Yohani 4
4
E Yesu numwanachi umuSamariya
1AwaFalisi awivwa kuno Yesu wabatizyanga awantu wavule swinya nakuno walinji nawasambilizi wavule ukulusye Yohani. 2(Ukuwa kweni Yesu atatela abatizye umuntu nanti wenga; awasambilizi wakwe awano wabatizyanga.) 3Ala Yesu wivwa wowonye, afuma mwe Yudeya aya ku Galileya; 4pano wayanga ku Galileya wapisile mwe Samariya.
5Afika mukaya kamwe Samariya kano kitwanga Sikari, kutalinji akutali, ninsi yino Jekapu wapile umwanakwe e Jozefu. 6Ichifula chakwe Jekapu chalinji kokonye, nga ala Yesu watonta pamusinzo wakwe, ayikala pachifula. Ilanzi lyatezile kwela lyafika pamutwe.
7Umwanachi umu Samariya aya mukusemba aminzi, nga Yesu amulenga aminzi ati, Mpa aminzi ing'we, 8(Awasambilizi wakwe watezile wayile mukaya mukukala ichakulya.)
9Umwanachi amutolelela ati, Nga ungandenga aminzi yakung'wa wuli—vino we mu Yuda nani ne mu Samariya? (AwaYuda watanga walile muviya vino awaSamariya wakalila mwenemo.)
10Yesu amutolelela ati, Ukuwa ndi wamanya uwila wakwe Leza, nawino akukulenga aminzi, wanga wewenye umulenge akupe aminzi yawumi.
11Umwanachi ati, Tatakulu, ngavino usi nichakusembela nacho ichifula chazika. Nga aminzi yawuminye yayo ungayafumya-kwi? 12Etatakulu e Jekapu awino watupile ichifulanye choo; weliwenye, nawanakwe nivikwato vyakwe wang'wanga aminzi yamuchifulanye choo. Wuzye ukuti wakula walusya nu Jekapu-nye?
13Yesu atolelela ati, Wensi wino akung'wa aminzinye yaa alikalilwa nulusala swinya; 14ukuwa wensi wino wiza wang'wa aminzi yano niza namupa atalitela akalilwe nulusala swinya. Aminzi yano niza namupa yaliwamiminuka mwakwe weliwe yawe akantopwezi kaminzi yamupe uwumi wamuyayaya.
15Umwanachi ati, Tatakulu, simpa aminzinye yayo! Alyakuti ntize njize nkalilwe nulusala swinya, ndeke nukwiza semba aminzi koo.
16Yesu amunena ati, Yanga kite wakwako uyize koo.
17Umwanachi amutolelela ati, Insi nuwakwane. Nawe ati, Wasimichilanye
pano wati usi nuwakwako. 18Watwazilwe kuwonsi wasano, nawino uli nawenye kanonzi asi wewakwako. Achaleka chino wanena achakusimichila.
19Umwanachi ati, Tatakulu, nakulola kuno wemutumwa. 20Watatakulu awaSamariya wapepanga Leza pamwambanye woo, ukuwa mwenji mwe Wa Yuda mukutanji awantu wakana wapepa Leza mwe Yerusalemu.
21Yesu anena umwanachi ati, Mwanachi, awenche impindi iliyiza pano awantu wataliwapepa Tata pamwambanye woo nanti amwe Yerusalemunye. 22Ndamwemwenye mwe wa Samariya mutamanya nachino mukapepa; ukuwa swenji swe Wayuda twamanya wino tukapepa, amuno ikomolwa lyafumilila ku Wayuda. 23Ukuwa impindi ikwiza, yati yiza nukwiza, pano wakalumbula wakusimichila waliwapakata Tata mumizimu namukusimichila. Wanyewaa awali wakalumbula wane Tata akalonda wamupakata. 24Leza aMuzimu, wane wakumulumbula wale wamulumbula nimyezo yakusimichila.
25Umwanachi amunena ati, Namanya kuno e Mesaya wino we Klistu aliyiza. Pano wiza-wiza aliyiza atunene ivintu vyonsi.
26Yesu atolelela ati, Nenenye, nemuntu nkuvwanga nawe, neweliwe.
27Napaponapapo awasambilizi wakwe awanyoka; awazunguka nkaninye pano wazana akuvwanga numwanachi. Ukuwa wumwi atatela awuzye umwanachi ati, Nga ukulonda chani? Nanti akuwuzya Yesu ukuti, Ngamuno chani chino ukuvwanga numwanachinye wee?
