युहन्ना 7
7
खोपार्हाता बासा हिका पारबा
1इङकोन्हुअ्सो इसु गालिल माउजाता दोङ घुराइगिल्हि, कालाउबुङ वा यहुदियाता हानिलि माकिअ्हि। हाइदोनु यहुदि आगुवागेलाइ वासेहेङ सेअ्लि दाउपातेङ हिघाखे। 2एला यहुदिगेलाइको खोपार्हाता बासा हिका पारबा#७:२ खोपार्हाता बासा हिका पारबा जाइहेङ यहुदिगेलाइ बालि चेतेङ सान्तेका पारबा बुङ दोअ्घाखे। लोलि तोम्का हिघाहि।#लेबि २३:३४; न्याम १६:१३ 3इसुको ओनेगेलाइ वासेहेङ दोअ्हि, “इदोइ थामे लाअ्तेङ यहुदियाता हाने रो नाङको पागिल्का कामगेलाइ इन्ता बुङ नाङको चात्यागेलाइ तिनाको। 4जेदोङ द्याङ मिङचलेपालि भोखे, इङको सिपापा काम मापाखे। ना इदोइ कामगेलाइ पाखेना पानु ताइमिहेङ दुनियाहेङ तिङपापि।” 5(हाइपानु वाको ओनेगेलाइ बुङ वासेहेङ खान्धुर मापाघाखे।)
6इसु एम्बालाइहेङ दोअ्हि, “काङको ठिक पहर एला बुङ लोका मान्थु, कालाउबुङ नेलाइको भाअ्सिङ ते गोताङ पहर ठिक हि। 7दुनिया नेलाइहेङ दिगमिग पालि मादोखे, कालाउबुङ कासेहेङ ते खाङलि माकिअ्खे। हाइपानु दुनियाको बारेता इङकोको कामगेलाइ दुरजन हि दोअ्तेङ का दासि पिखा। 8नेलाइ पारबा मानिलि हानिसु, काचाहिँ एला मान्हाङका हाइदोनु काङको पहर लोनाङ मान्थु।” 9एम्बालाइहेङ एसा दोअ्तेङ वा गालिलताङ हि।
10कालाउबुङ इसुको ओनेगेलाइ पारबाता हानिकान्हुअ्सो वा बुङ हासुहेङ मागिपासिङ सिपापा इन्ता हानिहि। 11पारबाता यहुदि आगुवागेलाइ इसुहेङ भोदोङघाखे रो “वा हिता हि?” दोअ्तेङ हिअ्दोङघाखे।
12इन्ता हेन्जाङ द्याङगेलाइ वाको बारेता काथा पादोङघाखे। आधिमि दोअ्घाखे, “वा रेम्का हि।” आधिमि, “माको, याते द्याङगेलाइको मिँस्याता बाल्हा खिनिङ ह्वाअ्खे।” 13कालाउबुङ यहुदि आगुवागेलाइदोफा थितेङ वाको बारेता हासु बुङ बाहार काथा पालि मादोघाखे।
पारबाता इसुको बिद्या
14पारबाको माझाता इसु थानलिअ्ता दुल्हि रो बिद्या पिहि। 15यहुदि आगुवागेलाइ भारभुसाइ मानितेङ एसा दोअ्हि, “इदोइ द्याङ माधिरसिङ हेसापा इदोइझोको गिका जेङहि?”
16कालाउ इसु एम्बालाइहेङ दोअ्हि, “काङको धिरपाका बिद्या काङको माको, कालाउबुङ कासेहेङ दिङगिल्का परमेस्वरसो लोका। 17एदि हिदिङ द्याङ परमेस्वरको इछा साअ्लि खाङनु, काङको धिरपाका बिद्या परमेस्वर पाहासो लोका बे काङको ताइकोङ पाहासो लोका इङको वा ग्यावा। 18जाइ ताइकोङ पाहासो धुइखे, वा ताइकोङ मान भोखे, कालाउबुङ जाइ ताइमिहेङ दिङगिल्काको मान भोखे, इङको सत्ते रो वाता जाल मान्थुखे। 19हाइ मोसा नेलाइहेङ न्याम मापिहि? कालाउबुङ नेलाइ हासु बुङ इङको न्याम मासाअ्सुखेना। नेलाइ हाइपालि कासेहेङ सेअ्लि भोसुखेना?”
