LUKA 14
14
1Kyasia kaida na mba ya mnene umu o Wafarisayo ili lya mkonu fo sabato nalye-pfo shelya; nawo wakambikia ndeheka. 2Napfo nyi kuwekeri-pfo mndu aluo, aambi mṟinga, ai alya sumuhana na oshangu loke. 3Yesu kawesa walanyi walya wa wuwawaso na Wafarisayo walya kawawia, “Kuipfo mti kochiṟa mkonu fo sabato ang'u ote?” 4Nawo wakatsia do. Nao kambada, kamchiṟa, kamsama. 5 Kawawesa, “Nyiiu onu pung'a yake ang'u nzoi yake ikaoloka ṟungunyi lya mṟinga, nade alaidosa-pfo oweṟe kudi ili kui mkonu fo sabato?” 6Nawo walaidime imhaluo ma-nta.
Ilekiya na ikunyiiṟa
7Kyasia kawia walya wa-walahe ifanano, kipfa alewona chando walesambuṟa shidembo sha kusonguo, kawawia. 8 “Kowona olaho nyi mndu walinyi, manya kuladamie kidembo kya kusonguo, kipfa nyi kochiwona kochicha mndu amlahe awode kiṟumi kota iyo. 9Na ulya amlahie mu-wawi nache nakuwie, Kesehia ichu; na iyo nyi ochiwooka iwado nyi rihima ili ochiwada kidembo kya numa ya wose. 10Kyaindi kolaho, damia kidembo kya numa; kundu ulya akulahie ili echicha nakuwie, mbuya, tikira alya huye. Nlyondo ochiṟumisho nyi walya wadamie na iyo shelyenyi wose. 11 Chakipfa orio mokudosa amonyi nyi echisotso, na mokusotsa nyi echidoso.” 12Kyasia kawuya iwia na ulya awemlahie, “Kowona osungusia choonga ya kyahuo ang'u ya kilaayo, manya kulalahie mbuya tsapfo ma wana wa mayo ma wodoo ma wamṟasa wasuṟi, wawone wechikulahia-se iyo kiwe matalana. 13Indi kosungusia choonga ya mpfuho, lahia wakiwa na shileta na weriteka na shipfupfuṟe. 14Na iyo, nanga iyo; kipfa wo walawode kekutaa. Kipfa kitaayonyi kyapfo nyi alya maṟutsyonyi ha wecha wasumuhanyi.”
Mfanano fo mfuho fung'anyi
(Mat 22:1-10)
15Kyasia umu o walya wadamie nao shelyenyi aicho ado kambia, “Wungusu ichu ekaa nakuliie choonga ipfo wumanginyi wo Ruwa.” 16Na Yesu kambia, “Mndu umu alesungusia kilaayo king'anyi, kalaha wandu wafoi. 17Kyasia, kiheri kya kilaayo kaduma msoṟo oke nahende-wia walya wawalahe, ‘Kenjonyi, kipfa shose shamewa!’ 18Iwo wose wakawooka yoka mtambo na kamu yekuwuta-ho. Ulya o kuwooka kambia, ‘Nyi njilehuṟa mdemi foko, nyi kinjiwaṟi njihende ifuambuya, ngakuterewa kenjieeka iwuya.’ 19Na o kawi kahamba, ‘Nyi njilehuṟa mbe ikumi, nyi njihenda itsihesha kokooya na tsiichi ikuruo magari, nyi ngakuterewa kenjieeka iwuuya.’ 20Na o kaṟaṟu kahamba, ‘Nyi njiilealika mka, kwi kipfa ikyo, ngaidima ichapfo.’ 21Msoṟo ulya kawuya kaongoya mndumii oke ado. Naalyo menyi kanyi kapfuluko nyashi, kawia msoṟo ulya oke, ‘Kure owinyii faṟa nohende ipfo mtandarenyi na ipfo njienyi tsa mṟi noende wakiwa na shileta na wapfu-meso na wairiteka nowaitse na kunu.’ 22Msoṟo ulya kahamba, ‘Mndumii, kilya ulembawasa kyambutika; indi na kuwode-se mwaanya.’ 23Mndumii ulya kawia-se msoṟo ulya, ‘Kure nohende mtanunyi na mṟasenyi ya kuleshe, uwaitike wache na iya, kundu mba yako iichuo pacha. 24Kipfa nyi ngamuwia; Wasoṟo walya waweei-walahe, ma umu owo, echisonja kelya kyakopfo!’”
Wuhuru wo wuṟundi
(Mat 10:37-38)
25Kyasia mamwingi fo wandu fufoi fukaawishana nao, nao kawaindukia kawawia. 26 “Mndu kacha na koko, alasuo ndee na mae na mka na wana wake na wanawamae wa kyumi na wa kika na mrima foke amonyi, echiidima iwa mloshe okopfo. 27 Orio sa ada alakudika msalapa foke fopfiaho nanjioshe-ng'u inyi, echiidima iwa mloshe okopfo. 28Kipfa nyi mndu ada o konu ili akundi iwika imba ling'anyi, alechidamia, naitale kuwooka, kokooya awewode shelimarisa? 29Kulawone kechiwooka ilisumia, na numa elechiidima ilimarisa, na wose wechiwona wawooke imtaluo. 30Wahambe, ‘Mndu chu nyi alewooka isumia imba, nalakidime ilimarisa.’ 31Ang'u na kuipfo mangi echihenda shidenyi iwinzana na mangi ingi, alechiwooka idamia nadede chila, kokooya na ekaria imsembelia na wasoṟo wake shiku ikumi nawingane na ichu arie wasoṟo shiku makumi hawi? 32Kawona alechimwidima, nyi echimdumia wasu ai kuleshe namterewe wawade ofoṟo. 33Nyi wudo-ng'u na orio umu onu, echiidima iwa mloshe oko, alawooka ikuletsana na shilya awodepfo.”
Chumwi ilawode mlodo
(Mat 5:13; Mar 9:50)
34“Chumwi nyi injicha, kyaindi kombona yamepuo nyiki kechiwiko-pfo ichie-se? 35Ma yeewa-se iwiko mdemenyi ma kyalenyipfo, shile nyi ikumba ipfo nja wandu wachume-chume. Ichu awode madu heicho naicho.”
Mfanano fo ichondi lidekye
(Mat 18:12-14)
دیاریکراوەکانی ئێستا:
LUKA 14: KIM2
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Kimochi Bible © Bible Society of Tanzania, 2016.