LIKI 11
11
Yeesu hate tooseŋ a kaa nuutuŋ
(Mat. 6.9-13; 7.7-11)
1Hõy məna Yeesu bə toose Pepeŋa a ko kəmana. Bə minti wə təwaŋ tooseŋ wəraŋ, hulum gud *kaa gə guuduŋa wəətunu minti: «Barkaŋ, hatə tooseŋ la a are, damdi Zaŋ a hətnu a kaa gə guuduŋ ana gəm.» 2Kəya, Yeesu wəətənəy minti: «Bə minti aŋ ɗəlaŋ ne bə tooseŋ, aŋ waatə la minti: Aba, kaŋ tokɗə səmam *cetcetiŋ la gud bə minti tam Pepeŋ. Bəəda a ji kumna nəmtiŋ cəərə are. 3Aytə hame bə minti are də tay du la a are dər hiŋa saksaki. 4Vəəgə giidim la wəra cəərə baymele naareŋa, gud maa mo are gəm, are vəəgti giidə are wəra cəərə kaa gə minti jəəti baymele sar areŋ gəm. A yaake are bə ve dər kel gə minti Nərtitiŋ ke ku kaŋ diiriŋ ba.»
5Yeesu wəətənəy pa minti: «Jəəne damdi hulum guudəŋa də dəəru, dəəru bəŋ ne girdu duugŋ leŋ a wəətu minti: ‹Daarənti, ayan gud so la kəm mo, 6gud bə minti daarən kəman a jəŋ bə gəryi da, wə tuukuŋ gerdəna. Karman bə hame paapa kaasəna bə əyu ba.› 7Jəəne minti wə wəətu aləw da anə lam minti: ‹A gəyan ba! Ku kuliŋ wəra bə gisə-gisi, are əstəŋ ne wəra lam-lam də karman. Ten nəkaŋ bə fe apəya bə ayam soŋ ba.› 8Bədoona, ten waataŋ minti bəŋa: wə bə fe apəya ha'aŋ paapa gud bə minti wə dəəruŋ ba. Wə fe apəya bə əyu kar gə minti wə də tay diŋ keɗe ha'aŋ, kas minti wə gəynu wəra də manteŋ.»
9«Səma ten waataŋ ha'aŋ minti: aŋ mantə la, yə ayaŋ yaŋ. Aŋ goldə la, aŋ fele yaŋ. Aŋ latə ku kuli la, yə bəŋəŋ dəŋ yaŋ wəra. 10Gud maa mo hulum bə minti mantaŋ neŋ, yə əyu. Hulum bə minti bə goldeŋ, wə fele. Hulum bə minti lətaŋ ku kuli neŋ, yə buŋu wəra a nuunu.
11Hulum jəəne guudəŋa bar kəmar koncoŋ, minti kurmuyu mantaŋ kəəsuŋa askaŋ, wə əyu yaŋ máŋ hənji mo, wə əyu paapa aska bə mo? 12Kumundu ba wə a mantaŋ kəəsuŋa kiciki, wə bə əyu máŋ turti mo? 13Jəəne minti aŋ kaa kə bayməlaŋ asaŋ aye bə kar pəsaŋ a karməyaŋ bə anə hãy ɗaw, máŋ bə Aba bə apəyaŋ mo? Wə aye Tiiru Cetcetaŋ a kaa gə minti manta kəəsuŋ dəŋaŋ aŋ gə minti aye kar pəsaŋ a karməyaŋ.»
Yeesu daana Belzebul
(Mat. 9.32-34; 12.22-30; Mar. 3.22-27)
14Kəya Yeesu bə sarme kəwal gə minti a koloŋ hulum wəra ba'-ba'iŋ. Bə minti kəwal pəŋ wəra cəərə huluma anəkay, hulum əsəŋ bə waate kela wəra faɗi. A ko toŋa kaŋ ŋələŋ ablaw. 15Səma, sərdə kaa aduubə di ada əsəŋ bə waate minti: «Əynu abay də sarme kəwal haa *Belzebul, kumna kə kəwal.»
