मरकुस 8
8
यीशुए चोऊ हजार लोगौ कै खाणौ खियाऊ
(मत्ती 15:32-39)
1जोबै यीशु दिकापुलिस इलाके दा थिया, तोबै बौड़ै भीड़ तैसकै धोरे कौठै हौए, औरौ तिनुकैईं किछै खाणौ खै ना थी। यीशुए आपणै चैलै खै आपणै धोरे बौएदैबा तिनुखै बौल़ौ, 2“मुखै इयौं भीड़ौ पांदी गिणौ लागै रोई, जिथुकै ऐजे लोग तीन दूसौ दै ऊंडे मैरै साथै औसौ, औरौ इनुकैंई किछै बै खाणौ खै ना आथी। 3जै हांव इनु घोरे भूखै ही छाड़ै दियु, तौ बाटौ पुंडे खोड़ीयों बेहोश हौए जांदै; जिथु इनु मुंजीदै कुणजैई-कुणजैई दूर दै आए रौवै।” 4तैसकै चैलै तैसीखै जोवाब दिया, “इथै उजाड़ जौगैह दी इनु सौबी लोगौ कारिए ऐतरी रोटी कुकै दी लियोऊ कै ऐजै सौब रोज़े जांव?” 5यीशुए तिनु कैईंदु पूछु, “तुऔं कैंई कैतरी रोटी औसौ?” तिनुऐ बौल़ौ, “आमुवा सात रोटी औसौ।”
6इथकारिए तैणै लोगौ खै जोमीनो पांदी बोठणौ कै बौल़ौ। औरौ सैजी सात रोटी कौरी औरौ पौरमेशवर का धन्यवाद कौरेयौ रोटी तुड़ी, औरौ आपणै चैलै खै दैंदा लागा, कै सै लोगौ कै बीचो दी बांडी दैंव। औरौ चैलै रोटी खै बांडी दी। 7तिनुकैईं दैणी नानड़ी माछी बै थी; औरौ यीशुए पौरमेशवर का धन्यवाद देएबा तिनुखै बै लोगौ कै औगौड़ियौ बांडी दी। 8औरौ लोग खाऐबा रोज़े गौवै औरौ चैलै बाद मै बौचेयौंदे टुकड़ै की सात शैकड़ी भोरेयोंदे टिपी। 9औरौ लोग चार हजार कै लमसम थिए, तोबै यीशुए तिनुखै छाड़ै दिए। 10औरौ सै तौलोंई आपणै चैलै कै साथै किश्ती पांदी बौठैबा दलमनूता इलाके खै हौटै गौआ।
फरीसी लोगै निशान मांगै
(मत्ती 16:1-4)
11तोबै फरीसी लोग यीशु कै धोरे आयौ तैसीआरी बैहस कौरदै लागै। सैजै तैसीखै पोरखणा चांव थिए इथकारिए तिनुऐ स्वर्ग दा ऐक निशान दिखाणौ कै बौल़ौ, सै दैखणौ चांव थिए कै पौरमेशवरे तैसी आपणै शौकतै दै राए। 12तैणै तिनकै अबिशवाश कै बौजैह शै दुखी मन लैई शुशकार भोरेबा बौल़ौ, “तुऐं इयौं पीढ़ी कै लोग किथुखै निशान चांव? हांव तुऔं खै साचौ बुलू, कै इयौं पीढ़ी कै लोगौ खै कुणजाई बै निशान ना दिया जांदा।” 13तोबै यीशुए फरीसी लोगौ खै छोडे़बा, आपणै चैलै कै साथी हौजौ किश्ती पांदी बौठै गौआ, औरौ गलील समुन्द्र कै पार कौरेयौ ओकी ढौबौ हौटै गौवै।
फरीसी लोग का खमीर
(मत्ती 16:5-12)
