Matie 24

Zozii lä Laagɔ‑bhutu 'kädʋʋ yi wlɔɔ

(Makö 13.1‑4; Lukö 21.5‑7)

1Zozii bha bhä Laagɔ‑bhutu 'kädʋʋ 'mnö, 'nɩ ɔɔ' 'kʋgënyʋa yio yëku yi. 'Nɩ wa yio soo nynä ɔ wloo Laagɔ‑bhutuu 'kädʋʋ sä wa slʋʋ‑ lä 'nää nä. 2'Nɩ Zozii yiwa soo, ɔ lä ‑nʋawlɛɛ 'mnö, n sonö'anyɩ nynä ‑bhutuu a wloo lä ‑länʋmʋ nä, ylɩɩ yi ŋëë 'nɩ wa yiu wlä 'nɩ ‑gɔgbää' ‑lä ‑gɔgbä 'kʋ too. 3‑Mä Zozii ‑mʋ Olivie‑kükëa 'wlu 'nɩ ɔ yi ‑mɔɔ sä kʋ. 'Nɩ ɔɔ' 'kʋgënyʋa yio ‑mɔɔ ŋëë, 'nɩ wa yio zigbëdä 'ylää, wlä Cɩanyɔ‑, 'tänyɩ ‑sa 'mnö wälɩyɩ 'kä bhä 'kʋ 'plöö? Panalɩ ‑sä yi bhä gbä 'nɩ ‑a yi bhä zëkpëa' bhɩäylʋʋ yibhëë?

'Kwlɩkaabhɩä 'kädaa' ciedä

4Zozii lä a kä ‑nʋ nä, a luë ‑mä nyɩkpɔɔ' 'nyigënö'anyɩ ‑lä! 5Bhutukpä yi yi, 'nɩ wa yi 'naa 'ŋnöö bhɛɛ. 'Nɩ nyɩkpɔ nyɩkpɔ yi ci nynä ‑mä ɔmɔɔ‑ plöö‑ Klisöɔ! 'Nɩ wa yi nyɩkpa ‑bhutukpä 'nyigë. 6A yi tʋʋ' wälɩ 'nu, 'nɩ a yi 'sɩɩ tʋʋ' kplü 'nu. ‑Mä ‑ŋänö 'nä bhla'anyɩ ‑lä! Ɩ ‑ŋwa 'kʋ nynä ‑nɩnɩ 'fɩɩn ŋëë! ‑Mä zëkpëa' bhɩä‑tänyɩɛɛ' ‑lätee ‑ŋëë. 7‑Lɔɔ' 'tänyɩɛ 'mnö nä, 'bhlɩ yi 'kʋ ‑bha 'nɩ ɛ yi ɛ lübhlɩ tʋ fä. 'Nɩ 'leyidu yi 'kʋ ‑bha 'nɩ ʋ yi ʋ lü‑leyidu tʋ fä. 'Ylʋzɔɔ' dö ‑bhutukpä ‑gbugbe yi yi, 'nɩ ‑dʋdʋ yi tɩtɛ. 8Nyäkälɩnɩ 'fɩɩn nä, kɩ ‑kʋ lä nynä gbadöŋnɔ kä cii ɔ 'kä gään nä ɩɩ' nyäkälɩɩ ɔ ni lä nä. 9Nä wa yi'anyɩ nyäkälɩɩ' 'ŋʋ. Wa yi'anyɩ 'bhlä 'nɩ a yi 'ku. Nyɩkpa yi'anyɩ 'bhlɩɩ 'fɩɩn 'mnö zɔbhlɛmä 'naa ‑za. 10‑Nɩnɩ yi gbä 'nɩ nyɩkpa ‑bhutukpä yi Laagɔɔ' pɔlötɛtɛɛ' ‑blɔɔ 'kʋ ‑bha. Wa yi 'nyigë ‑nyigë, 'nɩ wa yi zɔbhlɛmä ‑zɔbhlɛmä. 11‑Kpläkplö 'plɔfɛtɩnyʋä ‑bhutukpä yi yi, 'nɩ wa yi nyɩkpa ‑bhutukpä 'nyigë. 12‑Mä sä nyenyii 'kä lä zumë nä, ɩ yi gbä 'nɩ bhutukpää' ‑wawʋʋ wa ‑kä bhlä Laagɔɔ' ‑za nä, ʋ yi 'kʋ ‑sänöɔ. 13‑Mä anyɩa' lɔɔ‑ gä plɛkʋ 'tɛmä ‑aaa, 'nɩ bhɩäylʋʋ kä ‑ŋëë nä, ɔ yi ‑lɔɔ nëë' ‑bha. 14Laagɔɔ' 'Leyiduu' 'Nägädöö yi 'kɔɔn 'mnö dää 'fɩɩn ‑sänöɔ ‑yä ɩ 'kä 'bhlɩɩ 'fɩɩn ‑dläfʋɛ 'plö. ‑Lɔɔ ‑tɛɛ zëkpëa' bhɩäylʋʋ 'kä lä ŋëë.

