Makö 4

‑Lɛɛ ‑goonyɔɔ' ‑nyädlaa

(Matie 13.1‑23; Lukö 8.4‑15)

1Zozii ‑mʋ a bʋkʋ Galilee' 'nyibhlëa yëku 'nɩ ɔ cɩa bhä. ‑Mä sä nyɩkpa ‑bhutukpä 'wlänöɔ bhlä yëku 'wlu nä, kɔ ‑gblää 'gokpëë' 'nɩ ɔ yi sä kʋ. Ɔ ‑kʋ bhä 'nyiee 'klʋ 'gokpëa 'mnö 'nɩ wamä ‑wa ‑kʋ bhä 'nyie ‑kpʋkpʋʋ 'kʋ. 2Ɔ cɩanʋwa kpänyɩ ‑lɔɔ ‑nyädlöö' 'nɩ ɔ ‑sonʋwa, ɔ lä 3a poo 'nyukwli! A ni, ‑lɛɛgonyɔ ‑bhlo, ɔmɔɔ‑ ‑mʋ lä ‑lɛɛgoo ‑kää. 4Ɔ ‑kʋ lä goodä nä, ‑lɛɛyʋʋ ɔ goo bhlä nä, ʋʋ' 'klë ‑bhlüü ‑blɔ ‑gbäkö 'nɩ nümnüü ‑yi, 'nɩ ɩ yiu lü. 5'Yigädalʋʋ ‑bhlüü cɛkwɩ‑dʋdʋ 'mnö, dä ‑dʋdʋʋ' bhɔɔ lä ‑zu nä. Sä ‑lɔɔ' ‑dʋdʋʋ' bhɛ lä 'mʋ ‑tlʋ nä, 'yʋʋ wlʋʋ‑ bhɛ 'flɛ sisio, 6‑mä 'tänyɩɩ 'ylʋʋ 'tɛmä‑ ylä 'mʋ 'nɩ gogolɩɩ' sikplii' bhɔɔ ‑lä glu ‑mʋ nä, kɩ ‑si yɩ 'kʋ. 7'Yʋʋ ‑nʋnʋ ‑bhlüü nünëë'. Ʋ wlʋʋ‑ lä nä, kä nünëa gbiu‑ 'wlu 'nɩ ʋʋ' yɩɔ ‑tlʋ. 8‑Mä 'yʋʋ nʋnʋ ‑bhlüü 'nägä‑dʋdʋʋ 'mnö. ‑Ʋ ‑bhlüü lä 'nägä‑dʋdʋʋ 'mnö nä, ʋ ‑bha ‑lɔɔ nëë' 'nɩ ʋ ‑füto. 'Vöö ‑nɩnɩ ‑tlʋ 'yʋyii' glʋ 'nɩ 'kʋgbä, ‑nɩnɩ ‑tlʋ gwlɩ taa, 'nɩ ‑nɩnɩ ‑tlʋ gwlɩ ‑ngbü (100). 9'Nɩ Zozii yi ci, ɔ lä ‑ɔ gä 'nyukwli ‑kä nynä ‑mä ɔ 'kä 'nu nä, ɔ 'nu!

Zozii ‑sä ‑lɛɛgonyɔɔ' ‑nyädlaa ‑zɔɔ

(Matie 13.10‑17; Lukö 8.9‑10)

10Ɔ ‑sä ylä ‑jlëa gwë nä, ɔɔ' 'kʋgënyʋa 'kʋgbä 'sɔ ‑yä nyɩkpaa' ‑lʋa ‑kʋ bhlä ‑lɔɔ nä, wa ylɔɔ ‑nyädlöö' ‑zɔɔ. 11'Nɩ ɔ yiwa soo, ɔ lä ɩ ‑ŋwa 'kʋ nynä ‑mä anyɩ nä, Laagɔ panö'anyɩ ʋʋ' 'Leyiduu 'mnö 'yiziziogbɩɩ' ‑zɔɔ, ‑mä ‑mɔɔ' ‑lʋa nä, ‑nyädlöö' wa 'kwa sonö. 12Ɩyä

Wa 'kä ‑wloo ‑aaa ‑yä,

Waa' kä sä 'ni.

