LIKI 13
13
Aŋ kolə kerkeŋ la a baymele nəətiŋ
1Dər ko toŋa, kaa kəman a bəŋ sar Yeesu a wəətu kel cəərə kaanə Galile gə minti *Pilati əwnəy a ko bə minti yə bə keere Pepeŋaŋ. 2Kəya Yeesu hərnəy kel minti: «Aŋ ɗəkəŋ haa minti kaanə Galile teŋ meŋ ha'aŋ gud bə minti baymele neeteŋ dəŋaŋ kə kaanə Galile kaayaŋ keɗe mo? 3Ten waataŋ minti, paapa. Səma, aŋ koloŋ kerkeŋ a baymele nəətiŋ baŋ, aŋ bese yaŋ wəra keɗe bə té ana gəm. 4Bə minti kuli kimpili bə Siloweŋ awaŋ cəərə kaa hor ciiri azəgəniŋa ha'aŋ, aŋ ɗəkəŋ haa minti baymele neeteŋ dəŋaŋ kə kaanə Zeruzalem kaayaŋ keɗe mo? 5Ten waataŋ minti, paapa. Səma jəəne minti aŋ koloŋ kerkeŋ a baymele nəətiŋ baŋ, aŋ bese yaŋ wəra keɗe bə té ana gəm.»
Ku kumti cəərə kəbaŋ gə bay weŋa
6Kəya Yeesu wəətənəy *ku kumti minti: «Hulum kəman yaŋ də kəbaŋ nuutu gə garə-gere adəwaldə kəbaŋ kaayaŋa ada. Wə ɗeŋ a guluy minti yə waŋ ne mo? Wə fəlaŋ we di ada ba. 7Wə waataŋ hulum bə joŋre nuutuŋ minti: ‹Golə la, laate hebkəna soope minti ten bə pəəti a golde we də kəbaŋ teŋ gara, ten fəlnəy hõy gə waa-we ba. Ŋey la wəra! Yə he koŋ wəra boobo səm mo?› 8Səma hulum hərnu kel minti: ‹Bərdən, yəəkəy la kəm nuutu helna pa. Ten jukɗi tələŋkə yaŋ wəra ciiri ɓəki, ten ve kusi kə kaaraŋ yaŋ guudi. 9Ɗalba yə we yaŋ máŋ waŋka ɗawmay mo? Jəəne paapa paŋ, tam ŋey yaŋ máŋ wəra ta.›»
Yeesu seere həlgə dər hi bə faake kə Pepeŋa
10Hõy məna dər *hi bə faake kə Pepeŋa, Yeesu bə hate kaŋa giidə *kuli bə toose kə kaanə Ziwifiŋa. 11Kəya həlgə yaŋ ada, kəwal dagna wəra laate hor cuuru azəgən. A goɓoŋ wəra, a ɗempa hare wəra bə ɗekre pəda. 12Bə minti Yeesu asnaŋ, wə mantana daana wə waatəna minti: «Həlgəŋ, te bədəŋ ne wəra ku dege niitiŋa.» 13Kəya wə məlaŋ kəəsu sara. A ko toŋa ada faɗi a ɗekreŋ wəra, daana a əsəŋ bə tokɗe Pepeŋa. 14Səma kumna bə cəərə kuli bə toose kə kaanə Ziwifiŋ, giidu ɗəmnu ablaw cəərə kel gə minti Yeesu seereŋ həlgəŋ wəra dər hi bə faakeŋaŋ. Kumnaŋ waataŋ kaa kə ablaw minti: «Hiti yaŋ kənki bə minti aŋ ji joŋre duuruŋ. Aŋ kir bi da a seere kusrəŋ wəra haa də hiti toŋ, paapa dər hi bə faakeŋa ba.» 15Kəya Barkaŋ hərnu kel minti: «Aŋ kaa gə minti waate kel kəna də kuŋ təwaŋ! Dər hi bə faakeŋa ha'aŋ, mindi mo guudəŋa paapa bə foke kurki nuutu, ɗalba agerhẽ nuutu bə ɗe aya kan baŋ mo? 16Həlgə taŋ, a kaasaw də *Abrahama, *Sataŋ əntənə laate hor cuuru azəgən. A sə a bədə la wəra ku gəəli toŋa haa paapa dər hi bə faakeŋa bə mo?» 17Kel gə minti Yeesu wəətənəy bədoona anaŋ, yə doŋ kese wəra a kaa gə acukur duŋ keɗe. Səma kaa kə ablaw waalaŋ gud kel pəsaŋ gə minti wə jiini keɗeŋ.
Ku kumti cəərə dər kəbaŋ koncoŋ fenna'iŋa daana siipəŋ
(Mat. 13.31-33; Mar. 4.30-32)
18Kəya Yeesu minti: «*Kumna kə Pepeŋ bə ŋarə-ŋere də maa toŋ mo? Ten bə ŋəru la haa də maa toŋ mo? 19Wə bə ŋarə-ŋere haa bə dər kəbaŋ anə fenna gə daŋə-deŋe kumsi keɗe gə minti yə məntəy minti ‹mutardəŋ› ana. Hulum ɗeŋ a ju'uy giidə aka nuutuŋa. Kəya yə dəyaŋ wəra, yə koloŋ wəra kəbaŋ kəmtəŋ, kaskoŋ topoŋ kuli neeteŋ a kəəsiŋa.»