Gbenyenyi 'kädɩɩ' 'tänyɩɛ yi ŋëë

(Makö 13.14‑23; Lukö 21.20‑24)

15Ɩ ‑kä 'ŋnö nä, ‑lɔɔ ‑ɔ plöö‑ lä ‑Diizinyɔɔ 'nɩ ‑ɔ bhusuë lä Laagɔ yëku nä, 'nɩ 'plɔfɛtɩ Danɩɛ sä bhlä nä,#24.15 Zɛɛ 'sɩɩ Danɩɛ 9.27; 11.31; 12.11. 'tänyɩ yi ‑lɔɔ kʋ 'nɩ a yio 'ni. A kɔ yɩ 'yi 'ni, 'nɩ Laagɔɔ' kplɔɔkplɔɔdaa ɔ kä yɩ ‑lɔɔ sä ‑kʋ nä, anyɩa' lɔɔ ‑ɔ gä bhɛ 'bɔɔgʋnʋ zɛɛ nä, ɔ gblɩmä yɩ! 16‑Wa gä bhɛ Zudee‑bhlɩɛ 'mnö kʋ nä, wa ‑guu ‑yä wa zizio 'küküü nëëdë. 17‑Ɔ gä bhɛ ɔɔ' ‑bhutuu' ‑gwlɛɛdä sä ‑kʋ nä, ɔɔ' plä ‑läyɩ ‑bhutuu' nynä ɔ 'kä lʋʋ 'kʋ 'bhlü. 18‑Ɔ gä bhɛ 'klää ‑kʋ nä, ɔ 'nä 'ylɩbhɔ ‑läyɩ nynä ɔ 'kä ɔɔ' 'kotuklë 'kʋ 'bhlü. 19Gbadöŋwnɩa ‑yä 'ŋwnɩaa‑ 'gä lä 'yüë nyɩa ‑lɔɔ' 'tänyɩyɩ 'mnö nä, wa yä mie! 20Nä, a bhibhie Laagɔ ‑yä anyɩa' ‑guu‑tänyɩɛɛ' kä ‑kä 'nyugozo‑wätlɩɩ 'mnö ŋënö. A bhibhie 'sɩɩ ‑yä ɛɛ' kä ‑kä Sabaa‑gwlɛylʋʋ 'kʋ ŋënö. 21Nyäkälɩɩ nyɩkpaa 'kä lä ‑lɔɔ' tänyɩɛ 'mnö 'nii nä, ɩ yi zumë kpänyɩ 'nɩ ɩ yi nyäkälɩɩ 'fɩɩn 'kʋ zi. 'Kɔɔn 'nö bhlä 'wlʋ nä, sɔɔ' nyäkälɩɩ' ‑läzä nio‑, 'nɩ ɩɩ ‑lä 'sɩɩ 'kɔɔn nio. 22Kwlienyɔ Laagɔ 'nö bhä ɩɩ' ylɩɩ 'kʋ ‑tëtëë nä, nyɩkpɔɔ' ‑lä bhɔɔ 'pʋ. Nyɩkpaa 'fɩɩn Laagɔ laa‑ lä nä, waa' ‑za ʋ ‑tëtëë lä ‑lɔɔ' ylɩɩ 'kʋ. 23Naa, nyɩkpɔ ka'anyɩ soo nynä ‑mä, a ni Klisöɔ 'mɔɔ‑ ‑kʋ lä ‑mää nä! ‑Ɔ! A ni ɔmɔɔ‑ ‑kʋ lä ‑mɔyɩ nä, ‑lɔɔ' nyɩkpɔɔ a 'nä laa ‑lä ɔɔ' ciciwälɩɩ nyaasäsä. 24‑Kpläkplönyʋä yi yi, 'nɩ wa yi wa yëku Klisöɔ laa. 'Nɩ ‑kpläkplö 'plɔfɛtɩnyʋä yi 'sɩɩ yi. Wa yi 'yiziziogbɩ ‑yä ‑daminë 'kädö 'sɔ nʋ. Wa kä mii nä, nyɩkpaa 'fɩɩn Laagɔ laa‑ lä nä, wa yiwa 'sɩɩ 'nyigë. 25Nä, anyɩ kä n ‑gblɩmänö'anyɩ lä ‑bhlɛ.

