Genesis 10
10
Noaxi ôagu di ôananôagub
(1 Kroniks 1:5-23)
1Nē ra saob ge Noaxi ôagu, Semmi, Xammi tsî Jafet hâgu di ôananôagub ǂgaekhâiba. Kai ǁgammi dâus khaoǃgâ gu ge ǁîgu tsîna ǀgôana ge ǁorabahe.
2Jafeti ôagu ge Gomeri, Magogi, Madaib, Javanni, Tubali, Mesexi tsî Tiras hâga. ǁNāgu ge ǁîgu ǀonde ge ūhâ i ǃhaodi di aboxa ge iga. 3Gomeri ôagu ge Askenab, Rifati tsî Togarmab tsîga. 4Javanni ôagu ge Elisab, Tarsib, Kitimmi tsî Dodanim hâga. 5ǁÎgu ge ǁnā khoen, huri-ammi ai tsî ǃnāǃnuidi ai ge ǁan hâ in di aboxaga. Nēn ge Jafeti surin, ǁîn di ǃkharaga ǁaedi tsî ǃhūgu ǃnâ, mâs hoas ǁîs di gowaba ra ǃhoase ge hâ ina.
6Nēb ge Xammi di suriba:
Xammi ôagu ge Kusi, Egipteb, Puti tsî Kanaan hâga. 7Kusi ôagu ge Sebab, Havilab, Sabtab, Ramab tsî Sabtekab hâga. Ramab ôakha ge Skebab tsî Dedan hâkha. 8Kusi ôab ge Nimrodi, ǂguro ǀgaisa khoeb, ǃhūbaib ai ge hâ iba. 9ǁÎb ge ǃKhūb aiǃâ ge kai ǃau-ao i, ǁnā-amagan ge khoena nētsēs kōse “Nimrodi, Elob aiǃâ a kai ǃau-aob khami” ti ra mî. 10Aibeb ge ǁîb di gaosiba Babilons, Ereks, Akads tsî Kalnes tsîde ge ǃkhōǂgā hâ i, hoade Babiloniab#10:10 Babiloniab: Hebregowab xoaǁguigu ge Sinar ti ūhâ. ǃnâ. 11ǁNā ǃhūba xub ge ǃgû tsî Asiriab ǃnâ ǂgâ tsî Nineves, Rehobot Irs, Kalas 12tsî Resens, Nineves tsî Kalas, ǁnās ge kai ǃāsa, ǁîs ǁaegu hâde ge ǂnubi.
13Egipteb surib digu ge Ludimmi, Anamimmi, Lehabimmi, Naftuhimmi, 14Patrusi, Kaslusi (ǁîba xun Filisteǁaes dina ge ǃnaeb) tsî Kretab tsîga.
15Kanaanni ôakha ge Sidonni, ǁîb a kaib tsî Heti tsîkha, ǁîkha ǀonde ge ūhâ in di aboxakha. 16Kanaanni ge ǁkhāti ge Jebusǁîn, Amorǁîn, Girgasǁîn, 17Hivǁîn, Arkǁîn, Sinǁîn, 18Arvadǁîn, Semarǁîn tsî Hamatǁîn di aboxa i. ǃKharaga ǁaedi Kanaanni didi ge ge khoraǂuisen, 19Kanaanni di ǃhūǀgoradi ge Sidonsa xu ǀapasǀkhābǀî Gerars, Gasas ǀgūse hâs tsî aiǂoasǀkhābǀî Sodoms, Gomoras, Admas tsî Seboims, Lasas ǀgūse hâs tawa sīs kōse. 20Nēb ge Xammi di surib, ǁîn di ǃkharagaǃnâgu ǁaedi tsî ǃhūgu ǃnâ, mâ ǃhaos hoas ǁîs gowaba ra ǃhoase ge hâ ina.
21Semmi, Jafeti di ǂkham ǃgâsab tsîn ge ǀgôaga ge ǁorabahe, tsîb ge ǁîba ge hoaraga Hebreǁîn di aboxa i. 22Semmi ôagu ge Elammi, Asuri, Arpaksadi, Ludi tsî Aram hâgu, ǁîgu ǀondi ǃoa ge ǂgaihe hâ i ǁaedi di aboxaga. 23Arammi di ôagu ge, Usi, Huli, Geteri tsî Mas hâga. 24Arpaksadi ge Selaxa ge ǁorabahe tsîb ge Selaxa Ebera ge ǁorabahe. 25Eberi ge ǀgam ǀgôakha, Pelegi,#10:25 Pelegi: Nēs ge Hebregowab di mîs ǀgora ti hâs khami ra ǀō. ǁîb ge ǃnae ǁaeb ǃnâ ge ǃhūbaib khoen ǁaegu hâ i ǀgoradi ǁga ra ǁnaeǁgause ge ǁnāti ǀonǂgaiheb tsî naub hîa Joktan ti ge ǀonǂgaiheb tsîkha. 26Joktanni ôagu ge Almodadi, Selefi, Hasarmaveti, Jerab, 27Hadorammi, Usali, Diklab, 28Obali, Abimaeli, Skebab, 29Ofiri, Havilab tsî Jobab hâga. Nēgu hoagu ge Joktanni ôaga. 30ǃHūb hîa gu ge ǁîga ǁanǃnâ hâ ib ge Mesasa xu Sefars, aiǂoasǀkhāb ǃnâuxa ǀkharib dib kōse ge khoraǂuisen. 31Nēb ge Semmi di surib, ǁîn di ǃkharagaǃnâgu ǃhaodi tsî ǃhūgu ǃnâ, mâ ǁaes hoas ǁîs gowaba ra ǃhoase ge hâ ina.
32Nē hoaraga khoen ge a Noaxi surib di, ǁîn di ôananôagugu ǀkha, ǁaedi ân ǃnâ. ǁÎna xus ge ǃhaodi ge ǃhūbaib ai, kai ǁgammi dâus khaoǃgâ khoraǂuisensa.
دیاریکراوەکانی ئێستا:
Genesis 10: KKG20
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Khoekhoegowab Elobmîs © Bible Society in Namibia, 2020.