Matej 4
4
1Tegani o Duho legarđa e Isuse ki pustinja te ovel iskušime e bengestar. 2Palo adava so postinđa saranda dive hem saranda raća, bokhalilo.
3Tegani alo koro leste o beng kova kušini hem phenđa lese: “Te injan o Čhavo e Devlesoro, vaćer akale barenđe te oven maro.”
4A o Isus phenđa: “Pisimei ko Sveto lil:
‘O manuš naka živini samo oto maro
nego oto đijekh lafi savo ikljola taro muj e Devlesoro.’ ”
5Tegani o beng legarđa le ki Sveto diz Jerusalim, čhivđa le upro naj učo than e Hramesoro 6hem phenđa lese: “Te injan o Čhavo e Devlesoro, frde tut akatar tele! Adalese soi pisime:
‘Ka naredini ple anđelenđe te arakhen tut,
te akharen tut ko vasta
te na khuve tut preja ko bar.’”
7A o Isus phenđa lese: “Pisimei hem akava: ‘Ma kušin e Gospode, te Devle.’ ”
8Tegani o beng anđa le upri but uči gora, mothovđa lese sa o carstvija e phuvjakere hem lengiri slava 9hem phenđa lese: “Sa akava ka dav tut, te peljan ko kočija angla mande te slavine man!”
10A o Isus phenđa lese: “Dža mandar, Sotone! Adalese soi pisime:
‘Per ko kočija samo e Gospodese, te Devlese, hem samo ole kande!’ ”
11Tegani o beng cidinđa pe olestar, i otojekhvar o anđelja ale te kanden le.
12A kad o Isus šunđa so e Jovane e Krstitelje phandle, irinđa pe ki Galileja. 13Ačhavđa i diz Nazaret hem dželo te živini ani diz Kafarnaum, uzalo e Galilejakoro jezero, ko krajo oto plemija e Zavulonesere hem e Neftalimesere. 14Ađahar pherdilo okova so phenđa o proroko o Isaija:
15“Ani phuv e Zavulonesiri hem e Neftalimesiri,
uzalo jezero e Galilejakoro, tari aver strana oti len Jordan,
ani regija Galileja e avere nacijengiri,
16o manuša kola živinde ani tomina
dikhle baro svetlost;
o svetlost thabilo
upro okolende kola živinde ani senka e meribnasiri.”
17Otegani o Isus lelja te propovedini: “Pokajinen tumen zako tumare grehija, adalese soi paše o carstvo e nebosoro!”
18Sar o Isus nakhela ine uzalo e Galilejakoro jezero, dikhlja e duje phraljen, e Simone vičime Petar hem e Andreja, sar frdena o mreže ano pani, adalese so inele manuša so dolena maćhen.
19I phenđa lenđe: “Phiren pala mande hem me ka ćerav tumen te dolen manušen sar maćhen!”
20On odmah ačhavde pumare mreže hem džele palo leste.
21Kad džele adathar hari po dur, o Isus dikhlja avere duje phraljen, e Jakove hem e Jovane, sar pumare dadeja e Zevedeja bešena ano čamco hem popravinena pumare mreže. O Isus vičinđa hem olen. 22I on otojekhvar ačhavde o čamco hem pumare dade hem džele palo leste.
23O Isus džala ine maškari sa i Galilejaja hem sikaj e manušen ano lengere sinagoge, vaćerindoj o Šukar lafi oto carstvo e nebosoro hem sasljarindoj e manušen oto đijekh nambormipe hem bizoralipe.
24O glaso olestar šundilo ani sa i Sirija, i đi adathar o manuša anena ine koro leste sa e nambormen oto razna nambormipa hem muke, e manušen ano kolende inele demonja, e manušen kolen inele epilepsija hem e nepokretnonen, a o Isus sasljari len ine. 25Palo leste džele sa edobor manuša tari regija Galileja, taro Dekapolis, tari diz Jerusalim, tari regija Judeja hem tari aver strana oti len Jordan.
دیاریکراوەکانی ئێستا:
Matej 4: RAB
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە