Jenesis 2
2
1Nunee mak Nai Maromak halo hotu ona lalehan ho rai, ho buat hotu-hotu iha nia laran.
2Maromak halo hotu ona Nia serbisu, iha aban fali, loron dahitu, Nia deskansa. 3Nunee, Nia foo bensaun ba loron hitu nee no halo nia sai loron boot hosi loron sira seluk nee. Nia halo nunee, tanba Nia halo remata ona Nia serbisu, i iha loron hitu Nia deskansa. 4aNai Maromak halo lalehan ho rai nia istoria hanesan nee.
Nai Maromak halo mane ho feto
(Mateus 19:4-6; Marcos 10:4-9; 1 Korintu 6:16; 15:45,47; Efezu 5:31-33)
4bTempu NAI Maromak foin halo lalehan ho rai nee, 5seidauk iha ai ho duut oi-oin, tanba NAI Maromak seidauk foo udan. I seidauk iha ema hodi halo toos. 6Iha tempu nee, abu-abu mak sae hosi rai hodi habokon rai. 7I NAI Maromak foti rai ituan, kumu halo ema mane ida. I Nia huu iis tama ba nia inus, ema nee moris kedas.
8Liu tiha nee, NAI Maromak loke toos ida iha rai Eden, iha loro-sae nia sorin baa. I Nia tau ema nee hela iha toos nee. 9Iha toos nia laran, Nia halo moris ona ai huun oi-oin mesak furak deit, nebee foo fuan didiak para ema bele haan. Nia mos halo moris ai huun nebee foo fuan oin rua iha toos nee nia klaran. Se ema haan ai fuan hosi ai nee ida, nia bele moris nafatin. I se ema haan ai fuan hosi ai ida seluk nee, nia bele hatene saida mak diak i saida mak aat.
10Iha mota ida suli hosi toos nee. Mota nee fahe ba kadalak haat. 11Nia kadalak ida naran Pizón. Kadalak ida nee haleu rai Havila, nebee iha osan mean barak. 12Osan mean iha fatin nee, kualidade diak liu. Iha mos ai been morin, ho fatuk nabilan nebee folin karu. 13Mota boot nee nia kadalak rua, naran Gióm. Kadalak nee haleu rai Kuxe.#2:13:Uluk, rai nee nia naran Kuxe. Agora rai nee halo parte nasaun Etiópia ho nasaun Sudaun, nebee iha Áfrika loro-sae. 14Mota kadalak tolu naran Tigre. Kadalak ida nee baliza ho rai Asíria iha loro-sae nia sorin baa.#2:14:Asíria nee agora mak nasaun Irake. Mota kadalak haat naran Eufrates.
15NAI Maromak tau ema nee hela iha toos Eden, hodi tau matan ba toos nee. 16Nia foo orden ba ema nee dehan, “O bele haan ai fuan saida deit, hosi ai fuan hotu-hotu iha toos nee. 17Maibee iha ai huun ida nia fuan mak o la bele haan. Tanba ai fuan nee mak foo hatene kona ba saida mak diak i saida mak aat. Se o haan, o mate kedas.”
18I NAI Maromak hatete tan, “Ema nee moris mesak deit la diak. Nunee Hau sei halo maluk ida foo ba nia.”
19Iha tempu nee, NAI Maromak raut rai, kumu halo animal oi-oin ho manu fuik hotu-hotu. I Nia lori animal ho manu fuik sira nee ba iha ema mane nee, para tau naran ba sira. 20Depois ema nee tau naran ba animal sira nee ho manu fuik hotu-hotu, ida-idak ho nia naran. Maibee nia rasik seidauk iha maluk hodi ajuda nia.
21Entaun, NAI Maromak halo ema nee toba dukur tiha. Momentu nia toba, NAI Maromak hasai nia ruin knosen ida, depois taka fila fali kanek nee. 22Hosi ruin nee, Nia halo feto ida. I Nia lori feto nee baa entrega ba mane. 23Haree feto nee, mane nee dehan,
“Nee mak foin par ho hau!
Nia ruin hasai hosi hau nia ruin.
Nia isin mos hasai hosi hau nia isin.
Tanba nia sai hosi mane, nee mak hau tau nia naran ‘feto’.”#2:23:Iha lian Ebreu ‘mane’ dehan ish, i ‘feto’ bolu isha. Nunee iha nee dehan, “isha (feto) mai hosi ish (mane).”
24Tanba nee, mane sei husik nia inan-aman
hodi baa moris neon ida laran ida ho nia feen, i sira sai ida.
25Momentu nee, sira nain rua isin molik, maibee sira la senti moe.
دیاریکراوەکانی ئێستا:
Jenesis 2: BTDT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2024 Wycliffe Timor-Leste.