MOTHI 10
10
Bang Kere-Hini Adun
(Mrk. 3:13-19; Luk. 6:12-16)
1La-amun Jisu bang kere-hini adun helyok anang dungyok taramsi, kangho ajiuli kahujhar yok, aro ajat jat bet hel, aro ahuwit kiso-kilak hel kapame aphan analiyok apharan pilo. 2Labang bangkere-hini adun amen helke lalo: kichengke Simon po, anangyok ke Pitor po ta puman, aro anang muso Andriu po, aro Jebedi po aso Jems po pen anang muso Johon po, 3Philip po aro Bartholomiyu po, Thomas po aro Mothi po, anangke kalukdar, Alphayus po aso Jems po aro Thadeyus po. 4Simon poke Kanan arleng aro Judas Iskariyot po, anangsi Jisu yok kichampi.
Adunhel Yok Arnam Asal Aphan Kitol
(Mrk. 6:6-13; Luk. 9:1-6)
5La bangkere-hini yok Jisu angtolsi labadi than no, “Bang-ajat asitem ke damek; Samariya arongso hel longta lut damek, 6manta layok ke Israyel agijing hel kachingbojang bherabik aso hel adungyok damot. 7Aro nali kidamjong amun, pahar ponsi thannot, “Ethakpe-alongri adung hetno.” 8“Kiso kilak pamenot, kithi arleng paburnot, arje ibeng kiso helyok pangthir not, si-ik hel ujharnot; nali ador wesi hlongo, ador wene pinot. 9Nali abithang awamkok long ser, rupa, aro tama chipon nek. 10Aro duwar kidam apor chul lale chol agol pak-ni, keng-op, tokok, lamehel chi-en nek; piyok pu tene katiki abang aphan ke kicho kijun dowene. 11Aro nali konam rongpe lale rongso lut dam tene, lalong kamichang abangyok pangthek, aro lalong para tikangsi damde lengke lalong donot. 12Aro nali hem kilut dam amun, analiyok kardom pipon. 13Aro labang kamichang ahem, tene nali nengsam anali phuthak padonang; manta chingden pameme, tene labang nengsam nalilong pawang phak nang. 14Aro inghone bak nali chidengde, aro nali lam onene, tene konam anali hem lale rongso katikang amun, nali kengtak chihijir detnot. 15Ne naliyok khanangsi thando, Arnam kabisare arni labang rongso yok ke Sodum aro Gomura abangsi kachihi jalsochot bo.
Aduk-Tap Kiwang
(Mrk. 13:9-13; Luk. 21:12-17)
16“Langot, timit hel asitemyok bherabik badi ne nali toldo; lasi nali phurul hel badi chipare aro wothum badi kachinomhop chiplangot. 17Manta arlengyok atot chipado, piyok pu tene lahel ason amel alongyok nali champiye, aro anali kachirdom ahemlong nali pame; 18aro mehel naliyok ne natsi gobornor aro recho hel angoyok, lahel nenghong aphan aro Bang-ajat ayok hakhi kipi aphan nali pone. 19Manta konam naliyok anali arideng champiye, la-amun pot badi lale pot alam nali than nange, labang chiron hap mek; piyok pu tene nali pot than nange, labang la-amunsi nali yok nalipiye. 20Piyok pu tene labang alam kithanpo nali kalek, manta nali Apa ajiuli si nali ingthin long kithanpo. 21Anangka po ke amusopo yok aro apo poke aso poyok kithi aphan pek detne; aro asohel ape-apo pen chilang setsetsi, analiyok mariye. 22Aro nemen anat, nali yok ahuwit sime; manta inghosi kijutyok chirchisi doye, labang ihutsi jok hlonge. 23Konam isi rongpelong naliyok honjat piman, la-amun kamprek rongpe yok kat hrolnot; ne naliyok khanangsi thando, nali Israyel ahuwit rongsohel yok karting tang angotsi, Arleng Aso wange. 24Paklangpo yok ke adunpo thechot un-eh, aro hem ahemphupo ayok murkiyapo thechot un-eh. 25Adunhel anang paklangpo badi, aro murkiya po anang ahemphupo ateng chokngo pu tene anang phan doro. Anali hem ahemphupo yok Belsabul pu-un, tene anang ahem arleng helyok konbak kanghochot puye.
Inghoyok Phere Nange
(Luk. 12:2-7)
26“Lasi nali mehelyok ke phereyek; piyok pu tene isi kachiklangkle abihini dodeye, ladi kupklaksi kibi isi abihini ingjong; aro kachithan un-eh, ladi kabuti abihini ingjong. 27Kangting long ne naliyok potsi thando, bangpo nali katha-ang long thanot; aro ano long potsi arju hlong, labang hem sarnuk athak para paharnot. 28Aro inghosi abang poyok mariman, ajiupoyok mari un-eh, lamehel ayok phereyek; manta inghosi ajiupo aro abangpo, la-hinita jom long paprel unman, anangyok pherenot. 29Jon-ni wosirika poisa isipen jorje ma? Layongta nali Apa hawang pipe lengke ijon awota lungle athak jang bob be. 30Manta nali phu achu akokten alekha en detdo. 31Lasi phereyek, nali ako-ong wosirka yokta ador dochot. 32“Lasi inghosi arleng ango neyok hoi choye, ethakpe long kido ne Apa angot ne ta anangyok hoi choye. 33Manta arleng ango inghosi neyok hoi chocheye, ethakpe long kido ne Apa angot ne ta anangyok hoi choche ye.
Nengsam Kalek, Manta Isi Nokjirsi
(Luk. 12:52-53; 14:26-27)
34“Ne pirthimipe long nengsam kipiyok wango, ladi chironek, ne nengsam kipiyok kalek, manta nokjir kipiyok wango. 35Apo po anang so poyok, anang aipe yok asope, anipe yok amunpe pachilang set-set yoksi wango. 36Aro arleng abithang ahem abangsi anang hutur doye. 37“Inghosi neyok ke anang ai pen anang pa yok nengdok chotman, anangke ne pen michangche; aro inghosi anangso lale aso pe yok neyok ta nengdok chot, anang ne pen michangche. 38Aro inghosi anang kros po ensi ne phel-phel wang dunde; anangta nepen michangche. 39Inghosi abithang ajiu hlongman, anangke bangpo chipangbo ye; aro inghosi ne nat anang ajiu chiti, anang labang po pahlong phaknge.
Arnam Aman
(Mrk. 9:41)
40“Inghosi naliyok chingden pame; anang neyoksi chingden man; aro inghosi neyok chingden, anangke neyok wang kitol poyoksi chingdenman. 41Ingho turki po pusi turkipo yok chingden, anangke turkipo aman hlonge; aro inghosi dhorom arleng po pusi dhorom arlengyok chingden, anangke kadhorom aman hlonge; 42aro inghosi labang akibek hel asitem ihutyok adunpo pusi langhan isi nangset kangsam alang pajun, ne naliyok khanangsi thando, anangta jatsi abithang aman chipangbobe ye.”
دیاریکراوەکانی ئێستا:
MOTHI 10: AMRI-BSI
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.