मत्ती 19
19
तलाक चो सवाल
1जिदलदाय ईशु ऐ गोठमन बोललो, तेबे गलील ले गेलो; आउर यरदन लंदी चो हुनपाट यहूदिया चो परदेश ने ईलो। 2तेबे बड़े भीड़ हुनचो पाट-पाट होली, आउर हुन हुता हुनमन के चेंगा करलो। 3तेबे फरीसी हुनचो परीक्षा करतो काजे लगे ऐऊन भाती बोलुक मुरयाला, “काय हर गोटक कारन ले आपलो बायले के छांड़तोर अच्छा आय?” 4हुन जबाप दिलो, “काय तुमनमन नी पड़लास कि जोन हुनमन के बनालो, हुन मुर ले नर आउर नारी बनाऊन भाती बल्लो, 5‘ऐई लागुन माने आपलो आया बुआ ले अलग होऊन भाती आपलो बायले संगे रये दे आउर हुनमन दुनो गोटक देंह होदे?’ 6आउर हुनमन अदायं दुय नुआत, मान्तर गोटक देंह आत। ऐईकाजे जोन के माहापुरू जोड़लो से, हुनके माने अलग नी करोत।” 7हुनमन हुनचो ले बल्ला, “फेर मूसा ऐ केंव ठेबालो कि छाड़पतर देऊन भाती हुनके छांडुन देओत?” 8हुन हुनमन ले बल्लो, “मूसा तुमचो मन चो कठरता चो लागुन तुमके आपलो-आपलो बायले के छांडुन देतोर हुकुम दिलो, मान्तर मुर ले असन नी रली। 9आउर मय तुमचो ले बलेंसें, कि जोन कोनी बेबीचार के छांडुन आउर कोनी कारन ले आपलो बायले के छांडुन भाती दुसर ले बिहा होयेदे, हुन बेबीचार करू आय; आउर जोन हुन छांडलो बिती ले बिहा होयेदे, हुन बले बेबीचार करू आय।”
10चेलामन हुनचो ले बल्ला, “अगर मनुक चो बायले लेकी संगे असन नाता आय, तो बिहा करतोर अच्छा नुआय।” 11हुन हुनमन ले बल्लो, “सपाय ऐ बचन गरहन नी करूक सकोत, मात्र हुनमन जोनमन के ऐ दान दियाय गेली से। 12कसनबल्लोने खिन्डिक बायलामन असन आत, जोन आया चो गरब ची ले असन जनमला; आउर खिन्डिक बायलामन असन आत, जोनमन के मानेमन बायला बनाला; आउर खिन्डिक बायलामन असन आत, जोनमन सरग चो राज चो काजे आपन खुद के बायला बनाला सोत। जोन ऐके गरहन करूक सके, हुन गरहन करो।”
पिलामन के आशिर्बाद
13तेबे लोग पिलामन के हुनचो लगे आनला कि हुन हुनमन उपरे हाथ संगा ओ आउर पारथना करो, मान्तर चेलामन हुनमन के खिजला। 14ईशु बल्लो, “पिलामन के मोचो लगे ऐऊक दिआस, आउर हुनमन के माना नी करा, कसनबल्लोने सरग चो राज असने मन चो आय।” 15आउर हुन हुनमन उपरे हाथ संगाऊन भाती हुन थानले गेलो।
जुआन सवकार चो सवाल
16गोटक माने ईशु चो लगे ईलो आउर हुनचो ले बल्लो, “हे गुरू, मय कोन बिती अच्छा काम करेंदे कि अमर जीवना पायेंदें?” 17हुन हुनचो ले बल्लो, “तुय मोचो ले भलाई चो बारे ने केंव पचार सीस? अच्छा तो गोटकी ची आय, मान्तर अगर तुय जीवना ने ओलतोर मन कर सीस, तो हुकुममन के मान।” 18हुन हुनचो ले बल्लो, “कोन बिती हुकुममन?” ईशु बल्लो, “ऐ कि हत्या नी कर, बेबीचार नी कर, चोरी नी कर, झूठा गोहई नी देस, 19आपलो बुआ आउर आपलो आया चो ईजीत कर, आउर आपलो अड़स-पड़स चो लोग ले आपलो असन मया संगाव।” 20हुन जुआन हुनचो ले बल्लो, “ऐ सपाय के तो मय मानले से; अदायं मोचो ने काय गोठ चो कमी आसे?” 21ईशु हुनचो ले बल्लो, “अगर तुय सिद्ध होऊक मन कर सीस जाले जा, आपलो माल बिकुन भाती कंगालमन के देस, आउर तुके सरग ने धन मिरेदे; आउर ऐऊन भाती मोचो पाट-पाट आव।” 22मान्तर हुन जुआन ऐ गोठ सुनुन मुरमुरा होऊन भाती गेलो, कसनबल्लोने हुन खुबे सवकार रये।
23तेबे ईशु आपलो चेलामन ले बल्लो, “मय तुमचो ले सते बलेंसें कि सवकार चो सरग चो राज ने ओलतोर मशकिल आय। 24तुमचो ले फेर बलेंसें कि माहापुरू चो राज ने सवकार चो ओलतोर ले ऊंट चो सुजी चो नाका थानले निकरून जातोर सरल आय।” 25ऐ सुनुन भाती चेलामन खुबे भक्याऊन बल्ला, “फेर काचो मुक्ति होऊक सके?” 26ईशु हुनमन बाटे दकुन भाती बल्लो, “मानेमन ले तो ऐ नी होऊक सके, मान्तर माहापुरू ले सपाय काई होऊक सके।” 27ऐ थाने पतरस हुनचो ले बल्लो, “दक, आमी तो सपाय काई छांडुन भाती तुचो पाट-पाट होलु से तो आमके काय मिरेदे?” 28ईशु हुनमन ले बल्लो, “मय तुमचो ले सते बलेंसें कि नवा बरमाण्ड ने जिदलदाय माने चो बेटा आपलो महिमा चो सिंघासन थाने बसे दे, तो तुमी बले जोन मोचो पाट-पाट होलासास, बारा सिंघासनमन थाने बोसुन भाती इस्राएल चो बारा गोत्रमन चो नियाय करा से। 29आउर जोन कोनी बले घरमन, नाहले भाईमन, नाहले भईनमन, नाहले बुआ, नाहले आया, नाहले पिला-झिलामन, नाहले बेड़ामन के मोचो नाव चो काजे छांडुन दिलो से, हुनके सव गुना मिरेदे, आउर हुन अमर जीवना चो हकदार होयेदे। 30मान्तर खुबे असन जोन पुरे आसोत, पाटकुती होदे; आउर जोन पाटकुती आसोत, पुरे होदे।”
دیاریکراوەکانی ئێستا:
मत्ती 19: HLBNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Halbi Bible by The Love Fellowship is licensed under Creative Commons Attribution-ShareAlike 4.0 License.