मत्ती 12
12
यीशु विशांव का प्रभु
(मर 2:23-28; लूका 6:1-5)
1तैसी सौमय यीशु औरौ तैसकै चैलै विशांव कै दूसै बागड़ी बाटी हौयौ जांदै लागै रौवै थिए, औरौ तैसकै चैलै खै भूख लागै, तौ सै सिलै तौड़ै-तौड़ेयो खांदै लागै। 2फरीसी लोगै ऐजौ दैखैयो तैसीखै बौल़ौ, “दैख, तैरै चैलै सैजै टोल लोए सांडै, जू विशांव कै दूसै कौरणी मूसा कै कानून कै खिलाफ औसौ।” 3तैणै तिनुखै बौल़ौ, “का तुऐं पवित्र-शास्त्र दो ऐजौ ना पोढ़ै रैई, कै अमारै बौड़ै बुड़ेईक राजा दाऊदे, जोबै सै औरौ तैसकै दोस्त भूखै थिए। 4तोबै सै पौरमेशवर कै तोम्बू दै हौटै औरौ सैजी रोटी खैई जू पौरमेशवर कै चौढ़ावे की रोटी थी। मूसा कै कानून कै हिसाब सै सिरफ मुख्य यहूदी पुरोहितो खै ही तिनु रोटी खाणौ कै छूट थी औरौ ओकी कोसी कै नै थी।
5का तुऐं मूसा कै कानून दो पोढ़ै ना रैई, की मुख्य यहूदी पुरोहित विशांव कै दूसै मन्दिरो दी विशांव कै दूसौ की विधि खै तौड़णौ खै बै बैकसूर ठौहरौ थिए। 6पौरौ हांव तुऔं बौतौऊं कै इथका का मतलब औसौ, हांव तोंवारै धोरे आए रौआ औरौ हांव ऐसी मन्दिरो दा बै जादा खास औसौ। 7तुऐं जाणौए कै पवित्र शास्त्र दा इथका मतलब का औसौ कै हांव चोऊं कै मुं कारिए बलिदान चौढ़ाणौ कै बौदलै तुऐं ओकी पांदी दया कौरौ, तौ तुऐं मैरै बैकसूर चैलै कै नेंदैया ना कौरदै। 8हांव आदमी का बैटा तौ विशांव कै दूसौ का बै प्रभु औसौ।”
शोकैयोंदै हाथ वाल़ा आदमी
(मर 3:1-6; लूका 6:6-11)
9तिथैदा होटेयो सै तिनकै यहूदी सभा-घोर दा ओऊवा। 10औरौ तिथै ऐक आदमी थिया, जैसका हाथ शोकै रौआ थिया; औरौ तिनुऐ तैसी पांदी इलजाम लाणौ खै तैसी कैईंदु पूछु, “का विशांव कै दूसै ठीक कौरणा सोही औसौ?” 11तैणै तिनुखै बौल़ौ, “मानी पाव कै तुऔं मुंजी कोसी ऐकी कै भेड़ हौंव, औरौ सै विशांव कै दूसै गोढै दै छुटै जांव, तौ का सै तियौंखै थाम्बैयौ जोरुर बौचाए ना पान्दा? 12भला, आदमी कै कीमत भेड़ो दै बौड़ैयो औसौ, इथकारिए विशांव कै दूसै भोलाए कौरणी ठीक औसौ जैशैकै लोगौ कै ठीक ठाक कौरणा।” 13तोबै यीशुए तैसी आदमी खै बौल़ौ, “आपणा हाथ उंढा कौर।” तैणै आपणा हाथ आगु कौरा, औरौ तैसका हाथ ओकी हाथौ साए ठीक हौए गौआ। 14तोबै फरीसी लोग बायरै जाएयो तैसकै खिलाफ बात कौरदै लागै, की तैसी कैशैखै मारी?
