LUKA 12
12
1 Kiheri nakyo kukakuwumbia-ho mamwingi fo wandu shiku na shiku itane wachumana-chumana, nao kawooka ideda na wasu wake kuwooka kahamba, “Kuṟisenyi mso fotarang'asha fo Wafarisayo, nyifo wulembetseṟi. 2 Ma kuipfo kindo kii kiwoshie kilechishikuo ma kiṟike kilechimanyika numapfo. 3Kyasia-ng'u, orio shindo shose muhambie memenyi nyi shechikaa shiichio senyi; na orio kindo muwewedie madunyi ipfo mba kimolya, nyi kekaa kihambio ipfo mbehu.”
Msa awaṟi iowoyo
(Mat 10:28-31)
4“Kyaindi nyi ngamuwia nyo wakunde wako, mulawone mochiowuo iwo wewaha mbihu, wakammaa walaidime iwuta kya ngosera. 5Kyaindi njimloṟe sa mochimwowuo; owuonyii ulya echiidima iwaha, numa awewode-se pfinya yemkumba kulya modonyi, Ee, ichu nyiio ngamuwia; muowuonyii! 6Alae chi wekekumba njoṟiu tsitanu wuhuru wo senti tsiwi? Indi manya lumu-ho luhadimikie ko Ruwapfo. 7Kyaindi nyo ma njiui tsa ipfo mdonyi konu na tsinjitale tsose. Mulaowuo, nyo nyi muidie shilehe shifoi kui wucha!”
Ikana na iṟingishiya Kristo
(Mat 10:32-33; 12:32; 10:19-20)
8“Orio monjiṟingishia oshangunyi lo wandu, na Mana o mndu nyi echikaa namṟingishie oshangunyi lo wamalaika wa Ruwa. 9Kyaindi ichu monjikana wandunyi, nyi echikaa nakano alya sumuhana na wamalaika wa Ruwa. 10 Na orio sa echihamba idedo lyesutsa Mana o mndu nyi echihooṟio manyalepfo. 11 Nanyo, ili wechimuduo masinagogenyi na ko wachili na ko waitoṟi ma mulakuwinyishe ikusaṟa chando mochihaluo ang'u kindo mochikuashuo nakyo ang'u chando mochihamba. 12Cha kipfa Mumuyo Mwele nyio echimlosha saa iya tichi kindo kiwaṟi ihambo.”
Mfano fo msuṟi alamṟango
13Kyasia, mndu umu o kulya mamwinginyi kambia, “Mlosha Mwaria, njikanyia iwia manowama luhawane kyooṟa kyadu.” 14Nao kambia, “Nyiu anjiwikie njidumbuo mondu yanu ang'u mhawi mohawa shooṟa?” 15Nao kawawia, “Ambuyenyi, mukuṟise lango tsa shindo ma tsida ma tsida, cha kipfa mfeeṟa fo mndu fochiidima imnenga natawulye moo na shindo-sho awodepfo.” 16Kyasia kawawia ifanano kahamba, “Kuwekeri-pfo mndu msuṟi, madema hake hakaende mnu shelya. 17Nao kakusaṟa-saṟa mrimenyi kahamba, ‘Nyi wuda njiechiwika, ili ndawode kundu njesambuya shelya sako?’ 18Kahamba, ‘Nyi wudi njiechiwika; nyi njechisanja shikumbi shako njiwike shing'anyie ishi; nyipfondo njiesanyia isho shicheye shose na nzohoṟa tsako. 19Numa njiwie mrima foko; iyo mrima foko nyi uwode shindo sha kisa shifoi shishikie maka ifoi; onyonya-ng'u, nokuliie na ikunyooya na ikeseka nokukesekie.’ 20Kyaindi Ruwa kambia, ‘Iyo nyi tondo, kio-ki nyi wechicha ishiha moo fopfo wafuduo, aka isho uteseheṟie nyi shechiwa sha-u?’ 21Nyi wudo kyechiwutikia ichu mokusanyia shindo indi alasuṟie ko Ruwa.”
Ikusiria Ruwa
(Mat 6:25-34)
22Kawia na walya wa kiloshionyi kyake, “Kwi kipfa-kyo nyi ngamuwia; Ma mulakusaṟe wukiwa wo kindo ketawulia moo ang'u kindo mochiṟaa ipfo mbihu yanu. 23Kipfa moo nyi fung'anyie shelya, na mbihu fukaweng'anya maṟao. 24Keambuyenyi-wo makuru, hekewaaya ma isambuopfo, na Ruwa nyi ekehalisa hakaihuda pacha, a nyio chi mung'anyiie malehe-ho kui wuhuru! 25A wukoho wonu nyiu onu echiidima yengeṟia-ho ma kyoweṟe kimu ma cha dambo ma ili akusaṟa-saṟa? 26Kyasia kokooya mlekeidima ma kindo kitung'tu kido, nyiki ili mokesaṟa wukiwa wo isho shingi? 27 Kuloshienyi ipfo shiwaṟonyi sha mademenyi, chando shilekekapa ndusu manyia yoka; indi nyi ngamuwia; manya Solomon ipfo wusuṟinyi woke wose, awei mṟike nguwo cha kimu kyashopfo. 28Aka, kokooya Ruwa nyi wudo ekeṟika maṟa-ho ha mapatenyi hechikaa-ho inu, na ngama hakakumbo mawiwenyi, a chi ngoseṟa echimuṟika nyo muidikie kitutu?”
