San Mateo 9
9
Jesús ja'ay tu'ug yajtzo'ogy ku̶'u̶xúxypyu̶ tekyxyuxypyu̶
(Mc 2.1-12; Lc 5.17-26)
1Ko adaa du'un tyuunu̶ jyajtu̶, chi je̱'e̱ Jesús byarcu̶tu̶gu̶u̶y ñu̶kxy mejy'awiimb y oy jya'ady ma je̱'e̱ kyu̶'u̶mgajptu̶ñ. 2Jim je̱'e̱ ja'ay yajnija'ttu̶ ajku̶xy tu'ug je̱'e̱ ja'ay ku̶'u̶xúxy tekyxyuxypyu̶; yujkko'ogyu̶ch ku̶jx'aam, y ko je̱'e̱ Jesús ijxy je̱'e̱ ja'ay myu̶bu̶jku̶ñ ajku̶xy, chi je̱'e̱ pa'amja'ay nu̶maay:
—Ya'ay'úng, jootkugu̶'u̶; tu̶ je̱'e̱ mboky yajwinme̱kxta'ay.
3Chi je̱'e̱ Dios y'ane̱'e̱mu̶ñ windzu̶ndu̶jk nije̱' wyinmaaydyu̶gu̶u̶ygyu̶xy y ñayñu̶maayu̶gu̶xy: “Neby adayaaba ja'ay tu̶ myu̶na'añu̶ñ myu̶gapxtu̶gooby Dios yu̶'u̶ du'un.” 4Peru̶ je̱' ko ñejwu̶u̶by najty je̱'e̱ Jesús neby najty jyanchwinmaaygyu̶xyu̶ñ, chi yajtu̶u̶y ajku̶xy:
—¿Ti ko ju̶bu̶kjaty axu̶u̶gjáty mjanchwinmaaygyu̶xy ma je̱'e̱ mjoot mwinma'añ ajku̶xyu̶ñ? 5¿Mu̶dyiibu̶ da'a ka'p chípu̶ch ko nmu̶naanu̶mu̶ch: “Tu̶ je̱'e̱ mboky yajwinme̱kxta'ay”, o ko nmu̶naanu̶mu̶ch: “Pu̶du̶'u̶g y yo'oyu̶'u̶g”? 6Pues cham u̶u̶ch miich nyajni'ixu̶u̶ygyu̶xu̶ch ko u̶u̶ch je̱' je̱'e̱ ja'ay mu̶dyiibu̶ tzon tzajpjooty, nmu̶u̶du̶ch je̱'e̱ ane̱'e̱mu̶ñ ya naaxwiiñ neby u̶u̶ch nwinmé̱kxu̶chu̶ñ je̱'e̱ ja'ay ñu̶u̶ pyoky ajku̶xy.
Mu̶'it je̱'e̱ xuxyjya'ay nu̶maay:
—Pu̶du̶'u̶g, yajpu̶du̶'u̶g yu̶'u̶ mmabe̱jt y nu̶kxnu̶ ma je̱'e̱ mdu̶jku̶ñ.
7Chi je̱'e̱ xuxyjya'ay tyu̶naayu̶'ky y ñu̶kxnu̶ ma je̱'e̱ tyu̶jku̶ñ. 8Ko je̱'e̱ mayjya'ay du'un ijxy ajku̶xy ko je̱'e̱ xuxyjya'ay tyu̶naayu̶'ky, chi mu̶k chu̶gu̶u̶y ajku̶xy y ja'aymye̱jtz o'owu̶dajtku̶xy je̱'e̱ xu̶u̶ Dios ko je̱'e̱ myu̶k'ajtu̶ñ najty tu̶ yeky ma je̱'e̱ mayjya'ayu̶ñ.
Jesús nu̶ma'ay je̱'e̱ Mateo pajaamgu̶ch
(Mc 2.13-17; Lc 5.27-32)
9Chi je̱'e̱ Jesús jim choñ y ijxpaaty je̱'e̱ ja'ay tu'ug mu̶dyiibu̶ xu̶u̶'ajtpu̶ñ Mateo, mu̶dyiibu̶ najty jim u̶ñaaby ma je̱'e̱ yajkugube̱jtaaktu̶ñ, mu̶dyiibu̶ je̱'e̱ gobierno romano najty mu̶duumbu̶ñ. Chi je̱'e̱ Jesús nu̶maay je̱'e̱ Mateo:
—Pajaamgu̶ch.
Mu̶'it je̱'e̱ Mateo tyu̶naayu̶'ky y padzóñ je̱'e̱ Jesús.
