Luk 12
12
Jeju ndoo deg kad oon go rod maj dɔ ngéndokumdegt
(Oo Mat 6:12; 10:16-39)
1Kam ndɔgt'n non, lon koosɨdeg kawɨn na kɨ nat mbã ɗa ɓan na ye, Jeju mba girr kel ngéndoog lon an: Nyakɨdasa bang la ten: Oon go rosɨ dɔ berrkasɨt lo Parisɨg ad i ndo'n ndonkum deg. 2Kɨtɔ nya mad kɨ kut dɔ kɨ a unɨn nyadɔt al goto. Ke nya mad kiyadɔ kɨ de a ger al goto. 3Kɨtɔ nya kɨɗen'n elɨn kam tilt ye, a oon dɔ kam kunjt, nyag'n i elɨn kɨ mbi degt gɨlelot, a lan mbera dɔ kujgt dõ.
Maj kad de ɓool Luwah
(Oo Mat 10:28-31)
4Ĩn namg, m'ndɨ m'elsɨ ot ɓoolɨn ĩgɨn ndɨ tɔlɨn dãro de, na gog got asɨn ɗa nya mad kɨ tɔi al. 5Na m'a m'ɔjsɨ ĩn hã sumba kad i ɓoolɨna; i ɓoolɨn Luwah'n a tɔl de, kamla aw kɨ tɔg kad laa kam Jahanamat, ã m'elsɨ ĩla i ɓoolɨna ye. 6A ɗawɨn tĩtĩg mi kɨ gursɨ joo ale? Na kɨkɨɗa kudt kaa kam Luwah a oi dɔa al. 7Na mbã kɨ bisɨ dɔsɨ tube dan kɔrrd. Ot ɓoolɨn, i tɔin tĩtĩg ngãibe.
Maj kad ngéndoog lo Jeju tɔn tad nõ degt man ne naj
(Oo Mat 10:32-33; 12:32; 10:19-20)
8M'ndɨ m'elsɨ tɔ, dekɨɗen'n ndɨ elta lom nõ degt a ne, Ngon de tɔ a elta loa nõ malaikagt lo Luwah, 9na de'n maj ta gerɨm nõ degt a ne, Ngon de tɔ a maj ta gera nõ malaikagt lo Luwah ho. 10Dekɨɗen kɨ a elta kɨ ndoor Ngon de tɔ a ne, Luwah a nyàgo majalg loa; na ĩn ndɨ elta kɨmal dɔ Ndil kɨkunjɗangt a ne, a nyan go majalg loa kɔ al bat. 11Na lon awɨn sesɨ kad gangɨn ta dɔsɨt kam kuj kawnat lo Juipg kɨ nõ ngékõɓegt, kɨ ngétɔgg a ne, ot soolɨn dɔ tat ke titbãi a kɔrrɨn ne ta dɔsɨt, ke dɔ tat kɨ a kelɨn. 12Kɨtɔ dɔ kaglot'n non la Ndil Kɨkunjɗang a ndoosɨ ta'n sumba kad elɨn. 13De mad un ndin kɨ dõ de'n koosɨgt elɨn Jeju an: Ngendoo deg el ngonkom ad kegɨm nyandubat. 14Na Jeju el an: Dekɨdɨngã, nõ ndam ngegangtat losɨ ke ngekegnya kusɨt a? 15Kamla eld an: I ngomɨn rosɨ maj dɔ kumndà; kɨta ke neni nyamajg lo de ton mbuj kaa ne, a ndɨ kɨ dɔn dõ kɨta nyag'n ton jiat al.
16El terrta mad an: Dɔning lo de mad kɨ ngenya taa tee kɨ kand nya ngãi, 17la ɔj ta kamɨnt an: Ka m'ɗa ɗi? Kɨtɔ m'oo lon m'a m'kaw nyandɔɔ lom kɨ tit al.
18El an: Nya'n m'a m'ɗa la ten; m'a m'boti damg lom, na m'a m'ɗa kɨɗangg kɨbotɔi; nõbe la m'a m'ũ nyako lom kɨ nyamajg lom tube tit ye.
19Kamla m'a m'el rom m'an: Ĩ rom, i ndɨ kɨ nya majg ngãi kɨ nda kɨta ɓalg ngãibe, i taakò, i sa, ãi, i su.
20Na Luwah ela an: Ĩ ɓood de, ndɔ la 'nten a sahn roi roit gog. Nyag'n i mbõ kɨnat ye, i kɨta nõ a?