Wa 'kä 'nyukwli poo ‑aaa ‑yä,

Waa' kä 'nu.

Waa' kä ‑kä 'ylɩbhɔ ‑yä

Waa' kä ‑kä Laagɔ 'klʋ tlaa ‑yä,

Waa' nyenyii' kä ‑kä cienöɔ. # 4.12 Ɩ bha Eza 6.9‑10.

13'Nɩ ɔ yiwa bʋkʋ soo, ɔ lä a 'nö ‑nyädlänaa' ‑zɔɔ nuu‑ nä, säsä a yi bhä ‑mɔɔ' ‑lɩɩ' ‑zɔɔ 'nuu? 14‑Lɛɛgonyɔɔ nä, ɔmɔɔ‑ plöö‑ lä Laagɔwälɩ‑cinyɔɔ. 'Ɩzä, gogolɩɩ ɔ ‑goo lä nä, ɩmɩɩ‑ plöö‑ lä Laagɔwälɩɩ. 15Tɛɛtɛɛlɩɩ ‑bhlüü ‑blɔ ‑gbäkö. ‑Blɔɔ nä, kʋʋ panalɩɩ plöö‑ lä nyɩkpaa' ‑lʋa ‑wa nu lä Laagɔwälɩɩ, 'nɩ 'kpobhu ‑bhlo 'kʋ 'Dëvlo sʋwanyɩ lä plɛ 'yi nä. 16Gogolɩɩ ‑ɩ ‑bhlüü lä cɛkwɩ‑dʋdʋʋ 'mnö nä, kɩ pana lä nynä ‑mä nyɩkpaa' ‑nänʋä ‑kʋ ‑lɔɔ 'nɩ wa nu Laagɔwälɩɩ, 'nɩ wa 'bhlünɩ ‑pʋpɛɛ' 'kʋ. 17‑Mä ‑lɔɔ' nyɩkpaa' Laagɔwälɩɩ' 'ŋʋ ‑wʋ sikplii, 'nɩ wa 'cɩcɩ bhobhowlu sisio. 'Kwlɩkabhɩä ‑yä nyäkälɩ kwa Laagɔwälɩɩ' ‑za ŋëë nä, kä wa sä Laagɔ gwë. 18Gogolɩɩ ‑ɩ ‑bhlüü lä nünëa 'mnö nä, kɩ pana lä nynä nyɩkpaa' ‑nänʋä ‑kʋ ‑lɔɔ 'nɩ wa nu lä Laagɔwälɩɩ. 19‑Mä 'ylʋzɔɔ' bhobholɩɩ ‑yä ‑mɔɔ' leylüü' 'nyigëlɩɩ, ɩyä ‑mɔɔ' 'yii mɛnɔɔ nä, ɩ gbi Laagɔwälɩɩ 'wlu 'nɩ ɩ gbä 'nɩ ɩɩ' ŋëë ‑wʋ dä. 20‑Nɩnɩ ‑bhlüü 'nägä‑dʋdʋʋ'. 'Nägä‑dʋdʋʋ nä, kʋʋ pana lä nyɩkpaa' ‑lʋa ‑wa nuu‑ lä Laagɔwälɩɩ 'nɩ ‑wa ŋonɩ‑ lä 'kʋ nä. ‑Lɔɔ' nyɩkpaa, kwa ‑kʋ lä nynä 'vöö ‑ɩ ‑tlʋ lä nä. ‑Nɩnɩ ‑tlʋ 'yʋyii' glʋ 'nɩ 'kʋgbä, ‑nänʋä ‑kä gwlɩ taa, 'nɩ ‑nänʋä ‑tlʋ gwlɩ ‑ngbü (100).

'Näpɛɛ' ‑nyädlaa

(Lukö 8.16‑18)

21'Nɩ Zozii yiwa bʋkʋ soo, ɔ lä wa kä 'näpɛ 'yi döö‑ nä, waa' 'gbie ‑wʋ ‑takwë 'wlu. 'Nɩ waa' 'ŋʋɛ ‑wʋ 'sɩɩ ‑bɔɔgɩ ‑zɔɔ, ‑mä zëkpë 'kʋ wa ŋʋɛ 'nɩ ɛ ŋänɩä. Yio ‑a? 22Nä, ‑lɩɩ 'fɩɩn‑ ‑zizio bhlä nä, ɩ yi 'yi nio. 'Nɩ ‑lɩɩ ‑ɩ nʋɔ bhlä 'mükü ‑mükü nä, ɩ yi zëkpë 'kʋ ghlä. 23‑Ɔ gä 'nyukwli ‑kä nynä ‑mä ɔ 'kä 'nu nä, ɔ 'nu!

