LIKI 3
3
Waate bə kel kə Zaŋ Batisi
(Mat. 3.1-12; 14.3-4; Mar. 1.1-8; 6.17-18)
1Bə minti laate də Tiber Sezar, kumna bobloŋ, təpaŋ hor cuuru wiiɗiw a kumna nuutuŋaŋ, *Ponsə Pilati, kumna bə minti Sezar usnu, a kumnaŋa cəərə seŋka də Zudeŋa. Kumna bə Ziwifi *Erodi a kumnaŋa cəərə seŋka də Galileŋa, siinu Filipiŋ a kumnaŋa cəərə seŋka də Iture daana Tərakonitiŋa. Lisaniyasi a kumnaŋa cəərə seŋka də Abilena. 2Anə Annə də Kayifi a jəŋ *kaa kəmtəŋ gə kaa kə keere Pepeŋa. Haa dər ko bə minti Pepeŋ waataŋ kel nuutuŋ a Zaŋ, kormə Zakari giidə fulaŋ.
3Wə gəryəŋ seŋka də minti ku paaŋe bə Zurdeŋa wəra keɗe. Wə əsəŋ bə wəətiya minti: «Aŋ kolə kerkeŋ la a baymele nəətiŋ, aŋ jəə batem la, Pepeŋ vəəgi giidu yaŋ wəra cəərə baymele nəətiŋa.» 4Haa damdi minti Ezay, *hulum bə jogte ku mini kə Pepeŋ, a jeereŋ wəra dayday minti:
«Kaŋ bə əski dordə hulum kəmana bə naakte ku də səɓaki giidə fula minti:
‹Aŋ ɗampə kəkəy kə Barkaŋ la wəra;
aŋ kaw du la warna ɗeker-ɗeker!
5Bompoloŋ keɗe toste yaŋ wəra.
Pərkiŋ keɗe ce yaŋ wəra.
Kəkəy bə kuntə-kuntiŋ ɗekrete yaŋ wəra.
Kəkəy corom-coromiŋ tese yaŋ wəra.
6Kaŋ keɗe ase seere kə Pepeŋ yaŋ#3.6 Es. 40.3-5.›»
7Kaŋ ablaw vaŋ warda sar Zaŋ da minti wə jəə batem la a té. Wə wəətənəy minti: «Karmə akay! Hatnaŋ hel də minti aŋ daŋə la wəra ku waŋ kə Pep də minti bə bi daŋ haa mindi mo? 8Aŋ jəə la haa kar pəsaŋ bə ge dər kaŋ wəra minti aŋ koloŋ kerkeŋ ne wəra a baymele nəətiŋ gəəzi. Aŋ a ɗiki ku tarməyaŋa minti moomo dəŋ kəna *Abrahamaŋa, kel pa pədaŋ, paapa ana ba! Gud maa mo ten waataŋ minti Pepeŋ bə nakə-neke bə ji kaasaw də Abraham də karmə pərkiŋ laka. 9Kumuɗiŋ wəra máŋ bə ŋete kəbaŋ wəra a kəsar diŋa. Bədoona ana, kəbaŋ gə minti we diŋ paapa pəsaŋ baŋ keɗe, yə ŋitiy yaŋ wəra, yə vay yaŋ wəra dər cəwaŋa.»
10Kəya kaŋ ləənu ku minti: «Are jəə la haa naanaanə tə mo?» 11Wə hərnəy kel minti: «Hulum bə minti dəməəmə nuutuŋ jəŋ ne ɓasiŋ, wə ɓarsə la də hulum bə minti nuutu paapaŋ. Hulum bə minti də kar kə hame kəəsuŋ, wə jəə la bədoona gəm.»
12*Kaa kə tope lambaŋ bəŋ suru minti wə jəə batem la a té gəm. Yə ləənu ku minti: «Hulum bə hateŋ, are jəə la naanaanə mo?» 13Wə hərnəy kel minti: «Aŋ a mante kar kasi kaŋa dəŋaŋ gə minti yə a waatənaŋ minti aŋ mantə la bədoonaŋ ba.»
14Kəsootoŋ ləənu ku gəm minti: «Are gəm taŋ, are jəə la naanaanə mo?» Wə hərnəy kel minti: «Aŋ a tope soloy kə kaŋ a waŋ ba. Aŋ a ŋete kel bə tope soloy kə kaŋ bə gəm. Aŋ golə laŋa werke nəətiŋ təwa.»