10Chi du'un tyuunu̶ jyajtu̶, mu̶gaaby najty je̱'e̱ Jesús ma je̱'e̱ Mateo tyu̶jku̶ñ, y chi je̱'e̱ yajkugube̱jtpu̶du̶jk mu̶dyiibu̶ je̱'e̱ gobierno romano najty mu̶duungu̶xpu̶ñ y pokyjya'aydyu̶jk ajku̶xy oy nimay jya'tku̶xy y ñaxwech nandu'un ajku̶xy ma je̱'e̱ meesu̶ju̶ñ, kipxy mu̶u̶d je̱'e̱ Jesús y mu̶u̶d je̱'e̱ dyiscípulotu̶jk ajku̶xy. 11Ko adaa du'un ijxy ajku̶xy, chi je̱'e̱ fariseotu̶jk yajtu̶u̶gu̶xy je̱'e̱ discípulotu̶jk ajku̶xy:
—¿Ti je̱'e̱ mwindzú̶n ko kyaaymyúky y'uukmúky mu̶u̶d je̱'e̱ yajkugube̱jtpu̶du̶jk y mu̶u̶d je̱'e̱ pokyjya'aydyu̶jk ajku̶xy?
12Jesús myu̶doow je̱', y chi ñu̶maayu̶ ajku̶xy:
—Mu̶dyiibu̶ oy'ajtp mu̶k'ajtp y mu̶dyiibu̶ ka'p pyu̶gyii y'ixyii ajku̶xy, ka'p tzooydyuumbu̶ je̱'e̱ yajmayjyajtku̶xy. Je̱'e̱ju̶tz tu̶y je̱'e̱ mu̶dyiibu̶ pu̶jku̶p ijxu̶bu̶ñ ajku̶xy, yajmayjyajtku̶xypy tzooydyuumbu̶ je̱'. 13Nú̶kxku̶x y u̶xpu̶jkku̶x neby je̱'e̱ Dios ñaky du'un wyimbu̶dzu̶myu̶ñ: “U̶u̶ch je̱' ndzojkypy ko je̱'e̱ pa'a''ayo'on mmu̶dajtku̶xu̶ch, y ka'p jye̱'e̱ju̶ch ko je̱'e̱ windzu̶gu̶'u̶ñ ju̶yujk myejku̶xu̶ch.” U̶u̶ch ka'p u̶u̶ch je̱' tu̶ nnimiñ je̱'e̱ ja'ay mu̶dyiibu̶ ka'p pyokymyu̶u̶du̶chu̶ñ ajku̶xy. Je̱'e̱ pokyjya'ay u̶u̶ch tu̶ nnimiñ.
Jesús yajtu̶u̶gu̶xy tii je̱'e̱ ja'ay ko y'ayuu'ajtku̶xy
(Mc 2.18-22; Lc 5.33-39)
14Chi je̱'e̱ Jesús ñija'ttu̶ je̱'e̱ Juan Bautista y'u̶xpu̶jkpu̶du̶jk ajku̶xy y chi yajtu̶u̶wu̶ ajku̶xy:
—U̶u̶ch ajku̶xy y mu̶u̶d je̱'e̱ fariseotu̶jk ajku̶xy ja'anaam ja'atzojku̶ch n'ayuu'ajtku̶xy, y ¿miich ti je̱'e̱ mdiscípulotu̶jk ko kya'a'ayuu'ajtku̶xy?
15Chi je̱'e̱ Jesús y'adzoowu̶ ajku̶xy:
—¿Nej tajku̶xp maaygyu̶xp je̱'e̱ ja'ay da'a je̱'e̱ mu̶dyiibu̶ naty jim yajpaatku̶xpu̶ñ ma je̱'e̱ pu̶jkpu̶ yajwinxu̶u̶dúñu̶ñ, pu̶nu̶ jimnu̶ naty je̱'e̱ pu̶jkpu̶ ya'aydyu̶jk yajpaatyñu̶ mu̶u̶d je̱' ajku̶xy? Peru̶ pyade̱e̱mby je̱'e̱ tiempo, mu̶naa je̱'e̱ pu̶jkpu̶ ya'aydyu̶jk yajtzoonu̶u̶ju̶chu̶ñ; mu̶'íttu̶tz tu̶y y'ayuu'ajtku̶xu̶ch.
16“Ka'p mu̶baad ni pu̶n agu̶yu̶'u̶y je̱'e̱ tukvestido mu̶u̶d je̱'e̱ jemywyit tu'ktúky, je̱' ko je̱'e̱ jemywyit agu̶yu̶'u̶ñ ñu̶u̶múky y ku̶u̶ch je̱'e̱ tukvestido, y chi je̱'e̱ tukvestido ni'igyu̶ jyaknajtzku̶dzu̶'u̶y. 17Nan ka'p mu̶baad ni pu̶n pu̶da'agy jemyvyiino ma je̱'e̱ tukpo'o'áku̶ñ, je̱' ko je̱'e̱ po'o'ák kyu̶u̶ch, chi je̱'e̱ viino y'u̶xyojkta'awu̶ch y je̱'e̱ po'o'ák ni'itu̶góyu̶p je̱'e̱ nandu'un. Paady pu̶da'ag je̱'e̱ jemyvyiino ajku̶xy ma je̱'e̱ jemybyo'o'áku̶ñ, ka'pu̶ du'un ni mu̶dyiibu̶ tyu̶góyu̶ch.”