24Zozii ‑sonʋwa, ɔ lä wälɩ 'fɩɩn a poo lä 'nyukwli nä, a fɩɩ plɛ 'kʋ! ‑Lʋʋ a nyäka lä 'mʋ nä, ʋmʋ Laagɔ 'kä lä 'kʋ 'bhlü ‑yä ʋ 'kä sʋ nyɩ'anyɩ lä nyäka. ‑Mä anyɩ, ʋ yi anyɩa' daa 'kʋ 'ŋʋʋ. 25‑Ɔnöza bhää? Nyɩkpɔɔ' lɔɔ‑ ‑kä lä nä, wa yio bʋkʋ 'nyɛ. ‑Mä ‑ɔɔ ‑wʋ lä ‑kä nä, sä ɔ ‑kä bhlä nä, wa yio sɔɔ ‑sä.

Gogolɩɩ' ‑nyädlaa

(Matie 13.31,32; Lukö 13.18,19)

26Zozii ‑sonʋwa bʋkʋ, ɔ lä kä Laagɔɔ' 'Leyiduu' panalɩɩ ‑kʋ lä nynä ‑mä ‑n ‑näsä nyɩkpɔ ‑goo lä ɔɔ' 'klää ‑lɛɛyʋʋ nä. 27'Nɩ sä 'ylʋ bhlü 'nɩ zelü ze lä nä, 'nɩ ɔ ŋɔɔ, 'nɩ ɔ glɔɔ lä nä, sɔɔ ‑lɛɛyʋʋ pä 'kwälö 'nɩ ʋ wlʋ. ‑Mä sɩ nʋmɔ nʋmɔ lä 'nɩ ‑lɛɛyʋʋ wlʋ lä nä, ɔɔ' ‑wʋ sɔɔ ‑yi. 28‑Dʋdʋ nä, ʋmʋ 'titii‑ bhʋa ʋʋ' 'mnö gogolɩɩ. Ʋmʋʋ‑ gbä 'nɩ 'yʋyee nʋ 'vä. 'Nɩ 'vaa tlʋ 'yʋʋ, 'nɩ 'yʋʋ yi 'mʋ. 29Yʋʋ kä yɩ zään nä, ‑ɔ ‑goo bhlä nä, sä ‑döödä yä ylä ŋëë nä, ɔ bhlü yɩ ‑bakä 'kʋ 'nɩ ɔ yi ‑döö kää.

'Yʋyee' ‑nyädlaa

(Matie 13.31‑32; Lukö 13.18‑19)

30'Nɩ Zozii cii‑ bʋkʋ, ɔ lä ‑mä, n 'kä bhä ‑zi Laagɔɔ' 'Leyiduu' 'kʋ nyäka 'nä ‑a? Panalɩ‑ ‑sä n yi bhä 'kʋ 'bhlü 'nɩ n yiu bhä 'kʋ pään 'nä ‑a? 31Ɔ lä kʋ ‑kʋ lä nynä 'yuyee wa laa lä mutadö nä. Mutadöye, ɛ ‑glö 'ylʋnʋzɔɔ' suyʋʋ nëëdëë' ‑lɛ 'tɩkɩɩlɛɛ. 32‑Mä wa kɛ ‑goo nä, kɛ bhʋä 'nɩ ɛ zii ‑gboo 'mnö gogolɩɩ 'fɩɩn 'wlu. Ɛ nʋ sää 'läbhɩ 'kädɩ, 'nɩ 'läbhɩɩ 'mnö nümnü 'slää ‑mɔɔ ‑nünü. 33'Sää Zozii bhlü bhlä ‑nyädlöö 'kʋ 'nɩ ɔ cɩa bhlä, 'nɩ nyɩkpaa puo bhlä 'nyukwli. Sä wa 'kɔ bhlä 'mʋ 'nu nä, sɔɔ ɔ sonʋwa bhä. 34Ɔ kwa bhä cɩa nä, nyädlöö' ɔ cɩanʋwa bhä. ‑Mä ɔ ‑yä ɔɔ' 'kʋgënyʋa ‑bhlobhlo kä bhɛ ‑lɔɔ ‑kʋ 'nɩ ɔ sʋwa bhä wälɩɩ 'fɩɩn ‑zɔɔ.

