San Mateo 14
14
U kimi a Juan a ku but'ik ja' a winik
(Mr. 6.14-29; Lc. 9.7-9)
1A lay u k'inio' a Herodes a lʌji' aj wes tu yua u tsikbʌta a ba' ne tsoy ku metik a Jesús, 2Y tu ya'ti' u k'ʌni: «A je' lʌji' a Juan a ku but'ik ja' a winiko', lʌji' ka lik' tu ka' kuxta, ben ku metik ne yap' tsoy ba' yete u muk' K'uj.»
3Lʌji' Herodes a tu tuchi'taj mʌka a Juan, u k'ʌxa' yete maska' u sumi (cadena) y pura' tuku naj mʌka' winik, chen yok'o a Herodías, u lak' a Felipe u ka' xi'ra u bojo' a Herodes. 4A tu tu ya'a a Juan ti' Herodes: «Mo' tsoy a ch'eik u lak' a bojo'.»
5A Herodes poch u kinsik a Juan, chen sajak ti' a winik; tu ku yirik a winik ku yiriko' a Juan lʌji' a profeta. 6Chen tuk'in tʌn u metko' u yo'ch a Herodes yok'o a tuku k'uchu u jer u yaxk'in, u ch'upra u ti'a a Herodías, ok'otnʌ tu chumuki a winik y ne tsoy tu yira a Herodes u yok'ot. 7Y la'jen tu ts'a u t'ʌn a Herodes ti', wo yʌn ba' ku k'atik, jeu ts'ekti'. 8A'ti' ten u nʌ' bex u yei'k ti' a Herodes:
—In k'at ka ts'ek ten yok'o jump'e lʌk u jo' a Juan a ku but'ik ja' a winiko'.
9Y a Herodes ne tu tukra u bʌj, chen a tu tu ts'a u tʌn y tu laj ua tu woro a mok tu pʌya tu jʌnʌ, a ti' tu tuchi'ta ka' ts'abakti'. 10Tu tuchi'ta xat'a u che' u kar a Juan ichi ix tu ku mʌka' winik. 11Pachi tasa' yok'o lʌk u jo' a Juan, ti' ts'abti' u ch'upra u ti'ʌ a Herodías; y a ti' tu ka' ts'ati' u nʌ'.
12Pachi taro' u kʌ'sa winiko' a Juan, ka tu ch'a u bʌk'e y tu muko', y bino' u yao' ti' a Jesús.
Jesús ku ts'ek u jʌnʌ cinco mil winik
(Mr. 6.30-44; Lc. 9.10-17; Jn. 6.1-14)
13Ka tu yua Jesús, bini tu juna yete chem tu mix k'ʌs winik, y tuk'in a winik tu yuo', laj jok'o yok'o u kʌjta ti' t'urik a Jesús. 14Kaj emi Jesús yok'o a chem, tu yira a winik ne pim y tu cha otsi tio' y chu'mpʌ u laj ch'ensik a winik a mok mo' uts. 15Tuk'in tʌn u yak'ʌchʌ, u kʌ'sa winiko' a Jesús xok'o tu yiknʌn a Jesús y tu yao' ti': —Way mix k'ʌs winik y ya binukaj ak'ʌ'chʌ. Tuchi'te a winiko' ka xik u mʌno' u yo'cho', a tu xok'o yʌn kʌjta.
16Jesús tu nuka tio':
―Mo' sik u bino', ts'ae'x teche'x u yo'cho' ti' u jʌno'.
17Y tio' tu nuko':
—Toj jai' cinco pʌn yʌnto' y ka'p'e kʌy.
18Ti tu ya'a:
—Tase'x ten wai.
19Y tu laj tuchi'ta a winik u kuta ix su'k, y tu ch'a a cinco pʌn yete a ka'p'e kʌy, y tu li'sa u wich ix kʌ' y tu t'ʌna K'uj y tu jʌtsa aj pʌn ti' u kʌ'sa winik y tio' tu ka jʌtsa ti a winik. 20Laj jʌno' tu woro y laj ki nʌjcho'. Pachi u kʌ'sa winiko' a Jesús mʌni u much'o' u yʌrʌ' y tu much'o' doce xak woro u yʌrʌ'. 21Aj jʌno' ne pim, yʌn cinco mil winik, y moj xaka' a ch'upra yete a mejeno'.
Jesús ku xima ix peta'
(Mr. 6.45-52; Jn. 6.15-21)
22Pachi a Jesús tu ya'ti' u kʌ'sa winiko' ka nʌjko' ix chem y ka xi'ko' pati' ti' u ch'ʌktik u pach a peta' y ti' ku bij p'ata ti' u yei'k ti' a winiko' binuka'. 23Kaj ts'o'k u t'ʌnik a winiko', bini u t'ʌne K'uj ix wits tu juna. Kaj ak'ʌ'chʌ xuy tiʌ tu juna tita. 24Y a chem tiʌ tu chumuki a peta', y ne chich u tsa'pʌ u yʌ'mi yok'o a chem tu tio', tuku tʌn u tar a ik' u nu'ku tu yʌno'. 25Tʌn u jach bij sasta, a Jesús xok'i ti' u kʌ'sa winiko' ximuka' yok'o a peta'. 26Y u kʌ'sa winiko', tu yiro' u xima yok'o a peta', jach ja'k'o u yoro' y tu yao':
¡A lay kisin ku tichi!
27A Jesús t'ʌna y tu ya'tio':
—¡Chichkinte a wore'x! ¡Tenen a Jesús: Ma' sʌjtike'x!
28Ka tu nuka Pedro:
—Ts'uri, o jach tech, li'se u t'ʌni ti' in tar tu ti'ech yok'o a peta'.
29Jesús tu ya'a: Ko'ten.
Lʌji' kaj emi a Pedro yok'o a chem ij chu'mpʌ u xima yok'o a peta' ti' u bin tu tiʌ a Jesús. 30Ka tu yira jach k'ʌ'm a ik', tu sʌjta; y chu'mpʌ u juru ij chu'mpʌ u yabot:
—¡Ʌnten Ts'uri!
31Toj se'p' tu tich'a u k'ʌ' a Jesús ti', ti u chukik, ka tu ya'a:
—¡A tech lʌjiech a xi'ra a mu' ki aksamʌ tu wor ti' ten! ¿Biken ta sʌjta?
32Kaj nʌ'ki Jesús yok'o a chem, xu'ri a ik'. 33A tiʌ yok'o chem, xok'o ti' a Jesús, y tu xonkunto' u pixo' ti', ka tu yao':
—¡A tech jach lʌjiech u Ti'a K'uj!
Jesús ku ch'ensik a mok mo' utso' ix Genesaret
(Mr. 6.53-56)
34Chen ka tu ch'ʌkto' a peta', k'ucho' yok'o u kʌjta u k'aba' Genesaret. 35A winiko' tu k'o'oto' a Jesús to' a lay u kʌjta. Tu tuchi'to' t'ʌni ch'ik tu woro a xok'o a kʌjta a tiʌ tita. Y tasa' ti' a Jesús a mok mo' utso', 36y tu p'isubʌjo' u k'atko' ti' a Jesús wa jai' ku cheik u tʌra' u xur u nok', y tu woro a mok ku tʌrko' ku laj ch'eno'.
دیاریکراوەکانی ئێستا:
San Mateo 14: PLacNaha
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Sociedad Biblica de México AC