Je̱'e̱ Jairo tyo'oxy'úng y je̱'e̱ to'oxyu̶jk mu̶dyiibu̶ je̱'e̱ Jesús wyitpa'a ni'idoonu̶ju̶ñ
(Mc 5.21-43; Lc 8.40-56)
18Cham najty je̱'e̱ Jesús myu̶dmu̶dyaaku̶gu̶xyñu̶, ko je̱'e̱ judío windzú̶n tu'ug jya'ty, chi ñayñajtzkojxtu̶na'awu̶u̶yu̶ ma je̱'e̱ Jesús wyinduuyu̶ñ y nu̶maay:
—Tu̶ u̶u̶ch je̱'e̱ ndo'oxy'úng ñaam o'ogy, peru̶ pu̶nu̶ mnu̶kxp miich ma u̶u̶ch je̱'e̱ ndu̶jku̶ñ y pu̶nu̶ mgu̶'u̶ni'ixajpy, juugypyú̶gu̶p je̱'e̱ ja'adu'ook.
19Chi je̱'e̱ Jesús pyu̶du̶'ky, y chi ñu̶kxy mu̶u̶d je̱'e̱ dyiscípulotu̶jk ajku̶xy. 20Mu̶'it je̱'e̱ to'oxyu̶jk tu'ug mu̶dyiibu̶ najty xyu̶u̶ pyo'o janch mu̶'ayoobu̶ñ, ka'p najty y'ok'adujknu̶, mu̶majmé̱tzk jumu̶jt najty du'un kujk mu̶'ijtnu̶. Chi je̱'e̱ to'oxyu̶jk nimu̶jwa'ky je̱'e̱ Jesús ju̶xku̶'u̶by'eemby y ni'idoonu̶ je̱'e̱ wyitpa'a. 21Je̱'e̱ to'oxyu̶jk du'un najty je̱'e̱ jootjóty winma'añjyooty tu̶ myu̶na'añ: “Mu̶u̶d timyjye'eyu̶ch je̱'e̱ Jesús wyitpa'a ni'idoonu̶ju̶ch, tzo'ogu̶bu̶ch.” 22Chi je̱'e̱ Jesús wya'agwimbijty y win'ijxpejty je̱'e̱ to'oxyu̶jk y chi nu̶maay:
—To'oxy'úng, jootkugu̶'u̶, tu̶ mdzo'ogy je̱' ko u̶u̶ch tu̶ xymyu̶bu̶ky.
Y timymyu̶'ityu̶ je̱'e̱ to'oxyu̶jk chooky.
23Ko je̱'e̱ Jesús jim jya'ty ma je̱'e̱ judío ja'ay windzú̶n tyu̶jku̶ñ, y chi ijxy ko je̱'e̱ xuuxpu̶du̶jk o'ogyjya'ay winxuuxku̶xy nu̶kxy yajnaaxtu̶gu̶'u̶waangu̶xnu̶ y nan ijxy ko je̱'e̱ ja'ay najty mu̶k jyu̶u̶ygyu̶xy yaaxku̶xy, 24y chi ñu̶maayu̶ ajku̶xy:
—Pu̶dzu̶u̶mgu̶x jiiby, yu̶'u̶ to'oxy'ana'k ka'p yu̶'u̶ y'o'ogyu̶ch, maab yu̶'u̶.
Chi je̱'e̱ ja'ay Jesús nixiiktu̶gu̶u̶ygyu̶xy, 25mu̶'it je̱'e̱ Jesús jiiby tu̶gooty y'u̶xke̱jxpu̶dzu̶u̶mdaayu̶ ajku̶xy; y chi tyu̶jktu̶gu̶u̶y y majch je̱'e̱ to'oxy'ana'k ma je̱'e̱ kyu̶'u̶ju̶ñ, y chi je̱'e̱ to'oxy'ana'k pyu̶du̶'ky. 26Y chi je̱'e̱ ayuuk du'un wya'kxtaay ma je̱'e̱ jimbu̶ naaxjooty kú̶xyu̶ju̶ñ neby najty tu̶ tyuñ tu̶ jyadyiiju̶ñ.
Jesús yajwindu̶kxu̶'u̶gy me̱tzk je̱'e̱ wiindzja'ay
27Ko je̱'e̱ Jesús jim choñ, chi je̱'e̱ wiindzja'ay me̱tzk pyadu'ubu̶jku̶, cham yaaxke̱e̱kku̶xy:
—¡U̶u̶ch pa'a''ayoogu̶xk, miich David y'ok'ung y'ok'ana'k!