‑Vʋvɔlʋʋ ‑yä 'nyiee 'sɔ ŋʋ Zozii 'klʋkpää'

(Matie 8.18‑27; Lukö 8.22‑25)

35‑Lɔɔ ylʋʋ ‑bhlobhlo 'kʋʋ ‑kugbë, Zozii ‑soo ɔɔ' 'kʋgënyʋa, ɔ lä a yi ‑ya mʋ ‑mɔɔ 'nyie klë! 36Wa ‑të ‑lɔɔ nyɩkpaa' 'kpaa 'nɩ, 'gokpëa Zozii ‑kʋ bhlä 'mnö nä, wa ‑plaa 'nɩ wa ‑yɔsɔ yi mʋ. 'Gokpüü' ‑nɩnɩ ‑yʋwa 'sɔ ‑mʋʋ yëkuu'. 37‑Mä wa ‑kʋ lä mʋdä na, dide 'kädɛ ‑yi 'nɩ 'nyinakwɩɩ bhɛlɩɔ bhä 'kʋ. Ɩ ‑kä 'ŋnö 'nɩ 'gokpëa cie‑ 'nyuu' yielɩ 'kʋ. 38‑Mä Zozii puu‑ 'gokpëa' gbädää' sä, 'nɩ ɔ 'tënö‑ 'pinë 'wlu 'nɩ ɔ ŋɔɔ bhä. 'Nɩ ɔɔ' 'kʋgënyʋa yi yi 'nɩ wa yio gälɩä, wlä ‑mä Cɩanyɔ‑, kä ‑a ku lä 'nɩ ‑n ŋɔɔ, 'nɩ plɛɛ' gbänö‑ö ‑wʋ 'mnö ‑a? 39Ɔ ‑glɔɔ lä nä, 'nɩ ɔ yi ‑vʋvɔlʋʋ 'kʋ ‑gaa, 'nɩ ɔ yi 'nyiee soo, ɔ lä 'nyiee‑, ‑n kʋ ‑plɩɩ ‑yä, ‑n 'plö yɩ ‑siin! Ɔ cii‑ lä sɔɔ nä, kä ‑vʋvɔlʋʋ doo‑, 'nɩ dää 'fɩɩn plöö‑ ‑siin! 40'Nɩ ɔ yi ɔɔ' 'kʋgënyʋa soo, ɔ lä ‑ɔnözä 'nɩ a ŋää bhä sɔɔyɩ? ‑Aaa, ‑mä ‑wʋ pɔlötɛtɛ ‑kä ‑a? 41‑Mä ‑ŋänö ‑plʋwa 'sää kpänyɩ 'titi, wlä ‑maa nyɩkpɔɔ' 'cësa bhä 'nɩ ‑vʋvɔlʋ ‑yä 'nyie 'sɔ ŋʋɔ bhä 'klʋkpä?

دیاریکراوەکانی ئێستا:

Makö 4: god

بەرچاوکردن

هاوبەشی بکە

لەبەرگرتنەوە

دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە

زانیاری زیاتر لەبارەی GOD - u2

Makö 4

ئایەتە بڵاوەکانی پەرتووکی پیرۆز لە
Makö 4

گوێگرتن لە Makö 4

کتێبی پیرۆز:

Godié

وەشان: GOD - u2 - god

Makö 4

Makö 4

ئایەتە بڵاوەکانی پەرتووکی پیرۆز لە Makö 4

گوێگرتن لە Makö 4

کتێبی پیرۆز:

Godié

وەشان: GOD - u2 - god

Makö 4

ئایەتە بڵاوەکانی پەرتووکی پیرۆز لە
Makö 4