Makö 8

Zozii nyɛɛ‑ bʋkʋ nyɩkpa ‑bhutukpä lülülɩɩ

(Matie 15.32‑39)

1‑Lɔɔ ylɩɩyɩ 'mnö nyɩkpaa ‑bhutukpä 'wlää‑ bhä bʋkʋ Zozii yëku 'wlu 'nɩ waa' bhɔɔ lülülʋʋ ‑kä. Ɔ laa‑ ɔɔ' 'kʋgënyʋa 'nɩ ɔ yiwa soo, 2ɔ lä nyɩkpaa' wälɩ ‑kä'ä yɩ ŋäzö 'kʋ. Ɩ nʋ yɩ ylɩɩ taa sä wa kʋ'ʋ lä yëku 'nɩ waa' lü ‑wʋ lä nä. 3'Nɩ waa' pää bhutukpä bha 'sɩɩ ‑blëlë. Waa ‑lʋa ‑gbügbee bhlä nä, n kwa ‑soo nynä wa mʋ waa' ‑bhäändö nä, wälɩɩ' kwa ‑kä ‑blɔkʋ ŋënö. 4Ɔɔ' 'kʋgënyʋa lä 'nɩ Cɩanyɔ‑, ‑gbäsɩɩ ‑a ‑kʋ lä ‑mää nä, ‑mɔɔ ‑zie kpänyɩ gwë nä, dä ‑sä nyɩkpɔ yi bhä lülülɩɩ ‑sä 'nɩ ɔ yiwa bhä 'nyɛ 'nɩ wa yi bhä lü 'nɩ wa yi bhä loo? 5'Nɩ ɔ yiwa 'ylä, ɔ lä ‑mä, 'flɔɔbhü zio a ‑kä bhää? Wlä ‑a ‑kä 'flɔɔbhü ‑ngbɔɔsɔ.

6‑Mä Zozii ‑gbä 'nɩ ‑jlëaa' nyɩkpaa yi ‑dʋdʋʋ' 'kplɩfɔ. Ɔ bhlüü‑ 'flɔɔbhüü ‑ngbɔɔsɔ 'kʋ, 'nɩ ɔ yi Laagɔ bhään, 'nɩ ɔ yii 'mʋ ‑döö ‑döö 'nɩ ɔ yi ɔɔ' 'kʋgënyʋa 'nyɛ nynä wa dënʋ nyɩkpa‑gbʋʋ. 'Nɩ wa yiwanyʋ dëë. 7Wa ‑kä bhä bʋkʋ ‑lɔɔ zliiyilɩä zio. 'Nɩ ɔ yiwa 'kʋ 'bhlü 'nɩ ɔ yi bhibhie, 'nɩ ɔ yi ɔɔ' 'kʋgënyʋa soo nynä wa dëë nyɩkpaa. 8‑Maa, nyɩkpɔ nyɩkpɔ ‑lü 'nɩ ɔ ‑loo, 'nɩ lülülɩɩ ‑ji 'kʋ, 'nɩ wa fämʋ. ‑Ɩ ‑ji bhlä 'kʋ nä, ɩ ‑nʋ ‑takwü ‑ngbɔɔsɔ. 9Wa ‑bhɩä bhɛ lä lülɩ nä, 'nɩ Zozii yiwa soo nynä wa mʋ yɩ waa' ‑bhäändö. Wa yi bhä nyɩkpaa' ‑bhɛgö ‑mɔɔnä (4.000) ŋëë.

10'Nɩ ɔ ‑yä ɔɔ' 'kʋgënyʋa 'sɔ yi 'gokpë plä 'nɩ wa yi Dlamanutabhlɩ 'kʋ mʋ.

Falizɩɛnyʋä 'ylää Zozii panalɩ

(Matie 16.1‑14; 12.38‑39; Lukö 11.16,29)

11‑Mä Falizɩɛnyʋa ‑ŋënʋwa ‑mɔɔ 'nɩ wa ‑yä Zozii 'sɔ yi 'kʋ bhlälɩ 'kʋ cie. Wa sonöɔ bhä nynä ɔ nʋ 'yiziziogbɩɩ' lɩɩ ‑ɩ pana lä nynä ‑mä Laagɔ yëku ɔɔ' 'päwaa bha nä. 12‑Mä wa cii‑ lä sɔɔ nä, kä Zozii sluu‑ nyämʋ, 'nɩ ɔ yiwa soo, ɔ lä ‑ɔnözä 'nɩ 'bhlɛsʋnʋ 'mnö nyɩkpaa ‑waa bhä nynä ‑mä wa 'kä 'fɩa panalɩ 'yi 'nii? N sonö'anyɩ ‑nʋawlɛɛ 'mnö nynä aa' ‑lä panalɩ ‑bhlo 'coo 'yi 'ni! 13Ɔ cii‑ lä sɔɔ nä, kɔ ‑bhʋwa yëku 'nɩ ɔ yi bʋkʋ 'gokpë ‑plä 'nɩ ɔ yi 'nyie klë mʋ.

A fä Falizɩɛnyʋa ‑yä Elodöö' cɩalɩɩ plɛ

(Matie 16.5‑12)

14‑Mä ɔɔ' 'kʋgënyʋa ‑bë bhä 'nɩ waa' bhɔɔ 'flɔɔ bhɛɛ‑. 'Flɔɔbhë ‑bhlo 'coo‑ ‑kʋ bhlä 'gokpëa 'mnö nä, amä wa ‑fämʋ. 15'Nɩ Zozii yiwa soo, ɔ lä a fä Falizɩɛnyʋa ‑yä Elodöö' 'flɔɔ 'bhabha‑gwäzöö plɛkʋ! 16Ɔ cii‑ lä sɔɔ nä, kwa cii‑ wamä ‑bhlobhlo pää', wlä ‑aa ‑wʋ lä 'flɔɔ bhɛɛ‑ nä, 'ɩzä ɔ ci lä sɔɔ. 17‑Mä ɔɔ' 'nyukwli ‑klä lä sä wa ci bhlä nä, kɔ ylʋwa‑, ɔ lä ‑ɔnözä 'nɩ a bhlää bhä 'kʋ anyɩ ‑bhlobhlo pää', sä aa' ‑wʋ 'flɔɔ bhɛɛ‑ nää' ‑zaa? A nö'ö ‑lätee 'mʋ nuu‑ ‑a? Sɩ ‑kʋ bhä 'nɩ a 'tɛ bhä sää 'nyukwlii, 'nɩ anyɩa 'wluu ‑lä bhä tee wälɩɩ 'fɩɩn ‑ɩ nʋɔ lä nä 'kʋ bhlüü‑? 18Sɩ ‑kʋ bhä 'nɩ a ‑kä bhä 'yi 'nɩ aa 'ni bhä sää? 'Nɩ a ‑kä bhä 'nyukwli 'nɩ aa 'nu bhää?#8.18 Zɛɛ 'sɩɩ Zele 5.21; Eze 12.2. Aa' luë ‑wʋ ‑a? 19'Tänyɩɩ n bhlüü‑ lä 'flɔɔbhüü ‑ngbü 'kʋ, 'nɩ n ‑dënɩ lä nyɩkpaa' ‑bhɛgö ‑ngbü (5.000) nä, ‑takwü zio ‑ji bhɛ 'kʋ 'nɩ a ‑fämʋ bhɛɛ? Wlä ‑takwü 'kʋgbä 'sɔ. 20Ɔ lä 'nɩ 'tänyɩɩ n dëë‑ lä 'flɔɔbhüü ‑ngbɔɔsɔ nyɩkpaa' ‑bhɛgö ‑mɔɔnä (4.000) nä, ‑takwü zio ‑ji bhɛ 'kʋ 'nɩ a ‑fämʋ bhɛɛ? Wlä ‑takwü ‑ngbɔɔsɔ. 21Ɔ lä ‑a! ‑Mänɩ sɩ ‑kʋ bhä 'nɩ aa' ‑lä bhä ‑zä 'nuu?