Nyɩkpɔɔ ‑Yowlii' yi‑tänyɩ

(Makö 13.24‑27; Lukö 21.25‑31)

26Wa ka'anyɩ ‑soo nynä a ni Klisöɔ 'mɔɔ‑ ‑kʋ lä ‑mɔyɩ 'popie 'mnö nä, aa' mʋ lä ‑mɔɔ! Wa ka'anyɩ ‑soo nynä ‑mä a yi ‑mä ɔmɔɔ‑ ‑zizio lä ‑mää nä, aa' mʋʋ ‑lä ‑mɔɔ! 27A ni 'yi naa, sä ‑mɔɔ ŋɔkʋʋ' ‑ŋnäzälöö bha lä 'ylʋʋ ghlää ‑gbäsɩ 'nɩ ɩ ŋëë lä ʋʋ' säpu ‑gbäsɩɩ nä, sɔɔ Nyɩkpɔɔ ‑Yowlii' yi‑tänyɩɛ 'kä lä kʋ. 28Nä, dä ‑gɛzɛ yi lä kʋ nä, ‑lɔɔ goplüü 'kä lä 'wlu 'wlää.#24.28 Kɩ sä lä ‑zɔɔ nynä ‑mä 'tänyɩɩ Nyɩkpɔɔ ‑Yowli 'kä lä yi nä, kä nyɩkpaa' ‑lefɩɩn 'kɔ 'yi 'ni. 'Nɩ ɔ yi 'sɩɩ nyɩkpaa' ‑lefɩɩn 'tite ŋʋ. 29‑Mä, nyäkälɩnɩɩ' 'tänyɩɛ kä 'gää plöö‑ ‑jaa nä,

'Ylʋkwädlaa yi kpëmä.

'Nɩ sä 'cʋʋ lie bhlä nä,

Ʋʋ' ‑läyɩɔ sɔɔ lie.

‑Laagɔzälöö yi ŋɔkʋ ‑bha 'nɩ ɩ yi bhlü,

'Nɩ ŋɔkʋʋ' 'tɛtɩɩ ‑ɩ ‑kään bhlä ‑lɩɩ 'fɩɩn sä nä,

Ɩ yi gbʋgbɔnöɔ.#24.29 Zɛɛ 'sɩɩ Eza 13.10; 34.4; Zowɛɛ 3.4.

30‑Lɔɔ 'tänyɩɛɛ 'mnö Nyɩkpɔɔ ‑Yowlii' yiylʋʋ' panalɩɩ 'kä lä ‑laagɔɔ 'mnö 'kʋ ghlä. ‑Lɔɔ 'bhlɩɩ 'fɩɩn 'mnö nyɩkpaa 'kä ylä bhʋtʋ. Wa yi Nyɩkpɔɔ ‑Yowli 'yi 'ni, 'nɩ ɔ yi ‑laagɔɔ' 'nyukpɔɔ 'klʋ yii, ɔ ‑yä 'päwä 'kädä ‑yä 'klʋagbaa 'sɔ. 31'Nɩ zëkpënää' kwëtüü ‑mɔɔnä 'mnö, ɔ yi ‑mɔɔ ɔɔ' ‑Laagɔzizii lobho. 'Nɩ ɩ yi Laagɔɔ' läglɛɛ nyämʋʋ' 'pä. 'Nɩ nyɩkpaa' ‑lʋa Laagɔ ‑sä lä 'nɩ ‑wa ‑kʋ lä 'ylʋzɔɔ' dää 'fɩɩn nä, ɩ yiwa däbhlo 'wlu 'wlää.