28Umwanachi asya insembo yakwe aya kukaya, aya anena awantu wamukaya ati, 29Tuyani mukalole umuntu wino anenile vyonsi vino nkachita. Wuzye nche weyonye awino angalanga we Mesaya? 30Achaleka awafuma mukaya awaya kwe Yesu.
31Pampindinye yo yo awasambilizi walambilizyanga Yesu wakuti, Musambilizya, tela ulye akakulya kamwi!
32Ukuwa awatolelela ati, Indi nichakulya chino mutachimanyile.
33Achaleka awasambilizi awatalika ukuvwanzyania wonganye wakuti, Wuzye angatela wumwi amuletezile ichakulya?
34Yesu awanena ati, Nenji ichakulya chane, akutontela ukulonda kwakwe wino wantuma nukumalizya umulimo wuno wampile ukuti mbombe. 35Ngavino mukutanji, Kwasyala imyezi yini yatele amasika yiza. Nkuwanena nkuti, Silolani ivyalo; kanonzi ivizawalo vyacha nimpindi yakusezya yapalamila! 36Wino akusinza akapochelela ichilambu alonga ivizawalo vyawumi wamuyayaya; alyakuti wino akatanda nawino akasinza wize wazewele apaliponga. 37Akamulumbe kaa akakusimichila akakuti, Wumwi akatanda, nawe umuwuye asinza. 38Nawatuma mukusinza muchalo chino mutawomvile mwenemo; wanji awano wawomvile mwenemo, mwenji mwazana ichilambu mumulimo wawo.
39AwaSamariya wavulenye awamukaya kakonye awasuwila Yesu muno umwanachi wawanenile ati, Anenile vyonsinye vino nachita. 40Achaleka walile pano AwaSamariya waya kweweliwe awamulambilizya ukuti ayikale nawo; Yesu ayikala nawo amanda yawili.
41Nga nawanjinye awavule awamusuwila muno amazwi yakwe, 42awanena umwanachi awati, Kanonzi twasuwila, lelo asi amuno amazwi yako, ukuwa amuno sweswenye nalwitu twayivwila amazwi yakwe, twamanyichisya kuno nachawuzimanye we Katula wansi.
Yesu apozya umwana wankombe
43Ala Yesu walindamanda yawili, akatuka aya ku Galileya. 44Amuno e Yesu-nye nalwakwe watili, Umutumwa asichindikwa munsi yakwe. 45Ala pano wafika mu Galileya awantu wamwenemo awamupochelela, amuno pano wayile kuchakulya chakupitililwa mwe Yerusalemu waweni ivintu vino Yesu wachisile pampindi yachakulya chikulu.
46Achaleka Yesu anyochela kwe Kana wa mu Galileya, kuno wapiluzile aminzi ayawa we wayini. Kokonye kwalinji inkombe yimwi iyawuteko yino umwanakwe walwile mwe Kapemahumi. 47Awino walile wivwa kuno Yesu wayile mwe Galileya ukufuma mwe Yudeya, aya amulambilizya ukuti aye ku Kapemahumi akapozye umwanakwe, wino watezile wati awafwa. 48Yesu amunena ati, Pakwe mwemwe pasi wumwi wino angasuwila nkandi ndimwalola imilimo mikulu iyakuzungusya.
49Inkombe itolelela iti, Tatakulu, nazina tuyange tupite swensi tutize tuzane umwanane wafwa.
50Yesu amunena ati, Pitanga umwanako wandi apole!
Umuntu asuwila amazwi yano Yesu wamunenile awapita.
51Ala pane ali pamusinzo akupita awawomvi wakwe awamusunkania awamunena awati, Umwanako wandi apole!
52Nga awawuzichisya impindi yino umwanakwe watalisile ukupola, awamunena awati, Inzekema yamutayile iyolo pane ilanzi lyafuma pamutwe. 53Ngapano yisi ayizuka ati, ayili mpindinye yoyo yino Yesu wamunenezile ati, Umwanako wandi apole. Achaleka weliwe apaliponga nawachiwanza chakwe awasuwila.
54Wonye-woo amulimo wachitiwili uwukulu wuno Yesu wachisile pano wafuma mwe Yudeya waya mu Galileya
دیاریکراوەکانی ئێستا:
Yohani 4: WWN82
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Chinamwanga Bible © United Bible Societies, 1981.