San Lucas 23
23
Jesús ʌkʌtʌn ti' Pilato
(Mt. 27.1-2,11-14; Mr. 15.1-5; Jn. 18.28-38)
1Laj lik'o tu woro, y tu puro' a Jesús ʌkʌtʌn ti' Pilato. 2Ij chu'mpʌ u pʌk'ik u pach a Jesús, ka tu yao':
—Tak iraj a je' a xi'ra tʌn u but'ik ba' tu jo'o tu woro u winki a nukuch kʌjta, ku yei'k mo' tsoy ak bo'tik ti' in lu'm ti u wesi Roma a César, y ku yei'k u bʌj lʌji' a Cristo, y a wes.
3Pilato tu k'ata ti':
—¿Tech u Wesi a judío?
—A bʌji' tech ka wei'k— bex tu nuka a Jesús.
4Pilato tu ya'ti' u t'ojio' a moko' ku meajo' yok'o u yatoch K'uj, y yete a pim a winiko':
—Mix ki nʌj irik u si'pi a je' xi'ra.
5Chen tio' tu chich k'ato', y tu yao':
—Yete u kʌ'sa ku ts'ek u chokta tu woro a winik, chu'mpʌ Galilea hasta way ix Judea.
Jesús ʌkʌtʌn ti' Herodes
6Ka' tu yua a Pilato, u ya'ba Galilea, tu k'ata wo a je' xi'ra lʌji' u winki Galilea. 7Kaj tu yua lʌji' u winik a Herodes, ka tu tuchi'ta ti' Herodes, chen laj bexi' tiʌ ix u kʌjta Jerusalén a Herodes. 8Y a Herodes ka tu yira a Jesús, nej tsoyji u yor tu ne uch poch u yirik, tu ku yua u tsikbʌtʌ' a ba' ku metik Jesús, y tʌn u ch'uktik u ye'sa' ba' ti'. 9Y ya'p a ba' tu k'ata Herodes ti', chen a Jesús mix k'ʌs ba' tu nuka. 10U t'ojio' a moko' ku meajo' yok'o u yatoch K'uj, yete a ku kʌ'sko' u t'ʌn K'uj a toj u ts'ibtamʌ a Moisés uchik tʌn u jach chich pʌk'iko' u pach Jesús. 11A Herodes yete u ba'kʌi tu p'akto' y tu p'asto' a Jesús, y tu tʌko' ti' u nok' a jach tsoy ti' u yira' bex a wes, y tu ka tuchi'ta' a Jesús tu yʌn Pilato. 12Y a Pilato yete Herodes tu ka' kato' u yoro', chen a ka'chik p'ek u yirik u bʌjo'.
Ku ya'ba u kinsa' Jesús
(Mt. 27.15-26; Mr. 15.6-15; Jn. 18.39—19.16)
13A Pilato kaj u much'a u t'ojio' a moko' ku meajo' yok'o u yatoch K'uj, yete a mok akaʌ' tu wesio' y yete u winki u kʌjtai. 14Pilato tu ya'a:
—Teche'x tare'x a tase'x a je' xi'ra, ta wa'ex u chojkinta u yor u winki kʌjta; chen ten ne yap' ba' ti k'ata u chi' ti in wik u si'pi, a tu ka pʌk'ik u pach teche'x, chen mix tin wira u si'pi. 15Mix a Herodes tu yira u si'pi, la'jen tu ka tuchi'taj way. Ka wike'x, mʌnʌ' ba' tu meta ti' u kinsa'. 16Bi y sipte chen u ts'oko u bo'tik u si'pi.
17A Pilato, t'ʌrʌ' u naj siptik a mok makʌ', tuk'in ku metik u yo'cho'. 18Tu woro a winik kaj abotno', ka tu yao':
—¡Li'se a tʌn ti' u kinsa' a Jesús, y sipte ti to' a Barrabás!
19A je' Barrabás, toj makʌ' a tu ku mʌkʌ' winik, tu muj yui'k u tʌn u wesi a lay u kʌjta, y tu tu kinsa' winik. 20Pilato u k'at u siptik Jesús, la'jen tu ka k'ata ti' u pimai, 21chen abotno' u pimai a winik y bex tʌn u yei'ko':
—¡Bʌje ix cruz! ¡Bʌje ix cruz!