15Kaŋ a bə mi bi də *Hulum bə minti Pepeŋ ŋəmnuŋ. Yə əsəŋ bə ɗiki ku tərməyi minti: «Zaŋ haa hulum tó ɗawmay mo?» 16Səma Zaŋ hərnəy kel keɗe minti: «Ten jəŋ batem də kan. Səma hulum bə dəŋan abay yaŋ bə bi da. Ten paapa bə nakə-neke bə bidi saama də kalmasi nuutuŋ wəra ba. Nuutuŋ, wə jəŋ batem yaŋ də Tiiru Cetcetaŋ daana də cəwaŋ gəm. 17Wə haa damdi hulum bə witi kaasaw ana, kəəyəw gə witi kaasaw kəəsu. Wə ve kaasaw giidə dorgoɗi nuutuŋa, səma wə ki koɗosiŋ wəra dər cəwa də minti noke bə hasiŋ.»
18Kəya, Zaŋ bə waate kaŋa minti yə kolə ɗiki di la, daana wə waataŋ *Kel pəsaŋ kəmarwaŋ a niini də hel daalaŋ-daalaŋ pa. 19Səma, Erodi, kumna bə Ziwifi bə Galileŋ, bə minti Zaŋ jəŋ gəbaŋ a nuunu cəərə kel gə minti wə a doŋ Erodiyadi, mar siinuŋ wəra guudu, daana cəərə kar gə minti wə jiitini bayməlaŋ keɗeŋ, 20wə jəŋ kel gaalaŋ gə deŋe kumsi pa bə minti wə gaŋ Zaŋ a daŋgayaŋ.
Batem kə Yeesuŋ
(Mat. 3.13-17; Mar. 1.9-11)
21Bə minti Zaŋ a kəm paapa a daŋgaya baŋ, wə jəŋ batem wəra a kaŋ keɗe, daana wə jəŋ a Yeesu gəm. Bə minti Yeesu bə tooseŋ, tarmə pepeŋ bəŋəŋ wəra. 22Tiiru Cetcetaŋ damdi abaaku ana sorkoŋ cuuru da faɗi. Kaŋ əskəŋ dordə Pepeŋ bə waate da apəy da minti: «Tam haa kormon, giidən bəlam ablaw. Waaleŋ don wəra anəkay haa guuduma.»
Kəmoomo də Yeesu
(Mat. 1.1-16)
23Laate də Yeesu kampar hor-hor soope bə minti wə ɗəlaŋ joŋre nuutuŋ. Kaŋ a ɗəkəŋ minti wə kormə Zosefi. Zosefi ha'aŋ kormə Heli. 24Heli kormə Matati. Matati kormə Levi. Levi kormə Melki. Melki kormə Janay. Janay kormə Zosefi. 25Zosefi kormə Matatiyasi. Matatiyasi kormə Amos. Amos kormə Nahum. Nahum kormə Esli. Esli kormə Nagay. 26Nagay kormə Maati. Maati kormə Matatiyasi. Matatiyasi kormə Semeyin. Semeyin kormə Yoseki. Yoseki kormə Yoda. 27Yoda kormə Yoyana. Yoyana kormə Resa. Resa kormə Zorobabel. Zorobabel kormə Salatiyel. Salatiyel kormə Neri. 28Neri kormə Melki. Melki kormə Adi. Adi kormə Kosam. Kosam kormə Elmadam. Elmadam kormə Er. 29Er kormə Zosuwe. Zosuwe kormə Eliyezer. Eliyezer kormə Yorim. Yorim kormə Matati. Matati kormə Levi. 30Levi kormə Simeyon. Simeyon kormə Zuda. Zuda kormə Zosefi. Zosefi kormə Jonam. Jonam kormə Eliyakim. 31Eliyakim kormə Meleya. Meleya kormə Menna. Menna kormə Matata. Matata kormə Naatan. Naatan kormə Davidi. 32Davidi kormə Zese. Zese kormə Obeti. Obeti kormə Boozi. Boozi kormə Sala. Sala kormə Naason. 33Naason kormə Aminadabi. Aminadabi kormə Adəmin. Adəmin kormə Arni. Arni kormə Esrom. Esrom kormə Faresi. Faresi kormə Zuda. 34Zuda kormə *Zakopi. Zakopi kormə *Izaki. Izaki kormə *Abraham. Abraham kormə Taara. Taara kormə Nakor. 35Nakor kormə Seruki. Seruki kormə Ragaw. Ragaw kormə Faleki. Faleki kormə Eber. Eber kormə Sala. 36Sala kormə Kaynam. Kaynam kormə Arfaksadi. Arfaksadi kormə Sem. Sem kormə Nowe. Nowe kormə Lameki. 37Lameki kormə Matusala. Matusala kormə Enoki. Enoki kormə Yaredi. Yaredi kormə Maleleyel. Maleleyel kormə Kaynam. 38Kaynam kormə Enosi. Enosi kormə Seti. Seti kormə Adam, daana Adam haa kormə Pepeŋ. – 3 4
دیاریکراوەکانی ئێستا:
LIKI 3: KERNT05
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Texte de la Bible: Kera © Alliance Biblique du Tchad, 2004.