IIMU/UUNGW 11
11
Doó gáwtí tleér oo yaamaá Babuloni
1De'emuudae yaamu sleémeero tsifrír tar axweesi a wak, nee axweesantaín a wak. 2Alaá muu iwa bihhaá da/aáw wa tláy, xatsa kana ár baraá yaamaá Shinari. Tay amoodá' wa hoót. 3Mukdá' tari al'axweés, tari oó', «Gimsé', matofaáli a tleehhaán, kari da/aán.» Ala inooín gár ta kon a matofaáli kitángw tlaa/eewo nee laámi kitángw busluwo. 4Tari oó', «Gimsé', gixsarén a tleehhaán, nee baraá gixsarihe doó tleér u tleehhaán, oo tsitsinirós gawaá doorí hardah, nee tawa iiatleeruwaan, as mawa diya/ataán baraá yaamu sleémeero.»
5AAKOÓ MUNGÚ nay aweér baraá yaamu as gixsa nee tsitsini ngiwa ari, tidá' taa tleéhh nee muu. 6AAKOÓ MUNGÚ iri oó', «Ga/aaweek, mukwí a wak, nee inooín sleeme tsifrir'ín a wak, slám gaarí an sangw iimu/úngw gár ta tlehhemuú slai. Nee daxta umuúqo gár ta tlehhemuú wa slai ar gir baa/ i káhh. 7Qwalaasé', a aweeraán yaamu, tsifrir'ín a qasmisaán, kahhó' heé axweesantá kuqá' ga tsaáhh i kaahh.» 8AAKOÓ MUNGÚ inooín giri diyayaá/ gawaá daanduú yaamu sleémeero amór yaamaá sawen, gixsadá' tleehhamooro ngiri mayé'. 9Gawaá adoorihe umuú gixsadá' kuri báy Babuloni, asma didá' an dír Mungú tsifrír yaamu sleémeero ngiwa qasmiís. Nee iimír didae AAKOÓ MUNGÚ muu guri diyayaá/ gawaá daanduú yaamu sleémeero.
Xwaylár Shemu
(1Qom 1:24-27)
10Kuká' an xwaylár Shemu. Shemu kureeriiwós tawa tsiiru, Arpakshadi guri laqwaál, kureeraá tsár alaá tluwoó da/tene. 11Shemu iri hoót kureeraá tsiire kooán alaá Arpakshadi nguwa laqwaál, na/aá hatlá' awa daaqaay nee dasu giri laqwaál.
12Arpakshadi kureeriiwós tawa mibeeri tám nee kooán, Shela guri laqwaál. 13Arpakshadi alaá Shela nguwa laqwaál, kureeri ngaa hoót a tsiire tsiyáhh nee tám, na/aá hatlá' awa daaqaay nee dasu giri laqwaál.
14Shela kureeriiwós tawa mibeeri tám, Eberi guri laqwaál. 15Shela alaá Eberi nguwa laqwaál, kureeri ngaa hoót a tsiire tsiyáhh nee tám, na/aá hatlá' awa daaqaay nee dasu giri laqwaál.
16Eberi kureeriiwós tawa mibeeri tám nee tsiyáhh, Pelegi guri laqwaál. 17Eberi alaá Pelegi nguwa laqwaál, kureeri ngaa hoót a tsiire tsiyáhh nee mibeeri tám, na/aá hatlá' awa daaqaay nee dasu giri laqwaál.
18Pelegi kureeriiwós tawa mibeeri tám, Reu guri laqwaál. 19Pelegi alaá Reu nguwa laqwaál, kureeri ngaa hoót a tsiire tsár nee gwaleél, na/aá hatlá' awa daaqaay nee dasu giri laqwaál.
20Reu kureeriiwós tawa mibeeri tám nee tsár, Serugi guri laqwaál. 21Reu alaá Serugi nguwa laqwaál, kureeri ngaa hoót a tsiire tsár nee faanqw, na/aá hatlá' awa daaqaay nee dasu giri laqwaál.
22Serugi kureeriiwós tawa mibeeri tám, Nahori guri laqwaál. 23Serugi alaá Nahori nguwa laqwaál, kureeri ngaa hoót a tsiire tsár, na/aá hatlá' awa daaqaay nee dasu giri laqwaál.
24Nahori kureeriiwós tawa mibeeri tsár nee gwaleél, Tera guri laqwaál. 25Nahori alaá Tera nguwa laqwaál, kureeri ngaa hoót a tsiiru nee mibaá nee gwaleél, na/aá hatlá' awa daaqaay nee dasu giri laqwaál.
26Tera kureeriiwós tawa mibeeri faanqw, Abramu nee Nahori nee Harani giri laqwaál.
Xwaylár Tera
27Kuká' an xwaylár Tera. Tera an baabuú Abramu, nee Nahori nee Harani. Harani Loti guri laqwaál. 28Harani iri gwaá' baraá gixsár Uri ar baraá yaamaá Kaldayo, didá' kuwa laqwaál. Inós gwa'araaro ina giirín dír baabuúwós Terawo. 29Abramu nee Nahori tari duuxuuxún. Harér Abramu umuuwós a Sarai, nee ar Nahori umuuwós a Milka, dasír Harani. Harani an baabuú Iska sleeme. 30Sarai a kampeeri, inós na/aay gwa sleeriiká.
31Tera Abramu garmaawós gurir tláy, nee Loti garmoó naangós, na/oó Harani, nee Sarai harér garmaawós Abramu. Inooín nina altlayé' iimír gixsár Uri wa alé ar baraá yaamaá Kaldayo as tawa yaamaá Kana'anír kay. Ala tawa hardáh yaamaá Harani, tana baraadá' wa hoót. 32Tera ina gwaá' baraá yaamaá Harani kureeriiwós tawa tsiire tsár nee kooán.
دیاریکراوەکانی ئێستا:
IIMU/UUNGW 11: IRQW
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
The Bible in Iraqw © Bible Society of Tanzania, 2004.