ዶመ 30
30
1ራሄላ ያቆባዉ ናና የላቤናዋ በኤዳ ዎደ፥ ባረ ምቻቶ ቃናታዱ፤ ሄዋ ድራዉ ያቆባ፥ “ታዉ ናና እማ፤ ሄዌ ዮፐ፥ ታን ሀይቃና” ያጋዱ።
2ያቆብ ራሄሎ ሀንቀቲደ፥ “ታና ነዉ የሉዋ ድጌዳ ጾሳ ጋድየ?” ያጌዳ።
3እዛ፥ “ታ ዳንጋጽራቶ ባሎ ህኖ በአ፤ እዛ ታ ድራዉ የላና ማላ ኔን እዞ አካ፤ ያቶፐ እዝ ባጋና ታንካ ናኣ ዳዮ ግዳና” ያጋዱ። 4ባረ ዳንጋጽራቶ ባሎ ማቻቶ ኦደ አካና ማላ፥ አዉ እማዱ፤ ያቆብ እዞ አኬዳ። 5ባላ ሻሃራደ አቱማ ናኣ ያቆባዉ የላዱ። 6ያትና ራሄላ፥ “ጾሳይ ታዉ ዳናቴዳ፤ ታ ዎሳካ ስሲደ፥ ታዉ አቱማ ናኣ እሜዳ” ያጋዱ። ሄዋ ድራዉ አ ዳና#30:6 ዳና፦ ሀ ሱን ብለይ እብራዌዋን፥ “ጾሳይ ታዉ ዳናቴዳ” ግያዋ። ሱንዱ።
7ራሄል ዳንጋጽራታ ባላ ሀራ ሻሃራደ፥ ያቆባዉ ላኤንዋ አቱማ ናኣ የላዱ። 8ራሄላ፥ “ታን ታ ምቻትና ዎልቃማ ባጽያ ባጸታደ ጾናድ” ያጋዱ። ሄዋ ድራዉ አ ንፍታሌማ#30:8 ንፍታሌማ፦ ሀ ሱን ብለይ እብራዌዋን፥ “ባጽያ” ግያዋ። ሱንዱ።
9ልያ ባረዉ የሉ ኤቄዳዋ በኣደ፥ ባረ ዳንጋጽራቶ ዝልፖ አፋደ ያቆብ እዞ አካና ማላ እማዱ። 10ልያ ዳንጋጽራታ ዝልፓ አቱማ ናኣ ያቆባዉ የላዱ። 11ልያ፥ “ላ ሀዌ አያ ሎኦ ካጬ!” ያጋዱ። ሄዋ ድራዉ ጋዳ#30:11 ጋዳ፦ ሀ ሱን ብለይ እብራዌዋን፥ “ሎኦ ካጫ” ግያዋ። ሱንዱ።
12ልያ ዳንጋጽራታ ዝልፓ ያቆባዉ ላኤንዋ አቱማ ናኣ የላዱ። 13ልያ፥ “ታን አይ ኬሻ ናሸታይታሻ! ማጫ አሳይ ታና ናሸትያኖ ጋና” ያጋዱ። ሄዋ ድራዉ አ አሴራ#30:13 አሴራ፦ ሀ ሱን ብለይ እብራዌዋን፥ “ናሸቻ” ግያዋ። ሱንዱ።
14ዛርጋ ጫክያ አግናን ሮቤል ጋደ ቢደ፥ እንኮይያ ግያ ትማትምያ ማላትያ ቴራ ደሚደ፥ ባረ አት ልይዉ አሄዳ። ራሄላ ልዮ፥ “ነ ናኣ እንኮይያፐ ታዉ እማ” ያጋዱ።
15ሽን ልያ፥ “ታ አስና ኔን ዎ አኬዳዌ ግደናን እጽና፥ ቃይ ታ ናኣ እንኮይያ#30:15 እንኮይያ፦ የሉዋነ ሲቁዋ እሜ ጊደ ቆፈትያ ም። አካይ?” ያጋዱ።
ራሄላ፥ “ያቶፐ፥ ነ ናኣ እንኮይያ ድራዉ ያቆብ ሀቼ ቃማ ኔናና አቆ” ያጋዱ።
