Mateo 8
8
Inpamapteng Jesus I Mansekit A Paladoy Kolid To
(Mark 1:40-45; Luke 5:12-16)
1Idi chimalong si Jesus alid ma chontog, iyonod na chakel a too. 2Et gwara wiy dahin paladoy kolid ton kimowan alid kad-an Jesus a iyantalimohod cha sangoanan ton kigwan to i “Afo, amtak i mebedin a a-kalen mo ja sahit ko no piyan mo say eg konen na too i ensekigak.”
3Et in-okjad Jesus i diwa thon kiyapkap to ma dahin kigwan to i “Piyan ko. Edinis ka wa.” Et epiged a chakos i kolid niwa dahi. 4Et inbilin Jesus i “Iki-ngelim! Enog i ingwanggwanggwang iyay cha angken siyen too, no diket pandiritso ked kad-an na pari say metaen to i epiged i kolid mo. Et itangdal mod Afo Chiyos i inbilin Moses say amtaen na tothoo i edinis ka wa.”
Inpamapteng Jesus I Bagaen Na Kapitan
(Luke 7:1-10)
5Idi mimothok si Jesus cha Capernaum, gwariy sa-kin kapitan na Romano a sosolcharon imaspol a ekikaasin kigwan to i 6“Pangpangaasim, Afo, igwan i bagaen kon man-oolig cha baliy ko. Eg mahakiykiy tan paladoy digat to.”
7Et kigwan Jesus i “Emoy say pemapteng koy sahit to.”
8Nem insongbat niwa kapitan i “Afo, angken eg ka onkowan tep ekak maykarin onsekep ked baliy ko. Nem ibilin mo bengat tep on-anay i esel mon mengipamapteng na bagaen ko. 9Tep amtak i maypangkep na karebengan tep si-kak, gwariy ekayang a naiyanbili-bilin cha si-kak, tan gwara ngoy sosolcharon nabinili-bilin ko. No konen kod sa-ki i ‘Taha wed man,’ onkowan ma. Et no konen ko pay cha sa-ki i ‘Gomali,’ onkowan ali. Et no konen ko pay cha bagaen ko i ‘Amag mo jay,’ a-magen to.”
10Idi inki-ngelan Jesus iwan, iyasdaaw et kigwan tod tothoon kaono-onod cha si-katho i “Sejay a konen kod si-kayo, podnon angken chiya Israel, nagwariy sipol kon Hodjon gwariy pamati thon inges niya nat Hodjo. 11Konen kod si-kayo i chakel aliy medepod emiin a soli na dobong a mekidihob cha Abraham, si Isaac, tan si Jacob cha pantorayan Afo Chiyos. 12Nem sema ngo iren Hodjos a naiyannamnama iren mayka-chom cha pantorayan Afo Chiyos, chakel i maykepil cha kawad-an na enbolinget et onngogngogngog iren kale-kaletketen cha ngoy sangi red man.” 13Et kigwan men Jesus cha kapitan i “Taha betik, seta piyatim a mepesamak, metongpal.” Et mimapteng iwa bagaen na kapitan nonta ngon kosto-koston oras.
Inpamapteng Jesus I Chakel A Too
(Mark 1:29-34; Luke 4:38-41)
14Idi kimowan si Jesus cha baliy Peter, mita thos inepon Peter a biin man-oolig tep pimetang. 15Iyagchian toy diwa tho et iya-kal miy petang to. Et bimangon ma iwa bii et pikan tos Jesus.
16Idi iyalnek i akow, intolod na tood kad-an Jesus i chakel a iya-iya-janan na dimonyos. Chiyagchag Jesus ira ma dimonyos na esel to bengat, tan inpamapteng to ngon emiin i mansekit. 17Epasamak iwan say metongpal i kigwan Isaiah a profita a “Ingkal toy digat tan sahit na angel tayo.” #8:17 Isaiah 53:4
Sema Iren Digat Na Naekiolop Cha Jesus
(Luke 9:57-62)
18Nonta sa-kin akow, miten Jesus i chakel a esa-nop a tood kad-an to, isonga binilin toy disipolos to i “Onba-sil kiyed ma piig na baybay.” 19Et gwara wiy maistoro na dinteg a imesop cha Jesus a kigwan to i “Maistoro, mekiolopak cha emiin a konan mo.”
