मत्ती 9
9
ऐक ओधरंग कै बीमार कै ठीक कौरणा
(मर 2:1-12; लूका 5:17-26)
1तोबै यीशु किश्ती पांदी बौठैबा झील खै लोखेयो आपणै नगर खै ओऊवा। 2औरौ कैई लोगै ऐकी ओधरंग कै बीमार खै ल़ौहथौ पांदी राखैयौ तैसकै धोरे लियोऊवा, यीशुए तिनका बिशवाश दैखैयो, तैसी ओधरंग कै रोगी खै बौल़ौ, “ओए रै बैटा ढेट राख, तैरै पाप माफ हौए गौवै।” 3इथपांदी कैई यहूदी शास्त्रीए सुंचौ, “ऐजा तौ पौरमेशवर कै नेंदैया कौरौ।” 4यीशुए तिनकै मनो की बातौ जाणैयौ तिनु बौल़ौ, “तुऐं आपणै-आपणै मनो दै बुरै विचार किथुखै कौरे लौवै? 5आसान का औसौ? ऐजौ बौलणौ, ‘की तैरै पाप माफ हौवे,’ या ऐजौ बौलणौ, ‘की ऊबा बीज़ औरौ आगु हांड।’ 6पौरौ इथकारिए की तुऐं जाणै पाव कै मुं आदमी कै बैटै खै धोरती पांदी पाप माफ कौरणौ का औधिकार औसौ।” तोबै तैणै ओधरंग कै रोगी खै बुलू, “ऊबा भीज औरौ आपणै ल़ौहथ टेपेयो आपणै घोरो खै आगु जा।” 7सै ऊबा बिज़यो आपणै घोरो खै हौटा। 8लोग इथु दैखैयो डौरे गौवै, औरौ पौरमेशवर कै बौड़ाए कौरदै लागै, जैणै आदमी खै ऐशणा औधिकार दैय राए।
यीशु कै दवारा मती कै बोईदणा
(मर 2:13-17; लूका 5:27-32)
9तिथैदा आगु जाऐबा यीशुए मत्ती नांव कै ऐक आदमी खै मामला लौन्दै बैई चौकी पांदी बोठेयोंदा दैखा, औरौ तैसीखै बौल़ौ, “मैरा चैला बौण।” औरौ सै आपणै कामौ कै छोड़ेयौ तैसका चैला बौणै गौआ।
10औरौ जोबै सै घोरे खाणौ खांदा बौठै रौआ थिया, तोबै बौहितै सारै मामला लोणो वाल़ै औरौ जिनुकै लोग पापी बौल़ौ थिए, सै आयौ यीशु औरौ तैसकै चैलै कै साथै खाणौ खांदै बौठै। 11इथु दैखैयो फरीसी लोगै तैसकै चैलै खै बौल़ौ, “तोंवारा गुरु मामला लोणो वाल़ै औरौ पापियों कै साथै किथुखै खांव?” 12यीशुए ऐजौ शोणेयो, तिनुखै बौल़ौ, “राजी ताकडै़ कै डाक्टर कै जौरुरत नी आथी पौरौ बीमारों खै औसौ, 13इथकारिए तुऐं जाएयो इथका मतलब शैखै पाव, कै हांव बलिदान नै पौरौ दया चोऊं, जिथुकै हांव पापी लोगौ खै बोईददा आए रौआ, ना कै तिनु बोईददा जू आपी कै धरमी बौणौ।”
यूहन्ना कै चैलो का उपवास का सवाल
(मर 2:18-22; लूका 5:33-39)
14तोबै यूहन्ना कै चैलै तैसकै धोरे आयौ बौल़ौ, “का बौजैह औसौ कै आमै औरौ फरीसी लोग इशैक उपवास कौरु, पौरौ तैरै चैलै उपवास ना कौरौ?” 15यीशुए तिनुखै बौल़ौ, “जांव तौड़ी दूल्हा बरातुआ कै साथै औसौ तांव तौड़ी सै दुखी ना हौए सौकौ। पौरौ सैजै दूस आन्दै जोबै दूल्हा तिनुदा जौई कौरे दैंदै; तैसी सौमय, सै उपवास कौरदै।
16कुणिए बै आपणै नौवें खोटणो कै टाली पुराणै खोटणो दै ना लांव; नही तौ धौयौ नोऐं टाली शोकड़े जांदै औरौ पुराणै खोटणो कै चिरी दैली। 17ऐशैखैई नौवें अंगूर कै रस खै पुराणै खोलड़ै दा ना राखौ, जिथु ऐशै कौरणौ शै खोलड़ै फाटै जांव, औरौ अंगूर का रस खिंडै जांव, औरौ खोलड़ै बैकार हौए जांव; पौरौ नौवें अंगूरो का रस नौवें खोलड़ै दा भौरौ। औरौ सै दुईनै बौचेयौंदे रौंव।”
मौरेयौंदे भाइटी का जियुंदी हौणा
(मर 5:21-43; लूका 8:40-56)
18तैणै तिनुखै ऐजी बातौ बौल़ै ही लोई थी, कै दैखौ ऐकी ठोगड़े आयौ तैसीखै प्रणाम कौरा औरौ बौला, “मैरै बैटी इबी-इबी मौरे रोई, पौरौ चालैयौ तू आपणा हाथ तियौं पांदी राख, तौ सै जियुंदी हौए जांदै।” 19यीशु भीजा औरौ आपणै चैलै कै साथै तैसकै पौछौड़ियौ हौटै गौआ।
