लूका 21
21
विधवा जनेनिरा दान
1जेख्णी यीशु मंदरा मझ थ्या, तेनी अमीर मैहणु पेटी मझ दान सुटतै तकाय। 2जां तेनी अक गरीब विधवा जनानि बि तेत मझ दो दमड़ी (ताम्बेरे दो हल्कै सिक्कै) सुटती तकाय। 3तां यीशु बौलु, “आंउ तुहांनि सच बोलता कि, ऐसै गरीब विधवाय जनानि जै दान दिता, तेसैरी कीमत अमीर मैहणुवां केरै बड़ै दाना किना जादी आ। 4केईनी कि सभनियें दान दींणारै अपड़ै बड़ै जादै धना मझ किछ हिस्सा दान दिता, पण ऐनि विधवाय जनानि अपड़ु सभ किछ दान करि दित्तु, कि तैस किनि जीवित रींहणेरै तेईनी किछ बि ना रिहु।”
मंदरेरै विनाशेरी भविष्यवाणी
(मत्ती 24:1-14; मरकुस. 13:1-13)
5जेख्णी बड़ै-सारै मंदरेरै बारै मझ ऐ बोलतै थ्यै, कि ऐ मंन्दर केतिया छै घौड़ा जां चढ़ाउरिये चीजै ला सजाउरा आ, तां यीशु बौलु, 6“अक धियाड़ी ऐईंणी, जेख्णी ऐ सभ-किछ जै इमारती ऐठि सिधि खड़ी भोरी तकांतै अत्तै! ऐ सारी कंथै जां इमारते नष्ट भौ गांहणी।”
दुख संकट
7तैन्हैं यीशु किना पुच्छु, “हे गुरू! ऐ सभ-किछ केख्णी भूंणु? जां जेख्णी ऐ गलै भूंणार भूंणी ता तैस टैंमेरा चिन्ह कितु भूंणा?”
8तेनी बौलु, “सतर्क भौ करि बेशा कि कौ तुहांनि भटका ना दिया। केईनी कि बड़ा-सारा मिंडु नाँ लै करि ऐईणु जां बोलणु, कि आंउ सेहै आ; जां अबै टैंम नीड़ चलि यौउरा, तुवे तैन्हांं पिचोरै मेईं गांहथै। 9जां जेख्णी तुवे लड़ाईया केरा हूला जां जै दूर लड़ाई भूंणी, तेन्हैरी गलै शुणि करि डरींतै मेईं; केईनी कि पेहिलै ऐ भूंणु जरूरी आ; पण ऐठणीरा मतलब ऐ ना कि अंत भूंणारा।”
10तां यीशु तैन्हांं सिंउ बौलु, केईनी कि एकि जाति होरी जातिरै खिलाफ जां देशा पन देशा हमला कांना। 11जां बड़ै-बड़ै भुंजल भूंणै, जां ठाहरी-ठाहरी अकाल जां महामारी फेलणी, जां सुरगा मझ डरियूंणी गलै जां बड़ै-बड़ै चिन्ह लाधी ऐईंणै।
12पण ऐन्हां सभनियांं गला किना पेहिलै तुवे मूं पन विश्वास कांनेरी वजहि ला मैहणुवां पकड़ाणै, जां सतांणै जां यहूदी सभा घरा मझ तेन्हेरै हवालै काने, जां जैल्ही मझ सुटि दींणै, जां राजै जां राज्यपाला अघ्रियालीं खड़ै काने। 13पण ऐ तुवाड़ै तेईनी गवाहि दींणैरा टैंम भूंणा। 14ऐठणीरै तेईनी अपड़ै-अपड़ै मंना मझ सौचि रखा कि असु पेहिले किना जुबाव दींणेरी चिंता ना कांनी। 15केईनी कि मूं तुहांनि ऐतिया बोलणैरा तरीका जां बुद्धी दींणी, कि तुवाड़ै सभ विरोधिया केरै बोलै तुवाड़ा सामना जां तुवाड़ी गलैरा जुबाव ना दियूंणा। 16जां तुवाड़ै माँ-बब जां भाई जां परिवार जां मित्रा बि तुवे पकड़वाणै; ऐड़ि तेईनी कि तुहां मझ केथरै ता मारी छडणै। 17जां मूं पन विश्वास कांनेरी वजहि ला सभनियांं मैहणुवां तुहां सिंउ बैर कांना। 18पण तुवाड़ै शिरैरा अक शिरवा बि बांका ना भूंणा। 19पण जै अपड़ि मोउती तेईनी मिंडै विश्वासा मझ बंणोरा रैहला, सै बचाई गांहणा।
यरूशलेमेरै विनाशैरी भविष्यवाणी
(मत्ती 24:15-21; मरकुस. 13:14-19)
