LUKA 23
23
1Mamwingi fulya fukeri-ho fose fukakure fukamduo kulya ko Pontio Pilato. 2Wakawoka imkumba wakahamba, “Ichu nyi lulembona chando aihaluo-haluo wandu wa oshari lodu na iwaima ke, walataaye Kaisari okamba, kakuhamba inyi Kristo nyi mangi.” 3Pilato kambesa, kahamba, “Iyo nyi mangi ya Wayuda?” Nao kamhaluo kahamba, “Na chando owehamba.” 4Pilato kawia wakohanyi na mamwingi fulya fo wandu, “Ko mndu-chu njiwonyi-pfo kyemwanduya-nyi.” 5Kyaindi wo wakaengeṟa mnu iitikya-itikya wakahamba ke nyi ekewa mopfuluo-pfuluo wandu kelosha kadung'atsa kunu Yudaya kose awookie kulya Galilaya itane ashika iya.
Yesu adao ko Herode
6Pilato kekiicho ishi kawesa kokooya nyi mndu o Galilaya. 7Kekimanya ke nyi asumhanyie wuchilinyi wo Herode, kamdika kulya ko Herode, kyamba na mandi halya Herode nyi kulya Yerusalemu awecheiye napfo. 8Herode kekiwona Yesu, kachihio mnu; kipfa nyi awelangie imbona wokia shiheri sha haleshe, kipfa nyi awemiicho mbonyi tsake tsifoi kahamba kulako nyi echiwona kindo kiṟihishie kiwuto nyio. 9Kambesa shifoi, indi nalahaluo ma idedo limu. 10Na wakohanyi walya wang'anyi na walanyi wa shitapu wakahoṟoka-ho, wakamkumba kui wuitiki. 11Herode na wasoṟo wake wakamuisalucha na imwinyila, wakamṟika nguwo ikengemae, kambihiṟia Pilato. 12Mfiri fulya tichi Pilato wakawada mbuya na Herode, kipfa ili kuwooka nyi wawesuanyi.
Yesu aanduyo ipfa
(Mat 27:15-26; Mar 15:6-15; Yoh 18:39–19:16)
13Pilato kalaha wakohanyi wanene na handu hamu wameeku wa njoshari, na wandu wose. 14Kawawia, “Nyi monjiendei mnduchu cha nyi ai mndu moweṟuo-weṟuo wandu, indi ambuyenyi, ili njilededa mondu foke muweho mkaicho, inyi njilewona owingo lo mbonyi-tso mocha imkumba natsopfo. 15Manya Herode na wudo; kipfa ili ambihiṟa na kunu kodu. Kyasia, kuwode kisumhanyie opfu kii iwute nyiopfo. 16Kyasia, nyi njechimkapa kya kisamo njimlekie.” [ 17Indi nyi kuwe-pfo kido kewapfunguya mpfungo umu ili mkonu mnene fo Pasaka.] 18Wandu wose dang'a wakafahia wakahamba, “Ichu mduo, nolupfunguye Baraba.” 19Na Baraba-chu nyi awemshingie mba ya wapfunguo kipfa kya wuṟiingi wuweamkie kulya mṟinyi na wuwaahi. 20Pilato kawuya ideda nawo wose lya kawi, kipfa nyi awekundi ipfunguo Yesu. 21Nawo wakakaṟuo wakahamba, “Mbambye msalabenyi, mbambye msalabenyi!” 22Nao Pilato kawawia lya kaṟaṟu, “A nyi kiwicho kida awutie lanye? Inyi njiwonyi kido limsumhanyie opfupfo. Kyasia, nyi njechimkapa, numa njimlekie.”
23Kyaindi wakamrohia mnu wakundi nawambio msalabenyi. Na kifahio kilya kyawo, sanza na kya wakohanyi kikarohia. 24Pilato kadumbuo ke kihendeke chando wakundi. 25Kawapfunguya ulya awembike kipfungonyi kipfa kya wusutsu wo wuwahi; nyio walemkunda; na Yesu kamdambika wawute nao chando wakukundia.