पौरमेशवर का चोणेयौंदा सेवक
15ऐजौ जाणैयौ यीशु तिथैदा हौटै गौआ, औरौ बैजाए लोग तैसकै पौछौड़ियौ हौटै गौवै; औरौ तैणै सौबी खै ठीक कौरे। 16औरौ यीशुए तिनु चिताए दिए, कै कोसिया नै बौलेया कै सै पौरमेशवर का बैटा औसौ। 17की जू वचन यशायाह पौरमेशवर कै बातौ बौताणौवाल़ै कै दवारा बौल़ै राए थिया, सै पूरा हौं।
18“दैखौ, ऐजा मैरा सेवक औसौ, जैसीखै मोऐं चोणे राए, मैरा प्यारा, जैसी शै मैरा मन खुशी औसौ: हांव आपणा पवित्र आत्मा तैसी पांदी पोऊंबा औरौ सै सौबी बैगानै यहूदी लोगौ खै न्याय का समाचार प्रचार कौरदा। 19सै ना तौ झोगड़ा कौरला, औरौ ना लैरौ मारदा;
औरौ ना बाज़ारो दै कुणिए तैसकै धाव शुणदै।
20जैसी कोसी कै बै कुणजै समस्या औसौ
सै बौल़ेयोंदे बाती कै जैशणी औसौ, सै तिथुकै कुणजाई बै नुकसान ना पोऊचांदा,
औरौ आखरी दा सै न्याय खै जीतणौ कै बौजैह बौणदा।
21औरौ सौबी देशो कै लोग तैसी पांदी आशा राखदै।”
यीशु औरौ दुष्टआत्माओं कै ठोगड़े
(मर 3:20-30; लूका 11:14-23; 12:10)
22तोबै लोगै ऐकी आन्धै-गुंगै खै जैसदै दुष्टआत्मा थी, तैसकै धोरे लियोऊवा; औरौ तैणै तैसीखै ठीक कौरे दिया, औरौ सैजा गुंगा बौलांदा औरौ दैखदा लागा। 23इथकारिए सौबै लोग हैरान हौयौ बौलदै लागै, “का ऐजा आदमी राजा दाऊद कै वंश का औसौ औरौ जैसकै आमुए उमीद कौरे लोए।” 24पौरौ फरीसी लोगै ऐजौ शोणेयो बौल़ौ, “ऐजा तौ दुष्टआत्माओं का ठोगड़ा, औरौ शैतान कै मोदत लैई दुष्टआत्माओं खै घाड़ो।”
25तैणै तिनकै मन कै बात जाणैयौ तिनुखै बौल़ौ; “जैसी कोसी बै राज्य दै फूट हौंव, सै उजडै़ जांव, औरौ जैसी कोसी नगर या कुड़बे दै फूट हौंव तौ तिनकी टोल बै चोके रौए। 26औरौ जै शैतान ही दुष्टआत्माओं खै घाड़ो, तौ सै आपणै ही खिलाफ हौए जांव, तोबै तिनकै राज्य का काम तमाम हौए जांदा। 27भला, जै हांव शैतान कै मौदद लैई दुष्टआत्मा खै निकाल़दा, तौ तोंवारै चैलै कोस कै मौदद लैई घाड़ो? इथकारिए सैजाई तोंवारा न्याय कौरला। 28पौरौ जै हांव पौरमेशवर कै आत्मा कै मौदद शै दुष्टआत्मा खै घाडु़, तौ पौरमेशवर का राज्य तोंवारै धोरे आए गौआ।
29या कैशैकै कुणिए तागतवर आदमी कै घोरो खै तांव तौड़ी लूटी सौकौ, जांव तौड़ी सै आगै तैसी तागतवर आदमी खै बानै नै दैंव; औरौ तोबै सै तैसकै घोरो खै लोटै सौकौ।
30जू मैरै साथै ना आथी, सै मैरै खिलाफ दै औसौ, औरौ जू मैरै साथै कौठौ ना कौरौ, सै खिंडाऐ दैंव। 31इथकारिए हांव तुऔं खै बुलू, की आदमी कै सौबी बातौ का पाप औरौ नेंदैया माफ हौए जांदै, पौरौ पवित्र आत्मा कै नेंदैया माफ ना हौंदै। 32जू कुणिए आदमी कै बैटै कै खिलाफ दै कुणजै बात कौरला, तैसका ऐजा अपराध माफ हौए जांदा, पौरौ जू कुणिए पवित्र आत्मा कै खिलाफ दो किछै बै बौलला, तैसका अपराध ना तौ ऐसी लोक दा औरौ ना ही परलोक दा माफ हौंदा।”
ऐक डाल़ आपणै फोल़ो लैई पौछेयाणा जांव
(लूका 6:43-45)
33“जै डाल़ बै आछा औसौ, तौ तैसकै फल़ बै आछै हौंदै, जै डाल़ खराब औसौ, तौ तिथकै फल़ बै खराब ही हौन्दै, जिथुखै डाल़ फल़ शै ही पोछैयाणै जांव। 34तुऐं जोहरिले शोंगोऊं कै नानड़िया जैशणै औसौ, तुऐं बुरै हौयौ बै आछी बातौ बौल़ौ। जिथुखै जू मनो दो भोरै रौंव सैजौई मुँह पांदी आंव। 35आछा आदमी आपणै मनो कै आछै भण्डार शै आछी बातौ घाड़ो औरौ बुरा आदमी आपणै मनो कै बुरै भण्डार शै बुरी ही बातौ घाड़ो जिथुकै जू मन दो भोरयोंदो हों सैजौई तैसकै मुँओं पौरैशौ बायरै आंव।
