मरकुस 6
6
नासरतौ दै यीशु कै बैज्जती
(मत्ती 13:53-58; लूका 4:16-30)
1तोबै यीशु कफरनहूम नगर शै निकल़ैयो आपणै घोरो (नासरत गांव) दा ओऊवा, औरौ तैसकै चैलै बै तैसकै साथै आए। 2विशांव कै दूसै सै यहूदी सभा-घोरो दा उपदैश दैंदा लागा; औरौ बौहितै लोग उपदैश शौणैबा हैरान हौए गौवै औरौ बौलदै लागै, “ऐसीखै ऐजी बातौ कुकै दी आंव? ऐजा कुणजा ज्ञान औसौ जू तैसीखै दैय राखा? औरौ एजा यीशु कियों शौकतै की बौजैह शै बौड़ै चौमत्कार कै काम कौरौ?” 3तिनुऐ ऐजौ बौलेयौ यीशु का मोजाक ऊड़ोऊंवा औरौ बौल़ौ, “का ऐजा सैजा बाढ़ोए ना आथी, जू मरियम का बैटा, औरौ याकूब, योसेस, यहूदा, औरौ शमौन का भाई औसौ? का तैसकी बोईणी इथै आमु मुंजी ना रौंव?” इथकारिए तिनुऐ तैसकै बातौ पांदी बिशवाश ना कौरी। 4यीशुए तिनुखै बौल़ौ, “पौरमेशवर कै बातौ बौताणौवाल़ा का आपणै गांव, औरौ आपणै घोरे, औरौ आपणै रिशतेदारौ खै छोड़ेयौ ओकते सारै ठाँव दा आदर हौं।” 5इथकारिए यीशुए तिथै चौमत्कार कै काम ना कौरी, जिथुकै लोगै तैसी पांदी बिशवाश ना की औरौ थौड़ै शै बीमारों पांदी हाथ राखैयौ तिनुखै ठीक कौरे। 6औरौ तिनकै बिशवाश ना कौरणौ पांदी हैरानी हौए। इथकै बाद यीशु नेड़ी बैड़ी कै गांव दा हौटा, औरौ लोगौ कै पौरमेशवर का उपदैश शिखांदा लागा।
यीशुए बारौ चैलो कै छाड़ै
(मत्ती 10:1; 5-15; लूका 9:1-6)
7तोबै इथकै बाद यीशुए बारौ चैलै खै आपणै धोरे बोईदै औरौ तिनु दो-दो कौरेयौ जौई-जौई गांव दै छाड़दा लागा, औरौ तिनु दुष्टआत्माओं खै बायरै घाड़णो का औधिकार दिया। 8औरौ तैणै तिनुखै बौल़ौ कै, “आपणै बाटौ कारिए ऐक डैंगा राख सौकौ, ना तौ खाणौ कै रोटी, ना झोल़ा, ना बटुवे दै पोएसै निया। 9जूते तौ लाए सौकौ पौरौ जू खोटणो तुऐं बाम्बै राए सैजै काफी औसौ।” 10यीशुए तिनुखै बौल़ौ, “जिथै कौथी तुऐं कोसी घोरे जांव, जोबै तुऔं कुणिए आपणै घोरे बोइदो, तौ तुऐं तांव तौड़ी तैसी घोरे टिकयौंदे रौंव, जांव तौड़ी तुऐं तैसी नोगरो पौरैशै आगु नै जांव।” 11जैसी जौगैह कै लोग तुऔं खै ना अपनांव, औरौ तुंआरी ना शुणौ, तिथैदै हांडदै बैई आपणै तलवे कै धूल झाड़ै दैया, ऐजै बात तिनु चिताणो कारिए औसौ कि लोग पौरमेशवर कै औरौ शै भैटणौ वाल़ै सौजा कारिए आपी जुमैवार औसौ।
12तोबै चैलै जाएयो प्रचार कौरा, “तुऔं आपणै पाप कौरणै छोड़ेयौ पौरमेशवर कै पौछौड़ियौ हांडणौ चैंई।” 13औरौ बौहिती दुष्टआत्माओं खै घाड़ी, औरौ बौहितै बीमार लोगौ पांदी जैतून का तेल लाएबा तिनुखै ठीक कौरे।
यूहन्ना बपतिस्मा दाता कै मौत
