मरकुस 10
10
शादी औरौ तलाक कै बारै मुंजी शिक्षा
(मत्ती 19:1-12)
1तोबै यीशु आपणै चैलै साथी कफरनहूम नगर छोडे़बा, यहूदिया प्रदेश शै हौयौ यरदन नोंदी कै पाइली ढौबौ हौटा औरौ ऐक बौड़ै भीड़ यीशु धोरे कौठै हौए गौए, औरौ सै आपणै भोवार कै हिसाब शै तिनुखै हौजौ उपदैश दैन्दा लागा।
2तोबै फरीसी लोगै तैसकै धोरे आयौ तैसकै परीक्षा कौरणौ खै तैसी कैईंदु पूछु, “कै का ऐक मर्द आपणी घोरवाल़ी कै मूसा कै कानून कै हिसाब शै खित दैय सौकौ?” 3यीशुए तिनुखै जोवाब दिया, “मूसाए तुऔं खै खित कै बारै मुंजी का आज्ञा दैय राए?” 4तिनुऐ बौल़ौ, “मूसाए बौल़ै राए कै ऐक आदमी खित दैयौखै आपणी घोरवाल़ी खै छोड़े सौकौ।” 5यीशुए तिनुखै बौल़ौ, “मूसाए ऐजै आज्ञा तुऔं कारिए कानून कै हिसाब शै लिखै राए। जिथुकै तुऐं ओढ़ेयौंदे थिए। 6पौरौ दुनिया कै शुरुआत दै पौरमेशवरे मर्द औरौ बैटमाणिश कौरेयौ तिनुखै बाणै। 7औरौ इयौं बौजैह शै पौता चालौ कै ऐक आदमी शादी कै बाद आपणै माँ-बापू शै जौई हौयौ आपणी घोरवाल़ी आरी रोला। 8जिथुकै सै दुईनै ऐबै ऐक जोणे औसौ। इथकारिए मियांबीबी ऐबै दो लोग कै जैशणै ना आथी पौरौ ऐकी आदमी कै जैशणै औसौ। 9इथकारिए जिनुकै पौरमेशवरे जोड़े राए, तिनु कुणिए आदमी जौई ना कौरौ।”
10घोरे जाऐबा चैलै इथकै बारै मुंजी यीशु कैईंदु हौजौ पूछु, जौल़ौ सै इकली थिया। 11यीशुए तिनुखै जोवाब दिया, “जू कुणिए आपणी घोरवाल़ी खै छोडे़बा ओकीआरी बैयाव बाणल़ा तौ सै तियौं आगली घोरवाल़ी कै खिलाफ गौलत सौमबंध बाणौ। 12औरौ जै घोरवाल़ी आपणै घोरवाल़ै खै छोडे़बा ओकीआरी बैयाव कौरौ तौ सै गौलत सौमबंध बाणौ।”
नानड़िया औरौ स्वर्ग का राज्य
(मत्ती 19:13-15; लूका 18:15-17)
13तोबै लोग नानड़िया खै यीशु कै धोरे लान्दै लागै, कै सै तिनु पांदी हाथ राखियो तिनु आर्शीवाद दैंव; पौरौ चैलै लोगौ कै झिड़कै। 14यीशुए खेजेबा तिनुखै बौल़ौ, “नानड़िया खै मैरै धोरे आणौ दैव औरौ इनुखै मोना नी कौरौ, जू कुणिए नानड़िया कै जैशणा भोरोशा कौरौ सैजैई लोग पौरमेशवर कै राज्य दै रोन्दै। 15हांव तुऔं खै साचौ बुलू, कै जू कुणिए पौरमेशवर कै राज्य खै नानड़िया कै जैशणा अपनांव, सैजै तिंदै जाए सौकौ।” 16औरौ तैणै तिनुखै हौंगटै दै बौठाल़े, औरौ तिनु पांदी हाथ राखैयौ तिनुखै आर्शीवाद दिया।
सैठ आदमी औरौ पौरमेशवर का राज्य
(मत्ती 19:16-30; लूका 18:18-30)
17जोबै यीशु औरौ तैसकै चैलै बाटो पुंडे जांदै लागै रौवै थिए, तौ ऐक आदमी तैसकै धोरे दौड़ैबा ओऊवा, औरौ तैसकै आगै घुंडू नियुड़ाएयो तैसी कैईंदु पूछु, “ओए रै आछै गुरु, हांव ऐशणा का काम कौरु कै पौरमेशवर मुखै सौदा कै जिन्दगी दैला?” 18यीशुए तैसीखै बौल़ौ, “तू मुखै आछा गुरु किथुखै मानै? कुणिए आछा ना आथी, सिरफ पौरमेशवर ही आछा औसौ। 19तू पौरमेशवर की आज्ञाओं खै तौ जाणैए: ‘खून नी कौरेया, गौलत सौमबंध नी बाणैया, चोरी नी कौरेया, झूठी गवाही ना दैया, बैईमानी ना कौरेया, औरौ माँ-बापू कै इज्जत कौरेया।’ ”