16Sərdə kaŋ goldoŋ haa minti té law kəmpuru, yə əsəŋ bə wəətu minti wə jəə karman bə ge dər la minti səɓaki nuutuŋ bəŋ sar Pepeŋ da. 17Yeesu əsnəy ɗiki di wəra tə bə moŋ, wə wəətənəy minti: «Kaa gə minti giidə seŋka kə kumna bə mənaŋ, jəəne minti yə duuri kumsi té tokiŋ, kumna toŋ ji ba. Kaa gə minti ger kusri akera jəəne gə ɓarsə-ɓarse wəraŋ, kuli toŋ ɓalke yaŋ wəra. 18Jəəne minti *Sataŋ haraŋ bə duuri kusrəŋa tá tokiŋ, kumna naataŋ bə ɗe ajewa naanaanə mo? Aŋ bə waate minti aynan səɓaki də sarme kəwal wəraŋ haa Belzebul, naanaanə mo? 19A jəə la minti ten sarme kəwal wəra haa də səɓaki kə Belzebul, *kaa gə guudəŋ sərməy wəra haa də səɓaki kə mindi gəm tə mo? Yə kole yaŋ dəmaŋ də kusri kaa kə jəmaŋ kəəti dəŋ. 20Səma, jəəne minti ten sarme kəwal wəra haa də səɓaki kə Pepeŋ, teŋ gaŋ dərəŋ haa minti Pepeŋ wəra bə hame kumna nuutuŋa cəərəŋa ɗaw.
21Bə minti hulum bə səɓakiŋ əsəŋ ne wəra bə ganə-gene pisi bə gole cəərə kuli nuutuŋaŋ, kar nuutuŋ keɗe ji gə amə-ame pəsaŋ. 22Səma hulum bə səɓaki bə dəŋu ɗəlnu neŋ, wə pəŋ bulum ne cuuruŋ, kəya wə ɓiti kar kə duuri nuutu gə minti wə a məlaŋ ɗiki du ciiriŋ, bege bə minti wə ɓutnu a səɓakiŋ, wə ɓərsu wəra. 23Hulum bə minti jəəne paapa dəərən baŋ, wə acukur dəərən. Hulum bə minti kaynan bə tepe kaŋa baŋ, wə miiriy wəra haa meere ɗaw.»
Kəwal hare cəərə huluma
(Mat. 12.43-45)
24«Bə minti kəwal pəŋ ne wəra cəərə hulumaŋ, yə koore a ko keeŋeŋ na a golde ko bə minti té əsə la ada bə faake. Bə minti yə fəlaŋ ko bə faake baŋ, yə minti: ‹Ten hare giidə kuli nin bə minti ten a yəəkunu wardaŋ.› 25Yə hare kəyaŋ, yə ɗe a fele kuliŋ wəra bə harwə-harwe ke'-ke'i, daana bə ɗampə-ɗampe wəra pisi a kuɗuŋa. 26Kəya yə koore a humi kəwal gaalaŋ-gaalaŋ gə dəŋəy bayməlaŋ də ada seeɗa. Yə harə da də kumsi keɗe, bə bi a isi cəərə huluma. A ko toŋa kəyaŋ, hulum toŋ kole wəra baymele dəŋaŋ bə minti wə a jəŋ ajew.»
27Bə minti Yeesu bə waate kela bədoona anəkay, həlgə adəwaldə kaa gə ablawa haŋ dorda apəya koloŋ, a wəətunu minti: «Waaleŋ kə həlgə də minti haanam məənə dəm daana aynam gaw daŋ!» 28Səma Yeesu haraŋ kel minti: «Waaleŋ haa ɗaw kə kaa gə minti bə iski kel kə Pepeŋa daana duuniy neŋ!»