20Insongbat Jesus i “Gwariy dohang a naiyan-iyanan na tabaw, tan gwariy ogong na titit, nem si-kak ngon Anak na Too, nagwariy koston dogad a najimo-kowan ko.” #8:20 Sema Anak na Too i ngaran a naiyosal Jesus nonta kigwan toy maypangkep na angel to. Sema iren echom a naengachal na Biblia, nakigwan cha i inges toy ngaran a iyayngaran cha Daniel 7:13-14. Sema iren echom a naengachal, nakigwan cha i sema engibanagan to, sema kinatoon Jesus tep iyay-anak a too. Sema ngon echom, nakigwan cha i sema engibanagan to, sema kinachiyos Jesus tep si-kathos Chiyos. Tan sema echom ngo pay, nakigwan cha i sema engibanagan to, sema chegwa.
21Et gwara ngoy sa-kin disipolon Jesus a kigwan to i “Afo, asanem engkay, onkowanak nin a mengibeken awak.”
22Nem insongbat Jesus i “Kay-olop ka wed si-kak. Iolay mon sema iren singen etiy i mengibeka iren ma etiy.” #8:22 Kigwan Jesus i singen etiy ira ma too tep eg ira ematid si-katho.
Intalnen Jesus I Mapkes A Chahem Tan Ekayang A Chalojon
(Mark 4:35-41; Luke 8:22-25)
23Et iyankeb-ong si Jesus cha bangka et ekiolop ira ma disipolos to. 24Nonta gwara ired baybay, biglen pimekes i chahem a kesopsopjat i chalojon cha sekep na bangka et chanchanin melned. Nem si Jesus enan, manjo-jo-gwek. 25Isonga, bingon iren ma disipolos ton kigwan cha i “Afo, tolongi mo kawi! Chanchanin metiy kiya cha!”
26Et kigwan men Jesus i “Niyana ketahot kayo? Apay nga enka-jas bengat i pamati yod si-kak?” Et bimangon mes Jesus a kigwan tod chahem tan chalojon i on-eket et biglen simalcheng a emiin. 27Iyasdaaw a pasiya ira ma disipolos a kigwan cha i “Siya emo ja too? Apay nga angken chahem tan chalojon, napiyati ra?”
Sema Chegwen Dalekin Gwared Gadara A Iya-janan Na Dimonyos
(Mark 5:1-20; Luke 8:26-39)
28Intoloy iren Jesus a bima-sil chiwa baybay ingkathod mimothok ired sahop a naiyan-iyanan iren ma i-Gadara. #8:28 Gadara Sema ngaran niya dogad cha echom a sola-solat, Gerasa ono Gergesa. Idi imepas si Jesus chiwa bangka, gwariy chegwen dalekin iya-janan ira na dimonyos a engaspol cha si-kathon emangkedafod dogad a iyaybekaan na iyangketiy. Emanekot a pasiya ira ma daleki, isonga nagwariy mengitoled a onkowan chiwan. 29Et kimeljaw iren kigwan cha i “Si-kam a Anak Afo Chiyos, ngoy pekibibiyangan mod si-kawi? Kimowan ka din chosaen mo kawi no aneng pay i koston timpo?”
30Iyaytompong a gwariy chakel a kechel a kekinakan cha ki-ki-nan, 31isonga iyadok iren ma dimonyos si Jesus i “No chagchagen mo kawi, itolok mo kawin onkowan ired ma kechel say may-i-jan kawid si-kara.”
32Et kigwan Jesus i “Tiwa, tahejo.” Bintihan ma iren ma dimonyos ira ma daleki et iyay-ejan ired ma kechel. Et sema ngo iren kechel, iyanbetik ma iren chimalong a iya-kas mala ired ma baybay et iyalned ma ira.
33Sema ngo iren manbanbantay na kechel, iyanbetik iren kimowan cha siyodad a engigwanggwanggwang na emiin, pati sema epasamak ired ma chegwen dalekin iya-janan na dimonyos. 34Isonga, emiin a tood ma siyodad, kimowan ired kad-an Jesus a mekitebal. Idi mita ra, ekiadok iren bebtihan to ma sahop cha.
دیاریکراوەکانی ئێستا:
Mateo 8: KAR
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2023 Wycliffe Bible Translators, Inc. All rights reserved.