14चैलै आपणै साथै रोटी लाणी बैसरै गौवै थिए, औरौ किश्ती दी तिनुकैईं ऐकैई रोटै थी। 15यीशुए तिनु चिताऐबा बौल़ौ, “फरीसी लोगौ औरौ हेरोदेस राजा कै खमीर शै चौकश रौए।” 16चैलै आपी मुंजी विचार कौरेयौ बौलदै लागै, “आमुए तौ रोटी लाए ना रैई इथकारिए यीशुए ऐशैखै बौल़ौ।” 17ऐजौ जाणैबा यीशुए तिनुखै बौल़ौ, “तुऐं किथुखै आपी मुंजी विचार कौरे लौवै कै आमुए तौ रोटी बै लाए ना रैई? का तुऐं आपणै मन कै इशैक ढीठ बाणै राए, कै तुऐं इबी बै सौमझी ना रैई? 18तुंआरी आखी औरौ कान औसौ, पौरौ तुऐं दैखै औरौ शौणै ना सौकौ। औरौ का तुऔं याद ना आथी? 19जोबै मोऐं तिनु पाँच हजार लोगौ कै सिरफ पाँच रोटी लैई खियोऊं, तौ तुऐं बौचेयौंदे रोटी की कैतरी शैकड़ी भोरेबा टीपी?” तिनुऐ तैसीखै बौल़ौ, “बारौ शैकड़ी बोचयोंदै थी।” 20यीशुए तिनुखै बौल़ौ, “औरौ जोबै चार हजार लोगौ खै सात रोटी तुड़ी थी तौ तुऐं टुकड़ै की कैतरी शैकड़ी रोटी भोरेबा टीपी थी?” तिनुऐ तैसीखै बौल़ौ, “सात शैकड़ी रोटी की टिपी।” 21यीशुए तिनुखै बौल़ौ, “का तुऐं इबी तौड़ी बै ना सौमझौ कै हांव कुण औसौ?”
आन्धा आदमी कै ठीक कौरणा
(मत्ती 16:13-20; लूका 9:18-21)
22तोबै यीशु औरौ तैसकै चैलै बैतसैदा शहर दै ओऊवे; औरौ लोगै ऐकी आन्धै खै तैसकै धोरे लियोऊवा औरौ तैसी कैईंदी बिन्ती कौरे कै तैसीखै छुंयो ठीक कौरो। 23यीशुए तैसी आन्धै का हाथ पाकड़ैबा तैसीखै गांव खै बायरै लियोऊवा। औरौ तैणै आपणौ थूक आन्धै कै आखी दौ लाएबा तैसकै आखी पांदी हाथ राखा, औरौ तैसी कैईंदु पूछु, “का तैरै किछै दैखियौं औसौए?” 24तैणै आखी खोलेबा बौल़ौ, “हांव आदमी दैखी सौकु पौरौ हांव तिनु साफ-साफ ना दैखी सौकु। सै मुं बाईरे हांडदै डाल़ो कै जैशणै दैखै रौवै।” 25तोबै यीशुए दुजाल़ियो तैसकी आखी पांदी हाथ धोरे, औरौ आन्धै कै पोठाकरो दैखियु। औरौ सै ठीक हौए गौआ, औरौ सौबै साफ-साफ दैखदा लागा। 26तिथकै बाद यीशुए तैसीखै आपणै घोरो जाणौ खै बौल़ौ, “ऐजी बात गांव वाल़ै खै नी बौताया जू तांवआरी इथै हौए रौए।”
पतरस का यीशु कै मसीह मानणा
(मत्ती 16:13-20; लूका 9:18-21)
27यीशु औरौ तैसकै चैलै कैसरिया औरौ फिलिप्पी नोगरो कै गांव दै हौटै गौवै; औरौ बाटौ पुंडे तैणै आपणै चैलै कैईंदु पूछु, “लोग मुखै का बौल़ौ?” 28तिनुऐ जोवाब दिया, “यूहन्ना बपतिस्मा दाता; पौरौ कुणिए-कुणिए एलिय्याह; औरौ कुणिए-कुणिए पौरमेशवर कै बातौ बौताणौवाल़ा मुंजीदा ऐक बौल़ौ।” 29यीशुए तिनुखै पूछै, “पौरौ तुऐं का बिशवाश कौरौ कै हांव कुण औसौ?” पतरसे तैसीखै जोवाब दिया, “तू पौरमेशवर का भैजैयौंदा मसीह औसौ।” 30तोबै यीशुए तिनुखै चिताऐबा बौल़ौ, कै मैरै बारै मुंजी कोसी कैंई नी बौलेया जै हांव मसीहा औसौ।
