကော တီတ်ဆာ ပရိသတ်ဖူမ်နယ် ဟောပြောလောကဲ့ လင်းငါးချိန်နယ် တီတ်ဆာပရိသတ်ပါအာမာ့ ယာပ်ရှီဟော်ဝါကော “ကိုယ်တော်လည်ဟဲကဲ့အယ် စေါက်ဆီအီနောပ်လီကာ ယာပ်ရှီကော ကံကလန်တင်ငါဟီမ်ထာမာ့” ငေါကဲ့အယ် လျှောက်တင်နော်မာ့။ 28အင်းမာချိန်နယ် ကိုယ်တော်ကော “မှန်နောမာ့။ အင်းညယ်ငေါဝမ်ရီ ဘုရားရှင်ငါ နှုတ်ကပါတ်တော်ဖူမ်နယ် သပ်လာပ်မူကယ်အယ် လိုက်နာလော်ကာဟီမ်နာပ်ကော အမှန်တကယ် ကံကလန်ငါဟီမ်နာပ်ထာမာ့” ရယ် ပြန်နောကဲ့ ဖြေဟာမ်းမာ့။ 29တီတ်ဆာပရိသတ်ဖူမ်ငေါ် ကိုယ်တော်ပါအာ စုလောကဲ့လင်းငါးချိန်နယ် ကိုယ်တော်ကော “ရာမာခေတ် တီတ်ဆာဖူမ်ငေါ တအားဆိုးလောဟီးမာ့။ မဟာအောမ်ကယ်လိုးငေါနော ဟီမ်နာပ်ကော နိမိတ်လက္ခဏာလည် စိမ်ဟီးရီး ပရောဖက်ယောနbကာ နိမိတ်လက္ခဏာကာပန်းနယ် အခြားမဟာ နိမိတ်လက္ခဏာလည်ဟာမ်း ပြလော့ပ်ကာယို။ 30မဟာအောမ်ကယ်လိုးငေါနော ပရောဖက်ယောနကော နိနေဝေမြို့သားလာပ်ခနန်း နိမိတ်လက္ခဏာ ထာကယ်ညယ် တီတ်ဆာကာ့ဆာရီး ရာမာ့ခေတ် တီတ်ဆာလာပ်ခနန်း နိမိတ်လက္ခဏာကြအာ ထာရီပ်ကား။ 31ရှေဘပြည်ဘုရင်မc ကော ဉာဏ်ပညာကြီးမြတ်သောကားကာ ရှောလမုန်ဘုရင်ငါ အဆုံးအမလည် သပ်မူတီမ် စာတင်းငါးကာ အခြားတိုင်းပြည်ပါအာအယ် လီထော်ကား။ အင်းညယ်ငေါဝမ်ရီ အင်းကာနေရား ရှောလမုန်ဘုရင် ထက်သယ် ကြီးမြတ်သောဟန်ငါဟီမ် ထုတ်အီကား ထာမာ့။ အင်းသယ် တရားစီရင်နော့ကာမာန်းရာပ် ထုတ်ပီစ်သော် ရှေဘပြည် ဘုရင်မကော ယုတ်ကဲ့အယ် ရာမာ့ခေတ် တီတ်ဆာလာပ်သယ် ပြစ်ဒဏ်စီရင်နော့ကာ။ 32အင်းမာတိုင်းမန်း တရားစီရင်နောကားမာန်းရာပ် ထုတ်အီရာမ်းနော နိနေဝေမြို့သားလာပ်ရီ ရာမာခေတ် တီတ်ဆာလာပ်သယ် ပြစ်ဒဏ်စီရင်နော့ကာ။ မဟာအောမ်ကယ်လိုးငေါနော နိနေဝေမြို့သားလာပ်ကော် ယောနကာ့ ဆုံးမသွန်သင်မှုကြောင့်နယ် နောင်တသံဝေဂ လူဟီးမာ့။ ရာ အင်းကာနေရား ယောနထက်သယ် ကြီးမြတ်ထာမ်ဆုံးတီတ်ဆာ ထုတ်အီကား ထာမာ့” ငေါကဲ့အယ် မိန့်နောမာ့။ 33အင်းမာနောက်သယ် ကိုယ်တော်ကော “ဆီမီးသာပ်ပေးကားကာ မီးအိမ်နယ် ဟင်ဟာမ်းပီးကူစ်ကာ၊ ကောမ်ဟာမ်းတောမ်နား