(मत्ती 14:1-12; लूका 9:7-9)
14तोबै हेरोदेस राजाए बै तिनकै चौर्चा शौणै, जू काम यीशुए कौरे लौवै थिए, जिथु बौहितै लोग यीशु कै बारै दै जाणौ थिए औरौ तैसकौ नांव मोशुर हौए गौ थियु, औरौ कैई लोग यीशु कै बारै दै बौल़ौ थिए, यूहन्ना बपतिस्मा दाता मौरेयौंदे मुंजीदा जियुंदी हौए गौआ, इथकारिए तैणै चौमत्कार कै काम प्रगट कौरे लौवै। 15औरौ ओकी लोगै बौल़ौ, “ऐजा तौ पौरमेशवर कै बातौ बौताणौवाल़ा एलिय्याह औसौ।” पौरौ कैई लोगै ऐशै बौल़ौ, “ऐजा पौरमेशवर कै बातौ बौताणौवाल़ा औसौ, तिनु साए जूंजे पुराणै सौमय दै पौरमेशवर कै बातौ बौताणौवाल़ै थिए।” 16हेरोदेस राजाए ऐजौ शौणैबा बौल़ौ, “जैसी यूहन्ना बपतिस्मा दाता को मुंड मोऐं कोटवाऐ दियु थियु, सै मौरेयो जियुंदा हौए गौआ।”
17-18हेरोदेस राजाए कैई दूस आगै आपणै भाई फिलिप्पुसे कै घोरवाल़ी हेरोदियास आरी बियाव कौरे राए थिया। पौरौ यूहन्नाए राजा कै बौल़ौ, “कै ताखै मूसा कै कानून कै हिसाब शै आपणै भाई कै घोरवाल़ै राखणै ठीक ना आथी, जिथु तैरा भाई इबी जियुंदा औसौ।” इथकारिए हेरोदेस राजाए लोगौ खै छाड़ैयो यूहन्ना कै पाकड़ैबा कोयदी दा पाए राए थिया। 19इथकारिए हेरोदियास तैसीआरी बैर राखौ थी औरौ सै चांव थी, कै तैसीखै मारै दियु, पौरौ ऐशैखै ना हौए सौकी। 20जिथु हेरोदेस यूहन्ना खै धरमी औरौ पवित्र आदमी जाणैबा तेसिदा डौरौ थिया, औरौ तैसकै कोयदै दै बै रक्षा कौरौ थिया। औरौ यूहन्ना कै बातौ शौणैबा बैजाए होड़बड़ाए जांव थिया, पौरौ तोबै बै सै तैसकी बातौ शुणणी पसन्द कौरौ थिया।
21ऐकी दूसै, हेरोदेस राजाए आपणा जन्म दूसौ का नियोता दिया। तैणै आपणै प्रधानों औरौ सेनापतियो, औरौ गलील जिले कै बौड़ै लोग बोइदै। ऐसी दूसै, हेरोदियास कै यूहन्ना खै मारणौ का ऐक मौका बैटा। 22ऐसी मोके पांदी हेरोदियास कै बैटी भीतरै आए, औरौ नाचेबा हेरोदेस खै औरौ तैसकै पोऊंणै कै खुश कौरे; तोबै राजाए बाईटी खै बौल़ौ, “तू जू किछै मुं कैंईदौ मांगली हांव ताखै दियुंबा।” 23औरौ तैणै शौं कौरेयौ बौल़ौ, “जू किछै तू मांगलै हांव ताखै दियुंबा, चाए तू मैरौ आधौ राज्य तौड़ी मांगली।” 24तियैं बायरै जाऐबा आपणी माँ कैईंदु पूछु, “हांव का मांगु?” तियैं बौल़ौ, “यूहन्ना बपतिस्मा दाता को मुंड मांगै पा।” 25सै तौलोंई राजा कै धोरे भीतरै आए, औरौ तैसी कैईंदै बिन्ती कोरी, “हांव चोऊ कै तू इबी यूहन्ना बपतिस्मा दाता को मुंड काटैयौ मुखै ऐकी थालौ दौ मोंगाऐ दै।” 