यीशु कै आपणै मौरणौ कै बारै मुंजी बौताणौ
(मत्ती 16:21-28; लूका 9:22-27)
31तोबै यीशु आपणै चैलै कै शिखांदा लागा, कै ऐजौ जौरुरी औसौ, कै हांव आदमी का बैटा बौहितै दुख झैलू, औरौ बुड़ेईक औरौ मुख्य यहूदी पुरोहित, औरौ यहूदी शास्त्री मुखै नोकारा सौमझेयौ मारै दैलै, पौरौ हांव ती दूसौ कै बाद जियुंदी हौंदा। 32यीशुए ऐजै बात तिनुखै साफ-साफ बौल़ै दै। पतरस ना चांव थिया कै मसीहा दुख झेलेयो मौरे जांव, इथकारिए सै यीशु कै डांटदा लागा कै आपणै बारै दी ऐजी बातौ ना बौल। 33पौरौ यीशु पाछु फिरैयौ, आपणै चैलै कै ढौबौ दैखौ, औरौ पतरस खै झिड़केयो बौल़ौ, “शैतानो साए काम कौरणै बोन्द कौर! मैरै सामणै दा दूर हौ; जिथु तैरै बिचार आदमी कै जैशणै औसौ, ना कै पौरमेशवर कै जैशणै।”
यीशु पाछै चालणौ का मतलब
(मत्ती 16:21-28; लूका 9:22-27)
34यीशुए भीड़ौ समैंत आपणै चैलै खै आपणै धोरे बौएदैयौ तिनुखै बौल़ौ, “जै तुऐं मैरै चैलै बौणणे चांव, तौ तुऔं खै आपणी इछाएं छोड़णी पौड़ली। औरौ आपणा क्रूस टिपेबा मैरै पौछौड़ियौ चालणौ पोड़लो (आपणै क्रूस सोणो का मतलब औसौ दुख औरौ नेंदैया सोणै पोड़दै औरौ आपणै प्राण तक बै दैणै पोड़लै)। 35जिथु जू कुणिए इयौं धोरती पांदी आपणै जिन्दगी बौचाणौ कै कौचिश कौरला, सै हमैशा कै जिन्दगी गवांए दैला, पौरौ जू कुणिए मुं पांदी बिशवाश कौरणै औरौ सुसमाचार प्रचार कौरणौ कै बौजैह आपणै जिन्दगी गंवाला, सै स्वर्ग दै हमैशा खै जिन्दगी पाला। 36ऐक आदमी कै का भेटलो जै तैसीकै पूरी दुनिया कै चीज़ौ भेटली? औरौ पौरमेशवर कै साथी हमैशा कै जिन्दगी खोए दैला। 37हमैशा कै जिन्दगी कै बौदलै आदमी पौरमेशवर कै का दैय सौकौ? 38जू लोग ऐलो जियुंदी औसौ, औरौ सै पौरमेशवर आरी धौखा कौरौ सैजै ऐकी धोकैबाज घोरवाल़ी साए औसौ, जू मुखै औरौ मैरी शिक्षा कै ना मानौ। हांव आदमी का बैटा, जोबै पवित्र स्वर्गदूतौ कै साथै आपणै पिता कै महिमा कै साथै इयौं धोरती पांदी आन्दा, तोबै हांव बै तिनकै भाजै जांदा, कै तुऐं मैरै चैलै औसौ।”
دیاریکراوەکانی ئێستا:
मरकुस 8: SRXNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.