ပီးကူစ်ပေကာ အပို။ အင်းမာအစား ကျဥ်းနား ဆာမ်ရီကားကာဟီမ်နာပ် အလင်းလူကွန်းနယ် မီးအိမ်နယ် မီးတိုင်ပါအာဟာ ချိတ်သောပေးဟီးမာ့။ 34နီမ်ငါ မီပ်တူဖူမ်ငေါ နီမ်ငါ ခန္ဓာကိုယ်ကာ့ မီးအိမ်ညယ်ထာမာ့။ နီမ်ငါမီပ်တူ ကလန်မန်နော် နီမ်ငါခန္ဓာကိုယ်ကြအာလုံး အလင်းရောင် လူရင်ကဲ့အယ် နီမ်ငါမီပ်တူ အကလန်မန်နော် နီမ်ငါ ခန္ဓာကိုယ်ကြအာလုံးငေါ ထာမ်းကဲ့အယ်လင်းဟပ်ကာ။ 35အင်းသယ် နီမ်ပါအာ ငါကားကာ အလင်းရောင်နယ် အထာမ်းကွန်းနယ် ကလန်မယ် ဂရုစိုက်သောလိတ်။ 36အင်းသယ် နာန်ငါ ခန္ဓာကိုကြအာလုံးငေါ ထာမ်းငါးကာ အပိုင်းအပေါ်ရယ် အလင်းရောင်နောက် တောက်ပါးလောကဲ့အယ် လင်းမန်းနော မီးအိမ်ပါအာမာ့ အလင်းရောင်ငေါ် နာန်ငါစုတ်အား ထွန်းလင်းနောကယ်ညယ် နာန်ငါ ခန္ဓာကိုယ် ကြအာလုံးရီး တောက်ပါးလောကဲ့အယ် လင်းဟပ်ကာ” ငေါကဲ့အယ် မိန့်နောမာ့။ 37အင်းမာညယ် မိန့်နောစီးရာမ်စန်နော် ဖာရိရှဲဟော်ဝါကော ကိုယ်တော်ယေရှုလည် ရောက်တီမ်ဖူမ်နောက် ဧည့်ခံနောတီမ် ဟီမ်ငါကျဥ်းမား ဖိတ်သောကယ်မာ့ ကိုယ်တော်ကော ဟီမ်ငါကျဉ်းမား ကြွလောကဲ့အယ် စားပွဲရား ထောင်းငါမ်မာ့။ 38ကိုယ်တော်ယေရှုကော ရောက်တီမ်ဖူမ် အရောက်ကြီစ် ထော်ဝေးရှင်ထော်ပ်ကား ငေါကားကာ ဂျူးလူမျိုးလာပ်ကာ့ ဓလေ့ထုံးစံနယ် အအောမ်ရယ် လင်းငါးလည် ဖာရိရှဲ ယူပ်မူဝမ်စန်းနော အင်းမာ ဖာရိရှဲကော အန်းနောကဲ့လင်းမာန်မာ့။ 39အင်းမာချိန်နယ် ကိုယ်တော်ကော “နီမ်ငါ ဖာရိရှဲလာပ်ကော် ပန်းကန်ခွက်ဖူမ်ငါ ပြာန်ငါဟာ ဖောကဲ့အယ် နီမ်ငါ စိတ်နားကော လောဘ တရားဖူမ်၊ အတရာလော်ကာဖူမ်နောက် ဖိန်းကဲ့အယ်လင်းမာ့။ 40မိုက်မဲလောကားတီတ်ဆာဖူမ်၊ ဘုရားရှင်ငေါ် နားရော ပြာန်ငါရော် ကယ်ပိတ်စလုံး ဖန်ဆင်းနောကဲ့ အီပေးကားယိုလေး။ 41နီမ်ငေါ လောဘတရားဖူမ်၊ အတရာလော်ကာဖူမ် အပေးစောမ်းရယ် နီမ်ပါအာ ငါကားကာဖူမ်နယ် အပေါ်ဟာကားကာ့ တီတ်ဆာလာပ်ခနန်း စွန့်ကြဲပေးကမ်းနောဝါပ်သော် နီမ်ငေါ ဘုရားရှင်ငါ ဆာ မန်းနား အမှန်တကယ်ဟာမ် သန့်ရှင်းနောကားဟီမ်နာပ် ထာရီပ်ကား။ 42ဖာရိရှဲဖူမ်၊ နီမ်ငေါ ဒုက္ခရောက်သောဟီးကိုက်ပန်း။ မဟာအောမ်ကယ်လိုးငေါနော နီမ်ငေါ ဘုရားရှင်နယ် နီမ်ငါ ဥယျာဥ်ပါအာအယ် ပူရီကားကာ ပူစီနံ၊ လျှူသလပ်dဖူမ်နောက် ဥယျာဉ်ပါအာမာ့ အခြား ရှီစ်ဆာမ်ငါးကာ တွန်ဖူမ်ငါ့ ဆယ်ဖို့တစ်ဖို့ လှူလောဟီးမာငေါရီး နီမ်ငေါ တီတ်ဆာလာပ်သယ် မျှမျှတတရယ် အဆက်ဆံနော်ကယ်ညယ် ဘုရားရှင်နယ်ရား မူမ်းဟီးယိုး။ နီမ်ငေါ ဘုရားရှင်နယ် ဆယ်ဖို့တစ်ဖို့ လှူလောထော်ပ်ကားပြာန်နယ် တီတ်ဆာလာပ်သယ်ရား မျှမျှတတရယ် ဆက်ဆံနော်ထော်ပ်ကား ထာကယ်အယ် ဘုရားရှင်နယ်ရား မူမ်းထော်ပ်ကား။ 43ဖာရိရှဲဖူမ်၊ နီမ်ငေါ ဒုက္ခရောက်သောဟီးကိုက်ပန်း။ မဟာအောမ်ကယ်လိုးငေါနော နီမ်ငေါ ဓမ္မာရုံငါးရီး ရှေ့ဆုံးပါအာ ထောင်းကာပ်ချီမာ့။ ဈေးပါအာရီ တီတ်ဆာဖူမ် နှုတ်ဆက်သောကားလည် လာကာပ်ချီးမာ့။ 44ဖာရိရှဲဖူမ် နီမ်ငေါ ဒုက္ခရောက်သောဟီးကိုက်ပန်း။ မဟာအောမ်ကယ်လိုးငေါနော နီမ်ငေါ အမှတ်သားအပေါ်ကာကာ့ ကာနား နော်ပ်ပေကာကာ့ ဆိုင်းကျဥ်းသာဖူမ်နောက် တူလောဟီးမာ့။ တီတ်ဆာလာပ်ကော ဟီမ်နာပ်သယ် အသန့်ရှင်းနောရယ် လင်းကွန်းနယ် အောမ်ဟပ်ကားကာ ဆိုင်းကြဉ်းသာ ငေါကဲ့အယ် အမီမ်းဟော်ဟီရယ် ပလာပ်လီမ်ပလာပ်လာမ် ဟာဟီးမာ့” ငေါကဲ့အယ် မိန့်နောမာ့။ 45စီးရာပ်သော် ကျမ်းထောကား ဆရာဟော်ဝါကော ကိုယ်တော်ယေရှုလည် “ဆရာ၊ အင်းကာညယ် မိန့်နောကားကော အလေဆူလာပ်သယ်ရီး စော်ကားလောကဲ့အယ် သပေါက်ညာပ်ကာ ထာမာ့” ငေါကဲ့အယ် လျှောက်တင်နော်မာ့။ 46ကိုယ်တော်ကော “ကျမ်းထောကား ဆရာဖူမ် နီမ်ရီး ဒုက္ခရောက်သောဟီးကိုက်ပန်း။ မဟာအောမ်ကယ်လိုးငေါနော နီမ်ငေါ တီတ်ဆာလာပ်သယ် နီစ်ကာကာ့ ဝန်ထုပ်ဝန်ပိုးလည် ဖေးစီမ်းမာ့ငေါရီး နီမ်ကိုယ်တိုင်ငေါ အင်းမာဖူမ်နယ် ထော်ပဲနောက်ချန်း ထာဟီယို။ 47နီမ်ငေါ အမှန်တကယ်ဟာမ် ဒုက္ခရောက်သောဟီးကိုက်ပန်း။ မဟာအောမ်ကယ်လိုးငေါက်သော် မယားမားလည် နီမ်ငါ ဘိုးဘေးလာပ် ကတ်ရှီးရီကာကာ့ ပရောဖက်သာပ်ခနန်း နီမ်ငေါ အထိမ်းအမှတ် ဆိုင်းကြဉ်းသာဂူလည် စာကဲ့အီဟီးမာ့။ 48အင်းမာညယ် အောမ်ငါးကော နီမ်ငါ ဘိုးဘေးလာပ် အောမ်မီကားကာ့ဖူမ် မှန်နောမာ့ငေါကဲ့အယ် ထောက်ခံနောကဲ့လင်းငါး ထာမာ့။ နီမ်ငေါ အထောက်ခံနော်ဝမ်နော် နီမ်ငါ ဘိုးဘေးလာပ် ကတ်ရှီးရီကာကာ့ ပရောဖက်သာပ်ခနန်း အထိမ်းအမှတ် ဆိုင်းကြဉ်းသာဂူဖူမ်နယ် စာကဲ့အီဟိကာယို။ 49အင်းသယ် အရာအားလုံးနယ် မီမ်းဟော်ကာ ဘုရားရှင်ငေါ် ‘နီမ်ပါအာ ပရောဖက်ဖူမ်နောက် သာဝကဖူမ်နယ် သာပ်ခပ်ကား။ အင်းညယ်ငေါဝမ်ရီ နီမ်ငေါ အင်းမာပရောဖက်ဖူမ်၊ သာဝကဖူမ်နယ် ကြအာလည်ကောကတ်ရှီးကဲ့အယ် ကြအာလည်ကော နှိပ်စာပ်သော ဟိကာ’ ငေါကဲ့အယ် မိန့်နောမာ့။ 50ကမ္ဘာဦးအစမားအယ် ဟီမ်နာပ်ကာ့ ဘိုးဘေးလာပ် ကက်ရှီးရီကာကာ့ ပရောဖက်သာပ်အားလုံးဟနန် ရာမာ့ခေတ် တီတ်ဆာဖူမ်ငေါအပြစ်အီကားခံနောဟီးထော်ပ်ကား။ 51ပရောဖက်သာပ်ကော် အာဗေလeအယ်စားလောကဲ့အယ် ဗိမာန်တော်ပါအာမာ့ သန့်ရှင်းနောဟန်ဆုံးနေရာနောက် ပူဇော်လောကား ပလ္လင်ကြာပ်ကြားပါအာမာ့ ဗိမာန်တော်ဝါမ်းငါး ကက်ရှီးကား ခံနောထော်ကာကာ့ ဇာခရိအထိ ထာမာ့။ အင်းသယ် အင်းမာဖူမ်ဟနန်း ရာမာ့ခေတ် တီတ်ဆာလာပ်ကော အပြစ်စီရင်နောကား ခံနောထော်ပ်ကား ငေါကဲ့အယ် ငါအသေချာငေါနာပ်။ 52ကျမ်းထောကား ဆရာဖူမ်၊ နီမ်ငေါ ဒုက္ခရောက်သောဟီးကိုက်ပန်း။ မဟာအောမ်ကယ်လိုးငေါနော နီမ်ငေါ ဘုရားရှင်နောက် သက်ဆိုင်နော်ကာကာ့ အသိပညာ ကဖာန်သော့fလည် သိမ်းနောပေးဟီးကဲ့အယ် ကိုယ်တိုင်းရီးဆာမ်ဟီယို၊ အခြားတီတ်ဆာဖူမ်နယ်ရီး တာမြစ်သောဟီးမာ့” ရယ် မိန့်နောမာ့။ 53ကိုယ်တော်ယေရှုကော အင်းမာညယ် မိန့်နောစီးရာမ်စန်နော် ကျမ်းထောကား ဆရာဖူမ်နောက် ဖာရိရှဲဖူမ်ငေါ် ကိုယ်တော်လည် တအား ဒေါသထွက်သောတင်းကဲ့အယ် ကိုယ်တော်လည် အကြောင်းအရာဖူမ် နည်းကြီစ်နောက် ပတ်သက်သောကဲ့အယ် မေးခွန်းဖူမ် စီမ်ညူဟီးစာပ်အာမ်မာ့။ 54အင်းမာဟီမ်နာပ်ကော ကိုယ်တော်ယေရှု မိန့်နောကားဖူမ်ပါအာ အမှားကြအာကြအာ ပါလီရာမ်နော် ပြစ်တင် စွပ်စွဲလောတီမ် ထောင်ချောက်ဆင်နောဟီးမာ့။
دیاریکراوەکانی ئێستا:
Luke 11: ktpv-rv
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.