Yonasi 2
2
Ŋuntiŋ Kirinŋ Yonasi wɔ rafɛ ki mwu-i
1Ŋuntiŋ ki i yɛrinŋ sinaŋ bɛɛ cin na Yonasi fɔn. Yonasi i tu niŋ yɛrinŋ ki ciiru sunŋ byaŋ fa cii byaŋ.
2Ntiŋ tu-i yɛrinŋ ki ciiru, ntiŋ i Ŋuntiŋ Kirinŋ ki, awɔ Kirinŋ ki rafɛ. 3Ntiŋ tu :
« Ŋì i míŋ tu ńʼwɔ cɔɔri ki ru, Ŋuntiŋ Kirinŋ,
míŋ ábɛɛ rafɛ-i, ábɛɛ i míŋ ńʼnupwulu,
ŋì i míŋ tu beŋ ki mancinŋ ki ru,
míŋ ŋuntan-i ábɛɛ cɛfan, ábɛɛ i míŋ ŋuntan wulu ki rama.
4Ábɛɛ míŋ kee bo-i wɛɛlufinju cuu ki ru,
jukwululuŋ kiri i míŋ sunla, yìrì i bili de míŋ sun.
5Míŋ wuru ǹʼmiiri-ra ńʼtu ábɛɛ míŋ kwɔ po san á ɲaanfɛ kɔ.
Nka míŋ faa-ra ábɔɔ Kirinfusinaŋ wɔlinŋ ki ja sɛbɛ.
6Wɛɛlufinju ki míŋ sunla wuru-i,
fɔ míŋ sifwuu ki wuru juu-ra tu kɔ,
ju ru ɲiŋ kiri i minimini míŋ ŋuniŋ ki sun.
7Míŋ jɛri wuru fɔ ju ki cɛru,
fɔ tɔnŋ kiri cɛ sɔɔmaŋ ki ru,
pwɔkulinŋ ki tɔnŋ naye wuru míŋ sun kɔ.
Nka ŋì i míŋ tu niŋ ta ki ru, míŋ Ŋuntiŋ Kirinŋ,
ńʼwɔ Kirinŋ, ábɛɛ míŋ ɲaninkulutɔnŋ cɛɛn po-i taanna.
8Míŋ wuru juu-ra beeni waarinŋ wɔ̀ ru,
míŋ ɲakilila bo-i ábɛɛ bi tɛ, Ŋuntiŋ Kirinŋ.
Míŋ ábɛɛ rafɛ-i,
mɔ́ɔ́n nafɛ wulu ki i so ábɛɛ sun áwɔ Kirinfusinaŋ wɔlinŋ ki ru.
9Nwɔ̀ri i arì gbɛ bili-la pɛli li sun,
nini na ábɔɔ shɔɔrinŋ ki kila kì.
10Míŋ a na saraka wɔri ábɛɛ tɛ,
ŋí i ábɔɔ shɔɔrinŋ ki pɔri shu ru,
niŋ fa ŋí i ńʼwɔ tɔnwɔri kiri bataa po arì saa tɛ. »
11Niŋ mani nu, Ŋuntiŋ Kirinŋ i ǹʼbi tu yɛrinŋ sinaŋ ki Yonasi jɛkɔ bo tankpiŋ ki sun.
دیاریکراوەکانی ئێستا:
Yonasi 2: JOB
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© Wycliffe Bible Translators, Inc.