16ሄ ጋላሳ ኦማርስ ያቆብ ዎራፐ ዬዳ ዎደ፥ ልያ አ ሞካናዉ ከሳደ አ፥ “ኔን ታናና አቃና ኮሼ፤ አያዉ ጎፐ፥ ታን ታ ናኣ እንኮይያን ኔና ከራዉ አካ ድጋድ” ያጋዱ። ሄዋ ድራዉ እ ሄ ጋላሳ ቃማ እዝና አቄዳ።
17ጾሳይ ልያ ዎሳ ስሴዳ፤ እዛ ሻሃራደ፥ እቼሻን አቱማ ናኣ ያቆባዉ የላዱ። 18ልያ፥ “ታን ታ ዳንጋጽራቶ ታ አስናዉ እሜዳ ድራዉ፥ ጾሳይ ሄዋ ከራ ታዉ ጭጌዳ” ያጋዱ። ሄዋ ድራዉ አ ይሳኮራ#30:18 ይሳኮራ፦ ሀ ሱን ብለይ እብራዌዋን፥ “ከራ ታዉ ጭጌዳ” ግያዋ። ጋደ ሱንዱ። 19ልያ ሀራካ ሻሃራደ፥ ኡሱፑን አቱማ ናኣ ያቆባዉ የላዱ። 20ልያ፥ “ጾሳይ ታዉ አልኦ እሞታ እሜዳ፤ ታን ታ አስናዉ ኡሱፑን ናና የሌዳ ድራዉ፥ ሀእ እ ታና ቦንቻናዋ” ያጋዱ። ሄዋ ድራዉ አ ዛብሎና#30:20 ዛብሎና፦ ሀ ሱን ብለይ እብራዌዋን፥ “ቦንቹዋ” ግያዋ። ሱንዱ። 21ሄዋፐ ጉየ እት ማጫ ናቶ የላዱ፤ እዞ ዲኖ ሱንዱ።
22ጾሳይ ራሄሎ ሀሳዬዳ፤ እዝ ዎሳ ስሲደ እዝ የልያ ኡሉዋ ዶዬዳ። 23እዛ ሻሃራደ አቱማ ናኣ የላዱ፤ “ጾሳይ ታ ዬላ ቃሬዳ። 24መና ጎዳይ ታዉ ሀራ አቱማ ናኣካ ጉጄረኔሻ” ያጋዱ። ሄዋ ድራዉ አ ዮሴፎ#30:24 ዮሴፎ፦ ሀ ሱን ብለይ እብራዌዋን፥ “ጉጆ” ዎይ “ቃሬዳ” ግያዋ። ሱንዱ።
ያቆብ ላባና ድርጉዋን ፓሉመቴዳ
25ራሄላ ዮሴፋ የሌዳዋፐ ጉየ፥ ያቆብ ላባና፥ “ታን ታ አዉዋ ጋድያ ስማና ማላ፥ ታና ሞይዛ። 26ታን ኡንቱንቱ ድራዉ ነዉ ኦዳ ታ ማቻቱዋነ ታ ናና ሀማ፤ ታን ባና፤ አያዉ ጎፐ፥ ታን ነዉ አይ ኬሻ ኦሱዋ ኦደንቶ ኔን ኤራሳ” ያጌዳ።
27ሽን ላባን አ፥ “ታን ነዉ እትባ ኦዳይ፤ መና ጎዳይ ነ ጋሱዋን ታና አንጄዳዋ ታን በኣድ። 28ነ ድርጉዋ ታዉ ኦዳ፤ ታን ነዉ ጭጋና” ያጌዳ።
29ያቆብ፥ “ታን ነዉ ዋታ ኦደንቶ፥ ነ መሂካ ዋን የለቴደንቶ ኔን ኤራሳ። 30ታን ያናፐ ካሰ ነዉ ደእያ ጉይ ሀእ ሎይ ዳሬዳ፤ መና ጎዳይ ኔና ታን አዳ ሳኣን ኡባን አንጄዳ። ሽን ሀእ፥ ታን ታ ሶ አሳዉ ኦናዌ አዉዴ?” ያጌዳ።
31ላባን፥ “ታን ነዉ አያ እሞ?” ያጊደ አ ኦቼዳ።
