ዶመ 11
11
ባብሎና ግምቢያ
(11:1-9)
1ሳኣ ቦላን ደእያ አሳይ ኡባይ ኮይሮ እት ዶናነ እት ቃላ ሃሳዪኖ። 2አሳቱ አዋይ ከስያ ባጋ ስሚደ ቤዳ ዎደ፥ ሳናኦረ ግያ ጋድያን ደምባ እቱዋ ደሚደ ያን፥ ኡቴድኖ።
3ኡንቱንቱ እቱ እቱዋ፥ “ሃ ዪተ፤ ጹብያ መደ፥ ታማን ጹጎይተ” ያጌድኖ። ኡንቱንቱ ሹቻ ድራዉ ጹብያ፥ ኡርቃ ድራዉ ሽድያ አኬድኖ፤ 4“ሃ ዪተ፤ ኑ ሱን ጼስሳናዉነ ቃይ ኑን ሀ ሳኣ ኡባ ቦላን ላለተናን አታናዉ እት ዎልቃማ ካታማነ ጼራይ ሳሉዋ ጋክያ እት ፖቅያ ኑዉ ኬጾይተ” ያጌድኖ።
5ሽን ጎዳይ አሳቱ ኬጼዳ ዎልቃማ ካታማነ ፖቅያ በአናዉ ዱገ ዎዳ፤ 6መና ጎዳይ “ሄኮ ኡንቱንቱ እት አሳ፤ ቃይ ኡንቱንቱ ኡባይካ እት ቃላን ሃሳዪኖ፤ ኡንቱንቱ ሀእ ሀዋ ኦናዉ ዶሞዋፐ ጉየ፥ ኡንቱንቱ ባረንቶ ኦናዉ ቆፖዋ ኡንቱንቶ ዳንዳየተናዌ አያይነ ባዋ። 7ሃ ዪተ፤ ዱገ ዎደ ኡንቱንቱ እቱ ሃሳይያ ቃላ እቱ ኤረና ማላ፥ ኡንቱንቱ ቃላ ዱማዮይተ” ያጌዳ። 8መና ጎዳይ ኡንቱንታ ሄዋፐ ሳኣ ኡባ ቦላን ላልና፥ ኡንቱንቱ ሄ ዎልቃማ ካታማ ኬጽያዋ አጊሼድኖ። 9መና ጎዳይ ሳኣ አሳ ቃላ ያን ዱማዬዳ ድራዉ፥ ሄ ካታማይ ባቤላ#11:9 ባቤላ፦ እብራዌዋን ሀ ሱን ብለይ ዋላከቴዳዋ ግያዋ ማላቴ። ጌተቴዳ። ጎዳይ ኡንቱንታ ሄዋፐ ሳኣ ኡባ ቦላን ላሌዳ።
ሴማፐ አብራማ ጋካናዉ
(11:10-32)
10ሴማ የለታይ ሀዋፐ ካሊደ ጻፈቴዳዋ። ባሻ ሃፐ ጉየ፥ ላኡ ላይ ግድና፥ ሴማ ላይይ 100 ግዴዳ ዎደ፥ ሴም አርፋክሳዳ የሌዳ። 11ሴም አርፋክሳዳ የሌዳዋፐ ጉየ፥ 500 ላይ ደኤዳ፤ ሀራ አቱማ ናናካ ማጫ ናናካ የሌዳ።
12አርፋክሳድ 35 ላይ ደኢደ፥ ሸላሀ የሌዳ፤ 13አርፋክሳድ ሸላሀ የሌዳዋፐ ጉየ፥ 403 ላይ ደኤዳ፤ ሀራ አቱማ ናናካ ማጫ ናናካ የሌዳ።
14ሸላህ 30 ላይ ደኢደ፥ ኤቦራ የሌዳ፤ 15ሸላህ ኤቦራ የሌዳዋፐ ጉየ፥ 403 ላይ ደኤዳ፤ ሀራ አቱማ ናናካ ማጫ ናናካ የሌዳ።
16ኤቦር 34 ላይ ደኢደ፥ ፔሌጋ የሌዳ፤ 17ኤቦር ፔሌጋ የሌዳዋፐ ጉየ፥ 430 ላይ ደኤዳ፤ ሀራ አቱማ ናናካ ማጫ ናናካ የሌዳ።
18ፔሌግ 30 ላይ ደኢደ፥ ራአ የሌዳ፤ 19ፔሌግ ራአ የሌዳዋፐ ጉየ፥ 209 ላይ ደኤዳ፤ ሀራ አቱማ ናናካ ማጫ ናናካ የሌዳ።
20ራኡ 32 ላይ ደኢደ፥ ሳሩጋ የሌዳ፤ 21ራኡ ሳሩጋ የሌዳዋፐ ጉየ፥ 207 ላይ ደኤዳ፤ ሀራ አቱማ ናናካ ማጫ ናናካ የሌዳ።
22ሳሩግ 30 ላይ ደኢደ፥ ናኮራ የሌዳ፤ 23ሳሩግ ናኮራ የሌዳዋፐ ጉየ፥ 200 ላይ ደኤዳ፤ ሀራ አቱማ ናናካ ማጫ ናናካ የሌዳ።
24ናኮር 29 ላይ ደኢደ፥ ታራ የሌዳ፤ 25ናኮር ታራ የሌዳዋፐ ጉየ፥ 119 ላይ ደኤዳ፤ ሀራ አቱማ ናናካ ማጫ ናናካ የሌዳ።
26ታር 70 ላይ ደኢደ፥ አብራማ፥ ናኮራነ ሃራና የሌዳ።
ታራ የለታ
27ታራ የለታይ ሀዋፐ ካሊደ ጻፈቴዳዋ። ታር አብራማ፥ ናኮራነ ሃራና የሌዳ፤ ሃራን ሎጻ የሌዳ። 28ሃራን ባረ አዉ ታር ፓጻ ደእሽን፥ ባረ የለቴዳ ካላዳዌቱዋ ጋድያን፥ ኡራ ግያ ዎልቃማ ካታማን ሀይቄዳ። 29አብራምነ ናኮርነ ላአቱካ አኬድኖ፤ አብራሞ ማቻት ሱንይ ሳሮ፤ ቃይ ናኮራ ማቻት ሱንይ ምልኮ፤ ምልካ ሃራና ናቶ፤ ሃራን ምልክዉነ ይስካንዉ አዉዋ። 30ሳራ ማንቶ፤ እዝዉ ናእ ባዋ።
31ታር ባረ ናኣ አብራማ፥ ባረ ናኣ ሃራና ናኣ ሎጻነ፥ ባረ ናኣ አብራሞ ማቻቶ ሳሮ አኪደ ከስና፥ ኡንቱንቱ እትፐ ካናነ ጋድያ ባናዉ ኡር ግያ ካላዳዌቱዋ ካታማፐ ደንዴድኖ፤ ሽን ኡንቱንቱ ካራነ ግያ ካታማ ጋካናዉ ቢደ፥ ያን ኡቴድኖ። 32ታር 205 ላይ ደኢደ፥ ካራነን ሀይቄዳ።
دیاریکراوەکانی ئێستا:
ዶመ 11: DFBE
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
The Word for the World Ethiopia