20“जेख्णी तुवे यरूशलेम शहरा सैनाय ला घैरौरा तकालै, ता तुवे समझि गहि कि बड़ी जल्दी ऐ उजड़ि गांहणा। 21फिरी जै यहूदिया प्रदेशा मझ भुईया सै पहाड़ा पनि नशि गहिया, जां जै यरूशलेम शहरा मझ भुईया सै तेठां भेईनि निकोहि गहिया, जै ग्राँईयां मझ भुवै सै तेत मझ मेईं गांहथै। 22केईनी कि ऐन्हां धियाड़िया परमेश्वरा अपड़ा बदला लींणा जां पवित्र शास्त्रा मझ लिखोरी सारी गलै पूरी भौ गांहणी। 23तैन्हांं धिहाड़िया मझ जै दुपरांणी जां बच्चैनी दुध पिवांती भूंणी, तेन्हेरै तेईनी बड़ा दुखैरा टैंम भूंणा। केईनी कि देशा मझ बड़ा कलैश जां तैन्हांं मैहणुवां पनि बड़ा संकट भूंणा। 24सै तलवारियै ला मांने जां तेन्हैरै दुशमणा सै बंन्दी बंणा करि बड़ै सारा देशा मझ लैई गांहणै, जां यरूशलेम शहरा पनि होरनियां जातिया केरै मैहणुवां त्यो-तेईनी राज कांनु ज्यो-तेईनी तेन्हैरा टैंम पुरी ना गांहथा, तैन्हांं यरूशलेम शहरेरै मैहणु मारी छडणै।
यीशुरै वापस ऐईंणैरा चिन्ह
(मत्ती 24:15-21; मरकुस. 13:14-19)
25असमांणा मझ होरैन्धि-होरैन्धि गलै भूंणी, सूरज, चाँद जां तारा मझ चिन्ह लाधी ऐईंणै, जां धरती पन हर जातिरै मैहणुवां पनि संकट ऐईंणा, जां समुद्रा मझ जै उथल-पुथल भूंणी ता मैहणुवां डरि गांहणु। 26जां डरै ला संसारा पनि ऐईंणै बाईया मुसीबतिया तका करि बड़ा सारा मैहणुवां दिल छडि दींणै केईनी कि असमांणेरी सारी शक्ति इदि-ओदि हिलायूंणी। 27तां फिरी सभनियांं मैहणुवां, आंउ मैहणुरा पुत्र अपड़ि सामर्थ जां बड़ी महिमाय सिंउ बदऐ पन ऐईंता तकांणा। 28जेख्णी ऐकेई गलै भूंणा लगणी, ता तुवे आत्म-विश्वासै सेईतै खड़ै भौ करि असमांणा धेरै तकाय; केईनी कि तुवाड़ा छुटकारा नीड़ भूंणा।”
अंजीरेरू बुट्टैरा उदाहरण
(मत्ती 24:32-35; मरकुस. 13:28-31)
29तेनी तैन्हांं सिंउ अक उदाहरण बि बोला, कि “अंजीरेरू बुटा जां सभनियांं बुटा तका। 30जिहींये तेन्हेरै नवें पतरै निकूंथै, ता तुवे तैन्हांं तका करि ऐपुवै पता ला लींतै कि गर्मी चलि यैई। 31ऐहीं चारै जेख्णी तुहां ऐ गलै भूंती तंकाणी, ता तुवे बुझि गहि कि परमेश्वरैरा राज्य नीड़ चलि यौउरा। 32आंउ तुहां सिंउ सच बोलता, कि ज्यो-तेईनी ऐ सारी गलै भौ ना गाहली, त्यो-तेईनी ऐसै पीढ़िरै मैहणुवां केरा अंन्त ना भूंणा। 33सुरग जां धरती छपि गांहणै, पण मिंडी गलै पूरी भूंणी ऐ भूंणी।
सदा तियार रिहा
34ऐठणीरै तेईनी तियार बेशा, कि किहीं क्यै ऐहीं ना भुईया कि मोउज-मस्ती, नशै जां इस दुनियेरिया परेशानिये ला तुवाड़ा मंन प्रभु किना दूर भौ गहिया जां सै धियाड़ी अजाग्गै तुहां पन फंदै सैयि इकदम अईछी रिहा। 35केईनी कि सै धियाड़ि सारी धरतिरै सभ रींहणै बाऐ मैहणुवां पनि ऐहियें-चारै अईछी पूंणी। 36ऐठणीरै तेईनी तियार बेशा जां हर टैंम प्रार्थना कातै रिहा कि तुवे ऐन्हां सभनियांं ऐईंणै बाईयै मुशिकलिया किना बचणेरै तेईनी जां मूं किनि यानि मैहणुरै पुत्रेरै सांमणै खड़ै भूंणेरै लायक भुईया।” 37जां सै धियाड़ीऐ मंदरा मझ उपदेश करींथ्या, जां संन्हैरै भेईर गहि करि जैतून नाँईयेरै पहाड़ा पन गहि करि प्रार्थना करि-करि रात बिताईंथ्या। 38जां भियागै-पिचारी सारै मैहणु तेसैरी गलै शुणनेरै तेईनी मंदरा किनि ऐइछियां करींथ्यै।
دیاریکراوەکانی ئێستا:
लूका 21: CDJNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.