20इन्ता हिका द्याङगेलाइ दोअ्हि, “नासेहेङ मासान खोअ्का हि। हासु नासेहेङ सेअ्लि भोदोङखे?” 21इसु एम्बालाइहेङ दोअ्हि, “एलोङ काम का पाघा, कालाउ नेलाइ झाराङ इदोइता भारभुसाइ सुखेना। 22मोसा नेलाइहेङ खाताना#७:२२ खाताना जामाल येअ्निको जेङलाउ वाको सोअ्काको आगापाहाको धाले चेतेङ थालकाहेङ खाताना दोअ्खे। इदोइ यहुदिगेलाइको केराको रो पुनितताको चिनो हिघाहि। को रित पिका हि, (इदोइ मोसा पाहाको माको, कालाउबुङ आजुखालगेलाइसो) माइसाका दिनाता नेलाइ द्याङगेलाइहेङ खाताना पासुखेना।#लेबि १२:३; सिरजाइ १७:१० 23मोसाको पिका न्याम बाधा माज्याको दोअ्तेङ एदि हिदिङ द्याङ माइसाका दिनाता खाताना पानु, का एअ्मि द्याङहेङ माइसाका दिनाता एल्पाघा दोअ्तेङ हाइ नेलाइ कादोफा चेरताम्पासुखेना?#युहन्ना ५:९ 24द्याङको र्हाइ खान्तेङ माको, कालाउबुङ ठिकसो निया पासु।”
छुटकारा पिका ख्रिस्ट
25यरुसलेमको आधिमि द्याङगेलाइ दोअ्हि, “हाइ एम्बालाइको सेअ्लि भोका द्याङ याआङ माको कुनु? 26खाङसु, याते झाराङको आगाता खुला धुइदोङखे, कालाउबुङ एम्बालाइ यासेहेङ हाइदोङ मादोअ्खे। हाइ या दोङ ख्रिस्ट दोअ्तेङ धरम आगुवागेलाइ जातिङको मानिलि तोमहोइ ना हाइको? 27या हिसोसो लोहि केलाइ झाराङ गिन्हाखे। कालाउबुङ जेलाउ ख्रिस्ट तिङन्हावा, कालाउ वा हिसोसो लोहि हासु बुङ माग्यावा।”
28इसु थानता दुल्तेङ बिद्या पिलाउ, वा बारका गालाता दोअ्हि, “नेलाइ कासेहेङ नाल्सुखेना रो का हितासो लोका हिघा, इङको बुङ गिसुखेना। का ताइकोङ इछासो लोका माको, कालाउबुङ जाइ कासेहेङ दिङगिल्हि वा सत्ते हि। नेलाइ वासेहेङ मानाल्सुखेना। 29कालाउबुङ का वासेहेङ नाल्खा, हाइदोनु का वासो लोका रो वा कासेहेङ दिङगिल्का।”
30इदोङभाअ्सिङ एम्बालाइ इसुहेङ रिम्लि भोहि, कालाउबुङ हासुङ वासेहेङ खुर मालागाइहि, हाइदोनु वाको पहर एला बुङ लोलितोम्का मान्थुघाहि। 31कालाउबुङ इन्ता हिका हेन्जाङ द्याङगेलाइ वासेहेङ खान्धुर पाहि, कालाउ एम्बालाइ दोअ्हि, “जेलाउ ख्रिस्ट ल्वावा, कालाउ हाइ याको पाका कामगेलाइखान्तेङ हेन्जा सरबङ हिका कामगेलाइ वा पावा कुनु?”
इसुहेङ रिम्लि भोका
32जेलाउ इसुको बारेता द्याङगेलाइको काथा पाका फरिसिगेलाइ हिङहि, कालाउ मुल धामिगेलाइ रो फरिसिगेलाइ वासेहेङ रिम्लि थान र्हुम्काहेङ दिङगिल्हि।
33इसु दोअ्हि, “आरोङ आधे पहरथिकापा का नेलाइदोफा ह्याङका, इङकोन्हुअ्सो का कासेहेङ दिङगिल्काकोता हानाङका। 34नेलाइ कासेहेङ भोस्वाना, कालाउबुङ मानिङस्वाना रो जेता का हानाङका, नेलाइ इन्ता लोलि मादोस्वाना।”
35कालाउ यहुदिगेलाइ ताताइमिता दोअ्लि तेङहि, “या हिसो हानिलि खाङदोङखे रो केलाइ यासेहेङ दुसुलि माद्वाङ? हाइ या बोजात्यागेलाइको माझाता राइन्हातेङ हिका यहुदिगेलाइकोता हानितेङ बोजात्यागेलाइहेङ बिद्या पिलि भोखे? 36याको दोअ्का, ‘नेलाइ कासेहेङ भोस्वाना, कालाउबुङ मानिङस्वाना रो जेता का ह्याङका, नेलाइ लोलि मादोस्वाना’ इदोइ बचन हाइ?”
