ယောဟန် 3
3
ဒုတိယ မွီးဖွားခြင်း အကြောင်း
1 ဖာရိရှဲအဖွဲ့သားရို့အထဲမာ နိကောဒန်နာမည်န လူတစ်ယောက် ဟိလီရေ။ သူစာ ယုဒလူမျိုးရို့မာ ဂေါင်းဆောင် တစ်ယောက် ဖြစ်တေ။ 2သူစာ တစ်ရက်နိ ညဉ့်မာ ယေရှုတို့ လာရို့ ပြောလီရေ၊ “ဆရာ၊ ကိုယ်ဘင် ထာဝရဘုရားက ကြွလာစာ ဆရာ တစ်ယောက် ဖြစ်တေဆိုစာကို အကျွန်ရို့ သိပါရေ။ ထာဝရဘုရား ကိုယ်ဘင်နအတူ မဟိဆိုကေ ဒေပိုင် အံ့ဩဖွယ်အလုပ်တိကို ကိုယ်ဘင် တစ်ခါလည်း လုပ်နိုင်ဖို့ မဟုတ်ပါ။”
3ယေရှုစာ ပြောလီရေ၊ “ငါ ကိုယ်ဘင်ကို အမှန် ပြောရေ၊ ဒုတိယ မွီးဖွားခြင်းကို မခံသူစာ ထာဝရဘုရား၏ နိုင်ငံတော်တို့ ဝင်ရလိမည် မဟုတ်။” 4ယင်းခါ နိကောဒန်စာ သူ့ကို မီးလီရေ၊ “အသက်ကြီးသူ တစ်ယောက် ဇာပိုင်ပျင်ရို့ အရာတစ်ပြန် မွီးဖွားနိုင်ပါဖို့လည်း? အမိဝမ်းထဲတို့ ပြန်ဝင်ရို့ ဒုတိယခေါက် မွီးဖွားနိုင်ပါဖို့လော?”
5ယေရှုစာ ပြောလီရေ၊ “ငါ ကိုယ်ဘင်ကို အမှန် ပြောရေ၊ အသူမဆို ရီန သန့်ရှင်းသောဝိညာဉ်တော်က မမွီးဖွားဆိုကေ သူစာ ထာဝရဘုရား၏ နိုင်ငံတော်တို့ ဝင်ရလိမည် မဟုတ်။ 6လူတစ်ယောက်မာ ကိုယ်ခန္ဓာစာ အမိအဖ နှစ်ယောက်က မွီးဖွားရေ၊ ယေကေလည်း လူတစ်ယောက်မာ ဝိညာဉ်၏ အသက်စာ ဝိညာဉ်တော်အားန မွီးဖွားရေ။ 7ဒုတိယ မွီးဖွားခြင်းကို ခံယူရဖို့ ဟို့ ငါ ကိုယ်ဘင်ကို ပြောလီရေ။ ထိုစကားကို ကြားရို့ ကိုယ်ဘင် အံ့ဩဖို့စာ တစ်ခုလည်း မဟိ။ 8လီစာ ကိုယ်လိုရာဖက်ကို တိုက်လားရေ အရာ ကိုယ်ဘင် ထိုလီအသံကို ကြားရရေ။ ယေကေလည်း လီစာ ဇာဖက်က လာရို့ ဇာဖက်တို့ လားရေဆိုစာကို ကိုယ်ဘင် မသိ။ သန့်ရှင်းသောဝိညာဉ်တော်က မွီးဖွားသူရို့လည်း ယင်းပိုင်တထန် ဖြစ်ကတ်တေ။” 9နိကောဒန်စာ ယေရှုကို ပြောလီရေ၊ “ဒေသျှင့် ဇာပိုင် ဖြစ်နိုင်ပါဖို့လည်း?”