Kaŋ bele minti Yeesu jəə miɗi la a té
(Mat. 12.38-42)
29Bə minti kaa kə ablaw əsəŋ bə tepe sar Yeesuŋ, wə əsəŋ bə wəətiya minti: «Kaa kə dogoynaŋ, yə bayməlaŋ. Yə bele minti ten jəə karman bə ge dər la a té. Səma koo karman bə ge dər anə məna ten jəy di ba. Yə ase tó bə minti jəŋ sar Zonasi, *hulum bə jogte ku mini kə Pepeŋ təwa, ten jəy baalaŋ bə deŋe toŋ ba. 30Damdi Zonasi a jəŋ hulum bə ke dər kaanə Niniveŋ cəərə kela anaŋ, bədoona gəm *Kormə Hulúm ji yaŋ hulum bə ke dər kaa kə hebkənaŋ a kela gəm. 31Dər hi bə kəətiŋa ha'aŋ, kumna həlgə agal kə tamkaŋ daŋ, də minti a bəŋ ger *Salomoŋ bə bi a iski hel nuutu, fe yaŋ apəy da bə de kaa kə dogoynaŋa də kəəti. Gud maa mo a bəŋ warda tooto agev də seŋkaŋ da. Səma kel gə daŋə-deŋe Salomoŋ yaŋ kəna! 32Dər hi bə kəətiŋa, kaanə Niniveŋ piti yaŋ apəy da bə de kaa kə dogoynaŋ də kəəti. Gud maa mo kaanə Niniveŋ koloŋ kirki a baymele neeteŋ a ko bə minti Zonasi wəətənəy kel ha'aŋ. Səma, kel gə daŋə-deŋe Zonasiŋ yaŋ kəna.»
Dér haa pəɗaki bə kusrə áŋ
(Mat. 5.15; 6.22-23; Mar. 4.21; Liki 8.16)
33«Hulum do'oŋ lampa neŋ, haa paapa bə mala a ko bə metə-mete ba. Wə mala wəra apəya a ko bə maltaŋa minti kaa gə minti vaŋ də neŋ, yə asə pəɗakiŋ la. 34Dərəm ha'aŋ akas lampa kə kusruma ana. Jəəne minti dərəm wəra holoŋ, kusrum wəra keɗe dər pəɗakiŋa gəm. Səma jəəne minti dərəm paapa holoŋ baŋ, kusrum wəra keɗe dər tilməŋa. 35Golə kusrum la pisi kir minti pəɗaki bə səram a kole wəra tilmə ba. 36Jəəne minti kusrum wəra keɗe dər pəɗakiŋaŋ, minti surdu paapa dər tilməŋa baŋ, wə ji yaŋ wəra pəɗaki keɗe, damdi lampaŋ wele koŋ wəra cəərəma də pəɗaki naataŋ ana.»
Yeesu ji gəbaŋ a kaanə Farisiyeŋ də kaa kə hate ku giliŋ
(Mat. 23.4-36)
37Bə minti Yeesu təwaŋ kel kə waateŋ wəra anəkay, hulum bə *Farisiyeŋ məntunu bə ɗe a hame girdu. Kəya Yeesu ɗeŋ girdu, wə kəlaŋ aləwa, wə əsəŋ cin bə hame. 38Hulum bə Farisiyeŋ ŋələŋ gud bə minti Yeesu əsəŋ bə hame soŋa kəəsu bay baade. 39Kəya Barkaŋ wəətunu minti: «Golə la, aŋ kaanə Farisiyeŋ, aŋ baade nəətiŋ haa kerkə kəəyəw gə se kan də gə hame soŋ təwa, anaaŋa giidiŋ wəra gə ɗostə-ɗoste də ɗiki bə dəgaayaŋ daana də kel kə bayməlaŋ. 40Aŋ kaa kə bay ɗiki kel! Pep bə minti jəŋ kerkə kar, wə jəŋ giidiŋ paapa tó bə səm mo? 41Aŋ ayə la haa ɗaw kar gə giidə kəəyəw nəəti gə hame soŋ də gə se kan a kaa kə caacaŋ. Kəya, kar keɗe kole yaŋ wəra *cetceti nəəti.