इसु सिन्हुका चि
37एला पारबाको न्हुअ्दिना रो पारबाको मुल दिनाता, जाअ्तेङ इसु बारका गालाता एसा दोअ्हि, “एदि हासुङ आम्लि किअ्नु इङको काङकोता ल्वाको रो आमाको।#लेबि २३:३६ 38जाइ कार्हुता खान्धुर पाखे, धरमकिताबको दोअ्का आन्सार ‘इङकोको कोन्धाङलिअ्तासो सिन्हुका चिको झोरागेलाइ झोतेङ ओल्ह्यावा।’#इजकिएल ४७:१; जकरिया १४:८” 39इदोइ काथा वा पुनित हाङसाको बारेता दोअ्का हिघाहि, जेदोङ पुनित हाङसा वार्हुता खान्धुर पाकालाइ निङलि तोम्का हिघाखे। हाइपानु पुनित हाङसा एलाथिकापा पिनाङ मान्थुघाहि, हाइदोनु इसुको पारताप एलाथिकापा जेङनाङ मान्थुघाहि।
द्याङगेलाइता बेमेल
40इदोइ काथा हिङका आधे द्याङगेलाइ दोअ्हि, “याते जातिङकोङ परमेस्वर पाहासो धुइका हिघाहि।” 41आधिमि दोअ्हि, “या ख्रिस्ट।” कालाउबुङ आधिमि दोअ्हि, “हाइ ख्रिस्ट गालिलसो ल्वावा कुनु? 42ख्रिस्ट दाउदको खालसो रो दाउदकोङ देरा बेथलेहेमसो ल्वाङ दोअ्तेङ हाइ धरमकिताब दोअ्का मान्थु कुनु?”#२ सामुएल ७:१२; यरमिया २३:५-६; मिका ५:२ 43एसापा द्याङगेलाइको माझाता वाको भाअ्सिङ बेमेल जेङहि। 44एम्बालाइता हेअ्मि वासेहेङ रिम्लि भोहि, कालाउबुङ वासेहेङ हासु बुङ खुर मालागाइहि।
यहुदि धरम मास्टरगेलाइको आखान्धुर
45कालाउ थानको र्हुम्कालाइ मुल धामिगेलाइ रो फरिसिगेलाइकोता लोहि। एम्बालाइ एबालाइहेङ दोअ्हि, “नेलाइ इङकोहेङ हाइपालि माचुमासुन्हा?” 46थान र्हुम्कालाइ दोअ्हि, “इदोइ द्याङको धुइका भाइपा ते केलाइ हेअ्लाउ हिङका मान्थुघान्हाहि।” 47फरिसिगेलाइ दोअ्हि, “इङको नेलाइहेङ सुदाङ आवाइपाहि ना हाइको? 48हाइ धरम मास्टरगेलाइ रो फरिसिगेलाइता हासुङ वार्हुता खान्धुर पाका हि? 49इन्ता जोम्का द्याङगेलाइ मोसाको न्याम मागिखे, कालाउबुङ एम्बालाइता साराप परिहोइ।”
50एम्बालाइता एअ्मि निकोदेमस, जाइ लाम्फा एअ्खे इसुकोता लोका हिघाखे, इङको दोअ्हि, 51“हाइ केलाइको न्यामहोइ दुसि द्याङको काथा माहिङसिङ रो इङको हाइ पाका हि मागिसिङ इङकोहेङ दुसिलि मिल्याङ कुनु?” 52एम्बालाइ वासेहेङ दोअ्हि, “हाइ ना बुङ गालिलको? धरमकिताब भोतेङ खाङ, कालाउ ग्याना, गालिलसो परमेस्वर पाहासो धुइका माओल्ह्याङ।”
53[कालाउ झाराङ द्याङगेलाइ ताताइको साअ्भारि हानिहि।
دیاریکراوەکانی ئێستا:
युहन्ना 7: DHIM
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2025 by Nepal Bible Society and Wycliffe Bible Translators, Inc.