20औरौ ऐक बैटमाणिश थी, जियौं खै बारौ सालो शै लोऊ बौणौ का रोग थिया। तैसकै पौछौड़ियौ दै आयौ औरौ तैसकै खोटणो का पाला छुवा। 21जिथुखै सै आपणै मनो दो सुंचौ थी, “जै हांव यीशु कै खोटणो खै बै छुंऊबै, तोबै बै हांव ठीक हौए जांदै।”
22औरौ यीशुए पाछु खै घोमेयो दैखौ, औरौ बौल़ौ, “बैटी सब्र राख; तुऐं मुं पांदी भोरोशा कौरे राए कै हांव ताखै ठीक कौरे सौकु।” औरौ सैजै बैटमाणिश तौलोंई ठीक हौए गौए। 23जोबै यीशु तैसी ठोगड़ा कै घोरे पोहचेयो औरौ बाँशुड़ी बोजाणौ वाल़ै औरौ भीड़ौ खै रोल़ा पाड़दै बैई दैखै। 24तोबै तैणै बौल़ौ, “बैड़ौ हटौ, बाएटी मौरे ना रैई पौरौ सोतै रोई।” इथपांदी सै तैसका मजाक कौरदै लागै। 25पौरौ जोबै भीड़ निकाल़ै दै, तोबै तैणै भीतरै जाऐबा बाएटी का हाथ थामा, औरौ सै जियुंदी हौए गौए। 26औरौ इयौं बातौ कै चौर्चा तैसी पूरै देश दै फोयलै गौए।
दु आन्धै का बिशवाश
27जोबै यीशु तिथैदा आगु हौटा, तौ दो आन्धै तैसकै पाछैदै ऐजौ पुकारेयौ हांडै, “ओए रै राजा दाऊद कै वंश, आमु पांदी दया कौर!” 28जोबै सै घोरे पाहुंचा, तौ दो आन्धै तैसकै धोरे आए; औरौ यीशुए तिनुखै बौल़ौ, “जै तुऔं खै बिशवाश औसौ, कै हांव तुऔं कै ठीक कौरे सौकु।” तिनुऐ तैसीखै बौल़ौ, “हां प्रभु तू ठीक कौरे सौकै।” 29तोबै तैणै तिनकी आखी छोएयो बौल़ौ, “तुऐं बिशवाश कौरौए कै हांव तुऔं कै ठीक कौरे सौकु इथकारिए तुऐं ठीक हौए गौवै।” 30औरौ सै दैखदै लागै तोबै यीशुए तिनुखै चिताऐबा बौल़ौ; “चौकश रौया, इयौं बातौ कै बारै मुंजी कोसिया नै बौलेया कै मोऐं तुऔं कारिए का राए कौरे।” 31पौरौ तिनुऐ जाऐबा सौबी जौगैह दौ यीशु कै बारै मुंजी बौताए दियु।
ऐकी गुंगै कै ठीक कौरणा
32जोबै सैजै दो आन्धै आदमी बायरै जांदै लागै रौवै थिए, तौ कैई लोगै यीशु कै धोरे ऐकी आदमी खै लियोऊवा, जू बौलाए नै सौकौ थिया, जिथु तैसदै दुष्टआत्मा थी। 33औरौ जोबै यीशुए दुष्टआत्मा कै तैसी आदमी पौरैशै बायरै निकाल़ै दै, तोबै सैजा गुंगा बौलांदा लागै गौआ, औरौ भीड़ हैरान हौयौ बौलदै लागै की, “इस्राएल देश दो ऐशैखै कौलोंई बै ना दैखी।” 34पौरौ फरीसी लोगै बौल़ौ, “सै दुष्टआत्माओं कै ठोगड़ा, औरौ शैतान कै मोदत लैई दुष्टआत्माओं खै घाड़ो।”
मजदूरो कै छाड़णौ कारिए बिन्ती
35तोबै यीशु औरौ तैसकै चैलै गलील जिले कै शहरो औरौ गांव शै हौयौ हौटै, औरौ तिनकै यहूदी सभा-घोर मुंजी उपदैश दैंदा, औरौ पौरमेशवर कै राज्य का सुसमाचार प्रचार कौरदा, औरौ हर भान्त की बीमारी औरौ कमजोरियों खै दूर कौरदा रौआ। 36जोबै तैणै भीड़ दैखै तौ तैसीखै लोगौ पांदी तरस ओऊवा, जिथु सै तिनु भेड़ो कै जैशणै थिए, जिनका कुणिए बै रोखवाल़ा ना आथी, जू व्याकुल औरौ भोटकैयोंदै थिए। 37तोबै तैणै आपणै चैलै खै बौल़ौ, “फसल तौ बौहितै औसौ पौरौ मजदूर दैणिक औसौ। 38इथकारिए, फसल कै मालिक शै प्रार्थना कौरौ कै सै जादा शै जादा लोगौ कै पौरमेशवर कै राज्य कै बारै मुंजी बौताणौ कै भेजो।”
دیاریکراوەکانی ئێستا:
मत्ती 9: SRXNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.