'Figesuu' panalɩɩ

(Makö 13.28‑32; Lukö 21.29‑33)

32'Nɩ Zozii yi bʋkʋ ci, ɔ lä wälɩklëa 'figesuu' nʋnʋgbɩɩ pana lä nä, a 'nua 'mʋ ‑nä! A kä 'figesu 'yi 'ni 'nɩ ʋʋ' 'läbhɩɩ kä dögbɔlʋgbɔ nʋ nä, a ‑yi sɔɔ nynä ‑mä ‑kɔkɔylʋ yä 'mɛmɛ. 33Nä, a kä ylä ‑nɩnɩ 'fɩɩn 'yi 'ni nä, a yibhë sɔɔ nynä Nyɩkpɔɔ ‑Yowlii' yi‑tänyɩɛ yä 'mɛmɛ. ‑Ɔ ‑kʋ yɩ 'duu kpëkpë 'kʋ. 34N sonö'anyɩ ‑nʋawlɛɛ 'mnö nynä ‑mä, ‑pɛpɛɛ' nyɩkpaa' 'lɔlʋʋ' ‑lä 'plö 'nɩ wälɩɩ 'fɩɩn n ci lä nä, ɩ yi ŋëë. 35Laagɔ ‑yä ‑dʋdʋ 'sɔ yi 'plö, ‑mä 'naa ciciwälɩɩ ‑lä 'kɔɔn 'plö.

Nyɩkpɔɔ' ‑wʋ Klisöɔ' yiylʋʋ ‑yi

(Makö 13.32,35; Lukö 17.26‑27,34‑35; 12.39‑40)

36‑Ɔ plöö‑ lä ylʋʋ ‑yä 'gliyee 'sɔ nä, nyɩkpɔ 'nɩɩ ‑wʋ ‑yi. ‑Laagɔzizii ‑mä 'sɩɩ, ɩ 'nɩɩ ‑wʋ ‑yi. 'Nɩ Laagɔ ‑Yowli 'titi, ɔ 'nɩɩ ‑wʋ ‑yi, 'nɩ ‑ɔnö 'Bäɔ ‑bhlo. 37Sɩ plöö‑ lä Nowee' 'bhlɛsʋʋ 'mnö 'kʋ nä, sɔɔ ‑säkä ‑säkä Nyɩkpɔɔ ‑Yowlii' yi‑tänyɩɛ 'kä lä 'kʋ 'plö. 38Nowee' 'bhlɛsʋʋ nyɩkpaa nä, wa lü bhä 'nɩ wa mnä bhä, 'nɩ wa nönö bhä. Wa nyɛ bhä waa' 'yuŋnʋgbɛnyʋä 'wlie, 'nɩ wa 'nyɛ bhä wa 'yuŋwadie 'ŋwnɩä. Wa ‑kʋ sɔɔ nʋdä ‑aaa, 'nɩ Nowee yi 'gokpü 'kädaa 'mnö plä. 39Wa ‑kʋ bëlɩɩ' ‑aaa, 'nɩ 'nyu ‑zakwëa yiwa ‑zɔɔ 'vu. 'Nɩ 'nyunʋ yiwa 'kplɩ 'fɩɩn 'nɩ ʋ yiwa fään. Nä, Nyɩkpɔɔ ‑Yowlii' yi‑tänyɩɩ' nä, sɔɔ ‑säkä ‑säkä ɩ 'kä lä 'sɩɩ 'kʋ 'plö. 40Nyɩkpa 'sɔ yi 'klää lebhe nʋdä kʋ, 'nɩ ‑bhlo yi 'kʋ bhlüo‑, 'nɩ ‑bhlo yi ‑lɔɔ too. 41'Ŋwnɩä 'sɔ yi ‑gwëdë ‑zɔɔ kʋ, 'nɩ ‑bhlo yi 'kʋ bhlüo‑, 'nɩ ‑bhlo yi ‑lɔɔ too. 42Nä, a gblɩmä ‑mä, ylʋʋ 'kʋ anyɩa' Kwlienyɔ 'kä la yi nä, a 'nʋʋ ‑wʋ ‑yi! 43‑Mä a yibhë wälɩklënä! 'Gliyee 'mnö 'ghüghünyɔɔ 'kä lä 'sabo ghlü ‑kää yi nä, 'gbë 'bä kɛ bhä ‑yi nä, ɔ yi bhä gblɩmä ‑yä 'ghüghünyɔɔ' kä ‑kä ɔɔ' ‑bhutuu 'wäta. 44Nä, ɩ ‑kä 'ŋnö nä, anyɩ ‑mä 'sɩɩ, a ‑ghlɩlɩ ‑mä 'tänyɩɩ aa ‑wʋ lä 'kwläkwlä sää ‑gblɩ nä, ‑lɔɔ Nyɩkpɔɔ ‑Yowli 'kä lä yii.