29“Nanyo mamlatambahanyie kindo mochilya na kido mochinyo, ma mrima yanu ilaṟahisho nyisho. (30Cha kipfa isho nyisho wandu wa mbaṟi njihenu wa kunu wuyana weketambahanyia wose.) Kyaindi Ndeyanu na amuichi, kamanya ke shindo-sho nyi shimuwaṟi. 31Kyaindi lalakienyi wumangi woke; na isho shingi nyi cha sha ngawo.”
Wusuṟi wo Ruwehu
(Mat 6:19-21)
32“Ma mlawone mochiowuo nyo poo itutu; kipfa nyi kilechihia Ndeyanu imuinengia-nyio wumangi-wu. 33Kumbenyi nzohoṟa tsanu muwone shesaṟia wakiwa. Kesungusienyi na shikuchu shilechikuo sheṟika kisa kilechisia ipfo ruwehu, nyiho handu kulechisembelio nyi manyinyi ma ilio nyi kase. 34Chakipfa ipfondo kisa kyanu kikeri, nyipfondo na mrima yanu yechikaa.”
Waṟundi wecha
35 “Kaenyi-ng'u mukupfungie shitsi, na taa tsanu tsiweaka. 36 Nanyo muwenyi muwe cha wandu waiwedia mndumii owo nawuye walinyi, kundu ili echicha, kakapa mongo, waweṟuhuo faṟa. 37Nanga wasoṟo walya mndumii owo echiwakooya walee dembo ili echicha; nkya lohi ngamuwia; nyi echikupfunga na iwadamiṟa shelyenyi, natengete kechiwahidia iwainenga shelya. 38Kokoya acha isumuka lya kawi ang'u lya kaṟaṟu kawakooya wai wado, nanga wasoṟo-wo. 39 Manyenyi iki; kokooya menyi mba aweichi kiheri mwiwi echicha, nyi awechilaa dembo, ma awechilekia mba yake ifunjopfo. 40Nanyo kaenyi mukuṟeheṟie, kipfa Mana o mndu nyi echicha saa mulakuṟeheṟie.”
Mṟundi mhendelyi na alai mhendelyi
(Mat 24:45-51)
41Petro kambia, “Mndumii ifanano-li nyi oluwia so lu-wenyi tupu, a ngesa na wandu wengi wose?” 42Mndumii kahamba, “A nyiu ichu mokalia kanyi awei mwidiki mṟango, mndumii oke awemhaluye mnene o waṟundi wake, nawe mowahawia kando ili kiheri kyashika? 43Nanga msoṟo ulya mndumii oke kacha kamkooya kewuta ado! 44Nyi kya lohi ngamuwia, Nyi echimbika mwiṟichi o nzohoṟa tsake tsose. 45Kyaindi msoṟo ulya kawuya ikusaṟa ipfo mrimenyi foke, mndumii oko nyi akeleo icha, kawooka ikapa wodoe wa kyumi na wa kika, na ilya na inyo na inango. 46Ilindi mndumii oke echicha mkonu alakusirie, saa alaichi, nyi echimkapa ilyi iwicho na imsamza na wadeko. 47Na msoṟo aichi shindo mndumii oke akundi, nalateseheṟe, ma nalawute kisumhanyi chando mndumii oke akundi, o nyi echikapo maṟiinga hafoi. 48Na ichu alaweichi, kawuta sa shechimwendie ikapo, o nyiechikapo kyake kitutu. Orio amnenge shifoi, koke nyi shechiweso shifoi, ma ichu amwaṟie shifoi mnu, nyi wechimbesa sha ngoseṟa.”
Yesu nyi ai moletsana
(Mat 10:34-36)
49“Nyi njilecha ikumba modo wuyana, fukamekekuakia, nki njikundi-se? 50 Kyaindi njiwode wupatiso woko njipatiso nawo, na chando wunjikoṟoma, na mtano wumarisike. 51A nyi muhiye nyi njicheye yende ofoṟo wuyana? Nyi ngamuwia, Ote, indi nyi mpaṟakano. 52Kipfa kimatsika wulalu, wandu watanu wai mba imu nyi walekanyi kui waṟaṟu nyi kui wawi, waṟaṟu waloyane na wawi na wawi waloyane na waṟaṟu. 53 Nyi wechiloyana ndeye na mana o nguwo yake, na mana na nde, mae na mana oke o kika, na mana o kika na mae, mamii na mali o mana.”
Imanya maheri
(Mat 16:2-3)
54Kawewia na mamwingi fulya fo wandu, “Mkawona ipuchi liiu lido kulya kishingonyi, nyi mokehamba owinyi, mvuo nyi icha ii. Kyaindi nakyo na wudo. 55Kukawiwita otanu locha kulya nuka nyi mokehamba nyi kochiwaa, kikawewa kido. 56Nyo makulembetseṟe, ate fana ya ruwehu na ya oruka nyi mocheedima iitambahaluo; na nki ili mulaidima itambahaluo shiherishi sha wulalu?”
Idikiana na mkituwa opfo
(Mat 5:25-26)
57“A nyiki ili nyo muwenyi mlekechilia kindo kisumhanyi? 58Kipfa ili murianyi na mokituwa mohenda ikukumba ko mchili, kiheri mui njienyi, kambiṟa imnenga woṟunda woke, kundu mulekane nao, nalawone kekuduo wokukuruo itane ko mangi, na mangi-chu nalakudambikie msoṟo mokusaṟikia, na mosaṟikiacho nakuwike kipfungonyi. 59Nyi ngakuwia, ochikiwuka-pfopfo, na utane omaa itaa piu, kulechitsihaa ma senti imu.”
Dumbuyenyi wunyamaṟi ang'u mochipfa
دیاریکراوەکانی ئێستا:
LUKA 12: KIM2
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Kimochi Bible © Bible Society of Tanzania, 2016.