Zozii ‑yamä 'yikpüü' kʋnyɔ

(Makö 10.46‑52; Zään 9.1‑11)

22Zozii ‑yä ɔɔ' 'kʋgënyʋa 'sɔ ‑ŋëë lä Bɛsayida‑duu 'mnö nä, kä nyɩkpa ‑lɔɔ 'yikpüü' kʋnyɔ yëku. 'Nɩ wa yi Zozii bhibhie nynä ɔ 'taa nyɩkpɔɔ. 23‑Mä Zozii bhlüo‑ 'kʋ 'nɩ, ɔ ‑yɔsɔ yi 'duu gwë ‑sä. 'Nɩ ɔ yio ‑dlɛɛ 'yi bʋä, 'nɩ ɔ yio ‑klɔgbä 'kʋ gbɛɛ. 'Nɩ ɔ yio 'ylä, ɔ lä ‑n ni lʋʋ 'yi ‑a? 24Nyɩkpɔɔ ‑wloo lä sä nä, ɔ lä n ni nyɩkpa 'yi 'nɩ wa nää, ‑mä wa ‑kʋ nynä si. 25'Nɩ Zozii yi bʋkʋ nyɩkpɔɔ ‑klɔgbö 'yi 'kʋ gbɛɛ, 'nɩ ɔ yi yamä. Ɔ ni bhɛ ‑pɛɛ sä wɩa. 26'Nɩ Zozii yio soo, ɔ lä ‑n mʋ gbëë'! ‑Naa ghlää ‑lä 'duu 'mnö, ‑mä ‑n mʋ ‑naa ‑gbäsɩɩ!

Zozii 'mɔɔ‑ plöö‑ lä Klisöɔ

(Matie 16.13‑20; Lukö 9.18‑21)

27‑Nɩnɩ 'fɩɩn plöö‑ ylä nä, 'nɩ Zozii ‑yä ɔɔ' 'kʋgënyʋa 'sɔ yi Sezaleebhlɩ 'kʋ mʋ. Sezalee‑bhlɩɛ nä, 'loyo Filipʋ 'mɔɔ‑ 'kämänɩɛ bhlä. ‑Mä wa ‑kʋ lä mʋdä nä, Zozii ylää‑ ɔ lä ‑maa a kä 'plö 'nɩ wälɩɩ a nu lä 'naa ‑za nä, wlä n plöö‑ bhää? 28'Kʋgënyʋa lä 'a! ‑Nänʋä ci nynä ‑mɔɔ plöö‑ Zään Badisö, 'nɩ ‑nänʋä ci nynä ‑mɔɔ plöö‑ 'plɔfɛtɩ Elii. 'Nɩ ‑nänʋä ci 'sɩɩ nynä ‑n ‑glö ‑gɔgɔbhlää' 'plɔfɛtɩnyʋaa' lɔɔ ‑bhlo. 29Ɔ lä 'nɩ anyɩ 'titi, a lä n plöö‑ bhää? ‑Mä Pɩɛlö ‑sä në 'nɩ ɔ cii‑, ɔ lä ‑mɔɔ plöö‑ lä Klisöɔ! 30Pɩɛlö cii‑ lä sɔɔ nä, 'nɩ Zozii yiwa ‑kɔkwɩ bhoo nynä wa 'nä sonɩ ‑lä nyɩkpɔ.

Zozii paa‑ ɔɔ' 'kʋgënyʋä wälɩɩ‑ 'gɔ lä ŋëë nä

(Matie 16.21‑23; Lukö 9.22)