22Oxp'e wʌts' tu ya'a Pilato:
—¿Bai tu ne meta a je' a xi'ra? Mo' ti wira u si'pi ti' u kinsa' a je', ki bin in ts'ae u bo'tik u si'pi y pachi ki bin y sipte.
23Chen a tio' tʌn u chich k'atik abotukao' ti' Pilato, ti u bʌja' ix cruz a Jesús. U t'ʌno' tio' y yete u t'ojio' a moko' ku meajo' yok'o u yatoch K'uj, t'upti' u metik a ba' ku k'atko'. 24A Pilato tu ya'a u bʌja' a Jesús bex a tio' u k'ato'. 25Y tu sipta' Barrabás, a mok toj chukʌ' tu' muj yui'k u t'ʌn u wesi a lay u kʌjta, y tu tu kinsa' winik, y tu k'uba a Jesús u bʌjʌ' bex tu k'ato'.
Jesús ka bʌja' ix cruz
(Mt. 27.32-44; Mr. 15.21-32; Jn. 19.17-27)
26Y tʌn u purko' a Jesús tu ku bin bʌja', ka u chuko' junturi' xi'ra u k'aba' Simón, ti' u tar ix Cirene, a ti' tʌn u sut y tʌn u ka' oko yok'o u kʌjtai, ij ts'abti' u kuchik a cruz y tʌn u bin tu pach Jesús.
27Jach pim tʌn u t'urik u pach a Jesús, bexi' ne pim ch'upra tʌn yok'o tu yaj u pixʌn yok'o a Jesús. 28Jesús ka tu sutaj u bʌj u pʌkte tu tiʌ a ch'uprao', y tu ya'tio':
—U ch'uprai u kʌjta Jerusalén, ma' wak'tikenex, ak'te a bʌje'x ti teche'x y ti' a ti'e'x. 29Ku bij k'uchu u k'ini ka bin a wa'ex: “Jach tsoy u yor a ch'upra a muj yʌnta u tia', y a ch'upra a muj ti'ʌnʌj, y a mok mix tu nʌj ts'a u chu'ch u tia'.” 30Y a lay a winik ku bij chu'mpʌ u yei'k ti' a wits': “¡Juben tin wok'o wits'!”, y jer a wits' ku bin u yao' ti': “¡Mukeno'!” 31Wo yete yax a che' ka metik bex ¿Mo bex ka bin a mete yete a tikin a che'?
32Bexi' u yet bin kato' a ku metik k'as ba', ti' u kinsa' ket yete Jesús. 33Kaj laj k'ucho' tuj pʌcha' u k'aba' u lu'mi u Bake Jo', bʌja' ix cruz a Jesús, y bexi' a ku metik k'as ba', junxet' tu xax te' tʌtʌjʌn y junxet' tu xax tʌjʌn. 34Jesús tu ya'ti':
«In Tetech, sa'se ti' u si'pi a mok a ku pa'ktiken! ¡A tio' mu' ye baij ku metiko'!»
Chen aj ba'kʌi tu yarʌk'to' u nok' a Jesús ti' u yirik mok ku bin u ch'ae. 35A winiko' tʌn u chʌntko' baiki ku meta', laj bexi' u ts'uri a u kʌjta ku p'astik a Jesús y ku yei'ko':
—Ku yʌntik u jer, ka u yʌnte u bʌj a beje', wo jach lʌji' a Cristo a tu tejta K'uj.
36Aj ba'kʌyo' bexi' tʌn u p'astik a Jesús, y ku ts'aba u yuk'ik ya'ri vinagre, 37y tu yao' ti':
—¡Wo u jach tech u Wesi judíos, take a bʌj!
38Ti' ts'ibʌ' t'ʌn tu jo' u cruz Jesús, ts'ibʌ' yete u t'ʌn griegas, latinas y hebreas: «A JE' A XI'RA LɅJI' U WESI JUDÍOS.»