28Ko je̱'e̱ Jesús tyu̶jktu̶gu̶u̶y, chi je̱'e̱ wiindzja'ay ñimiinu̶gu̶xy, y chi je̱'e̱ Jesús je̱'e̱ wiindzja'ay yajtu̶u̶y ajku̶xy:
—¿Nej mmu̶bu̶jkku̶xypy ko nyajwindu̶kxu̶'kku̶xu̶chu̶?
Chi je̱'e̱ wiindzja'ay y'adzoogu̶xy:
—Du'un Windzú̶n.
29Mu̶'it je̱'e̱ Jesús wyiin ñi'idoonu̶xu̶ ajku̶xy, y ñu̶maayu̶ ajku̶xy:
—Wan du'un tuñyii jadyii neby tu̶ mmu̶bu̶jkku̶xyu̶ñ.
30Y chi wyindu̶kxu̶'kku̶xy. Chi je̱'e̱ Jesús mu̶kta'agy yajni'ipu̶jku̶ ajku̶xy:
—Ka'p du'un ni pu̶n m'awaanu̶ch ajku̶xy.
31Peru̶ je'eyu̶ jim ñi'itzóngu̶xy, chi myu̶dyaaktu̶gu̶u̶ygyu̶xy ma je̱'e̱ jimbu̶ naaxjóty kú̶xyu̶ju̶ñ ko je̱'e̱ Jesús najty tu̶ yajwindu̶kxu̶'ku̶gu̶xyu̶.
Jesús uumja'ay tu'ug yajkapxu̶'u̶gy
32Cham je̱'e̱ wiindzja'ay chóngu̶xy, chi je̱'e̱ ja'ay Jesús nije̱' yajnija'tku̶xy tu'ug uumja'ay ka'a'oybyu̶mu̶u̶dpu̶. 33Ko je̱'e̱ Jesús u̶x'ojy je̱'e̱ ka'a'óybyu̶, chi je̱'e̱ uumja'ay kyapxu̶'ky. Chi je̱'e̱ ja'ay myu̶naandu̶gu̶u̶ygyu̶xy, cham yajnú̶kx yajju̶wu̶u̶ygyu̶xy:
—¡Nimu̶naa ya Israel du'un tii kya'ayaj'íxyñu̶ neby adaaju̶ñ!
34Peru̶ je̱'e̱ fariseotu̶jk du'un najty je̱'e̱ myu̶naangu̶xy:
—Jesús mu̶jwinma'añ yu̶'u̶ tyuumby mu̶u̶d je̱'e̱ ka'a'óybyu̶ windzú̶n myu̶k'ajt, paady je̱'e̱ ka'a'óybyu̶ yajpu̶dzú̶my.
Jesús myu̶dajtypy pa'a''ayo'on je̱' ma je̱'e̱ ja'ayu̶ñ
35Wu̶dijttaay je̱'e̱ Jesús ma je̱'e̱ kajpt kú̶xyu̶ju̶ñ y ma je̱'e̱ ja'ay y'aaychu̶naay y'ujtzu̶naaygyu̶xyu̶ñ, yaj'u̶xpú̶ky najty kajpt kajpt ma je̱'e̱ judío ja'ay ñaymyujktaakt ajku̶xyu̶ñ. Kyapxwa'kxypy najty je̱'e̱ oybyu̶ ayuuk tu̶y'ajt neby je̱'e̱ Dios y'ane'emyu̶ñ, y yajtzookypy najty ku̶xyu̶ yuu pa'am wan timytyiiba'amu̶ch y mu̶dyiijáty yaj'ayoobu̶ñ. 36Ko je̱'e̱ mayjya'ay ijxy, chi pa'a''ayoogóty ajku̶xy, je̱' ko najty tyajku̶xy myaaygyu̶xy y y'ayo'oy y'anaxu̶u̶ygyu̶xy neby je̱'e̱ borreegu̶ ka'pu̶ kyweentu̶'ajtpu̶ ajku̶xyu̶ñ. 37Mu̶'it je̱'e̱ dyiscípulotu̶jk nu̶maaygyu̶xy:
—Jaanch je̱'e̱ pu̶da'aky tu̶ y'oyu̶'u̶y, peru̶ je̱'e̱ mu̶duumbu̶du̶jku̶tz tu̶y janch we̱e̱nu̶. 38Paady yujkwaangu̶x miich ajku̶xy ma je̱'e̱ pu̶da'aky windzu̶nu̶ñ ko je̱'e̱ tyuumbu̶du̶jk wan kexy y yajpu̶du̶'kku̶xu̶ch je̱'e̱ pu̶da'aky.
دیاریکراوەکانی ئێستا:
San Mateo 9: MIXE
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005