20तैणै यीशु खै बौल़ौ, “ओए रै गुरु, इनु सौबी आज्ञा कै हांव बचपन दी उंढी मानदा आए रौआ।” 21यीशुए तैसकै ढौबौ प्यार शै दैखैबा औरौ तैसीखै बौल़ौ, “ऐक काम औसौ जू ताखै कौरणौ कै जौरुरत औसौ। जा, जू किछै तैरौ औसौ, तिथुखै बिकैयो गोरीबो खै दैय दै, तौ ताखै स्वर्गो दा धन भैटला, औरौ आयौ मैरा चैला बौणै जा।” 22यीशु की बातौ खै शोणेयो सैजा आदमी उदास हौए गौआ, औरौ दुखी हौयौ तिथैदा आगु हौटा, जिथुकै सै बैजाए सैठ थिया।
23यीशुए चोऊ ढौबौ दैखैयो आपणै चैलै खै बौल़ौ, “सैठ लोगौ कै पौरमेशवर कै राज्य दो जाणौ बौहितु मुशकिल औसौ!” 24चैलै तैसकी बातौ लैई हैरान हुवे। इथु पांदी यीशुए हौजौ तिनुखै बौल़ौ, “ओए रै भाईयों, जू जोमीन जायदात पांदी भोरोशा राखलै तिनु कारिए पौरमेशवर कै राज्य दो जाणौ बौहितु मुशकिल औसौ! 25ऊँट कै सिओणी कै पाशी पौरैशौ निकल़णौ आसान हौए सौकौ, पौरौ सैठ लोगौ कै पौरमेशवर कै राज्य दो जाणौ बैजाए चैईथु औसौ!” 26चैलै ऐजै बात शोणेयो हौजौ बै बैजाए हैरान हुवे, औरौ आपी मुंजी बौलदै लागै, तौ इथका मतलब औसौ कै कुणिए बै आपणै पापौ कै सौजा भैटणौ शै ना बौचै सौकौ औरौ ना ही सै पौरमेशवर कै राज्य दा जाए सौकौ। 27यीशुए तिनकै ढौबौ दैखैयो बौल़ौ, “ऐजौ आदमियों शै तौ ना हौए सौकौ; पौरौ पौरमेशवर सै सौब ठुँ हौए सौकौ।” 28पतरस तैसीखै बौलदा लागा, “दैख आमै तौ सौबै ठुँ तांव कारिए छोड़े दियु कै तैरै चैलै बौणु।” 29-30यीशुए चैलै कै बौल़ौ, “हांव तुऔं कैंई साचौ बुलू मैरै चैलै बौणणौ कारिए औरौ सुसमाचार का प्रचार कौरणौ कारिए जिनुवै बै भाईटु या माँ या बापू या बाल-बच्चे या खेतौ खै छोड़े, तिनुखै पाका ऐसी जमाने दा सताव कै साथी बौहिती चीज़ौ भैटदी। औरौ आणौवाल़ै सौमय दी तिनुखै सौदा कै जिन्दगी भैटदी। 31पौरौ तुऔं लोगौ मुंजी जू इबी आपी खै खास सौमझौ, सै बाद मै खास ना सौमझै जांदै, औरौ जू आपी खै खास ना सौमझौ सै खास सौमझै जांदै।”
यीशु का आपणै मौत कै बारै मुंजी तिजाल़ियों बौताणौ
(मत्ती 20:17-19; लूका 18:31-34)
32सै यरूशलेम शहर खै जांदै लागै रौवै थिए, औरौ यीशु तिनकै आगै-आगै जांदा लागै रौआ थिया: औरौ चैलै बौहितै हैरान हौए रौवै थिए जिथै सै जांदै लागै रौवै थिए तिथै बौहितै लोगै तिनका विरोध कौरे राए थिया, औरौ जू औकै लोग तिनकै साथी थिए, तिनुकै इयौं बातौ का डौर थिया कै यरूशलेम शहर दै तिनुआरी का हौल़ौ। तोबै यीशु बारौ चैलै कै ऐकी ढौबौ नैयबा औरौ तिनुकै सैजी बातौ बौतैई, जू तैसीआरी हौणौवाल़ी थी। 33“शुणौ, आमै यरूशलेम शहर खै जांदै, औरौ हांव आदमी का बैटा मुख्य यहूदी पुरोहित औरौ यहूदी शास्त्री कै हाथौ दा थोम्बाए जांदा, औरौ सै मुखै मारणौ कै सौजा दैलै, औरौ मुखै बैगानै यहूदी कै हाथौ दै सोंपदै। 34औरौ सै मैरा मोजाक ऊंडान्दै, मुं पांदी थुकलै, मुं दै कौड़ै मारले, औरौ मुखै मार दैंदै, औरौ हांव तिजै दूसै जियुंदी हौए जांदा।”
याकूब औरौ यूहन्ना कै बिन्ती
(मत्ती 20:20-28)