Yesu awambyo msalabenyi
(Mat 27:32-44; Mar 15:21-32; Yoh 19:17-27)
26Kiheri wawemrie, wakakumbuhanana na mndu ewuka mdeminyi foke, ewio nyi Simon o kulya Kirene, wakamdika msalaba fulya foke nafuduo oo numa yake. 27Kyasia mamwingi fo wandu wafoi fukamiwata numa na fo waka wechifuha na imkapia shilio. 28Na Yesu kawaindukia kahamba, “Nyo waka wa kunu Yerusalemu, ma mlanjililie inyi, indi lienyi kyanu muwenyi na kya wana wanu! 29Cha kipfa ambuyenyi, nyi kochikaa kushike mafiri wahambe, nanga iwo wahumba, na wusu-wo wulalefee na mawee-ho halelemeonze! 30 Nlyondo wechiwooka iwia mafumwu, keluhoyenyi, na shitoṟomoso, kelushikienyi. 31Kipfa kokooya wawutia wadi ikidi iwishi, aka ili yumu nyi lyekaa liwiko lida?” 32Kukawedao-pfo na wandu wawi wewuta mawicho, kundu wawoho wasanzo nao. 33Nawo wekishika handu ha-halahe nyi handu ha mbuonyi, wakambambya msalabenyi hamu na wanyamaṟi walya, umu ora lo kulyo, na ungi ora lo kumoso. 34 Na Yesu kahamba, “Hoi Wande uwahooṟie, kipfa iki waiwuta wakiichipfo.” Na nguwo tsilya tsake wakatsihawa wechikapa natso kuṟu kuhya. 35 Na wandu wakahoṟoka-ho wechiambuya. Na waitoṟi walya wakamtaluo wakahamba, “Chi alekiṟa wengi, nakekukiṟa-ng'u amonyi kokooya nyio Kristo amsambuṟe nyi Ruwa!” 36 Na wudo na wasikari walya wakawemtaluo-taluo na imchungia-chungia na imwendie mṟinga futarang'ae. 37Wakahamba, “Kokoya iyo nyi ui mangi ya Wayuda, kekukireng'u kumonyi!” 38Na alya msalabehu huye yake nyi kuweeho mṟeho fumṟehie Kigriki na Kiroma na Kiebri, Mangi ya Wayuda nyi ichu. 39Wanyamaṟi walya wawewamase kimu nao, ulya umu-ho kawemtaluo kahamba, “Iyo chi iyo Kristo? Kukiṟeng'u kumonyi naso-wo!” 40Kyaindi ulya odoe kahaluo kamdedia kahamba, “A iyo okiowuo-se Ruwa ili ukeri iya owingonyi ilu? 41So nyi lukeri-ho kya sungusihu, kipfa nyi luiambia kilya kisumhanyie mawuto hadu; kyaindi ichu awode kindo awutie kya wukika manya-lepfo.” 42Kawuya kawia Yesu, “Kewekunjitamuye-wo hoi na hoi Mndumii, ili ochishika ikuidia ipfo wumanginyi wopfo!” 43Nao kambia, “Nkya lohi ngakuwia, Na inu tichi ochiwona kui na inyi kulya Paradiso.”
Yesu apfa
(Mat 27:45-56; Mar 15:33-41; Yoh 19:28-30)
44 Kyasia ili kuweshikie kufui sa ya kaṟandaṟu, kukaho meema puti kulya orukenyi kose mtano saa ya kenda. 45Mnengeṟi fulaloṟe ngeela yafo, isulia lilya lyeshingia hando haele ipfo hekalunyi likarandukia oo makiidi hawi likalekana. 46 Na Yesu kalesha ṟu na pfinya kahamba, “Hoi Wande, ngadambika mumuyo foko ipfo mawokonyi hapfo.” Amaa ihamba ado kalekia moo. 47Kyaindi mchili ulya o wasikari kekiwona shilya shewutika, kaidapfuma Ruwa, kahamba, “Na lohi, mndu-chu na awei mcha asumuhanyi!” 48Na mamwingi fulya fuwekuwumbie-ho yambuya shido-sho, wekiwona shilya shilewutika, wakawuya na kanyi wechikapa-kapa shipeeta. 49 Na wandu walya waweichianyi nao wose, na waka walya wawemitung'atye wookia Galilaya, nyi waweehoṟoki aleshe wechiamabuya shindo-shi.
Yesu aṟiko
(Mat 27:57-61; Mar 15:42-47; Yoh 19:38-42)
50Nlyondo kulekuloṟaho mndu ang'anyi, rina lyake nyi Yosefu o mṟi fo Wayuda foilaho Arimatia, nao nyiwe mndu mcha o wusumhanyi. 51Ichu awekuwode na chila yawo ma mawuto hawopfo; nao nyi aweiwedia wumangi wo Ruwa. 52Ichu kahenda kulya ko Pilato, kamterewa mnying'a fulya fo Yesu. 53Kahenda-fusota-ho, kafuoṟowia nguwo tsa owiṟo, kafuṟika opangenyi luwei lusume kundu ko ihonyi, sa lulawemerike mndu. 54Nafo nyiwe-mkonu fosaya Sabato, kuile kuamkenyi Sabato. 55Kyaindi waka walya wawehendesanyi nao wookia Galilaya, wakaosha-osha, wakawona opanga lulya, na mbihu foke chando fuleṟiko. 56 Wawuya-pfo, wakacha iṟeheṟa mdi ya opfamo hamu na mafuda hemshia. Mkonu fulya fo Sabato wakatsinda wakutsiiye chando kiweei kiwawase.
Yesu aṟuka
(Mat 28:1-10; Mar 16:1-18; Yoh 20:1-12)
دیاریکراوەکانی ئێستا:
LUKA 23: KIM2
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Kimochi Bible © Bible Society of Tanzania, 2016.