21Titbe tɔ la de'n mbõ nyamajg kɨ nat kɨta ron a ne, i ngenya ro Luwaht al.
Maj kad de ɓa kul Luwah
(Oo Mat 6:19-34)
22Kamla Jeju el ngéndoog lon an: Kɨtɔ 'nten m'ndɨ m'elsɨn: Ot soolɨn kɨta rosɨ dɔ nyat'n a san, ke kɨta dãrosɨ dɔ nyat'n a lan rosɨt tɔ. 23Kɨtɔ ro de tɔi nyasa, dãro tɔ tɔi kubg. 24I nɔlɨn kagãg kɔri kɔri, duwɨn nyako al ho, jan nyako al ho, lo ndah nyako lod goto ho, dam lod goto tɔ, na Luwah la ndɨ uld ye. I tɔin yelg nja bãi a? 25Nõ kusɨt asɨ la kil ji kɨɗa dɔ ndɔgt kad ngalɨn kɨta sool lon a? 26Kɨtɔ 'nten ĩla i asɨ ɗa nya kɨ du kɨtitbe al a ne, kɨtɔɗi i ndɨ soolɨn ne dɔ ndeg nyagt a? 27I nɔlɨn Hutkamg kɔri kɔri, titbãi ɗa tɔgɨn ne, ɓewɨn kɨla kub al, joo'n kub al tɔ; na m'ndɨ m'elsɨ, ke Salomõ kam nyamajgt loa tube kaa la kub kɨmaj tit kɨkɨɗa kudt al. 28Luwah la ndɨ pare ro mũ kɨ kam mut titbe ye. Mũ'n non ɗa kari ɓone, na loti a lana kam horrt. Yela, ĩn deg tã Luwah a oo gosɨ kɨ kub ale? Kadkam losɨ i tẽbe. 29Na ĩn, ot sahn nya'n a i san ke nya'n a kãin, ot kadɨn kamsɨ dasɨ ta paa. 30Kɨtɔ nyag'n non deg kɨ dɔningt ndɨ sahn; na Bɔwsɨ ger i ndɨ gen nyag'n non ho. 31Na i sahn kõɓe loa, na nyag'n non tube tɔ a adsɨn kɨ dɔt.
Nyandoo lo Jeju dɔ nyamajgt kɨ kam dɔrãt dõ
(Oo Mat 6:19-21)
32Ĩn ɓut kɨ tẽbe ot ɓoolɨn kɨta nel Bɔwsɨ dum kɨ n'adsɨ kõɓe. 33I ndugon nyag losɨ kɔ adɨn nara ngéndog kadkarit. Urɨn ngong narg kɨtɔsɨ kɨ a tel kɔkɨ al bat. I mbõn nyamajg kɨ kam dɔrãt dõ, a tujɨn al, ɓoogg a teen kadt al, kɨɗukɨs a tujɨnd nu al tɔ. 34Kɨtɔ lon nyamajg losɨ ĩn tit a ne, lon non la kamsɨ a i dɔt ye.
Maj kad ɓerg lo Bɨraɓe ndɨn dɔgt
35I ndɨn kɨ ɓosɨ kɨ dɔ kɨta ɗa kɨla, na adɨn lambag losɨ ndɨn kɨ horr kɨ ndɔgbe. 36Kɨ ĩn tit ɓerkɨlag kɨ ndɨ ngoon tel bɨraɓe lod lo mburr namt keɗengẽ kad 'nten ta ɗob adɨna lon gan tabit. 37Ngéronel la ĩn ɓerg'n non, ĩgɨn hã Bɨraɓe lod tel ɗe a ne, a ngahd ndɨn dɔgt. Rota la m'ndɨ m'elsɨ ye, ĩ kɨɓe kɨ dɔn a dɔ ɓon, na a ndad ta nyasat, a aw rodt, na a oo god kɨ nyasa. 38Ke ɗe danlot ke kɨ kàd kɨ tɔi, ĩla ngah ɓerg lon ndɨn dɔgt a ne, ɓerg'n non a ĩn ngéronel. 39Na kɨ i gerɨn nya 'nten maj; ĩla ngeɓe ger dɔkàd lon ngeɓoog a ɗet a ne, ni a ndɨ dɔgt, na a nya ad mbutɨn kuj loa al. 40Ĩn tɔ i ɗan go rosɨ, kɨta Ngon de a ɗe dɔ kaglot'n a i ndan kamsɨ dɔt al.
Ta lo ɓer kɨ ngeɗanya kɨro kɨ ɓer kɨ ngeɗa nya kɨro al
(Oo Mat 24:45-51)
41Pierr el an: Bɨraɓe terrta 'nten ye, jĩ la i ndɨ elj yo? Ke deg tube a? 42Bɨraɓe el an: Nõ i ngɔrɔkɨla kɨro kɨ ngekumtɔg a? I ɓer'n ngea ndaa dɔ ngangt kɨ ɓe lon, kad kɨ ad'd nyasa dɔkàdat. 43Na lon ngea ɗe ngaha ndɨ ɗa titbe ye, ɓer'n non i ɓer kɨ ngeronel. 44Rota la m'ndɨ m'elsɨ ye, a ndaa dɔ nyagt lon tube. 45Na ĩla ɓer'n non el kamɨnt an: Ngeem a tel ɗe Kanag al, na mba girr tɨnda namɨng kɨdɨngãg kɨ kɨdẽg, sanya ho, ãi ho ad kasɨ ɗaa tɔ a ne, 46ngeɓer'n non a ɗe dɔkàdt'n nda kamɨn dɔt al, kɨ dɔkàd'n ger al tɔ, a gangta dɔat, a laa lot lo ngékadkamd Luwah al. 47Ɓer'n ger nya kɨ ngeen ndig kad ɗa, na ɗa nya'n non al, ɗago ndigt lo ngeen al tɔ a ne, a ndana ngãi. 48Na ɓer'n ger nya kɨ ngeen ndig al, na ɗa nyag kɨmajal asɨ ta nda ngãi a ne, ndana ngãi. Na de'n adɨna nya ngãi a ndɨjena ngãi tɔ, na de'n lan jiat ngãi tɔ a ne, a ndɨjena kɨ tɔi tɔ ho.
Jeju ɗe nda lapia dan degt al, na ndoorna tã
49M'ɗe kɨta la horr dɔ degt kɨ dɔningt; na m'ndig jeje kad horr'n non kɨ õ woi. 50Na baptem mad to nõ kari na kɨ m'ɗa baptem'n non. Kam ndɨ ɔsɨm ngãibe mbã kad m'tɨga'n. 51Ot koo Kana: m'ɗe kɨtakad lapia to dan degt kɨ dɔningt ne. M'ɗe kɨ gang na tã. 52Kɨtɔ labekɨnõt, deg mi kam kujt kɨkɨɗat a ĩn kɨ gang na, kɨmita a ndoorɨn kɨjoo, kɨjoo a ndoorɨn kɨmita. 53A gangɨn na, bɔw a ndoor ngonɨn kɨdɨngã, ngon kɨdɨngã a ndoor bɔwɨn; kõ ngon a ndoor ngonɨn kɨdẽ, ngon kɨdẽ a ndoor kon; mum kɨdẽ a ndoor mumɨn; ĩ tɔ a ndoor mumɨn.
Jeju ndáng deg'n gerɨn go kaglo'n non al
(Oo Mat 16:2-3)
54Jeju el koosɨdeg an: Lon kilndii mad bãi ko lo kudkàdt a ne, tentenbe i ndɨ anan: Ndii ndɨ ɗe; ɗaa titbe tɔ. 55Lon oon nel ndii la kɨ dɔɔ a ne, i ndɨ anan: Lo a tɨnga ngãi; ɗaan titbe tɔ. 56Ĩn ngéndokumdeg i gerɨn kɔj takum dɔning kɨ dɔrã; na titbãi i gerɨn ne kɔj kaglo 'nten al a?
Maj kad de sah ɗob tee ji mad kɔlɨnt lon i ne ɗobo ɓaitɔ
(Oo Mat 5:25-26)
57Kɨtɔɗi ĩn kɨɓeg kɨdɔsɨ i gangɨn ta nya ĩn i goɗobat al a? 58Lon i ndɨ awɨn kɨmadkɔli kɨro ngegangtat ɓaitɔ a ne, i ɗa tootbe kad i la nooj nat sia dɔ ɗobt, na ɓet a ɔrri aw sei ro ngegangtat, ngegangta tɔ a lai ji asɨgart, na asɨgar tɔ a taa lai dangait. 59Rota la m'ndɨ m'elsɨ ye, a i teet al bat, na a i ba ndɔ mbã kɨ dɔboi sile.
دیاریکراوەکانی ئێستا:
Luk 12: MlL
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Mbai Bible Revision © Bible Society of Chad, 2015.