26तोबै राजा बैजाए उदास हौआ, पौरौ आपणी शौं औरौ पोऊंणै की बौजैह शै तियांरी बात टाल़ै ना सोकी। 27औरौ राजाए तौलोंई ऐक सिपाही खै आज्ञा देएयो छाड़ा, कै तैसकौ मुंड काटैयौ मैरै धोरे लाव। 28सैनिके ज़ेलो पुंडे जायौ तैसकौ मुंड काटैयौ ऐकी थालौ दौ धोरेयौ, औरौ तियौं बाईटी खै दैय दियु, औरौ बाईटीऐ आपणी माँ खै दियु। 29ऐजौ शौणैबा यूहन्ना कै चैलै आए, औरौ तैसकै लाश खै लोए गौवै औरौ कब्रो दै राखै।
यीशुए पाँची हज़ारो आदमी कै खाणौ खियांव
(मत्ती 14:13-21; लूका 9:10-17; युहन्ना 6:1-14)
30जोबै चोणेयौंदे चैलै पाछु आयौ यीशु कै धोरे कौठै होवे, तोबै जू किछै तिनुऐ कौरे राव थियु, औरौ शिखोऊ थियु, सौबै तैसीकैईं बौतौऊं। 31यीशुए चैलै कै बौल़ौ, “आव आमुए ऐकी शुनशान जौगैह दै हांडेबा जिथै आमु इकली रौए सौकु औरौ दैणी विशांव कौरे सौकु।” जिथु बौहितै लोग आन्दै जांदै रौंव थिए, औरौ इयौं बौजैह शै तिनु खाणौ का मौका बै ना भैटौ थिया। 32इथकारिए सै किश्ती पांदी जाऐबा, शुनशान जौगैह दै इकली हौटै गौवै। 33पौरौ बौहितै लोगै तिनुखै जांदै बैई दैखै औरौ जाणै पोऊँ कै सै कुकै जांदै लागै रौवै। इथकारिए सौब नोगरो कै लोग कौठै हौयौ समुन्द्र कै किनारे-किनारे दै हौयौ दोऊड़ै, औरौ समुन्द्र कै ओकी ढौबौ यीशु औरौ तैसकै चैलै कै तिथै पोऊंचणौ दै औगौड़ियौ ही पौंचै गौवै। 34यीशुए उदे आयौ बौड़ै भीड़ दैखै, औरौ तिनु पांदी तरस खोऊवा, जिथुकै सै तिनु भेड़ो कै साए थिए, जिनका कुणिए रोखवाल़ा ना आथी, औरौ सै तिनुखै पौरमेशवर कै राज्य कै बारै दो बौहितै बातौ शिखांदा लागा।
35बैल़खै कै सौमय यीशु कै चैलै तैसकै बौलदै लागै, “ऐजै शुनशान जौगैह औसौ, औरौ बैल़खौ हौए गौ। 36लोगौ कै छाड़ै दै कै चोऊ ढौबौ कै गांव औरौ बस्तियौं दै जाऐबा, आपी कै किछै खाणौ खै मोलै लियांव।” 37यीशुए चैलै खै जोवाब दिया, “तुऐं ही तिनुखै खाणौ खै दैंव।” तिनुऐ यीशु कै बौल़ौ, “का आमै दो शो दूसौ कै धियाड़ै की रोटी मोलै लोऊँ, औरौ तिनुखै खेयांऊ?” 38यीशुए तिनुखै बौल़ौ, “जायौ दैखौ तुऔं कैई कैतरी रोटी औसौ?” तिनुऐ पौता कौरेयौ बौल़ौ, “आमुकैंई पाँच रोटी औरौ दो माछी औसौ।” 39तोबै यीशुए तिनुखै आज्ञा दै, कै सौबी खै होरी-होरी घासो पांदी पाँति-पाँति दै बौठाल़े दैंव। 40सै सौ-सौ औरौ पचाश-पचाश कौरेयौ पाँति-पाँति बौठै गौवै।