39Junturi' a ku yakra ba' aj bʌja' yete Jesús, laj bexi' tʌn u p'astik a Jesús, tʌn u yei'k:
—Wa jach tech a Cristo, take a bʌj y laj bexi' tako' to'.
40Chen a juntu a xi'ra a ket bʌja' yete Jesús, tu ya'ti' u bojo':
—¿Maj sʌjtik K'uj? ¿Mo bexi' tʌn a muk'yaj tuka bo'tik u si'pi? 41A to'o, taj kʌk jach bo'tik ʌk si'pi tu tak meta ba', chen a je' xi'ra mʌnʌ' k'as ba' tu meta ti' u bo'tik u si'pi.
42Y pachi tu ya'a:
—Jesús, k'a'sen tuk'in ka kurakech taj wesi.
43Jesús tu nuka ti':
—Jach taj kin wei'k tech, beje' ti' ka bij k'uchu yete ten tu yʌn K'uj tu jach tsoy.
Kaj kimi a Jesús
(Mt. 27.45-56; Mr. 15.33-41; Jn. 19.28-30)
44Kaj k'uchi k'ak' chuk'in hasta ka tu tsarubʌ k'in, ch'ik tu woro u lu'm p'ati jach ts'uak'ʌ. 45Ak'ʌ'chʌ a k'in y jati toj tu chumuki u nok'i a t'inʌ' ix u yatoch K'uj. 46Jesús abotnʌj, ka tu ya'a:
—¡Tet, ix a k'ʌ' kin ts'ek a kʌnʌnte in pixʌn!
Kaj ts'o'k yei'k, lʌji' kaj kimi.
47U ts'uri ba'kʌi u winiko', ka tu yiraj ba' metchʌ, chu'mpʌ u yei'k jach tsoyech K'uj y tu ya'a:
—Jach a je' xi'ra mix k'ʌs yʌn u si'pi, mix ba' tu meta k'as.
48Tu woro aj taro' ti' u yiriko' u kinsa' Jesús, kaj ts'o'k laj bino' ix u yatoch. Kaj tu jʌts'a' u tsem. 49Chen a u k'o'mo' a Jesús, yete a ch'upra a taro' tu pach Jesús ch'ik u kʌjta Galilea, nʌch tio' u yiro' tu woro a je' a ba'.
U but'a u bʌk'e Jesús ix jabʌn tunich
(Mt. 27.57-61; Mr. 15.42-47; Jn. 19.38-42)
50Ti' yʌn junturi' xi'ra u k'aba' José, ti' u tar ix u Arimatea, u kʌjta u lu'mi a Judea, lʌji' junturi' u ts'uri u winiko' judío, jach tsoy u tuku y jach taj ku metik a ba'. 51A José, ku ch'uktik u tar u wesintik K'uj, A José mo' ket yor u ts'ek kinsa' a Jesús. 52Kaj bini tu yʌn Pilato, ti' u k'atik u bake Jesús. 53Kaj ts'o'k u yensik ix cruz, kaj u tap'a yete nok' a jach tsoy, Kaj bin u but'e ix u jabʌn tunich tu mʌnʌ' mok but'a. 54Xok'o u k'uchu u k'ini ku je'sik u bʌjo' a judíos#23.54 U k'ini ku je'sik u bʌjo' a judíos: A lʌji' u k'ini sábado a ku je'sik u bʌjo' a judíos ti' u t'ʌnko' K'uj., jach taki u chu'mpʌ
55A ch'upra taro' tu pach Jesús ch'ik u lu'mi Galilea, kaj bino' tuj but'a u bake Jesús, tu yiro' bik but'a u bʌk'e. 56Kaj suto' tu yatoch tu meto' a ba' a ne ki' u bok yete tsats xak'ʌ' yete aj ba' jabon a ki u bok, y tu je'sa u bʌj u k'ini a ku je'sik u bʌjo' a judíos. A bik ku yei'k tu ts'ibʌ' a tu li'sa u t'ʌn K'uj.
دیاریکراوەکانی ئێستا:
San Lucas 23: PLacNaha
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Sociedad Biblica de México AC