मत्ती 3
3
यूहन्ना बपतिस्मा दींणै बाऐरै कम
(मरकुस. 1:1-8; लूका 3:1-9,15-17; यूह. 1:19-28)
1तैन्हांं धियाड़िया मझ यूहन्ना बपतिस्मा दींणै वा अईछी करि यहूदिया प्रदेशेरी सुनसान जगाय मझ ऐ प्रचार कांना लगा कि 2“अपड़ै पापा किना मंन फैरा, केईनी कि परमेश्वरैरा राज्य नीड़ अईछी गियौरा आ।” 3ऐ यूहन्ना सैहै आ जेसेरै बारै मझ यशायाह भविष्यवक्तै चर्चा कातै बोलोरू थियु कि “सुनसान जगाई मझ अक हक दींणारेरी आवाज शुणींति आ, कि प्रभुरा स्वागत कांनेरै तेईनी अपड़ै आपा तुवे तियार करा।”
4यूहन्ना ऊंटेरै शिरवा केरै बंणोरै लिकड़ै लईंथ्या जां अपड़ै ढकापन चमड़ेरी गात्री बन्हींथ्या। सै टिट जां बणियुं मखीर खईंथ्या। 5तां यरूशलेमेरै जां होरै सारै यहूदिया केरै, जां यरदन नदिरै इलाकेरै आस-पासेरै सारै देशेरै मैहणु तैस किनि अईछी करि किठै भौ गियै। 6जां अपड़ै-अपड़ै पाप मनणा किना बाद यूहन्ने तेन्हांनि यरदन नदी मझ बपतिस्मा दिता।
7जेख्णी तेनी बड़ै सारै फरीसी जां सदूकी बपतिस्मा लींणैरै तेईनी ऐपु किनि ऐईंतै लधै, ता यूहन्ने तेन्हांनि बौलु, जैहरीलै कीड़ै सैयि बुरै मैहणुवो, आंउ तुहांनि खबरदार काता, कि हर मैहणु जै पाप काता तेसनी परमेश्वरा अक धियाड़ी सजा दींणी जां ऐहीं मेईं सौचा कि तुवे ऐस सजाय किना बचि गांहणै। 8अगर तु सही मझ अपड़ै पापा किना मंन फैरता आ, ता अपड़ै अच्छै कमैं ला तैन्हांं लुहा; 9ऐस गलतफैमी मझ मेईं रिहा कि अब्राहम असैड़ा पिता आ; ऐठणीरै तेईनी असुनि सजा ना मेईंणी केईनी कि आंउ तुहां सिंउ बोलता, कि परमेश्वर ऐन्हां घौड़ा किना अब्राहमेरै तेईनी सन्तान पेईदा करि सकता। 10जां जिहीं अक मैहणु अपड़ि कुराहड़ी ला सीरा पन जैस बुटा पन ऐयिड़ै फल लगतै, तैस बढि करि आगी मझ फुकणनि तियार आ, ठीक तिहियें परमेश्वर बि तुहांनि तुवाड़ै पापा केरै तेईनी सजा दींणनी तियार आ।
11“आंउ ता तुवाड़ा मंन बदलणैरै तेईनी पाणी ला बपतिस्मा दींता, पण जै मूं किना बाद प्रचार कांननी ऐईंणार आ, सै मूं किना बि बड़ा महान आ; आंउ ता तेसेरै मुकाबलै किछ बि ना, आंउ एकि दासेरै मुताबिक सभनियांं हल्का कम कांना चाहूं ता तेसेरै बि लायक ना। तैस तुहांनि पवित्र आत्माय जा आगी ला बपतिस्मा दींणा। 12यीशु तैस मैहणु सैयि आ जेसेरै हत्था मझ शुप आ, जेनि ला सै दांणा किना द्रुबड़ अलग काता, जां अपड़ि पटिया किना साफ क्यौरा सारा अनाज किठा करि-करि तूणियां मझ भरतै जां जै द्रुबड़ बचतु तैस आगी मझ फुकि दींता, तिहियें परमेश्वरा धर्मी मैहणु अधर्मियां किना अलग करि-करि स्वर्गानि लै गांहणै जां अधर्मी मैहणु द्रुबड़ा सैयि तैस आगी मझ सुटणै जै आग कदि ना हिषणी।”
यूहन्ने किना यीशुरा बपतिस्मा
(मरकुस. 1:9-11; लूका 3:21-22)
13तैस टैंमा जेख्णी यूहन्ना प्रचार काता थ्या, ता यीशु गलील प्रदेशेरै इलाके किना यरदन नदी मझ तैस किना बपतिस्मा लींणनी या। 14पण यूहन्ने प्रभु यीशुनि नमां कातै बौलु कि, “मूं ऐपु तिंडै हत्थै ला बपतिस्मा लींणैरी जरूरत आ, फिरी बि तु बपतिस्मा लींणैरै तेईनी मूं किनि यौउरा आ?” 15यीशु तेसनी ऐ जुबाव दिता, कि “अबै तु ऐतियु ऐ भूंणा दै, केईनी कि जै परमेश्वर चांहथा आ तैस पूरू कांनेरै तेईनी असेड़ै तेईनी ऐहींयै कांनु ठीक आ।” फिरी यूहन्ने यीशुनि बपतिस्मा दित्ता। 16जां जिहीं ऐ यीशु पाणी मझांं बपतिस्मा लैकरी भेईर निकआ, तेनी तकाउ कि सुरग खुलि गिउ जां तेनी परमेश्वरैरा आत्मा एकि कबूतरा सैयि उतरता जां ऐपु पन ऐईंता लधा। 17जां सुरगा किना अक आवाज यैई “ऐ मिंडा प्यारा पुत्र आ, जैस किना आंउ बड़ा खुश आ।”
دیاریکراوەکانی ئێستا:
मत्ती 3: CDJNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.