Mateu 7
7
Yesu mwavuluka kupezalisa kupwa chavakwenu
(Luka 7:37-38, 41-42)
1 Kanda muwanyinanga vakwenu milongako, kuchina nayenu nawa navakamiwanyina milonga.
2Mwomwo seteko mwéji kupezalishilangamo, yikiko návakamipezalishila. Kaha chesekelo mwéji kwesekelanga vakwenu, chikiko navakamyesekelaho.
3Unamono ngachilihi kachiswaswa kali haliso lyandumbwove, oloze mwalachi uli haliso lyove kawauhaka muchimako?
4Kaha ngachilihi nawamba ndumbwove ngwove, Ngwitavise ngukufumise kachiswaswa kali haliso lyove, shimbunyi haliso lyove hali mwalachi?
5Ove muka-kulyongela kwoloka, vangila kufumisa mwalachi uli haliso lyove, numbanyi uhase kumona kanawa, ufumise kachiswaswa haliso lyandumbwove.
6Ocho chajila kanda mukachihana vatuwako, chipwe jipela#7:6 Pela yapwa usanga wandando yayinene chikuma. Vajiwana muvambanga-mbanga vamukalungalwiji. jenu nawa kanda mukajimbilila vanguluko, kuchina navajilyatangila nakumyalumukila nakumitanya.
Lombenu, tondenu nakungongomweza
(Luka 11:9-13)
7 Lombenunga, kaha navamihana. Tonda-tondenunga, kaha namuwana; ngongomwezenunga, kaha navamisokolwelako.
8Mwomwo weshowo eji kulombanga eji kutambulanga, kaha ou eji kutonda-tondanga eji kuwananga, kaha ou eji kungongomwezanga navamusokolwelako.
9Mutu muka muli enu, nge mwanenyi mwamulomba mbolo, ikiye mwamuhana lilolwa?
10Chipwe nge mwamulomba ishi, kaha ikiye mwamuhana linoka?
11Nge enu vavapi mwatachikiza mwakuhanyina vana venu mawana amwenemwene, Senu ali mwilu mwahambakananyi chikuma kuhana vyamwenemwene ava veji kumulombanga!
12 Shikaho mweshomwo mwasáka ngwenu vakwenu vamilingilemo, lingenu mwomumwe kuli vakiko. Mwomwo mukiko mwaya jishimbi namazu avapolofweto.
Chikolo chachindende
(Luka 13:24)
13 Ingililenu kuchikolo chakulipalakanya, mwomwo chikolo chachinene, najila yakutanduuka yatwala kukunonga, kaha vaze veji kwingililangako vavavulu.
14Mwomwo chikolo chakulipalakanya, najila nawa yayikalu, yatwala kumwono, kaha ava navayiwana vavandende.
Mutondo navautachikijila kumihako yawo
(Luka 6:43-44)
15 Zangamenu navaka-kulyongela upolofweto, ava naveza kuli enu vanalifwanyisa#7:15 MuchiHelase vamba ngwavo, naveza kuli enu vanavwale uvwalo wamikoko. Mazu awa alumbunuka ngwavo vanalifwanyisa nge mikoko. nge mikoko, oloze mumichima yavo vapwa tungunge vaka-kutanya.
16 Kumihako yavo kukiko namuvatachikijila. Mihako yavinyo vayihela kumingonga numba? Chipwe jikuyu vajihela kumituvapoko numba?
17Ngocho, mutondo himutondo wamwaza wema mihako yamwaza, oloze mutondo waupi wema mihako yayipi.
18Mutondo wamwaza kaweshi kuhasa kwima mihako yayipiko, chipwe mutondo waupi kaweshi kuhasa kwima mihako yamwazako.
19 Mutondo himutondo wazeneka kwima mihako yamwaza veji kuutetangamo nakuumbila mukakahya.
20Shikaho kumihako yavo kukiko namuvatachikijila.
Yesu ngwenyi, Kangwamitachikizako
(Luka 13:25-27)
21 Keshi nge vosena navangwamba ngwavo, Ove Mwata, ove Mwata, vakiko navakengila muwangana wamwiluko, kuvanga ou kaha éji kulinganga mwaya muchima waTata átwama mwilu.
22 Halikumbi lize, vavavulu navakangwamba ngwavo, Ove Mwata, ove Mwata, katwapolofwetele mulijina lyoveko? Katwalowele vandemone mulijina lyoveko? Katwalingilile vilinga vyangolo mulijina lyoveko?
23 Kaha haze vene nangukavamba hatoma ngwami, Kanda lyehi ngumitachikizengaho, Fumenu kuli Ami, enu vaka-kulinga vyaupapwoki.
Muka-kutunga wamangana
(Luka 6:46-49)
24 Shikaho mutu himutu mwevwa awa mazu ami nakuwalinganga, napu nge lunga wamangana átungile zuvo yenyi halilolwa.
25Kaha vula yanokele, livaji lyejile, jipeho jahuhwile nakuliveta hazuvo yize, oloze kayashiukileko, mwomwo chihela chayo vachalile halilolwa.
26Kaha mutu himutu mwevwa awa mazu Ami nakuzeneka kulingangamo, napu nge lunga wakuzeneka mangana átungile zuvo yenyi hausekeseke.
27Kaha vula yanokele, livaji lyejile, jipeho jahuhwile nakuliveta haze hazuvo, kaha yashiukile nakulyenyeka chikuma.
Wata waYesu
28Kaha omu Yesu akumishile kuhanjika mazu awa, aze mazavu alikomokelele kunangula chenyi.
29Mwomwo avanangwilenga mwamuka-wata, keshi nge muze mwavaka-kusoneka javoko.
دیاریکراوەکانی ئێستا:
Mateu 7: LUE
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Bible Society of Zambia