35तोबै जब्दी कै बैटै याकूब औरौ यूहन्नाए तैसकै धोरे आयौ बौल़ौ, “ओए रै गुरु, आमै चोऊं कै जू किछै आमै तांव कैईंदु मांगु, सै तू आमु कारिए कौरे।” 36तैणै तिनुखै बौल़ौ, “तुऐं का चांव कै हांव तुऔं कारिए कौरु?” 37तिनुऐ तैसीखै बौल़ौ, “तैरै राज्य दै आमु आदर कै जौगैह ऐक तैरै सोऐं औरौ दूजा तैरै डैरै ढौबौ बुठू।” 38पौरौ यीशुए तिनुखै बौल़ौ, “तुऐं ना जाणौ कै का मांगै लो? का तुऐं दुख झैल़णौ कै तैयार औसौ जू दुख हांव झैल़णौ पांदी औसौ; का तुऐं मौरणौ कै तैयार औसौ? जैशैकै हांव मौरणौवाल़ा औसौ?” 39तिनुऐ तैसीखै बौल़ौ, “हौर आमु कौरे सौकु।” यीशुए तिनुखै बौल़ौ, “जैशैकै हांव दुख झेलूबा तैशैखै तुऐं बै दुख झेलले; जैशैकै हांव मौरे जांदा, तैशैखैई तुऐं बै मोरले। 40जोबै कै एसी फैसला का औधिकार मुंकैई ना आथी कै पौरमेशवर कै राज्य दा आदर कै जौगैह ऐक मैरै सोऐं औरौ दूजा मैरै डैरै ढौबौ कुण बोठला। पौरमेशवरे ऐजै जौगैह आपणै चोणेयौंदे लोगौ कारिए तैयार कौरे राए।”
41ऐजौ शोणेयो दस चैलै याकूब औरौ यूहन्ना पांदी खिजदै लागै। 42तौ यीशुए तिनु सौबी कै आपणै धोरे बौएदैयौ तिनुखै बौल़ौ, “सैजै जू बैगानै यहूदी लोगौ मुंजी आपी खै राजाओं कै भैषो दै मानै जांव, औरौ तिनुकै दबायो राखौ औरौ तिनकै बौड़ै औधिकारी तिनु पांदी आपणा औधिकार चोलांव। 43पौरौ तुऔं मुंजी ऐशै नी हौणौ चैंई, पौरौ जू कुणिए तुऔं मुंजी बौड़ा हौणा चांव, सै तोंवारा सेवक बोणौ। 44औरौ जू कुणिए तुऔं मुंजीदा प्रधान हौणा चांव, सै सौबिका गुलाम बोणौ। 45पौरौ हांव आदमी का बैटा ओकी कै सेवा कौरणौ कारिए इयौं दुनिया दा आए रौआ। हांव इथकारिए ना आए रैई कै औकै लोग मैरै सेवा कौरौ, हांव कैई लोगौ खै तिनकै पापौ शै छुड़ाणो कारिए मौरणौ कै आए रौआ।”
आन्धै बरतिमाई कै चंगाए
(मत्ती 20:29-34; लूका 18:35-43)
46जोबै यीशु औरौ तैसकै चैलै यरीहो शहर दै ओऊवे। औरौ सै ऐक बौड़ै भीड़ कै साथै यरीहो शहर कै छोड़ेयौ जांदै लागै रौवै थिए, तोबै तिमाई का बैटा बरतिमाई, जू ऐक आन्धा भिखारी थिया, शोड़कै कै किनारे बौठै रौआ थिया। 47जोबै तैणै लोगौ कैईंदु शुणौ कै यीशु जू नासरत गांव का औसौ, बाटौ पुंडा जांदा लागै रौआ, तोबै तैणै जोर शै धाव मारी, “ओए रै यीशु राजा दाऊद कै वंश, मुं पांदी दया कौर।” 48बौहितै लोगै तैसीखै झिड़का कै चुपी रौ, पौरौ सै हौजौ बै लैरौ मारदा लागा, “ओए रै यीशु राजा दाऊद कै वंश, मुं पांदी दया कौर।” 49तोबै यीशुए रौकेयौ बौल़ौ, “ऐसीखै उंढा बौईदो।” औरौ लोगै तैसी आन्धै खै बौएदैयौ तैसीखै बौल़ौ, “हिम्मत राख! ऊबा बिज़, तैणै ताखै बौएदै लौआ।” 50सै आपणै खोटणो फेरकाए, झट बिज़ा, औरौ यीशु कै धोरे ओऊवा। 51इथपांदी यीशुए तैसीखै बौल़ौ, “तू का चांए कै हांव तांव कारिए कौरु?” आन्धै तैसीखै बौल़ौ, “ओए रै गुरु, ऐजौ चोऊं कै हांव दैखदा लागू।” 52यीशुए तैसीखै बौल़ौ, “आगु जा, तुऐं मुं पांदी बिशवाश कौरे राए।” इथकारिए ऐबै तू ठीक हौए गौआ औरौ घोरो खै जा। औरौ सै तौलोंई दैखदा लागा, औरौ सै तिनकै साथी हौटै गौआ जू यीशु कै पाछैदै जांदै लागै रौवै थिए।
دیاریکراوەکانی ئێستا:
मरकुस 10: SRXNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.