31'Nɩ Zozii yiwa cɩalɩ 'kʋ cie, ɔ lä ɩ ‑ŋwa 'kʋ nynä Nyɩkpɔɔ ‑Yowli nyɛnɩä kpänyɩ. ‑Dɔɔpänyʋa, 'Cibhisänyʋaa' 'cifinyʋa ‑yä ‑Jlämöcɩanyʋa, wa yio cɛɛ nynä ɔmɔɔ‑ ‑wʋ Klisöɔ plöö‑ 'nɩ wa yio 'bhlä 'nɩ ɔ yi 'ku. ‑Mä tanaylʋʋ 'kʋ ɔ yi 'kuëë glɔɔ. 32Zozii' zizienʋwa bhɛ ‑pɛɛ wälɩ 'yii ‑mä kɔ sonʋwa bhɛ 'kpätaa ɔɔ' nyɛnɩälɩɩ' yëkuu' wälɩ. Ɔ cii‑ lä sɔɔ nä, kä Pɩɛlö lanöɔ‑ gbäkö 'kʋ 'nɩ ɔ yio ‑kɔkwɩ ‑bhoo nynä sä ɔ ci lä nä, ɔɔ' cii ‑lä sɔɔ. 33‑Maa, Zozii 'ylɩbhɔ‑ 'nɩ ɔ yi ɔɔ' 'kʋgënyʋa 'klʋ tlaa, 'nɩ ɔ yi Pɩɛlö 'yizlɛ 'kʋ 'ŋʋʋ, ɔ lä ‑n ‑sä'ä gwë, 'Dëvlo‑! Nyɩkpaa 'bhisäkʋ ‑n bhobho, ‑mä ‑nn bhobho ‑wʋ Laagɔ 'bhisäkʋ.

Zozii' 'kʋgëlɩ

34'Nɩ Zozii yi ‑jlëa ‑yä ɔɔ' 'kʋgënyʋa 'sɔ laa. 'Nɩ ɔ yiwa soo, ɔ lä nyɩkpɔ kä cii‑ nynä ‑mä ɔ yi'i 'kʋ 'gë nä, ɔ ‑bha ɔ yëkuu' gbʋʋ' ɩyä ɔ bhɛɛ ɔɔ' 'kusuu ‑yä ɔ gë'ë 'kʋ. 35‑Ɔ gä tään nynä ‑mä ɔ 'kä ɔ yëkuu' zëkpë 'kʋ bhlää nä, ɔ yia të. 'Ɩzä ‑ɔ gä cii‑ nynä ‑mä, ɔ yi ɔɔ' zëkpë të 'naa ‑za ‑yä Laagɔɔ' 'Nägädöö' ‑za nä, ‑lɔɔ' nyɩkpɔɔ yi ɔɔ zëkpëa ‑lɔɔ nëë' ‑sä. 36Nyɩkpɔ kä 'ylʋzɔɔ' leylüü 'fɩɩn nii‑, 'nɩ ɔɔ' zëkpëa kä ‑too nä, ‑bʋzʋɛ ‑sä 'titi ɔ nii‑ bhää? 37Lʋʋ ‑sä 'titi nyɩkpɔ yi bhä ɔɔ' 'wugä 'mʋ dögbää? 38'Bhlɛsʋnʋ 'mnö nyɩkpaa‑ sä lä Laagɔ gwë 'nɩ ‑wa nʋ lä nyenyii nä, waa' 'yikʋ 'naa zoo kä nyɩkpɔ 'bhlä, 'nɩ 'naa nuwälɩɩ' zoo kɔ 'bhlä nä, ‑lɔɔ nyɩkpɔɔ nä, ɔɔ' zoo yi 'sɩɩ Nyɩkpɔɔ ‑Yowli 'bhlä. 'Tänyɩɩ ɔ 'kä lä ɔ 'Bää 'klʋagba ‑yä kplɔɔkplɔɔ‑zizii 'klʋagba 'mnö yii nä, ‑lɔɔ' nyɩkpɔɔ' zoo yio 'sɩɩ 'bhlä.

دیاریکراوەکانی ئێستا:

Makö 8: god

بەرچاوکردن

هاوبەشی بکە

لەبەرگرتنەوە

دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە

زانیاری زیاتر لەبارەی GOD - u2

Makö 8

ئایەتە بڵاوەکانی پەرتووکی پیرۆز لە
Makö 8

گوێگرتن لە Makö 8

کتێبی پیرۆز:

Godié

وەشان: GOD - u2 - god

Makö 8

Makö 8

ئایەتە بڵاوەکانی پەرتووکی پیرۆز لە Makö 8

گوێگرتن لە Makö 8

کتێبی پیرۆز:

Godié

وەشان: GOD - u2 - god

Makö 8

ئایەتە بڵاوەکانی پەرتووکی پیرۆز لە
Makö 8