41यीशुए तिनी पाँच रोटी औरौ दो माछी कौरी, औरौ स्वर्ग कै ढौबौ दैखैयो पौरमेशवर का धन्यवाद कौरा, औरौ रोटी तौड़ै-तौड़ेयो चैलै खै दैन्दा लागा, कै सै लोगौ खै बान्डो, औरौ सैजी दो माछी बै तिनु सौबी मुंजी बान्डै दी। 42सौबै खाएयो छौकै गौवै। 43जोबै सौबीए खाणौ खाए पोऊँ तोबै चैलै रोटी औरौ माछी कै बौचेयौंदे टुकड़ै की बारौ शैकड़ी भोरेयो टिपी। 44जिनुवै रोटी खाई, सै पाँच हजार मौरोद थिए, औरौ तिनुऐ बैटमाणिशौ औरौ नानड़िया कै गिनतै ना की।
यीशु पाणी पांदी चाला
(मत्ती 14:22-23; युहन्ना 6:15-21)
45तोबै यीशुए तौलोंई आपणै चैलै खै किश्ती पांदी बोठणौ खै मोजबूर कौरे कै सै तैसदै आगै पार बैतसैदा शहर खै निकल़ै जांव, तांव तौड़ी हांव लोगौ खै आगु डियाल़ु। 46तिनुखै आगु डियाल़ेयो सै धारो पांदी प्रार्थना कौरदा हौटा।
47जोबै फिरै कै वकतौ किश्ती गलील समुन्द्र कै बीचो दै थी, औरौ यीशु इकली किनारे पांदी थिया। 48यीशुए दैखौ कै चैलै कै किश्ती चोलांदै बैई बौहितै मुशकिल हौए रौए थी, जिथु जोराल़े हावा बैरवें कै बोए रौए थी। झीशो रात कै बियाणौ दै आगै यीशु झीलो पांदी चालैयौ तिनकै धोरे ओऊवा; औरौ तिनुदा आगै निकल़ै जाणौ चांव थिया। 49पौरौ चैलै यीशु कै झीलो पांदी चालदै दैखा, औरौ डौरेयौ लैरौ मारी, तिनुऐ जाणौ कै सै भूत औसौ। 50जिथु सौबै तैसी दैखैयो घबराए गौवै थिए। पौरौ यीशुए तौलोंई तिनुआरी बातौ की औरौ बौल़ौ, “हिम्मत राखौ: हांव औसौ; डौरेया नै।” 51तोबै सै तिनकै धोरे किश्ती पांदी ओऊवा औरौ हवा रौकै गौए औरौ सै बौहितै हैरान हौए गौवै। 52हालांकि तिनुऐ दैखै राए थियु कै यीशुए पाँच हजार मौरदो कै रोटी खियाए रैई थी पौरौ सै इबी तौड़ी तैसकै शौकतै कै बारै मुंजी बिल्कुल ना सौमझै रैई थी, जिथुकै तिनकै मन हौजौ बै बिशवाश कौरणौ शै ढीठ हौए रौवै थिए।
गन्नसरतौ दा बीमारों कै ठीक कौरणा
(मत्ती 14:34-36)
53यीशु औरौ तैसकै चैलै किश्ती शै गलील झील कै पार कौरेयौ गन्नेसरत प्रदेश दै पोऊंचे, औरौ किश्ती किनारे पांदी बानै। 54जोबै सै किश्ती पांदी दै उदे उतरे, तौ लोग तौलोंई तैसीखै पौछौड़ियौ, 55नेड़ी-बैड़ी कै जिले दै दोऊड़ै, औरौ बीमारों खै ल़ौहथौ पांदी राखैयौ, औरौ तिनु टेपेयो तियौं जौगैह दै लौए गौवै, जिथै तिनुऐ लोगौ खै बुलदै शौणै राए थिए, कै यीशु तिथै हौटै रौआ थिया। 56औरौ जिथै कौथी सै गांव, नोगर, या बोसतिदा जांव थिया, लोग बीमारों खै बोजारों की जौगैह दै धोरेयौ तैसीकैईं दै बिन्ती कौरौ थिए, कै सै तिनु आपणै खोटणो कै पालै खै ही छुणौ दैंव: औरौ जैतरै तैसीखै छुओं थिए, सौबै ठीक हौए जांव थिए।
دیاریکراوەکانی ئێستا:
मरकुस 6: SRXNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.