‑Gänʋnyɔɔ' 'nägälɔɔ ‑yä ‑gänʋnyɔɔ' ‑lɛɛ nyonyo

(Lukö 12.41‑48)

45‑Gänʋnyɔɔ' lɔɔ ‑ɔ nää‑ lä nä, 'nɩ ‑ɔ ‑gblɩ lä 'sɩɩ nä, säsä wa yibhënöɔ bhää? ‑Gänʋnyɔ ‑bhlo 'mɔ ɔɔ' käänyɔ ‑soo lä, ɔ lä kä n mʋ lä lowluu' ‑mä, ‑n ni lebhe. 'Tänyɩ kä ‑ŋëë nä, ‑n 'nyɛ ‑lää gbëë' lebhe‑nʋnyʋa lülülɩɩ ‑yä wa 'kä lü! 46'Nɩ ‑gänʋnyɔɔ kä lebhee nʋdä ‑kʋ 'nɩ ɔɔ' käänyɔ kɔ ‑lɔɔ ŋëë nä, ɔ yä 'pʋ! 47‑Nʋawlɛɛ 'mnö, n sonö'anyɩ nynä ‑mä ‑gänʋnyɔyɩ, ɔɔ' käänyɔ yio ɔɔ' kääkäälɩɩ 'fɩɩn 'kʋ wloodä 'nyɛ. 48‑Mä, gänʋnyɔ kä ‑nyuu, 'nɩ ɔ kä ɔ yëku ‑soo nynä ‑mä 'tänyɩ yä 'mʋ tlʋmä 'nɩ 'naa käänyɔɔ' yi ‑wʋ! 49'Nɩ ɔ kä 'kʋ ‑bha 'nɩ ɔ kä ɔ ‑liesɩɩ bhütë, 'nɩ ɔ ‑yä nʋbhlänyʋa 'sɔ kä lü 'nɩ wa kä 'mnä nä, 50ylʋʋ 'kʋ ɔɔ' ‑wʋ lä ‑gblɩ nä, 'nɩ 'gliyee ɔɔ' ‑wʋ lä ‑yi nä, ɛmɛ 'mnö, 'gbëa' käänyɔ yio ‑zɔɔ 'vu, 'nɩ ɔ yi yi. 51Ɔ kä yɩ ‑yi nä, ɩ yio nyäkälɩ 'kädɩɩ' 'ŋʋ. Sä wa klä lä tootoonyʋä nä, ɔ yio sɔɔ klä. ‑Lɔɔ nyɩkpa 'kä lä 'tu ‑yä wa 'kä lä glëwlu mnü.

دیاریکراوەکانی ئێستا:

Matie 24: god

بەرچاوکردن

هاوبەشی بکە

لەبەرگرتنەوە

دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە

زانیاری زیاتر لەبارەی GOD - u2

Matie 24

ئایەتە بڵاوەکانی پەرتووکی پیرۆز لە
Matie 24

گوێگرتن لە Matie 24

کتێبی پیرۆز:

Godié

وەشان: GOD - u2 - god

Matie 24

Matie 24

ئایەتە بڵاوەکانی پەرتووکی پیرۆز لە Matie 24

گوێگرتن لە Matie 24

کتێبی پیرۆز:

Godié

وەشان: GOD - u2 - god

Matie 24

ئایەتە بڵاوەکانی پەرتووکی پیرۆز لە
Matie 24