Génesis 28
28
1Va'i un, ti Isaaque laj yic' talel ti Jacobe, xi laj yalbe mantal c'alal laj sc'an ac'o sva'an sba ti Dios ta stojole: “Mu xavic' mi ja'uc junuc tseb ti li' nacalic ta Canaane. 2Batan ta sna amuc'tot Betuel ti nacal ta Padán-arame. Ic'bo junuc stseb ti ajuntot Labane. 3Ti Dios scotol xu' yu'une, ac'o sva'an sba ta atojol. Ac'o yac'bot ep anitilultac yo' jech ta xlic ayanuc epal muc'tiquil lumetic ta aventa. 4Ac'o yac'bot xchi'uc anitilultac ti slequilal Dios albil ta x'ac'bat ti Abrahame#Gn 17.4-8. yo' jech ta xacomic ta yajval ti banomil li' bu nacalotic co'ol s'elan jyanlumotique, yu'un albil ono'ox ta x'ac'bat ti Abrahame.”
5Ja' jech laj spas ti Isaaque ti laj stac batel ta Padán-aram ti Jacobe. Jech ti Jacobe c'ot ta sna ti Labane, xnich'on ti arameo vinic Betuel xchi'il ta voq'uel ti Rebecae, sme'ic ti Jacobe xchi'uc ti Esaue.
Ti Esaue laj sa' yan yajnil
6Ti Esaue laj yil c'alal ac'bat yich' slequilal Dios ti Jacob yu'un ti Isaaque, ti taque batel ta Padán-aram yo' jech ta sa' ti yajnile. Ja' jech xtoc laj stuc'ulan lec c'alal laj sc'an slequilal Dios ti stote, ti c'ubanbat mu xu' ta xic' junuc ti canaán antse. 7Va'i un, ti Jacobe bat ta Padán-aram jech c'u cha'al albat yu'un ti stot sme'e. 8C'alal jech laj yil ti Esaú va'i s'elan taje, laj sna' ti mu junuc yo'nton yu'un stot ta sventa ti canaán antsetique. 9Jech o xal un, bat sc'opon ti Ismaele, ja' xnich'on ti Abrahame. Laj yic'be ti stsebe, ti Mahalat sbie, xchi'il ta voq'uel ti Nebaiote. Slecoj xtoc ma' ti yan canaán antsetic ti yic'oj xa ono'oxe.
Ti Diose laj yac' sba iluc ta stojol ti Jacob ta Betele
10Ti Jacobe loc' batel ti ta Beersebae. Laj stam batel sbelel Harán. 11Oy bu c'ot xcux yo'nton. Com vayuc ti bu taje, yu'un mal xa ti c'ac'ale. Laj stam jbej ton yo' ta xoncolin ti bu taje. Laj xpuch'an sba vayuc. 12Ti bu taje, lic vaichinajuc. Laj yil jun tec'obal ti quiquil ta banomil ti c'otem to c'alal vinajele, ti xyal xmuy yaj'ánjeltac ti Dios laj yile.#Jn 1.51. 13Ja' jech xtoc laj yil va'al ti Dios ta sts'ele, ti xi albate: “Vu'un ti Ajvalilune, Dios yu'un ti amuc'tot Abrahame xchi'uc ti atot Isaaque. Ti vo'ote xchi'uc ti anitilultaque, ta xcac'boxuc ti banomil bu puch'ulote.#Gn 13.14-15. 14Jech ti stuquique ta x'epajic jech c'u cha'al spucuquil ti banomile. Ta xtanijic batel ta xchanjechal banomil. Ta aventa vo'ot xchi'uc ti anitilultac eque,#Gn 12.3; 22.18. ta staic slequilal Dios scotol ti jujuchop jnaclejetic ta sbejel banomile. 15Li' jchi'inojote. Ta jchabiot ti buyuc no'ox ta xabate. Ta xcac' sutan batel ta banomil ti bu lalic talele. Ta xc'ot ta pasel cu'un jech c'u cha'al ta xcalbote. Mu xa xquictaot comel.”
16C'alal vul xch'ulel Jacob ti jech vayeme, xi lic snope: “Ta melel ti bu oyune, li' oy ti Diose. Mi ja'uc laj jna'.” 17Ep xi' ta jmec ti xi laj snope: “Ti li'e, ja' jun ch'ul banomil. Li' oy sna ti Diose. ¡Li'e, ja' ti' vinajele!”
18Sob lic ti Jacob ta yoc'lomale. Ti ton xoncolinoj to oxe, lic sva'an yo' jech na'bil ta xc'ot, lic smalbe aceite ta sba. 19Ti bu taje, oy to ox jun jteclum, Luz sbiinoj. Ti Jacob une laj sjeltabe sbi, laj yac'be sbiin Betel.#Ti sbi Betele, “sna Dios”, xi ta xal smelol ti ta hebreo c'ope.
20Ti bu taje, ti Jacobe xi laj yal ti sc'ope: “Mi xchi'inojun ti Diose, mi xchabiojun ta jbe jxaneb ti c'usi jnopoj chba jpase, mi ta xiyac'bun jc'u'e xchi'uc jve'el cuch'ome, 21mi mu'yuc c'usi laj jpase, mi lec ta xisut batel yu'un ta sna ti jtote, ja' yu'un unbi, ti Ajvalile ta xc'ot o ta Dios cu'un. 22Jech ti ton laj jva'ane, ja' ta xc'ot ta sna ti Diose. Ja' jech xtoc, Ch'ul Dios, ta xcac'bot o ta jujun lajlajuneb scotol ti c'usi ta xavac'bune.”
دیاریکراوەکانی ئێستا:
Génesis 28: TZC00
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Biblia en Tzotzil de Chamula, Chiapas, México © Sociedad Bíblica de México, A.C. 2000