San Mateo 15
15
A ku waysik a xi'ra mo' tsoy ti' K'uj
(Mr. 7.1-23)
1Taro' tu tiʌ a Jesús u winiko' a judíos a ku ya'batio' fariseos yete a ku kʌ'sko' u t'ʌn K'uj a toj u ts'ibtamʌ a Moisés uchik a ti' u taro' ix Jerusalén, y tʌn u yei'ko' ti';
2—¿Biken a kʌ'sa winiko' muj metiko' a bex tu ye'sa' to' ak nuki uchik? ¿Biken muj p'o'iko' u k'ʌo' tuk'in ku bin tu jʌno'?
3Tu nuka Jesús y tu k'ata tio':
―¿Y biken bexi' teche'x maj metke'x a u lismʌ u t'ʌn K'uj ti' a metke'x, y toj jai' ka metke'x a ba' tʌra a metke'x teche'x uchik? 4K'uj tu ya'a: “Ki ue'x u t'ʌn y ki yakunte'x a tet yete a nʌ'” y “a mok ku yei'k mo tsoy ba' ti u tet y ti' u nʌ', yʌnti' u kimi.” 5Chen teche'x ka wei'ke'x: Tak xik lara ku yei'k ti' u tet y ti' u nʌ': “Mo' bik in wʌntike'x, tu woro a ba' yʌnten lʌji' ti laj k'uba' ti K'uj.” 6A mok ku yei'k bex ti' u tet y ti' u nʌ', ya muj ts'ʌra' u pach u yʌntiko'. Y bex ya maj metke'x a tu li'sa u t'ʌn K'uj toj jari a t'ʌne'x a teche'x ka metke'x. 7¡A teche'x ka metke'x a bʌje'x ne tsoy a tuke'x chen tusaka'e'x! Toj tu ki' a'a yok'o a teche'x a profeta Isaías ka tu ya'a:
8“A je' a winiko' jai' yete u chi' ku yei'k tus ku yui'k in t'ʌn,
chen toj mo' ten ku tukriken.
9Ba'wi ku chen k'ujintiken wa muj yui'ko' in t'ʌn,
chen u t'ʌn winik ku ye'sik tia winik.”
10Pachi a Jesús tu pʌya tu woro a winik a tio' tita y tu ya'tio':
―Ki ue'x a ba' kin wei'k teche'x. 11A ba' a ku yoko tu chi' a winik mo' lʌji' ku ts'ek u kʌxtik u k'ebʌn, chen a ba' ku jok'o ti' lʌji' ku ts'ek u kʌxtik u k'ebʌn.
12Kaj xok'i u kʌ'sa winiko' a Jesús, tu yao' ti:
—¿Toj a we a u winiko' a judíos a ku ya'batio' fariseos mo' tsoy tu yua a ba' ta wa'a?
13Ti' tu nuka:
—Tu woro a mo' tu pʌk'a in Tet a tiʌ ix kʌ', binukaj laj jo'ka' tu woro yete u mots. 14P'ʌte, a layo' muj yirko' u ber y ku ka' e'sik ti' u jeri' a mok muj yirik u ber. Wo juntu a muj yirik u ber ku ye'sik u ber ti u jeri' a mok muj yirik u ber, tu ka'tio' ku bij k'opo wo yʌn jump'e u jor lu'm.
15Pedro tu ya'a ti Jesús:
—Tsikbʌte to' baiki u nu'ku a ba' a ta tsikbʌta.
16A Jesús tu nuka: ―¿Bexi' teche'x mo' ta ki ue'x baiki u nu'ku in kʌ'sa? 17¿Yʌn ma' we'x, tu woro a ba' ku yoko yok'o chi' ku bin yok'o a jʌ'mne, y pachi ku jok'o yok'o a bʌk'e? 18Chen a ba' a ku jok'o yok'o chi' a winik, ti' ku jok'o yok'o u pixʌn y a je' lʌji' ku ts'ek u waya a xi'ra mo' tsoy ti' K'uj. 19Toj yok'o u tuku ku jok'o u tukrik mo' tsoy ba', ku tukrik u kinsa, u tusik u lak' yete u jer mo' la' u lak', u bin tu nʌta tak mʌnʌ' a lak', u yakra ba', u tus y yei'k mo' tsoy ba' ti' u bojo'. 20A je' a bao' ku waysik a winik mo' tsoy ti' K'uj, chen a jʌnʌ y maj p'o'ik a k'ʌ', muj ts'ek u waya a winik mo' tsoy ti' K'uj.