20Yeesu waataŋ pa minti: «Ten bə ŋarə Kumna kə Pepeŋ la haa də maa mo? 21Wə bə ŋarə-ŋere də siipə də minti həlgəŋ haara, a gaara dər kunti bə ŋaɓə-ŋeɓe pəriŋa ana. Siipəŋ fe kuntiŋ wəra apəya keɗe.»
Ku kuli feleŋleŋiŋ
(Mat. 7.13-14, 22-23; 25.10-12; 8.11-12)
22Yeesu bə gəryi giidə vila daana wəlasiŋa keɗe bə hate kaŋa a kəkəy bə ɗe Zeruzalem na.
23Hulum kəman ləənu ku minti: «Barkaŋ, kaa kə seereŋ haa anə məka mo?» Yeesu haraŋ kel a niini minti: 24«Aŋ ayə səɓaki la a kusrəŋ bə ve a ku kuli feleŋleŋiŋa. Ten waataŋ gəəzi minti: kaa ablaw bə golde yaŋ minti té ve ada, səma yə neke bə ve ada ba.
25Bə minti bərdə kuliŋ faŋ ne apəyaŋ, wə bə gisiŋ ku kuliŋ ne wəraŋ, aŋ bə jəŋ ne wəra tiilimaŋ, kəya aŋ isi yaŋ bə le ku kuliŋa bə waate minti: ‹Barkaŋ, bəŋə ku kuliŋ la wəra a are!› Wə haraŋ kel yaŋ minti: ‹Ko bə minti aŋ bəŋ da adaŋ paapa də dərən ba!› 26A ko toŋa kəya, aŋ isi yaŋ bə waate minti: ‹Áŋ hamaŋ, áŋ saŋ də kumsə áŋ keɗe. Tam hataŋ kaŋ a kəkəy bə giidə kuli naareŋa.› 27Səma wə hare yaŋ bə waataŋa pa minti: ‹Ko bə minti aŋ bəŋ da adaŋ paapa də dərən ba. Aŋ zee la warna sarən na, aŋ kaa kə jəəti baymeleŋ keɗe!› 28Dər ko toŋa aŋ hage yaŋ, aŋ herɗe kəsnəŋ yaŋ bə minti aŋ asaŋ *Abraham ne, də *Izaki, də *Zakopi, daana *kaa kə jogte ku mini kə Pepeŋ a *Kumna kə Pepeŋ naŋ, minti aŋ teŋ máŋ gə vaa-ve warna taakaw naŋ! 29Kəya kaa bi yaŋ a gud ko da daana a tiinə ko da, agal kə tamkaŋ da daana agal də goloŋ weeteŋ da, yə ɗe yaŋ a isi bə hame kəɗwəya a Kumna kə Pepeŋa.
30Bədoona, sərdə kaa gə minti wəra adoro hebkənaŋ, kole yaŋ wəra kaa gə ajew. Sərdə kaa gə minti hebkəna ajewaŋ, kole yaŋ wəra kaa gə adoro.»
Yeesu bele kaanə Zeruzalem ablaw
(Mat. 23.37-39)
31Də ko toŋ ha'aŋ, sərdə kaanə *Farisiyeŋ zeŋ sar Yeesu da, yə wəətunu minti: «Marya diŋ zee la, ɗee la warna, gud bə minti kumna bə Ziwifiŋ *Erodi golde bə awam wəra.» 32Yeesu hərnəy kel minti: «Aŋ ɗee la a waate bezernegi toŋ minti: ten bə sarme kəwala, ten bə seere kaa kə ɗemeŋa dayna, də dibiini. A hi bə soopeŋa, ten tewe ku joŋre nin yaŋ wəra. 33Doŋ kir minti ten raawə la də kəkəy nin dayna, dibiini, dibiini ayna gəm, gud bə minti kəkəy paapa minti *hulum bə jogte ku mini kə Pepeŋ me də warda a ko baalaŋ də ba, wə mee la Zeruzalema palpal ɗaw.
34O, aŋ kaanə Zeruzalem, aŋ kaanə Zeruzalem! Aŋ gə minti awte kaa kə jogte ku mini kə Pepeŋ wəraŋ, daana aŋ awte kaa gə minti Pepeŋ a faknaŋ dəŋ daŋ wəra də pərkiŋ! Ten də taynə taptaŋ cəərəŋ damdi dəbərgəŋ tapte cəərə karməyaŋ gud gəraŋ də ana kampa ablaw, səma aŋ bəlaŋ ba! 35Golə la, kuli nəətiŋ ji yaŋ wəra bə ŋoryə-ŋorye. Ten waataŋ, aŋ bə asan hõy pəda hãã də ko bə minti aŋ bə waate minti: ‹Pisiŋ jəə la cəərə hulum bə minti bə bi da a sam Barkaŋ daŋ#13.35 Ps. 118.26!›»
دیاریکراوەکانی ئێستا:
LIKI 13: KERNT05
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Texte de la Bible: Kera © Alliance Biblique du Tchad, 2004.