ያቆብ፥ “ታዉ አይነ እሞፓ፤ ሽን ኔን ታዉ እትባ ኦፐ፥ ታን ነ ዉድያ ቃይካ ሄማናነ ናጋና። 32ታን ሀቼ ነ ዉድያ ኡባ ግዱዋና አና፤ ሄዋን ነ ዶርሳፐ ፑንጫርያ ዎይ ጋዛ ኡባ፥ ካረ ዶርሳ ማራ ኡባነ ዴሻፐ ጋዛነ ፑንጫርያ ኡባ ታን ሻካና፤ ኡንቱንቱ ታ ድርጉዋ ግዳና። 33ሄዋ ድራዉ ታ ጽሎተይ ኔን ታዉ ጭጌዳ ድርጉዋ ፓይዳናዉ ስንፐ ይያ ዎደ፥ ታዉ ማርካታና፤ ታ ዴሻፐ ጋዛ ዎይ ፑንጫረ ግደናዌ ዎይ ካረ ግደና አይ ዶርሳ ማራይነ ታ ማታን ቤትንቶ፥ ዉኤቴዳዋዳን ፓይደታና” ያጌዳ።
34ላብ፥ “ማያድ፤ ኔን ጌዳዋዳን ግዶ” ያጌዳ። 35ሽን ሄ ጋላሳን ላብ ዳንጫ ዎይ ጋዛ ግዴዳ አቱማ ዴሻ ኡባ፥ ፑንጫረ ዎይ ጋዛ ግዴዳ ማጫ ዴሻ ኡባ፥ ቦ ግዴዳ ኡባነ ካረ ዶርሳ ማራ ኡባ ከሲደ፥ ባረ አቱማ ናና ሄንዳ። 36ያቲደ ሄ ዉድያና ሄዙ ጋላሳ ኦግያ ያቆባፐ ሃኪደ ቤዳ። ሽን ያቆብ አቴዳ ላባና ዉድያ ሄሜዳ።
37ያቆብ ዴሻ ሎምያፐ፥ ጉማርያፐነ ጻንቃርሳፐ ቃየ ጋትማ ከሲደ፥ ፖቁዋ ፖቂ ፖቂደ፥ ግዶ ቦ ባጋ ቃሪደ ጋዛዬዳ። 38ዉዲ ሃ ኡሻናዉ ይያ ሳኣ ኡባን፥ ዎንግርያን፥ ዉድያ ስንን ፖቄዳ ጋትማቱዋ ዎዳ። ካሆዋንቱ ሃ ኡሻናዉ ዪደ፥ 39ሄ ጋትማቱዋ ስንን ብራሴድኖ፤ ኡንቱንቱ ዳንጫ፥ ፑንጫረነ ጋዛ ማራቱዋ የሌድኖ። 40ያቆብ ማራቱዋ ዉድያፐ ሻክ ዱማ ዎዳ፤ አቴዳ ዉድያ ዳንጫነ ካረ ግዴዳ ላባና መህያ ስን ዛሬዳ። ያቲደ ባረዉ ዉድያ ዱማዬዳ፤ ላባና መሄቱዋና ኡንቱንታ ጋቤና።
41ፓጻነ ምኖ ማጫዋንቱ ካህያ ዎደ አዉደነ፥ ኡንቱንቱ ሄ ጋትማቱዋ ማታን ብራሳና ማላ፥ ያቆብ ሄ ጋትማቱዋ ሃ ዎንግርያን፥ ሚዛቱዋ ስንን ዎ። 42ሽን መሄቱ ላፋ ግዶፐ፥ ኡንቱንቱ ስንን ጋትማቱዋ ዎና። ሄዋ ድራዉ ላፍያ መሄቱ ላባዋ ግድና፥ ዳርያዋንቱ ያቆባዋ ግዴድኖ። 43ሀዋዳን ሀኒደ፥ ያቆብ ሎይ ዱረቲደ፥ ዳሮ ዉድያ፥ ማጫ ቆማቱዋነ አቱማ ቆማቱዋ፥ ዳሮ ጋሎቱዋነ ሀረቱዋ ሞዴዳ።
دیاریکراوەکانی ئێستا:
ዶመ 30: DFBE
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
The Word for the World Ethiopia