A ch'upra a mo judía ku jach ki' aksik tu yor ti' K'uj
(Mr. 7.24-30)
21Jok'i a Jesús tu tiʌ ij bini yok'o u lu'mi Tiro y Sidón. 22Tari junturi' ch'upra cananea tij jok'i yok'o a lay u lu'mi, ne k'ʌ'm abotnʌj y bex ku yei'k:
—¡Ts'uri, u ti'a David, cha'e otsi ten! ¡U ch'upra in ti'a yʌnti' juntu kisin tu bʌk'e y ne jach k'ux yaj ba' ku yui'k!
23Chen a Jesús muj nuka ti'. Y u kʌ'sa winiko' tu k'ato' ti' Jesús:
—A'ti' a lay a ch'upra u bin, jai' tʌn u yabot tʌn u tar tak pach.
24Jesús tu ya'a:
—K'uj jai' tu tuchi'ten ti' a meo' a u sʌtmu u bʌj a lʌji' u winki Israel.
25La' kaj tari a ch'upra y tu xonkitubʌj ti' Jesús y tu ya'a:
—¡Ʌnten Ts'uri!
26Chen Jesús tu nuka ti':
―Ka wirik mo' tsoy a takik u yo'ch u ti'o' a winik ti' a ts'ekti' a pe'k'o.
27A ch'upra tu nuka ti' Jesús:
―Taj a ba' ka wei'k Ts'uri, chen tak a pek'o' bexi' ku marik u p'ap'ai a ku jutu a tu ku jʌno' u winki.
28Ka tu ya'a Jesús:
¡Ch'upra, a tech ta jach ki' aksa ta wor ti' K'uj! Ka' metchʌjʌk a bex a k'at.
Y u ch'upra u ti'a a ch'upra toj se'p' ch'eni.
Jesús ku ch'ensik ne pim a mok mo' uts
29Jesús jok'i tita, kaj bini tu xur u petai a Galilea; kaj nʌ'ki yok'o wits y tij kuraji tita. 30Jach k'ux pim winik tu much'a u bojo' tu tiʌ, u tasmo' yete a muj ximo', muj yirik bao', mʌnʌ' u k'ʌo', yete a muj jok'o u t'ʌno' y u jero' mo' uts, tu k'uso' tu yok Jesús y Jesús tu laj ch'enso'. 31Y a winik jach pekno' u yoro' tuk'in tu yira a mok muj t'ʌn jok'i u t'ʌn, a muj xima ya ku xima, y a muj yirik ba' je'chʌ u wich, y chu'mpʌjo' u yei'ko' jach k'ux tsoy ba' ti' u K'uj a Israel.
Jesús ku ts'ek u jʌnʌ cuatro mil winik
(Mr. 8.1-10)
32A Jesús tu t'ʌna u kʌ'sa winiko' y tu ya'tio':
—Kin ch'eik otsi ti' a je' a winiko', yʌn oxp'e k'in tiʌ yete ten y mʌnʌ' baij u jʌnto'; Wa kin tuchi'tiko' ka' xi'ko' tu yatocho' je' u sʌjkimo ix bej.
33U kʌ'sa winik tu yao':
—¿Tuba ki bin in jaro' o'chi ti' ne pim winik wai, tu mʌnʌ' k'ʌs kʌjrik winik way?
34Jesús tu k'ata tiʌ:
—¿Bon pʌn yʌnte'x?
—Tu nuko': Siete, y yete mo' ne ya'p meje kʌy.
35Y Jesús tu tuchi'ta a winik ka xi'ko' kuta ix lu'm, 36tu chuka yete u k'ʌ' a siete pʌn yete a kʌy y tu ya'a:
—Bay tech K'uj.
Y pachi tu jʌtsa ti u kʌ'sa winiko' y tio' tu jʌtsa ti' a winiko'. 37Y laj jʌno' tu woro y ne ki nʌjcho', y tu much'o' u yʌrʌ', siete xak turu. 38Tu woro a mok jʌno' yʌn cuatro mil winik y moj xaka a ch'upra yete a mejen. 39Y pachi a Jesús tu t'ʌna a winiko' y lʌji' kaj okij ix chem, ij bini tu lu'mi u k'aba' Magadán.
دیاریکراوەکانی ئێستا:
San Mateo 15: PLacNaha
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Sociedad Biblica de México AC