10ယင်းခါ ယေရှုစာ သူ့ကို ပြောလီရေ၊ “ကိုယ်ဘင် ဣသရေလလူမျိုးရို့မာ ကျမ်းဆရာတစ်ယောက် ဖြစ်ရို့အတိုင်း ဒေ အကြောင်းအရာတိကို ဇာဖို့ နားမလည်စာလည်း? 11ငါ ကိုယ်ဘင်ကို အမှန် ပြောရေ၊ ငါရို့ ကိုယ်သိစာ အကြောင်းအရာကို ပြောရေ အရာ ကိုယ်မြင်စာ အကြောင်းအရာကို သက်သီပီးရေ။ ယေကေလည်း ငါရို့ ပီးကတ်စာ သက်သီကို ကိုယ်ဘင်ရို့ ငြင်းပယ်ကတ်တေ။ 12ငါ ကိုယ်ဘင်ရို့ကို လောကနဆိုင်စာတိကို ပြောပြရေခါ ကိုယ်ဘင်ရို့ မကျုံကတ်။ ယင်းပိုင်ဆိုကေ ဂေါင်းခင်ဘုံနဆိုင်စာတိကို ပြောပြရေဆိုကေ ကိုယ်ဘင်ရို့ ဇာပိုင်ပျင်ရို့ ကျုံကတ်ဖို့လည်း? 13ဂေါင်းခင်ဘုံက ဆင်းလာစာ မနုသသားတော်ကို ပယ်ရို့ အရာတစ်ယောက်လည်း ဂေါင်းခင်ဘုံတို့ မတက်ဖူးကတ်။ 14မောရှေစာ သဲကန္တာရတောပြင်မာ မြိန်ရုပ်တုကို ဒုတ်မာ ချိုင်ရို့ မြှောင့်ထားလီရေ။ ယင်းပိုင်တထန် မနုသသားတော်လည်း အမြင့်မာ မြှောင့်ထားခြင်းကို ခံရလိမည်၊ 15အကြောင်းကား မနုသသားတော်ကို ကျုံသူရို့ အားကုံးသူ ထာဝရအသက်ကို ရကတ်ပတ်စီအတွက် ဖြစ်တေ။
တစ်ပါးတည်းသားတော်ကို လောကတို့ ရွှတ်ခြင်း
16“ထာဝရဘုရားစာ လောကသားရို့ကို ကောင်းကောင်း ချစ်လီရေ။ ယင်းအတွက်န သူစာ ကိုယ့်မာဟိစာ တစ်ပါးတည်း သားတော်ကို ဒေ လောကတို့ ရွှတ်လိုက်လီရေ၊ အကြောင်းကား သားတော်ကို ကျုံသူရို့စာ ပျက်စီးခြင်းတို့ မရောက်ဘိုင်းန ထာဝရအသက်ကို ရကတ်ပတ်စီအတွက် ဖြစ်တေ။ 17ထာဝရဘုရားစာ လောကသားရို့ကို အပြစ်တင်ဖို့အတွက် သားတော်ကို ဒေ လောကတို့ ရွှတ်လိုက်လီစာ မဟုတ်။ ယေကေလည်း လောကသားရို့ သားတော်ကနီရို့ ကယ်တင်ခြင်းကို ရကတ်ပတ်စီအတွက် သားတော်ကို ဒေ လောကတို့ ရွှတ်လိုက်လီစာ ဖြစ်တေ။ 18ထိုသားတော်ကို ကျုံသူရို့စာ အပြစ်တင်ခြင်းကို မခံရဗျာ၊ ယေကေလည်း ထာဝရဘုရား၏ တစ်ပါးတည်း သားတော်ကို မကျုံသူရို့စာ အယင်ကပင် အပြစ်တင်ခြင်းကို ခံရကတ်ပျာ။ 19အပြစ်တင်ခြင်း အကြောင်းကား ဒေပိုင်၊ အလင်းစာ ဒေ လောကတို့ ရောက်လာလီရေ။ ယေကေလည်း လောကသားရို့စာ အလင်းကိုထက်ပင် အမိုက်မှောင်ကို အများ နှစ်သက်ကတ်တေ၊ အကြောင်းကား သူရို့စာ ဆိုးယုတ်စာ အလုပ်ကို လုပ်နီကတ်တေ။ 20ဆိုးယုတ်စာ အလုပ်ကို လုပ်နီသူရို့စာ အလင်းကို မုန်းကတ်တေ အရာ သူရို့စာ အလင်းနားတို့ မလာကတ်၊ အကြောင်းကား အလင်းစာ သူရို့မာ ဆိုးယုတ်စာ အလုပ်တိကို ဖေါ်ပြရေ။ 21ယေကေလည်း မှန်ကန်ခြင်းလမ်းမာ လားသူရို့စာ ကိုယ်လုပ်စာ အလုပ်တိ ထာဝရဘုရား၏ အလိုတော်အတိုင်း လုပ်တေဆိုစာကို ပေါ်ထွန်းပတ်စီအတွက် သူရို့စာ အလင်းတို့ လာကတ်တေ။”
ရီနှစ်မင်္ဂလာပီးသူ ယောဟန် သက်သီပီးခြင်း
