Génesis 12
12
Ic'ot yu'un Dios te Abram
1Te Jehová yalbeyejix te Abram: Loc'an bahel ta aq'uinal, ta stojol te mach'atic ay awu'un soc ta sna atat, bahan ta q'uinal te ya ca'bat awil. 2Muc'ul nación ya xc'ohat cu'un, soc ya ca'bat bendición ta atojol, muc' ya xc'oht abihil cu'un, soc ha'at bendición ya xc'ohat. 3Ya ca'be bendición te mach'a ya ya'bat bendición, soc ya jbohlobtesbe sc'oblal te mach'a ya sbohlobtesbat ac'oblal. Soc ha'at ta acuenta ya me yich' bendición spisil ants-winiquetic ta bahlumilal, xchi sc'oblal.
4Hich baht te Abram, hich te bin ut'il halbot yu'un te Jehová, soc joquinot bahel yu'un te Lot. Ay ho'lajuneb schanwinic (75) ya'bilal a te Abram c'alal loc' bahel ta Harán. 5Te Abram la yic' bahel te Sarai ha te yihnam, soc Lot te snich'an yihts'in, soc spisil sbiluc stahoj soc spisil mach'atic la sta ta Harán, loq'uic bahel, bahtic ta sq'uinal Canaán.
C'ohtic ta sq'uinal Canaán, 6te Abram c'ax bahel tey ta q'uinal, c'oht c'alal Siquem, ta banti ay te jihte' yu'un More. Ha yorahil te tey ayic a te cananeohetique. 7Te Jehová la yac' sba ta ilel ta stojol Abram, hich la yalbe: Ya ca'be sq'uinalin ats'umbal te q'uinal ini, xchi. Hich te Abram tey la spasbe scajtajib ta chiq'uel smahtan a te Jehová, ha te mach'a la yac' sba ta ilel ta stojol.
8C'ax xan bahel tey a te Abram, c'oht ta jun wits ay ta stojol banti ya xloc' tal c'ahc'al yu'un Bet-el, la stehc'an snahilpac' tey a; ay ta stojol smahlib c'ahc'al te Bet-el, ay ta stojol banti ya xloc' tal c'ahc'al te Hai. Tey la spasbe scajtajib ta chiq'uel mahtanil a te Jehová soc la sc'opon te Jehová. 9Loc' bahel tey a te Abram, c'unc'un behen bahel ta stojol te Neguev.
Abram ta Egipto
10Ha yorahil a te ay bayel wi'nal ta q'uinal; hich te Abram co bahel ta nahinel ta Egipto, yu'un ay bayel wi'nal ta q'uinal. 11Te c'alal nopol ya xc'oht ta Egipto a, la yalbe te Sarai te yihname: Ya jna' te buen t'ujbil antsat. 12Te c'alal ya yilat te egipciohetic ya me yalic: Ha yihnam, xchihic. Ha yu'un ya me smilonic, yan te ha'ate ya me yac' te cuxul ya xhilat. 13Ha yu'un ya me awal te quihts'inat scuenta yu'un lec ya xc'ohon soc cuxul ya xhilon ta acuenta, xchi.
14Te c'alal och bahel ta Egipto te Abram, ilot yu'un te egipciohetic te buen t'ujbil te antse. 15Ha nix hich te príncipaletic yu'un faraón la yilic soc la yalbeyic yutsil sc'oblal ta stojol te faraón. Hich ic'ot bahel ta sna faraón te antse. 16Lec bin la spasbe te Abram ta scuenta te antse; la ya'be tuminchijetic, wacaxetic, burrohetic, a'bat ants-winiquetic, burrahetic, soc camellohetic.
17Pero te Jehová la ya'be tulan wocol ta chamel te faraón soc sjunal sna ta scaj te Sarai, te yihnam Abram. 18Ha yu'un te faraón la yic' tal te Abram, hich la yalbe: ¿Bin a te la apasbon? ¿Bin yu'un ma ba jamal la awalbon teme ha awihname? 19¿Bin yu'un la awal: Ha quihts'in, te xchihate, te hich jteb ma ba la jquic' quihnamin? Yo'tic ic'a bahel te awihnam, bahan soc, xchi. 20Ha yu'un te faraón la yalbe mandar te swinictac te ya me sjoquinic loq'uel ta Egipto te Abram soc yihnam soc spisil te bintic ay yu'une.
دیاریکراوەکانی ئێستا:
Génesis 12: TZH
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Biblia Tzeltal Bachajon © Sociedad Bíblica de México, A.C., 2006.