Pianciilna 3
3
Mihing ii Thunit Ngawlna
1Tu in ngul sia Topa Pathian vawtsa nganhingte sung pan a thiimthelbel nganhing ahi hi. Ngul in numei tungah, “Pathian in, huan sung thingkung khat pawpo ii nga ne thei ngawl tu nu hi, hong ci takpi ziam?” ci in dongh hi. #Tpl 12:9; 20:2
2Numei in, “Huan sung thingkung pawpo ii nga ne thei tu khu hi. 3Ahizong Pathian in huan laizang a om thingkung ii nga sia na ne buatu uh hi, tham zongh na tham buatu uh hi, hong ci hi; ka ne ka tham uh le ka thi tu uh hi,” ci in zo hi.
4Ngul in, “Tuasia thumaan hi ngawl hi; thi ngawl tu nu hi. 5Banghang ziam cile na neak uh ciang, Pathian taw kibangin, a pha le a sia na heak tu hunlam uh he ahikom Pathian in tuabangin hong ci hi,” ci in zo kik hi.
6Numei in thingkung hoizia le a nga a limtuakziate mu a, tuaciang miciim sua tu sia bangza in pha tu ziam ci in, ngaisun hi. Tua ahikom thingnga pawlkhat loin, ne hi. Tuaciang pawlkhat a pasal pia a, a pasal zongh in ne hi. 7A neak zawk po ciang amate teltheina kipia a, a pumnguak ahi hunlam kiphawk uh hi; tua ciang amate in theitee te khui khawmin kiseal uh hi.
8Tua nitakin, amate in huan sungah Topa Pathian khuasuan nging za uh a, ama ii mu ngawl natu thingkungte kawmah buu uh hi. 9Ahizong Topa Pathian in mihingpa sam a, “Nang koi sungah om ni ziam?” ci hi.
10Ama in, “Huan sungah na khuasuan nging ka za a; ka pumnguak om ka hikom lau in ka buu hi,” ci in zo hi.
11Pathian in, “A kua in na pumnguak om ni hi, hong ci ziam? Ne heak in kong ci thingnga sia ne ni ziam,” ci in dongh hi.
12Mihingpa in, “Kei taw a omkhawm tu nong piak numei in thingnga hong pia a, ka ne hi,” ci in zo hi.
13 Topa Pathian in numei tungah, “Banghang hi bang ngamta ni ziam?” ci in dongh hi. Ama in, “Ngul in hong theam a, ka ne hi,” ci in zo kik hi. #2 Cor 11:3; 1 Tim 2:14
Pathian Thukhenna
14Tuasia ciang Topa Pathian in ngul tungah, “Hi thu hangin nang daan hong kipia tu a; nganhing theampo sung pan nangma bek in hi haamsiatna na thuak tu hi: tu a kipan awmtaalin na vak tu a, na nuntak lai teng leivui na ne tu hi. 15Numei taw khat le khat kong kihuatsasak tu a; ama ii hin le toaite le nang aa te a tawntungin na kingal tu uh hi. Ama ii hin le toaite in na lutang hong sucip tu a, nang in a khuatul na tuksak tu hi,” ci hi. #Tpl 12:17
16Tuaciang ama in numei tungah, “Nau na paai ciang na ngimna le nau na sua ciang na natna kong khangsak tu hi. Tua kawm pan na pasal ma na it veve tu a, ama in nang hong uk lai tu hi,” ci hi.
17Tuaciang ama in mihingpa tungah, “Na zi thu son ni in, ne heak in, kong ci thingnga sia ne ni hi. Tuabang ngamta na hikom nang hangin leitangh in haamsiatna thuak hi. Leisung pan nangma atu an a khom a pian natu in, na nuntak sung tawntung haksa takin na na seam tu hi. #Heb 6:8 18Lei sung pan ling le lopa te hong po tu a, duisung thingkung pan a piang ngamh ante na ne tu hi. 19Hong kipiansakna leitang ah na cia kik mateng leitang tung pan na a pian thei natu in, haksapi tak le khua ulsa suak in na na seam tu hi. Lei taw hong kivawt na hikom lei ma na suak kik tu hi,” ci hi.
20Adam in a zi min sia Eve phuak hi, banghang ziam cile ama in mihing theampo ii nu ahi hi. 21Tuaciang Topa Pathian in Adam le a zi atu in savun puan vawtin amate silhsak hi.
Adam le Eve Huan pan Kipusuaksak
22Tuaciang Topa Pathian in, “Tu in, mihingpa sia eima khat bang hong suakin a pha le a sia he hi. Nuntakna thingkung ii nga sia ne in a tawntungin a nuntak tu ki oai ngawl het tu hi,” ci hi. #Tpl 22:14 23Tua ahiciang Topa Pathian in mihingpa sia, Eden huan pan hawlkhia in ama a kipiansakna leitang thosak hi. 24Tua ciang huan ii nisuana sangah Cherub te le a kiim mun theampo ah a kiheak, meikuang namsau khat koi hi. Tuasia kuama in nuntakna thingkung nai a neak thei ngawl natu in a khaamna ahi hi.
دیاریکراوەکانی ئێستا:
Pianciilna 3: SCB2
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Siyin Chin Bible © Bible Society of Myanmar, 2016