22ယင်းနောက် ယေရှုန သူ့တပည့်ရို့စာ ယုဒပြည်နယ်မာဟိစာ ရွာတိတို့ ကြွကတ်လီရေ။ ထိုပြည်နယ်မာ သူစာ တပည့်ရို့နအတူ လိုင်းကေရက် နီရို့ လူရို့ကို ရီနှစ်မင်္ဂလာ ပီးလီရေ။ 23လူရို့စာ ရီနှစ်မင်္ဂလာ ခံယူဖို့အတွက် ရီနှစ်မင်္ဂလာပီးသူ ယောဟန်တို့ လာကတ်လီရေ။ ယင်းခါ ရှာလိမ်မြို့အနားက အဲနုန်ဆိုစာ နေရာတစ်ခုမာ ရီအများကြီး ဟိလီရေ။ ယင်းအတွက်န သူစာ လူရို့ကို ယင်းနေရာမာ ရီနှစ်မင်္ဂလာ ပီးရို့ နီလီရေ။ 24ယောဟန် ထောင်မကျခင်အယင်က ဒေ ဟိသမျ အကြောင်းအရာ ဖြစ်ပျက်လီရေ။
25ယင်းအချိန်ခါ ယောဟန် တပည့်ရို့စာ ယုဒလူမျိုး တစ်ယောက်န ဘာသာရေး ထုံးစဉ်အတိုင်း စင်ကြယ်ခြင်း အကြောင်းကို ယူရို့ အငြင်းအခုံ ဖြစ်ကတ်လီရေ။ 26ယင်းနောက် ယောဟန် တပည့်ရို့စာ ယောဟန်တို့ လာရို့ ပြောကတ်လီရေ၊ “ဆရာ၊ ယော်ဒန်ချောင်း ကမ်းတစ်ဖက်က ကိုယ်ဘင်တို့ လာလီစာ လူတစ်ယောက်ကို မှတ်ရပါသိလော? သူ့အကြောင်းကို ကိုယ်ဘင် သက်သီ ပီးလီပါရေ။ ကြည့်ပါ၊ သူစာ ဒေဂု လူရို့ကို ရီနှစ်မင်္ဂလာ ပီးနီပါရေ အရာ လူရို့ အားကုံးသူ သူ့တို့ လားကတ်ပါရေ။”
27ယောဟန်စာ ပြောလီရေ၊ “ဂေါင်းခင်ဘုံမာဟိစာ ထာဝရဘုရားက မပီးကေ လူစာ တစ်ခုကိုလည်း မရနိုင်။ 28‘ငါ ခရစ်တော် မဟုတ်၊ ယေကေလည်း ထာဝရဘုရား ငါ့ကို ခရစ်တော် ကြွမလာခင်အယင်က ရွှတ်လိုက်လီစာ ဖြစ်တေ’ ဟို့ ငါ ပြောလီစာ စကားကို နင်ရို့ ကြားကတ်ပျာ။ 29မင်္ဂလာဆောင်စာ သမီးကို ရသူစာ မင်္ဂလာဆောင်စာ သမက် ဖြစ်တေ။ သမက်မာ မိတ်ဆွေစာ သမက်အနားမာ ရပ်ရို့ သူ့စကားကို နားထောင်နီရေ အရာ သူစာ သမက် စကားအသံကို ကြားရို့ ကောင်းကောင်း ဝမ်းသာရေ။ ယင်းအတွက်န ဒေနိခါ ငါ့မာလည်း ဝမ်းသာခြင်းန ပြည့်စုံဗျာ။ 30ယင်းအတွက်န သူစာ တိုးတက်စီချင်ရေ အရာ ငါစာ ဆုတ်ယုတ်ချင်ရေ။”
ဂေါင်းခင်ဘုံက ကြွလာစာ အသျှင်
31အထက်က ဆင်းလာသူစာ အားကုံးသူထက် အကြီးမြတ်ဆုံး ဖြစ်တေ။ ကမ္ဘာမြေကြီးက မွီးဖွားလာသူစာ ကမ္ဘာလူ့သား ဖြစ်တေ။ ယင်းအတွက်န သူစာ ကမ္ဘာအကြောင်းကိုရာ ပြောပြနိုင်ရေ၊ ယေကေလည်း ဂေါင်းခင်ဘုံက ဆင်းလာသူစာ အားကုံးသူထက် အကြီးမြတ်ဆုံး ဖြစ်တေ။ 32ယင်းအတွက်န အသျှင်ယေရှုစာ ကိုယ်ကြားခစာ-မြင်ခစာ အကြောင်းတိကို လူရို့ဘားမာ သက်သီပီးရေ၊ ယေကေလည်း သူပီးစာ သက်သီကို လူရို့ တစ်ယောက်လည်း လက်မခံကတ်။ 33သူပီးစာ သက်သီကို လက်ခံသူစာ ထာဝရဘုရား၏ စကားတော် မှန်ရေဆိုစာကို သက်သီပြရေ။ 34ထာဝရဘုရား ရွှတ်လိုက်သူစာ ထာဝရဘုရား၏ စကားတော်ကို ပြောရေ၊ အကြောင်းကား ထာဝရဘုရား သူ့ကို အပြည့်အစုံ သန့်ရှင်းသောဝိညာဉ်တော် ပီးလီရေ။ 35အဖစာ ကိုယ့်သားတော်ကို ချစ်တေအတွက်န ဟိသမျ တန်ခိုးအာဏာကို သားတော်အလက်မာ အပ်ပီးလီရေ။ 36သားတော်ကို ကျုံသူစာ ထာဝရအသက်ကို ရရေ၊ ယေကေလည်း သားတော်၏ စကားကို မလိုက်နာသူစာ အသက်ကို ရလိမည် မဟုတ်။ ယင်းထက်ပင် ထာဝရဘုရား၏ အငြိုဒေါသစာ အမြဲတိုင်း သူ့အထက်က ဟိလိမည်။
دیاریکراوەکانی ئێستا:
ယောဟန် 3: RMZ
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
©2023 Wycliffe Bible Translators, Inc.