Madiu 4
4
Sadanimi Yesu la andisaya ei
(Maka 1:12-13; Luka 4:1-13)
1Go dinare Epe Yaakopi Sipiridimi Yesu monde wenaali na-aya lena ma-paisaya. Yesu para Sadanimi la andenaya ma-paisaya. 2Yesu go para ainyare yapi da ei ali ria laapo pange rimbada ei ali ria laapopu go para aisaya. Gupuma nipumi enda na-ne aisayandare reame komisaya. 3Gupuma Sadanimi Yesu repara ipuma lalore, Neere ora Godena naki alindare gore go suna wia kananu muma palawa waruma mea na, lisaya. 4Go eimi Sadanina angele yango liada ara Yesumi lalore, Mo Godena angele wia bukana gurupa lea, lisaya.
Palawa komea nelemendare
alimi endoaya ei na-milimi.
Go eiri ora lea, Alimi Godena angaa para
ipuaya angelenu komea pangoma
endoaya ei meapeya, lea, lisaya.
5Go angele loma Sadanimi Yesu mo Godena ree anda Diurusaleme para karu puma alinau puae anda kulu mandaa pua ma-aisaya. 6Gupuma Sadanimi Yesu para lalore gupi lisaya. Neere Godena naki deandare go alena piruma no suna pua pongola lisaya. Akepeare ande Godena angele wia bukame gupi leanda lalo.
Godeme nipuna eindiolonu para
nena angenu koyapanayanda
nimuna ki mandaa lopainyayanda
angele dape eina lalo lisaya.
7Yesumi lalore, Mo Godena angele wia bukame lalore,
Neeme nena Reali Gode para wala na-la andape,
lea, lisaya.
8-9Sadanimi Yesu wala karu so kana rumu menda para paisaya. Gupuma nipumi mo andasu raayo pange olemolenu raayosi walala ara lalore, Yesu neeme rumu yaruaoma ni para panda pilindare gore mo olemolenu raayo nee para ora gula lisaya.
10Gupuma Yesumi Sadanina angele yango liada ara lalore, Sadani nee pane pu, lisaya. Mo Godena angele wia bukame lalore,
Nena Godena angele pangoma
nipu para komea panda punyaoma
yainya pape, lea, lisaya.
11Go eina Sadanimi Yesu minyapalaoma paisaya dina mo Godena eindiolo alinumi Yesu epa rambamisimiya.
Yesumi mo Galili nane pupudengi kini pisaya ei
(Maka 1:14-15; Luka 4:14-15)
12Mo Dioni Baparaisiri pape kuda para pirisaya eiri Yesumi ambala pangoma mo Galili nane paisaya. 13Gupuma nipumi Nasarere anda giaoma mo ipa repara ae anda Kapeneame lee andaa ree anda nane popisaya. Gupuma mo Sebulunina pange Napidalina ruru laapo aisimiya andasu para pua aisaya. 14Go pisaya eiri Godena poropedi ali Aisayame lisaya ei ora minyaya pisaya.
15Sebuluni pange Napadali andasu laapo
ipa nane pula porana aepe.
Diodani mone pana aya.
Galili ande Isaraelimi na-mandu rangala pae
repaana andasu.
16Go para aisimiya wenaalinuri
rimbale para aisimiya.
Gupuma nimu ora koae rupa rimbale para
aisimiyapare paa pi ei andaai andisimiya.
Gupuma mo paa ora nimu para paisaya.
17Go dina Yesumi nimu para lalore, Ambiare Godena Yaa Nane Wia Ki Rambuao-aya Eiri ora repara ipulale nimimi peme koae einu ora giaoma kone perekeyo sialepape, lisaya.
Yesumi repali muaisimiya alinu malapu wi lisaya ei
(Maka 1:16-20; Luka 5:1-11)
18Gupuma Yesu mo Galili ipa lee repaa lena popisaya. Gupuma go para Saimono nipuna bi menda Pida pange nipuna ame Enduru laapo aisipiya. Repali mulame mo ipa lee para niipuna angona nu ma-lopada-ainyaloma andisaya. 19Gupuma Yesumi niipu para wi loma lalore, Niipiri repali muaepe ali laapo alinu mula pepe rupa wadoame lawale nina kou nane raluma ipulupa, lisaya. 20Gupuma mo ameayame niipuna angona nu mo ipa para minyapalaoma Yesuna kou nane raluma paisipiya.
21-22Gupuma engeisinda mo para puma pua andisayapare ameaya laapo menda si laapo Dieimusi Dioni ameayame niipuna apa Sepedi pange pupudengi nao-ae alinu menda paranu pange piri niipuna angona nu rambulala pirinya Yesumi andisaya. Gupuma Yesumi niipu para lalore, Niipi pange na kou nane raluma ipulupa lisaya. Go lisayanda niipuna apa Sepedi pange mo angona nu mo kawaso para pa winya minyapalaoma Yesuna kou nane raluma paisipiya.
Yesu nipumi yainya ae wenaalinu ma-epeaisaya ei
(Luka 6:17-19)
23Yesumi Galili andasu raayosi para pamuala ara Gode repara yainya puae anda paranu Godena Ki Rambuao-aya Eina epe angele wala eiri pamisaya. Gupuma nipumi one mone yainya ae wenaalinu raayo ma-epeaisaya. 24Yesumi go au pisaya einu Siria andasu raayosi paranu lari pamisimiya. Go einare wenaalinumi one mone yainya ae repaa raayo nipu repara karu ipisimiya. Koae remo piri wenaalinu pange kalu para yainya ae wenaalinu pange lewalewa pu pora pamuape-nae wenaali raayo Yesumi ma-epeaisaya. 25Wenaali andapu Galili naneyame aoma pange ande Ki Laapo Anda naneyame aoma pange Diurusaleme andaa ree anda naneyame aoma pange Diudia andasu naneyame aoma pange Diodani ipa mone ree naneyame aoma nipu paisaya para raluma paisimiya.
دیاریکراوەکانی ئێستا:
Madiu 4: POLENT23
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.