36औरौ हांव तुऔं खै बुलू, की जू-जू बुरी बातौ आदमी बौलल़ै, न्याय कै दूसै हर ऐक बातौ का लैखा दैंदै। 37जिथुखै ऐक आदमी आपणी बातौ कै बौजैह शै बैकसूर औरौ आपणी ही बातौ कै बौजैह शै दोषी ठोराए जांदा।”
यीशु शै निशानो कै मांग
(मर 8:11-12; लूका 11:29-32)
38इथपांदी किछै यहूदी शास्त्री औरौ फरीसी लोगै तैसीखै बौल़ौ, “ओए रै गुरु आमै तांव कैईंदा ऐक चौमत्कार का निशान देखणा चोऊं, जिथलैई ऐजा पौता चालौ कै पौरमेशवरे ताखै भैजै राए।” 39यीशुए तिनुखै जोवाब दिया, “ऐसी जमाने कै लोग निशान चांव; जिथुखै सै बुरै औसौ, औरौ बिशवाश ना कौरणा चांव, पौरौ योना पौरमेशवर कै बातौ बौताणौवाल़ै कै निशान छोडे़बा ओका कुणजाई बै निशान तिनु दिया ना जांदा। 40योना तीन रात औरौ तीन दूस बौड़ी माछी कै पेटोऊदा रौआ, तैशैखैई हांव आदमी का बैटा तीन रात औरौ तीन दूस धोरती कै भीतरै रौंदा। 41नीनवे शहर कै लोग न्याय कै दूसै इनु जमाने कै लोगौ कै साथै खौड़ै हौयौ तिनु दोषी ठोहरांदै, जिथुकै तिनुऐ योना का प्रचार शोणेयो पाप कौरणा छोड़े दिया, औरौ दैखिया, इथै सैजा औसौ जू योना पौरमेशवर कै बातौ बौताणौवाल़ा दा बै बौड़ा औसौ। 42दक्षिण की राणी न्याय कै दूसै ऐसी जमाने कै लोगौ कै साथै बिज़यो तिनुखै दोषी ठोहरांदी, जिथुकै सै राजा सुलैमान का ज्ञान शुणणौ कारिए धोरती कै दूरकै जौगैह शै आए, औरौ इथै सैजा औसौ जू सुलैमान राजा दा बै बौड़ा औसौ पौरौ तुऐं पाप कौरणा छौड़णौ शै मोना कौरौ।”
दुष्टआत्मा कै घोरो कै तलाश
(लूका 11:24-26)
43“जोबै दुष्टआत्मा आदमी पौरैशै निकल़ै जांव, तौ शोकै जौगैह दा आराम जोंवो औरौ आराम ना पांव। 44तोबै सै आपिआरी बौल़ौ जैसी आदमी पौरैशै हांव निकल़ै रौए तैसकै धोरे हांव पाछु जान्दी औरौ आयौ तैसी आदमी कै जिन्दगी कै तैसी घोरो साए दैखौ जू खाली, साफ-सुथरा औरौ सौजायौंदा हौंव। 45तोबै दुष्टआत्मा जायौ आपी दी बै जादा बुरी सात दुष्टआत्मा खै आपणै साथै लियांव, औरौ सै तैसी आदमी दी जाएयो ठिकाणा बौणांव, औरौ तैसी आदमी कै पाछलै हालत इदै बै बोरै हौए जांव; ऐसी जमाने कै बुरै लोगौ कै साथै बै ऐशैखैई हौंदौ।”
यीशु का साचा परिवार
(मर 3:31-35; लूका 8:19-21)
46जोबै यीशुए भीड़ौ मुंजी बातौ कौरे लोई थी, तोबै तैसकै माँ औरौ भाए बायरै खौड़ै थिए, औरौ तैसीआरी बातौ कौरणी चांव थिए। 47औरौ कोसीए यीशु खै बौल़ौ, “दैख, तैरी माँ औरौ तैरै नानड़ै भाए बायरै खौड़ै औसौ, औरौ तांव आरी बातौ कौरणी चांव।” 48ऐजौ शोणेयो तैणै बौलणौ वाल़ै खै जोवाब दिया, “मैरै माँ औरौ मैरै भाए कुण औसौ?” 49औरौ आपणै चैलै कै ढौबौ खै आपणा हाथ औगौड़ियौ कौरेयौ बौल़ौ, दैखैया, “मैरै माँ औरौ मैरै भाए ऐजै औसौ। 50जिथुकै जू कुणिए मैरै स्वर्ग कै पौरमेशवर कै मोरजी पूरी कौरौ, सैजै मैरै भाईटु औरौ माँ औसौ।”
دیاریکراوەکانی ئێستا:
मत्ती 12: SRXNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.