42Səma gəəliŋ cəərəŋa, aŋ kaanə Farisiyeŋ! Gud bə minti aŋ ayte agal hora də anə agumgum, awerwereŋ daana kosnə kəsaw kaayaŋ keɗe a Pepeŋ, anaaŋa ji bə kel ɗekeriŋ də bele bə Pepeŋ, cəərəŋ jəŋ a teŋa ba. A haa kar gə minti aŋ a sə a jəy, səma aŋ a yaake kel kaayaŋ wəra bay ji bə gəm. 43Gəəliŋ cəərəŋa, aŋ kaanə Farisiyeŋ! Gud bə minti, bə minti aŋ giidə *kuli bə toose kə kaanə Ziwifiŋaŋ, aŋ golde haa ko bə isti bə minti aŋ ji yaŋ wəra kəkər lakiŋ. Aŋ golde haa minti kaŋ mirkiŋ la wəra anə pasyak-pasyaki a ko bə anə alumaŋa. 44Gəəliŋ cəərəŋa! Gud bə minti aŋ damdi teɗker də daasə-daase də minti kaŋ ɗe karta bay asaŋ ana.»
45Hulum məna gud *kaa kə hate ku gili kə Pepeŋa wəətunu minti: «Hulum bə hateŋ, tam waate bədoona ha'aŋ, tam sarte haa are gəm!» 46Yeesu haraŋ kel minti: «Gəəliŋ cəərəŋa gəm, aŋ kaa kə hate ku gili kə Pepeŋ! Aŋ malte kar kə eele gə bay tekeŋ cəərə kaŋa. Aŋ də kusrəŋ, aŋ paapa bə kəyəya də kaasaŋ bə təkəy kar teŋa ciiri ba. 47Gəəliŋ cəərəŋa! Gud bə minti aŋ hərsiti teɗker pəsaŋ cəərə *kaa kə jogte ku mini kə Pepeŋa, anaaŋa kamnaŋ a əwtənəy wəra haa teŋ! 48Kel gə minti aŋ jəy hebkənaŋ, yə ge dər kaŋ wəra minti aŋ doŋ haa də joŋre kə kamnaŋ. Yə awtaŋ kaa kə jogte ku mini kə Pepeŋ wəra, aŋ də kusrəŋ, aŋ bə hərsiti teɗker neeteŋa! 49Gud teŋa, Pepeŋ də hel nuutuŋ waataŋ wəra minti: ‹Ten vay kaa kə jogte ku mini nin yaŋ na də *kaa kə vaa-veŋ gəm. Yə awe sirdiŋ yaŋ wəra daana yə lese sirdiŋ yaŋ.› 50Gud teŋa, Pepeŋ mante kor də kaa kə jogte ku mini nuutu bə minti ãyaŋ warda hãã a mele bə gud seŋkaŋ daŋ keɗe, kasi kaa kə hebkənaŋa. 51Wə mele guudu da də titi də Abel hãã wəra də titi də Zakari bə minti yə əwnu aduubə də *ko bə jəəti keere a Pepeŋa də *Kuli kə Pepeŋ. Bədoona ana ten waataŋ: yə məntəy kel di yaŋ kasi kaa gə hebkənaŋa. 52Gəəliŋ cəərəŋa, aŋ kaa kə hate ku gili kə Pepeŋ! Aŋ haŋ karman bə biŋi ku kuli bə aseŋ wəra kaasəŋa. Aŋ də kusrəŋ, aŋ vaŋ ada ba, səma kaa gə minti teŋ bele ve adaŋ, aŋ həənəy kuy wəra bay ve.»
53Bə minti Yeesu kəlaŋ warda anəkay, kaa kə hate ku gili kə Pepeŋ də kaanə Farisiyeŋ həənu bəlam du də kel daana ləənu ku də kel gaalaŋ ablaw. 54Kəya yə əsəŋ bə ziidu ku minti ku raawe kel kə laŋə-leŋe yaŋ ɗawmay mo minti té daw la diiriŋ.
دیاریکراوەکانی ئێستا:
LIKI 11: KERNT05
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Texte de la Bible: Kera © Alliance Biblique du Tchad, 2004.